“29 Iulai–4 Aokuso. Galuega 22–28: ‘O Se Auauna, ma se Molimau’” Sau, Mulimuli Mai ia te Au---Mo Tagata Taitoatasi ma Aiga: Feagaiga Fou 2019 (2019)
“29 Iulai–4 Aokuso. Galuega 22–28,” Sau, Mulimuli Mai ia te Au---Mo Tagata Taitoatasi ma Aiga: 2019
29 Iulai–4 Aokuso
Galuega 22–28
“O Se Auauna, ma se Molimau”
O lagona mai le Agaga Paia e masani ona filemu ma o nisi o taimi e puupuu lava. O le tusifaamaumauina o ou lagona e mafai ai ona e manatunatu loloto atili i ai. A o e faitauina le Galuega 22–28, tusi i lalo manatu ma lagona e oo atu ia te oe ma faaalu se taimi e mafaufau loloto i ai.
Tusifaamaumau Ou Lagona Uunai
“Pe a tatou i ai i le feau a le Alii,” na folafola mai e Peresitene Thomas S. Monson, “ua tatou agavaa i le fesoasoani a le Alii” (“Ia Aoao, Ia Faia, Ia Avea Ai,” Ensign po o le Liahona, Nov. 2008, 62). Ae ui i lea, tatou te le agavaa, i se auala laulelei ma se auvai o faamanuiaga e le gata. Mo se faamaoniga o lenei mea, e le manaomia ona tatou vaai mamao atu nai lo le Aposetolo o Paulo. O lana feau mai le Faaola o le “momoli [o] lo’u igoa i luma o Nuuese, ma tupu, ma le fanauga a Isaraelu” (Galuega 9:15). I le mataupu 22–28 o Galuega, ua tatou vaai ai i le faataunuuga e Paulo o lenei feau ma le feagai ma le tele o le tetee—saisai, faafalepuipui, sauaga faaletino, malaia i folauga, ma faapea foi ona osofaia e gata. Ae ua tatou vaaia ai foi “sa tu [Iesu] ia te ia, ua faapea mai, Paulo e, ina faalototele ia oe” (Galuega 23:11). O aafiaga o Paulo o se faamanatu musuia e faapea, a talia e auauna a le Alii Lana valaau e “o atu e fai nuu uma lava ma soo,” o le a Ia faataunuuina Lana folafolaga ia i latou: “Faauta foi, ou te ia te outou i aso uma lava, e oo lava i le gataaga o le lalolagi” (Mataio 28:19–20).
Manatu mo Suesuega Faaletagata Lava Ia o Tusitusiga Paia
Ua faasoa atu ma le lototoa e soo o Iesu Keriso a latou molimau.
Ina ua momoli atu e Paulo molimau mamana ua tusifaamaumauina i le Galuega 22 ma le 26, sa faapea ona taofia faapagotaina o ia e fitafita Roma. Sa i ai i tagata sa ia tautala atu i ai le mana e faasala ai o ia i le oti. Ae sa filifili o ia e tuu atu ma le lototoa le molimau ia Iesu Keriso ma “le faaaliga mai le lagi” (Galuega 26:19) sa ia mauaina. O le a se mea e musuia ai oe e uiga i ana upu? Mafaufau i avanoa e te maua e faasoa atu ai lau molimau. Mo se faataitaiga, o le a le taimi mulimuli na e tauina atu ai i lou aiga po o isi le auala na e maua ai lau molimau o le talalelei?
Aisea ua i ai ai ni eseesega i le va o tala e tolu o le faaaliga a Paulo e uiga ia Iesu Keriso?
O le tusi o Galuega o loo i ai ni tala se tolu o le faaaliga faavavega a Paulo i le auala i Tamaseko (tagai Galuega 9:3–20; 22:1–21; 26:9–20). O nei tala taitasi e tau eseese teisi mai isi, ma o isi e tele atu faamatalaga auiliili o loo tuuina mai ai nai lo isi. Talu ai o tala sa faamatalaina atu i aofia eseese mo faamoemoega eseese, o lea e fetaui ai, le filifili o Paulo e faamamafa atu vaega eseese o le aafiaga mo aofia taitasi.
Sa faapena foi, ona tusifaamaumauina e Iosefa Samita ni tala o lana Uluai Faaaliga (tagai “First Vision Accounts,” Gospel Topics, topics.lds.org). O faamatalaga eseese sa tuuina atu i aofia eseese mo faamoemoega eseese, ma tuuina atu ai ni malamalamaaga manino ma loloto ia o le a le maua pe afai e nao le tasi se tala e i ai.
Galuega 23:10–11; 27:13–25, 40–44
E tu le Alii ia i latou o e taumafai e auauna atu ia te Ia.
E pei ona faaalia manino mai i le auaunaga a Paulo, o faafitauli i o tatou olaga e le o se faailoga lea o le le fiafia o le Alii i le galuega o tatou faia. O le mea moni, o nisi taimi, o taimi o faafitauli tatou te lagona ai Lana lagolagosua aupito sili ona malosi. Atonu e manaia le toe faamanatu o mea na e faitauina talu ai nei e uiga i le auaunaga a Paulo ma lisi nisi o mea sa ia onosaia (tagai, mo se faataitaiga, Galuega 14:19–20; 16:19–27; 21:31–34; 23:10–11; 27:13–25, 40–44). Sa faapefea ona tu ai le Alii ia te ia, ma o le a se mea ua e aoao mai i lenei mea e uiga i au lava taumafaiga i le galuega a le Alii?
Galuega 24:24–27; 26:1–3, 24–29; 27
E mafai ona ou filifili e talia pe teena upu a auauna a le Atua.
I lana auaunaga atoa, sa tuuina atu ai e Paulo se molimau mamana ia Iesu Keriso ma Lana talalelei. E toatele tagata sa taliaina lana molimau, ae sa lei talia e tagata uma. A o e faitauina le Galuega 24:24–27 ma le Galuega 26:1–3, 24–29, tusi ia upu ma fasifuaitau o loo faaalia ai le ala na tali atu ai taitai Roma i Iutaia i aoaoga a Paulo:
Filiki
Feso
Tupu o Akeripa
A o folau atu i Roma ina ia faamasinoina e Kaisara, sa vavalo ai Paulo e faapea, o le a oo mai i le vaa ma lana pasese le “tele o le leaga ma le maumau” (Galuega 27:10). Faitau le mataupu 27 e iloa ai pe na faapefea ona tali atu uo malaga a Paulo i ana lapataiga. Pe ua e maua ni lesona mo oe lava i lenei aafiaga?
Pe na i ai se taimi na e tali atu ai e pei o se tasi o nei tagata ina ua e faalogo i aoaoga a taitai o le Ekalesia? O a ni taunuuga e ono tulai mai o le tali atu i nei auala? O le a se mea ua e aoao mai nei tala e uiga i le faalogo ma usitai i fautuaga a le Alii e ala mai i Ana auauna?
Tagai foi 2 Nifae 33:1–2; Iosefa Samita—Talafaasolopito 1:24–25; D. Todd Christofferson, “O Le Leo o le Lapataiga,” Ensign po o le Liahona, Me 2017, 108–11.
Manatu mo Suesuega Faaleaiga o Tusitusiga Paia ma Afiafi Faaleaiga
A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai fautuaga nei:
A o lei oo i lona liuaina, sa i ai se talaaga umi o solitulafono a Paulo e faasaga i le Atua. Ae ona sa naunau o ia e salamo, sa mafai ai ona ia faapea atu, “Ua ia te aʼu se mafaufaufuatiaifo ua aunoa ma se faatausuai e faasaga i le Atua, ma faasaga i tagata uma” (tagai foi MFF 135:4). E mafai faapefea ona tatou aveese o tatou mafaufau mai faatausuai e faasaga i le Atua ma isi?
I nei fuaiupu, o le a le mea na valaau le Alii ia Paulo e fai? O a ni avanoa ua tatou maua e fai ai mea faapenei?
E i ai se tagata o lou aiga e fiafia i gata? Atonu e te manao e fai atu i le tagata lena po o se isi tagata o le aiga e faamatala atu tala o loo i le Galuega 28:1–9. Atonu o le a fiafia lau fanau e tusi se ata o nei tala pe faatino foi. O le a ni lesona e mafai ona tatou aoao mai i nei tala? O le tasi atonu o le, e faataunuu e le Alii Ana folafolaga i Ana auauna. Mo se faataitaiga, e mafai ona e faatusatusaina folafolaga o loo faia i le Mareko 16:18 ma o latou faataunuuga i aafiaga a Paulo. E mafai foi ona e sailia se lauga o le konafesi aupito lata mai, sa faia ai se folafolaga e se tasi o auauna a le Alii—atonu o se folafolaga e anoa i le tou aiga—ma faapipii i totonu o le tou fale. E mafai faapefea ona tatou faaalia lo tatou faatuatua o le a faataunuuina lenei folafolaga?
Sa puipuia e le Alii ia Paulo ina ua u o ia e se gata e ona.
E pei o le Ekalesia i aso o Paulo (na taua o se “lotu” i le fuaiupu 22), e masani foi ona “talaeseina” le Ekalesia i aso nei. Ina ua talaeseina e tagata le Faaola ma Lana Ekalesia, sa faapefea ona tali atu i ai Paulo? O le a se mea e mafai ona tatou aoao mai le aafiaga a Paulo?
Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.
Faaleleia o Lo Tatou Aoao Atu
Taulai i mataupu faavae o le a manuia ai lou aiga. Ao e suesue i tusitusiga paia, ia fesili ifo ia te oe lava, “O le a se mea ou te mauaina ii o le a aoga tele i lou aiga?” (Tagai Aoao Atu i le Ala a le Faaola, 17.)
Lototoa i le Molimau ia Iesu Keriso, saunia e Daniel A. Lewis. Paulo i luma o le Tupu o Akeripa.