O Le Leo o le Lapataiga
E ui e lagonaina patino e perofeta le tiute e lapatai atu i isi, ae o se tiute foi e tatau ona i ai i isi.
Na soifua mai le perofeta o Esekielu pe a ma le luasefulu tausaga a o lei tuua e Liae ma lona aiga Ierusalema. I le 597 TLM, i le 25 o ona tausaga, o Esekielu o se tasi o le toatele o e na ave faatagataotaua i Papelonia e Nepukanesa, ma o le mea e gata ai lo tatou silafia, sa ia faaaluina lona olaga atoa iina. O ia o se ositaulaga mai le gafa o Arona, ma ina ua 30 ona tausaga, sa avea o ia ma se perofeta.
I le tofiaina o Esekielu, sa faaaogaina e Ieova le faatusa o se tagata vaai.
“A iloa atu e [le tagata vaai] le pelu o loo sau i le nuu, afai na te ilia le pu, ma faailoa atu i le nuu;
“O se na te lagona le leo o le pu, a e le anaana i ai, a oo ane le pelu, ma oti ai o ia, e i luga o lona lava ulu lona toto.”
I se isi itu, “Afai e iloa e le tagata vaai le pelu o loo sau, a e le ilia e ia le pu, ma ua le faailoa atu i le nuu; a oo mai le pelu, ma oti ai se tasi o i latou, … o lona toto ou te tauiatua lea i le tagata vaai.”
Ona fetalai sao atu lea o Ieova ia Esekielu ma folafola atu, “O oe foi le atalii o le tagata, ua ou tofia oe e fai ma tagata vaai i le aiga o Isaraelu; o le mea lea ia e faalogo mai ai i le upu a lo’u gutu, ma e apoapoai atu ia te i latou i upu [mo] au.” O le lapataiga o le liliu ese mai le agasala.
“A ou fai atu i le ua amio leaga, Le tagata amio leaga e, e te oti lava oe; afai e te le tautala atu e apoapoai atu ai i le ua amio leaga, ia liliu ese i lona ala; e oti lena tagata amio leaga i lana amio leaga; a o lona toto ou te tauiatua lea ia te oe.
“A o oe, afai e te apoapoai atu i le ua amio leaga, ia liliu ese o ia i lona ala; afai na te le liliu ese i lona ala, e oti o ia i lana amio leaga; a ua faasaoina e oe lou lava agaga. …
“A ou fai atu foi i le ua amio leaga, E oti lava oe; afai e liliu ese ia i lana agasala, ma ua fai e ia le amio tatau ma le amiotonu; …
“O ana agasala ua ia faia e le tautaua ia te ia; ua ia fai le amio tatau ma le tonu; e ola lava ia.”
O le mea e mata’ina ai, o lenei lapataiga e faatatau foi i e amiotonu. “A ou fai atu i le ua amiotonu, e ola lava ia; afai e faalagolago ia i lana amiotonu, ma ua fai le amio leaga, ona le manatua lea o ana amiotonu uma, a e oti o ia ona o amio leaga ua ia faia.”
I le augani atu ai i Lana fanau, na fetalai atu ai le Atua ia Esekielu, “Fai atu ia ia te i latou, O loo fetalai mai le Alii o Ieova, Ou te ola a’u, ou te le fiafia lava i le oti o lē amio leaga, a ia liliu mai ia lē amio leaga ai lona ala, ma ola ai; liliu ia outou, ina outou liliu ese ia i o outou ala leaga; aua pe se a ea le mea tou te fia oti ai, le aiga o Isaraelu e?”
Nai lo le naunau ia faasala, o loo saili e lo tatou Tama Faalelagi ma lo tatou Faaola lo tatou fiafia ma augani mai ia i tatou ina ia salamo, ma ia iloa lelei “e lei avea lava [ma o le a le avea lava] le amioleaga ma fiafia.” O lea la o Esekielu ma soo se perofeta o i luma atu ma talu ai nei, na tautatala i le afioga a le Atua mai le loto atoa, na lapataia tagata uma o e o le a liliu ese mai ia Satani, o le fili o o latou agaga, ma “filifili le saolotoga ma le ola e faavavau, e ala i le Puluvaga sili o tagata uma.”
E ui e lagonaina patino e perofeta le tiute e lapatai atu i isi, ae o se tiute foi e tatau ona i ai i isi. O le mea moni, “ua tatau i tagata taitoatasi o e ua uma ona lapataia ona lapatai atu i le la te tuaoi.” O i tatou o e ua mauaina se malamalama o le fuafuaga sili o le fiafia—ma poloaiga e fesootai i ai—e tatau ona lagona se manao e faasoa atu lena malamalama ona e faia ai se eseesega tele iinei ma i le faavavau. Ma afai tatou te fesili ifo, “O ai lo’u tuaoi e tatau ona ou lapataia?” e moni o le a maua le tali i se faataoto lea e amataina, “O le tasi tagata na alu ifo mai Ierusalema i Ieriko, ua maua o ia e tagata fao mea,” ma faaauau ai pea.
O le mafaufau ai i le faataoto o le Samaria agalelei i lenei talaaga ua faamanatu maia ia i tatou o le fesili “O ai lo’u tuaoi?” na noatia i poloaiga sili e lua: “E te alofa atu i le Alii lou Atua ma lou loto atoa, ma lou agaga atoa, ma lou malosi atoa, ma lou manatu atoa; e te alofa atu foi i le lua te tuaoi, ia pei o oe lava ia te oe.” O le uunaiga mo le siitiaina o le leo o le lapataiga, o le alofa lea—alofa i le Atua ma le alofa i uso a tagata. O le lapatai atu o le popole lea. Ua faatonuina e le Alii ina ia faataunuuina “i le mālū ma i le agamalu” ma “i le faatauanau, i le tali-tiga, i le agamaualalo, … , ma i le alofa faamaoni.” E mafai ona faafuasei, e pei ona tatou lapataia se tamaitiiti e aua le tuua lona lima i se afi. E tatau ona manino ma i nisi taimi ia mausali. O nisi taimi, o le lapataiga e ono avea ma tulaga o le aoaiga “pe a uunaia ai e le Agaga Paia,” ae ia faavae pea i le alofa. Molimau, mo se faataitaiga, le alofa lea e uunaia ai le auaunaga ma le osigataulaga a o tatou faifeautalai.
E mautinoa lava o le alofa o le a faamalosia matua e lapatai atu i o latou “tuaoi”—e sili ona latalata i ai, o o latou lava fanau.O le uiga o lenei mea o le aoao atu ma le molimau atu i upumoni o le talalelei. O lona uiga o le aoao atu o le aoaoga faavae a Keriso i fanau: faatuatua, salamo, papatisoga, ma le meaalofa o le Agaga Paia. Ua faamanatu mai e le Alii i matua, “Ua Ou poloaina outou ia tausi a’e a outou fanau i le malamalama ma le upumoni.”
O se elemene taua o le tiute faamatua ina ia lapatai atu e le gata i le faamatala atu o taunuuga faataumaoi o le agasala ae o le olioli foi i le savali ma le usiusitai i poloaiga.Toe mafaufau i upu a Enosa e uiga i le mea na taitaiina o ia e saili i le Atua, mauaina o se faamagaloga o agasala, ma ia liuaina:
“Faauta, sa ou alu e tuli manu i le vao; ma o upu sa ou faalogo soo o tautala i ai loʼu tamā e uiga i le ola e faavavau, ma le olioli o le au paia, sa gotouga ifo i lo’u loto.
“Ma sa matelaina lo’u agaga; ma sa ou tootuli i lalo i luma o loʼu Tufuga, ma ou tagi atu ia te ia i le tatalo malosi ma le faatauanau mo loʼu lava agaga.”
Ona o Lona alofa ma le popole e le mafaatusalia mo isi ma lo latou fiafia, e lei faatali Iesu e lapatai mai. I le amataga o Lana galuega, “na afua ona talai atu e Iesu, ua faapea atu, Ina salamo ia outou; aua ua latalata mai le malo o le lagi.” Talu ai ua Ia silafia e le taitai atua i tatou i soo se auala i le lagi, o lea na Ia poloai mai ai:
“Ia outou ulu atu i le faitotoa vaapiapi: aua e va tele le faitotoa, e lautele foi le ala, e tau atu i le malaia, e toatele foi i latou o e ui atu ai:
“Aua e vaapiapi le faitotoa, e lauitiiti foi le ala e tau atu i le ola, e toaitiiti foi i latou o e maua”
Sa Ia tuuto atu le taimi i e agasala, ma fetalai atu, “Ou te lei sau e valaau i e ua amiotonu, a o e ua agasala, ina ia latou salamo.”
Ae mo le au tusiupu, Faresaio, ma le au Satukaio, sa maumaututu Iesu i le tausalaina o lo latou pepelo. O Ana lapataiga ma poloaiga na tuusao atu: “Oi talofa ia te outou tusiupu ma faresaio, tagata pepelo! Ua outou avatu mea e sefulu a’i o le mili, ma le aneto, ma le kumina, a ua tuu e outou o mea silisili o i le tulafono, o le amiotonu, ma le alofa, ma le faamaoni.” E moni e leai se tasi o le a tuuaia le Faaola i le le alofa atu i nei tusiupu ma Faresaio—aua i le iuga lava, sa Ia puapuagatia ma maliu e laveaiina ai foi i latou. Ae o le alofa ia i latou, e le mafai ai ona Ia tuua i latou e faaauau pea i le agasala e aunoa ma le faasa’oina ma le manino o i latou. Sa matauina e se tasi tagata matau, “Sa aoaoina e Iesu ona soo ia faia e pei ona Ia faia: ia talia soo se tagata ae ia aoao atu foi e uiga i le agasala, talu ai o le alofa e manaomia ai le lapataia o tagata e uiga i mea e mafai ona faatiga ai i latou.”
O nisi taimi o i latou o e sii ae le leo o le lapataiga ua le amanaiaina ona ua faapea ua faamasinosino. Ae peitai, i se eseesega, o i latou o e fai mai o le upumoni e fua i le manatu o le tagata ia, ma o tulaga faatonuina o le amio mama o se mataupu e fua i le mea e fiafia i ai le tagata lava ia, e masani lava o i latou lava ia e sili ona faitio leaga i tagata ia e le taliaina mea ua manatu i ai tagata lautele o se “manatu sa’o.” Sa faasino i ai se tasi o tusitala i lenei mea o se “aganuu maasiasi”:
“I se aganuu tausalaina e te iloa lou lelei po o lou leaga i le mea e tau atu e lou mafaufau. I se aganuu maasiasi e te iloa lou lelei po o lou leaga i le mea e tau atu e tagata o le nuu e uiga ia te oe, pe faamamaluina ai oe pe faiesea ai oe. … [I se aganuu maasiasi,] o le olaga mama e le o fausia i luga o le fuafaatatau o le lelei ma le leaga; o loo fausia i luga o le fuafaatatau o le faaaofia ma le faiesea. …
“… O le a tumau ai pea le le mautu o tagata uma i se faatulagaga o amioga mama e fua i le faaaofia ma le faiesea.E leai ni tulaga faatonuina tumau, ua na o faamasinoga fesuisuiai a tagata lautele. O se aganuu o lagona maaleale gofie, soona maoaluma ma le popolevale po o le a le mea sa’o ae po o le a le mea sese, e lagona ai e tagata uma le faamalosia e ioe atu i ai. …
“O le aganuu tausalaina e ono soonafai, ae o le mea e sili ai e mafai ona e ita i le agasala ae alofa pea i le tagata agasala. O le aganuu maasiasi o nei onapo e tatau ona faatauaina le faaaofiaina ma le faapalepale, ae ono tulaga ese le le alofa ia i latou o e le ioe [i se mea] ma i latou e ese mai le toatele o tagata.”
E faatusatusa i lenei mea “le papa o lo tatou Togiola,” o se faavae mausali ma tumau o le faamasinoga tonu ma le mama. E sili atu le lelei o le i ai o le tulafono e lemasuia a le Atua lea tatou te faatino ai le filifilia o lo tatou taunuuga nai lo le faapologaina e tulafono lē mautu ma le maemaea a se vaega leaga o ala faasalalau faaagafesootai. E sili atu le lelei o le iloa o le upumoni nai lo le “felafoaiina e pei o peau, ma feaveaiina i matagi uma lava o mataupu.” E sili atu le lelei o le salamo ma tulai ae i tulaga faatonuina o le talalelei nai lo le faafoliga e leai se sa’o po o se sese ma pagatia ai i le agasala ma le faanoanoa.
Ua folafola mai e le Alii, “O le leo o le lapataiga ua mo tagata uma, e ala atu i fofoga o o’u soo, o e ua Ou filifilia i aso nei e gata ai.” I le avea ai ma tagata vaai ma soo, e le mafai ona tatou tutu faaleogalua e uiga i lenei “auala e silisili lava.” E pei o Esekielu, e le mafai ona tatou vaai i le pelu o loo sau i luga o le laueleele “ma le ilia … le pu.” E le o faapea atu e tatau ona tatou tu’itu’i i faitotoa o o tatou tuaoi pe tutu i nofoaga faitele ma alaga atu, “Ia salamo!” E moni, ae mafaufau i ai, ua tatou maua i le talalelei toefuataiina mea ua matua mananao lava i ai ia tagata. O lea la o le leo o le lapataiga e le masani le na o le faaaloalo, ae i se fasifuaitau a le au fai Salamo, o se “alalaga fiafia.”
Na tusia e le tusitala o manatu a le Deseret News o Hal Boyd se tasi o faataitaiga o uiga sese o le nofonofo e le tautala. Sa ia matauina e ui o le manatu i faaipoipoga o loo avea pea ma se mataupu o “finauga faaleatamai” i tagata iloga o le malo o Amerika, o le faaipoipoga lava ia e le o se mataupu o le finauga mo i latou i mea o loo latou faia. “‘O tagata iloga e faaipoipo ma tumau ai i faaipoipoga ma faamautinoa o loo fiafia a latou fanau i faamanuiga o se faaipoipoga mautu.’ … Peitai, o le faafitauli, [latou] te le o faamoemoe e talai atu mea o loo latou faia.” Latou te le o mananao e “fosi” atu ia i latou o e mafai moni lava ona faaaogaina la latou taitaiga lelei, ae “masalo ua oo i le taimi mo i latou ua aoaoina ma ua i ai aiga malolosi ina ia taofia le faafoliga o le tu faaleogalua ma amata ona talai atu mea o loo latou faia e faatatau i faaipoipoga ma tulaga faamatua … [ma] fesoasoani atu i o latou uso a tagata Amerika ia taliaina.”
Matou te talitonu aemaise lava outou le tupulaga faiae, talavou ma talavou matutua lea e tatau ona faalagolago i ai le Alii mo le manuia o Lana galuega i tausaga o i le lumanai, o le a lagolagoina ia aoaoga o le talalelei ma tulaga faatonuina o le Ekalesia i nofoaga faitele faapea foi i [nofoaga] patino. Aua nei tuulafoaia i latou o e atonu e taliaina le upumoni ina ia tauivi ma toilalo ai i le le iloa o se mea. Aua le gauai atu i manatu sese o le faapalepale po o le fefe—fefe i le faaletonu, le taliaina, pe oo lava i le puapuagatia. Ia manatua le folafolaga a le Faaola:
“Amuia outou pe a latou upu leaga, ma faasaua ia te outou, ma latou tuuaiina pepelo outou i mea leaga uma ona o a’u.
“Ia outou olioli ma fiafia lava; aua o i le lagi lo outou taui e tele; aua na faapea ona latou faasaua i perofeta e na muamua ia te outou.”
I le taimi mulimuli lava, tatou te tali uma atu i le Atua mo a tatou filifiliga ma olaga o tatou ola ai. Na folafola mai e le Faaola, “Ma na auina mai au e lou Tamā ina ia sii ae au i luga o le satauro; ma a mavae ona sii ae o au i luga o le satauro, ina ia mafai ona ou aumai o tagata uma ia te au, ina ia pei ona sii ae o au i luga e tagata ia faapea foi ona sii ae i luga o tagata e le Tamā, e tutu i ou luma, e faamasinoina i a latou galuega, pe ua lelei pe ua leaga.”
O le iloaina o lenei mea, o le silisiliese o le Alii, ou te aioi atu ai i upu a Alema:
“Ma o lenei, ou uso e [ma tuafafine], ou te moomoo mai le vaega totonugalemu o loʼu loto, ioe, ma le atuatuvale tele e oo lava i le tiga, ina ia outou faalogo mai i au upu, ma lafo ese a outou agasala, ma aua le faatuatuai le aso o lo outou salamo;
“Ae ia outou faamaualalalo outou lava i luma o le Alii, ma valaau atu i lona suafa paia, ma mataala ma tatalo e lē aunoa, ina ia lē faaosoosoina outou i luga atu o le mea e mafai ona outou lavatia, ma faapea ona taitaiina ai outou e le Agaga Paia… ;
“Ua faatuatua i le Alii; ua i ai se faamoemoe o le a outou maua le ola e faavavau; ua i ai le alofa o le Atua e le aunoa i o outou loto, ina ia mafai ona sii aʼe outou i luga i le aso mulimuli ma ulu atu i lona malologa.”
Tau ina tatou faapea atu taitoatasi i le Alii faatasi ma Tavita: “Ou te lei natia lava i lo’u loto lau amiotonu; ua ou tauina atu lou faamaoni m lau faaolataga: ou te lei faalilolilo lou alofa ma le mea moni mai ia te oe i le faapotopotoga tele. Ieova e, aua e te taofi e oe lou alofa mutimutivale ia te a’u.” I le suafa, o Iesu Keriso, amene.