Korinito, Eleni i Saute, o le Nofoaga Autu o le Forum ma le Civic, atavali na saunia e Balage Balogh

19–25 Aokuso

1 Korinito 1–7

“Ia Maopoopo Lava”

Tusifaamaumau ou lagona ao e faitau i le 1 Korinito 1–7. O nei lagona e mafai ona aofia ai uunaiga ia suesue atili i se manatu, ia faasoa atu i isi se mea ua e aoaoina, po o le ia faia ni suiga i lou olaga.

Tusifaamaumau Lagona e Uunaia ai Oe

I masina sa faaalu e Paulo i Korinito, “e toatele foi tagata Korinito o e na faalogo [ia te ia] ua faatuatua i latou ma ua papatisoina” (Galuega 18:8). O lea la, atonu sa nutimomoia le loto o Paulo i le faalogo atu, i na o ni nai tausaga mulimuli ane, ua i ai “misa” ma “maseiga” i le Au Paia i Korinito ma o lona lei i ai, sa amata ai ona latou faalogo ma usitai atu i le “poto o lenei lalolagi” (1 Korinito 1:10–11, 20). I le tali atu, sa tusia ai e Paulo le tusi lea ua tatou ta’ua nei o le 1 Korinito. Ua tumu i aoaoga faavae loloto, ae i le taimi lava foi lea, e foliga mai sa le fiafia Paulo ona sa lei saunia le Au Paia e maua aoaoga faavae uma sa manao e tuu atu ia i latou. O lana auega, “O au foi, le au uso e, na ou le mafaia ona tautala atu ia te outou faapei o e faaleagaga, ... aua ina o i ai ia te outou le mataua” (1 Korinito 3:1–3). A o tatou sauni e faitau upu a Paulo, atonu e aoga le suesue o o tatou lava saunia e maua upumoni—e aofia ai lo tatou naunau e faalogo ma usitai i le Agaga ma taumafai mo le tasi i totonu o o tatou aiga, faapea ma o tatou uso a Au Paia, faatasi ma le Atua.

Manatu mo Suesuega Faaletagata Lava Ia o Tusitusiga Paia

1 Korinito 1:10–17; 3:1–11

Ua autasi tagata o le Ekalesia a Keriso.

Tatou te le iloa uma faamatalaga auiliili o le leai o se lotogatasi i le Au Paia i Korinito, ae ua tatou iloa e uiga i le leai o se lotogatasi i totonu o a tatou lava mafutaga. Mafaufau i se mafutaga i lou olaga e mafai ona faamanuiaina mai le faateleina o le lotogatasi; ona vaai lea po o le a le mea na aoao mai e Paulo i le 1 Korinito 1:10–17; 3:1–11 e uiga i le leai o se tasi i totonu o le Au Paia i Korinito. O a ni malamalamaaga loloto ma manino ua e maua e faatatau i le auala e atinae ai le lotogatasi faateleina ma isi?

Tagai foi Mosaea 18:21; 4 Nifae 1:15–17; Mataupu Faavae ma Feagaiga 38:23–27; 105:1–5; “Lotogatasi,” Gospel Topics, topics.lds.org.

1 Korinito 1:17–31; 2

Ina ia ausia le galuega a le Atua, ou te manaomia le poto o le Atua.

E ui e lelei—ma uunaia ina foi—e saili le poto i soo se mea tatou te maua ai (tagai 2 Nifae 9:29; MFF 88:118), ae sa tuuina atu e Paulo se lapataiga malosi e uiga i faaletonu o le poto o le tagata, lea sa ia taua o le “poto o lenei lalolagi.” A o e faitau i le 1 Korinito 1:17–25, mafaufau loloto po o le a le uiga o lenei fasifuaitau. O le a sou manatu o le a le uiga o le tala a Paulo o le “poto o le Atua”? Aisea tatou te manaomia ai le poto o le Atua e faataunuu ai le galuega a le Atua?

I au taumafaiga e faataunuu ou tiutetauave i le ausiaina o le galuega a le Atua, pe na i ai se taimi sa e lagonaina ai le “matau, ma le … gatete tele” lea sa lagona e Paulo i le taimi sa ia aoao atu ai i le Au Paia i Korinito? (1 Korinito 2:3). O le a se mea e te maua i fuaiupu 1–5 e tuuina atu ai ia te oe le lototele? Mafaufau i auala e mafai ona e faaalia ai e sili atu lou faatuatuaina o le “mana o le Atua” nai lo le “poto o tagata o le lalolagi.”

Tagai foi Mataupu Faavae ma Feagaiga 1:17–28.

1 Korinito 2:9–16

Ou te manaomia le Agaga Paia ina ia mafai ona ou malamalama i mea a le Atua.

Afai e te fia aoao atili i se mea e pei o le enisinia o taavaleafi po o le tusiata o fauga o fale o le Vaitau Ogatotonu, e faapefea ona e faia? E tusa ai ma le 1 Korinito 2:9–16, e faapefea ona ese le aoaoina o “mea a le Atua” mai le aoaoina o “mea a le tagata”? Aisea e tatau ai ona tatou maua le Agaga Paia ina ia mafai ona malamalama i mea a le Atua? A uma ona faitau nei fuaiupu, o le a se mea e te manatu e tatau ona e faia ia malamalama atoatoa ai i mea faaleagaga? E mafai faapefea ona fesoasoani upu a Paulo i se tasi o loo tauivi ma lana molimau?

1 Korinito 6:13–20

E paia lo’u tino.

Sa manatu le toatele o tagata i Korinito sa taliaina le le mama i feusuaiga ma o o latou tino sa faia lava mo le tuinanau. I nisi faaupuga, sa le ese Korinito mai le lalolagi i aso nei. O le a le mea na aoao mai e Paulo i le 1 Korinito 6:13–20 lea e mafai ona fesoasoani e te faamalamalama atu ai i isi le pogai ua e manao ai e ola i se olaga mama?

Atonu foi e manaia le vaai pe na faapefea ona uunaia e Sister Wendy W. Nelson, e pei o Paulo, le Au Paia ina ia mama, i lana lauga“Love and Marriage” (Faigalotu i le Lalolagi Atoa mo le Autalavou Matutua, Ian. 8, 2017, broadcasts.lds.org). E faapefea ona ese upumoni e uiga i le alofa ma le militino lea na faamatalina e Sister Nelson mai savali a le lalolagi?

Tagai foi Roma 1:24–27; “Legavia,” Gospel Topics, topics.lds.org.

1 Korinito 7:29–33

Pe na aoao mai Paulo e lelei atu le le faaipoipoina i le faaipoipoina?

E foliga o loo fautua mai e nisi o fuaiupu i le 1 Korinito 7 e faapea, e ui i le taliaina o le faaipoipoina, ae e sili atu le nofo toatasi ma le taumamao atoa mai feusuaiga. Ae peitai, o le Faaliliuga Iosefa Samita, 1 Korinito 7:29–33 (tagai faaiuga o le Tusi Paia) e fesoasoani tatou te malamalama ai, sa faasino atu Paulo ia i latou sa valaauina e avea ma faifeautalai faamisiona, sa matauina, sa mafai ona lelei atu la latou auaunaga i le Atua pe afai latou te nonofo toatasi pea i le taimi o a latou misiona. Na aoao mai le Alii e ala i Ana auauna, e aofia ai Paulo, o le faaipoipoga o se vaega o Lana fuafuaga e faavavau ma e manaomia mo le faaeaga1 Korinito 11:11; MFF 131:1–4).

Manatu mo Suesuega Faaleaiga o Tusitusiga Paia ma Afiafi Faaleaiga

A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai fautuaga nei:

1 Korinito 1:10–17; 3:1–11

A o faitau e tagata o lou aiga nei fuaiupu, valaaulia i latou e sue se aoaoga loloto ma manino e mafai ona fesoasoani ia latou atili tasi ai.

1 Korinito 3:1–2

Atonu e mafai ona e faitau atua nei fuaiupu ao aai i se vaiaiga o le susu ma aano o manufasi, ma e faatusatusa ai le ala e tutupu ae ai pepe e avea ma tagata matutua i le ala tatou te tutupu ae ai faaleagaga.

1 Korinito 3:4–9

Sa faatusa e Paulo ana taumafaiga faafaifeautalai i le totoina o fatu. O le a se mea o fautua mai e lenei faatusatusaga o le auala e tatau ona tatou faia ai le faasoa atu o le talalelei i isi?

1 Korinito 6:19–20

O le faatusaina o o tatou tino i malumalu, e pei ona sa faia e Paulo, e mafai ona avea o se auala mataalia e aoao atu ai e uiga i le paia o o tatou tino. Atonu e te faaali atua ni ata o malumalu, e pei o ata o loo i ai faatasi ma le otootoga lenei. Aisea ua paia ai malumalu? E faapefea ona pei o tatou tino o malumalu? O a ni mea e mafai ona tatou faia e taulima ai o tatou tino e pei o malumalu? (Tagai foi “Mama i Feusuaiga,” Mo le Malosi o le Autalavou, 35–37.) Afai e mafai, o faatasi i le malumalu pe asiasi i lotoa o le malumalu; o lenei mea e mafai ona faatamaoaiga ai le tou talanoaga e uiga i le paia o le malumalu ma o tatou tino.

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Faaleleia o Suesuega Faaletagata Lava ia

Ia onosai ia te oe lava ia. Sa aoao mai Paulo e faapea, o le susu e muamua i lo o le aano o manufasi a o tatou aoaoina le talalelei (tagai 1 Korinito 3:1–2). Afai e te iloa e faigata ona e malamalama i nisi o aoaoga faavae, ia onosai. Ia talitonu o le a oo mai tali ao e faatuatua ma suesue ma le maelega.

Ua faatusa e Paulo o tatou tino i le paia o le malumalu. Amata mai le agavale pito i luga: Malumalu oi Tijuana Mekisiko, Malumalu o Taipei Taiwan, Malumalu o Tegucigalpa Hondura, Malumalu o Houston Texas.