Korinito, Eleni i Saute, o le Malaefono ma le Laumua Faalepulega, ata vali na saunia e Balage Balogh

19–25 Aokuso

1 Korinito 1–7

“Ia Maopoopo Lava”

O le a fesoasoani le Agaga Paia ia te oe ia iloa ai pe o a mataupu faavae o i le 1 Korinito 1–7 o le a fesoasoani i tamaiti o loo e faiaoga ai. A e faitau ma le lototatalo i nei mataupu, tusifaamaumau ia mafaufauga ma lagona e oo atu ia te oe mai le Agaga.

Tusifaamaumau Ou Lagona Uunai

Valaaulia le Fefaasoaai

I ni nai aso a o lei oo i le vasega, valaaulia se tasi pe sili atu foi o tamaiti e sue se fuaiupu i le 1 Korinito 1–7 e mafai ona latou faasoa atu i le vasega. E mafai ona e valaaulia o latou matua e fesoasoani pe afai e tatau ai.

Aoao atu Aoaoga Faavae

Tamaiti Laiti Ifo

1 Korinito 2:11–14

E aoao mai e le Agaga Paia ia te au upumoni o le talalelei.

O se tasi o matafaioi a le Agaga Paia o le aoao mai ia i tatou o upumoni. O a aafiaga e mafai ona e faasoa atu i tamaiti e fesoasoani ai ia latou malamalama i lenei mea?

Gaoioiga e Mafai Ona Fai

• Faaali atu ni mea faitino po o ni ata e faatusa i auala tatou te aoao ai e uiga i le lalolagi (pei o se a’oga, api, po o se telefoni feaveai). O le a se mea e mafai ona tatou aoaoina mai pe a tatou faaaogaina nei mea? Faamalamalama atu o le 1 Korinito 2:11, 14, o loo aoao mai ai e Paulo e mafai ona tatou aoao e uiga i le Atua e ala mai i le na o le Agaga o le Atua, lea o loo i ai i le Agaga Paia. O a ni mea e mafai ona tatou fai e aoao ai “i mea a le Atua”?

• Pati ou lima a o e ta’uina silapela taitasi i le fuaiupu “E aoao mai e le Agaga Paia ia i tatou upumoni.” Fai i tamaiti e pati o latou lima ma toe fai mai le fasifuaitau. Faasoa atu i tamaiti se aafiaga i se taimi na fesoasoani ai le Agaga Paia ia te oe ia iloa e moni se mea.

• Usu faatasi se pese e uiga i le Agaga Paia, e pei o le “O Le Agaga Paia” (Tusipese a Tamaiti 56). Fesoasoani i tamaiti e sue upu ma fasifuaitau i le pese o loo a’oa’o mai ai le ala e talanoa mai ai le Agaga Paia ia i tatou ma pe o a foi mea Na te aoao mai ia i tatou.

1 Korinito 3:10–11

O Iesu Keriso o lo’u faavae.

O loo faataatitia e tamaiti se faavae mo a latou molimau, ma e mafai ona e fesoasoani ia i latou e fausia se faavae mautu i luga o Iesu Keriso.

Gaoioiga e Mafai Ona Fai

• Faitau le 1 Korinito 3:11 i tamaiti, ma faamalamalama atu o Iesu Keriso lo tatou faavae. Faaali i tamaiti ni ata o mea e mafai ona i ai a tatou molimau, e aofia ai se ata o Iesu Keriso. Fesoasoani ia i latou e faatulaga ia ata ina ia pito i lalo le ata o Iesu, e pei o se faavae, ma o isi ata e “fausia” i luga o se molimau ia te Ia.

• Fatufatu ni taga mo le pese “Tagata Poto ma le Tagata Valea” (Tusipese a Tamaiti, 132), ma usu faatasi ma tamaiti le pese. Tuu atu ia tofu le tamaitiiti ma se maa o tusi ai le “O Iesu Keriso o lo’u faavae.” Tuu i tamaiti e o ma ave a latou maa i le fale e faamanatu ai ia i latou mea sa latou aoaoina.

• Faasoa atu ata o loo faamatalaina ai nisi o tala e te fiafia i ai mai le soifuaga o le Faaola, ma fai i tamaiti e faamatala atu ia te oe mea o loo tutupu i ata. Tuu atu latou te faasoa maia tala latou te fiafia i ai e uiga ia Iesu. Tuu atu lau molimau o Iesu Keriso o le faavae o lou faatuatua.

1 Korinito 6:19

O lo’u tino ua faapei o se malumalu.

E mafai faapefea ona e fesoasoani i tamaiti ia talisapaia o latou tino o ni meaalofa mai le Atua ma maua se manaoga sili atu e tausia lelei?

Gaoioiga e Mafai Ona Fai

• Faaali i tamaiti ni ata o malumalu (tagai otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga), ma faitau upu nei mai le 1 Korinito 6:19: “O lo outou tino o le malumalu lea ole Agaga Paia.” Fesoasoani ia malamalama tamaiti e finagalo le Tama Faalelagi ia tatou tausia o tatou tino ia mama ma paia, e faapei o se malumalu.

• Faaali se ata o se tamaitiiti, ma tuu faataamilo ai ata o mea e lelei mo o tatou tino ma mea foi e leaga. Valaaulia ia tamaiti e feauaua’i i le faailoa mai o mea lelei ma aveese ia mea leaga.

• Usu faatasi se pese e uiga i tino, e pei o le “Ulu, Tauau, Tuli ma Tamaivae” (Tusipese a Tamaiti, 129), ma fesili i tamaiti pe aisea e faafetai ai mo o latou tino.

Aoao atu Aoaoga Faavae

Tamaiti Matutua Atu

1 Korinito 1:23–25

E sili atu le poto o le Atua nai lo le tagata, ma ou te faaalia le poto moni pe a ou talitonu i Ana aoaoga.

O le a iloa e tamaiti o loo e faiaoga ai–pe afai latou te lei iloaina–o nisi o tagata latou te aoao atu mea e fete’ena’i ma le poto o le Atua. O le suesueina o le 1 Korinito 1:23–25 e mafai ona fesoasoani i tamaiti e malamalama ai e sili atu le poto o le Atua nai lo le tagata.

Gaoioiga e Mafai Ona Fai

• Faitau faatasi le 1 Korinito 1:23–25 ma fesoasoani i tamaiti e sue ia upu o le poto ma le valea. Faamalamalama atu e toatele tagata na manatu e valea aoaoga a Paulo, ae sa faamalamalama atu e Paulo e faapea o le talitonu i le talalelei a Keriso o le poto moni ia. Aisea e poto ai le talitonu i mea ua aoao mai e le Atua?

• Fesoasoani i tamaiti e faatino mai taga o le auala e mafai ona latou tali atu ai i tagata o e mafaufau e “valea” ia aoaoga o le Ekalesia–aoaoga e pei o le talitonu i le Faaola, tausia o le Upu o le Poto, po o le usitai ile tulafono o le sefuluai. Mo se faataitaiga, e mafai ona latou molimau atu i faamanuiaga e maua mai le ola ai i nei aoaoga.

• Faasoa atu se aafiaga i se taimi na manatu ai isi e valea ou talitonuga, pe faasoa atu se faataitaiga mai tusitusiga paia. Mata e mafai e tamaiti ona faasoa mai ni aafiaga faapena? E mafai faapefea e le 1 Korinito 1:25 ona fesoasoani ia tumau lo tatou faamaoni pe a ta’uvaleina e isi o tatou talitonuga?

1 Korinito 2:11--14

E aoao mai e le Agaga Paia ia te a’u upumoni o le talalelei.

E mafai faapefea ona e fesoasoani i tamaiti ia iloa latou te manaomia le Agaga Paia ia malamalama ai “i mea a le Atua”?

Gaoioiga e Mafai Ona Fai

• Fai se lisi o auala tatou te aoao ai e uiga i le lalolagi–mo se faataitaiga, tusi, a’oga, ma le initoneti. Ona faitau faatasi lea ole 1 Korinito2:11–14. O a mea o aoao mai e nei fuaiupu e uiga i le ala tatou te aoao ai “i mea a le Atua”?

• Valaaulia ia tamaiti e faamatala mai se taimi na latou lagonaina ai uunaiga ale Agaga Paia, lea foi e faaigoaina “o le Agaga o le Atua” (1 Korinito 2:11–14). O na taimi e mafai ona aofia ai le taimi sa latou i ai i le lotu, tatalo, pe faitauina foi tusitusiga paia. Fesoasoani ia latou malamalama faapea o le Agaga Paia sa aoao atu ia i latou upumoni, e pei ona sa faamatalaina ai e Paulo.

• Valaaulia tamaiti taitasi e faitau se tasi o nei mau: 1 Korinito 2:11–14; 1 Nifae 10:17; Moronae 10:3–5; ma le Mataupu Faavae ma Feagaiga 8:2–3. Fai i tamaiti e faasoa mai mea sa latou aoaoina mai nei mau e uiga i le ala e aoao mai ai i tatou e le Agaga Paia. Fautuaina i latou e tusi nei mau i autafa o a latou tusitusiga paia.

1 Korinito 6:19–20

E tatau ona ou faia lo’u tino ma le faaaloalo ma tausia ia paia.

O le malamalama o o tatou tino o meaalofa mai le Tama Faalelagi o le a fesoasoani i tamaiti e tausia le paia o o latou tino, e oo lava pe a faaosoosoina ai i latou.

Gaoioiga e Mafai Ona Fai

• Aumai se meaalofa ua afifi o i ai i totonu ata o se tamaitiiti ma se malumalu. Valaaulia ia tamaiti e faitau le 1 Korinito 6:19–20 ma mate mai po o a mea o i le meaalofa. Tuu atu latou te tatalaina le meaalofa ma talanoaina pe faapefea ona pei o tatou tino o malumalu.

• Talanoa ma tamaiti e uiga i le ala e tatau ona latou taulima ai se malumalu. Afai o o tatou tino ua pei o malumalu, e faapefea ona tatou faia o tatou tino? O le usuina po o le faitauina o upu i se pese e uiga i malumalu, e pei o le “Ia Tuu Mai E Le Alii Se Malumalu” (Tusipese a Tamaiti, 73), e mafai ona fesoaosani e tali ai le fesili lea. Pe a tatou faia ni mea sese, e mafai faapefea ona tatou toe faamamaina o tatou “malumalu”?

• Faitau faatasi le vaega ua faaautu “Soifua Maloloina Faaletino ma Faalelagona” ile Mo Le Malosi o le Autalavou (2011, 25–27). Valaaulia ia tamaiti e lisi i le laupapa ia fautuaga latou te maua e uiga i le auala e tausia ai o tatou tino.

Fautuaina le Aoaoina i le Aiga

Valaaulia ia tamaiti e fasoa atu i o latou aiga se pese sa latou usuina i le vasega ma mea sa latou aoaoina mai ai.

Faaleleia o Lo Tatou Aoao Atu

Molimau atu e uiga ia Iesu Keriso. O se tasi o mea e sili ona taua e mafai ona e faia o se faiaoga o le molimau atu lea e uiga ia Iesu Keriso. O le a fesoasoani lea i tamaiti e faamalolosia ai a latou molimau ma lagonaina ai le alofa o le Faaola mo i latou.