O Fafine Mausali
O fafine mausali o ni soo e taulai atu i le Faaola o Iesu Keriso ma e i ai le faamoemoe e ala i le folafolaga o Lana taulaga Togiola.
Ou uso e pele, e maeu lo matou alolofa ia te outou ma faafetai atu mo lo outou tali mai ma le agamalu ma le naunautai i le valaaulia a le Au Peresitene Sili ma le taumafaiga o le #SaFaiA’umaTagataEse. Faamolemole ia tatalo pea, faalogo i musumusuga a le Agaga, ma faatino ia uunaiga e te maua.
Pe ou te femalagaa’i i le lotoifale po o le lalolagi atoa, o se mea masani mo se tasi le fesili mai, “E te manatuaina a’u?” Ona ou te matua le atoatoa lava, e tatau ona ou tautino atu e tele ina ou le manatuaina ni igoa. Peitai, ou te manatua le alofa tonu ma le moni ua faatagaina a’u e le Tama Faalelagi ia lagonaina a o ou feiloai atu i Ona afafine ma atalii faapelepele.
Talu ai nei sa ou maua ai le avanoa e asiasi atu ai i nisi o tamaitai pele o loo i le falepuipui. A o matou faamavae ai ma le lotomomomo, sa aioi mai le tasi tamaitai pele, “Sister Burton, faamolemole aua ne’i faagaloina i matou.” Ou te faamoemoe o le a ia lagonaina faatasi ma isi o loo mananao ina ia manatuaina, lena mea a o ou faasoa atua ni nai manatu ia te outou.
O Tamaitai Faapitoa i Aso o le Faaola: Faatutotonu i le Faaola o Iesu Keriso
O o tatou uso i soo se vaitausaga na faaalia le mamanu faamaoni o le avea ma soo lea foi tatou te taumafai i ai. “O loo aofia i le Feagaiga Fou ni tala o tamaitai [faapitoa] ua iloa ma lemailoa, o e na faatinoina le faatuatua ia Iesu Keriso [ma i Lana Togiola], sa aoao ma ola i Ana aoaoga, ma molimau e uiga i Lana galuega, vavega, ma le mamalu. O nei tamaitai na avea ma ni soo ua fai ma faataitaiga atoa ai ma molimau taua i le galuega o le faaolataga.”
Mafaufau i tala nei i le tusi a Luka. Muamua, i le taimi o le galuega a le Faaola:
“Mulimuli ane … ua faataamilo [Iesu] i aai ma faoa aai, ua talai ma folafola le tala lelei o le malo o le Atua; ua faatasi foi ma ia le toasefulu ma le toalua,
“Atoa ma nisi fafine faapitoa, … o Maria ua ta’ua o le Makatala, … ma Ioana … , ma Susana atoa ma isi fafine e toatele, e na auauna atu ia te ia.”
Na sosoo ai ma Lona Toetu:
“[Ma o] nisi fafine faapitoa … sa i le tuugamau i le tafa o ata;
“… [Ina ua] lei iloa e i latou lona tino, a ua latou o atu, ma faapea atu, … ua iloa e i latou agelu na faaali mai, e na fai mai ua soifua o ia.”
Ua ou faitauina ma pasia faafia muamua le faamatalaga e foliga mai e le ofoofogia “fafine mausali” ae talu ai nei a o ou mafaufau loloto ma le faaeteete atili lava, o na upu sa foliga mai e oso ese mai le itulau. Mafaufau i nei upu uiga tutusa ma le upu mausali e pei ona fesootai atu i fafine mausali faatuatua: “faatalitonuina,” “lelei,” “to’afimalie,” “mautu,” “maoti,” “faamautinoaina,” ma le “faatuatuaina.”
A o ou mafaufau loloto i na faamatalaga mamana, sa ou manatuaina le toalua o na fafine mausali o le Feagaiga Fou o e na tuuina atua ni molimau lelei, to’afimalie, mautu, ma faamautinoaina e uiga i le Faaola. E ui e pei foi i laua o i tatou, o ni fafine e le atoatoa, ae o le la moilmau e musuia.
Manatua le fafine e lemailoa le igoa i le vaieli sa valaauliaina isi e o mai ma vaai i le mea sa ia aoaoina e uiga i le Faaola? Sa ia tuuina atu lana molimau mausali i se ituaiga o fesili: “Pe le o le Keriso ea lea?” O lana molimau ma le valaaulia sa matua faatauanau lea na “toatele … [ai] e na faatuatua ia te ia.”
I le mavae ai o le maliu o lona tuagane, o Lasalo, o Mareta, le soo pele ma le uo a le Alii, na tautino mai ma se lagona sa ono matua ootia lava, “Le Alii e, ana e iinei, po ua le oti lo’u tuagane.” Mafaufau i lona mausali a o faia pea lana saunoaga, “Ae ui lava i lea, ua ou iloa, o mea uma e te faatoga atu ai i le Atua, e foaiina mai e le Atua ia te oe.” Sa ia toe molimau mai, “Ua ou talitonu lava, o oe le Keriso, le Alo o le Atua, o lē maliu mai i le lalolagi.”
Ua tatou aoao mai nei uso o fafine mausali o ni soo e taulai atu i le Faaola o Iesu Keriso ma e i ai le faamoemoe e ala i le folafolaga o Lana taulaga Togiola.
O Fafine Tausi-Feagaiga Mausali o le Toefuataiga: Loto e Ositaulaga
I aso anamua, na ositaulaga fafine mausalia o latou molimau atu ma ola i aoaoga a Iesu. Sa faia e fafine mausalilea mea e tasi i le popofou o le Toefuataiga. O Drusilla Hendricks ma lona aiga o se tasi o i latou na, a o avea ma tagata fou liliu mai, na mafatia i taimi o sauaga o le Au Paia i le Itumalo o Clay Misuri.Sa pipili ai lava lona toalua i le taimi o le Taua o le Vaitafe o Crooked. Sa tuua ai o ia e tausi [lona toalua] faapea ai ma le tausiga o lona aiga.
“I se tasi taimi patino o le faanoanoa, ina ua leai se meaai a le aiga, sa ia manatua na ta’u atu e se leo ia te ia, ‘Onosai, aua o le a tausi mai le Alii.’”
Ina ua manaomiaina lona atalii e ofofua atu mo le Autau a Mamona [mo le malo], i le taimi muamua sa tetee i ai Drusilla ma tauivi ai i le tatalo ma le Tama Faalelagi seia oo “ina peiseai o se leo na faapea atu ia te ia, ‘E te le manao ea i le mamalu aupito sili ona maualuga?’ Sa vave ona tali atu, ‘Ioe,’ ma sa toe faapea mai le leo, ‘E faapefea la ona e manatu e te mauaina e aunoa ma le faia o ni osigataulaga silisili?’’’
Ua tatou aoao mai lenei fafine mausali o le tausiga o feagaiga e manaomia ai lo tatou naunautaiga e ositaulaga.
O Fafine Mausali o Aso Nei: Manatuaina ma le Sauniaina e Faamanatu Lona Toe Afio Mai
Sa ou ta’ua ia fafine mausali i taimi o le Faaola atoa ai ma le popofou o aso o le Toefuataiga o le talalelei, ae faapefea ia faataitaiga o le avea ma soo ma molimau o fafine mausali i o tatou aso?
I so’u tofiga talu ai nei i Asia, sa toe musuia ai foi a’u e le tele o fafine mausali na ou feiloai atu i ai. Sa patino lava le faagaeetiaina o a’u i tagata o uluai tupulaga na auai i le ekalesia i Initia, Meleisia, ma Initonesia, o loo tauivi e ola i le aganuu o le talalelei i o latou lava aiga, o nisi taimi e faia ni osigataulaga tetele ona e tele lava ina feteenai le ola i le talalelei ma aganuu faaleaiga ma faaleatunuu. O augatupulaga e tele o fafine mauasali sa ou feiloai i ai i Hong Kong ma Taiuani o loo faaauau pea ona faamanuiaina ai olaga o o latou aiga, tagata o le Ekalesia, ma nuu e ala i le faatumauina o le taulai atu i le Faaola ma le ositaulagaina ma le loto i ai e tausi ia feagaiga. O loo i ai foi ni fafine mausali faapena i le Ekalesia atoa.
O se fafine mausali ua faamanuiaina ai lo’u olaga mo le tele o tausaga, ua silia ma le 15 tausaga o tauivi pea ma le faama’i faigata o le gagase o le tino, ma le faateleina o le vaivai ua ta’ua o le Inclusion Body Myositis. E ui ua noatia i lana nofoa faataavalevale, ae o loo tauivi pea o ia ia lotofaafetai ma tausisi i lana “Lisi o Mea e Mafai”: o se lisi o mea e mafai ona ia faia, e pei o le mafai ona ou manava, e mafai ona ou [ai ma inu], e mafai ona ou tatalo, ma e mafai ona ou lagonaina le alofa o lo’u Faaola. Na te tuu atu lana molimau mausali e taulai atu ia Keriso e toetoe lava o aso uma i aiga ma uo.
Talu ai nei sa ou faalogo ai i le tala a Jenny. O ia o se faifeautalai ua maea le misiona, ae na tete’a ona matua a o i ai o ia i lana misiona. Sa ia faamatalaina le mafaufau atu i le toefoi atu i le aiga “na matuai fefe ai lava o [ia].” Peitai i le faaiuga o lana misiona i Italia, ao ia malolo ai i le fale o le misiona i lona agai atu i le aiga i le Iunaite Setete, sa auauna atu ma le alofa ia te ia se fafine mausali, o le faletua o le peresitene o le misiona, i le na o le seluina o lona lauulu.
I ni tausaga mulimuli ane, o se isi fafine mausali, o Terry—o se peresitene o le Aualofa a le Siteki ma o se soo o Iesu Keriso—na faamanuiaina le olaga o Jenny ina ua valaauina Jenny o se peresitene o le Aualofa a le uarota. I lena taimi, sa galue ai Jenny e tusi faauma lana pepa o sailiiliga mo lana faailoga faafomai. Sa le gata na auauna atu Terry o se faufautua ia Jenny o se taitai, ae sa ia nofo foi faatasi ma ia mo le 10 itula i le falemai ina ua maua Jenny i le faamai matautia o le lukimia. Sa asiasi atu Terry i le falemai ma ave ia Jenny e vaai ana fomai. Sa tautino mai Jenny, “Ou te manatu atonu sa ou faasuati faatele i totonu o lana taavale.”
E ui lava i lona gasegase, ae sa faaauau pea ona auauna atu ma le lototoa Jenny i le avea ai ma peresitene o le Aualofa a le uarota. E oo lava i ona tulaga sili ona faigata, sa ia valaau atu i telefoni ma auina atu feau tusitusia ma imeli mai lona moega, ma sa ia valaauliaina uso ia o atu e vaai o ia. Sa ia lafo atu ni kata ma ni tusi i tagata, ma alofa atu i ona uso mai se mea mamao. Ina ua talosagaina e lana uarota se atapue o lana au peresitene mo le talafaasolopito o le latou uarota, o le ata lenei sa latou maua. Ona o Jenny o ia lava o se fafine mausali, sa ia valaaulia ai tagata uma ia tauave faatasi avega a isi, e aofia ai lana lava ia avega.
I le avea ai ma se fafine mausali sa molimau mai Jenny: “E le gata ua tatou i ai iinei e laveai isi ae ia laveai foi i tatou lava. Ma o lena faaolataga e sau mai le faigapaaga ma Iesu Keriso; mai le malamalama i Lona alofa tunoa ma Lana Togiola ma Ona lagona o le alofa mo tamaitai o le Ekalesia. E tupu lena mea e ala i mea faigofie e pei o le seluina o le lauao o se isi tagata, auina atu o se tusi o loo i ai se savali faafaaaliga musuia, ma manino o le faamoemoe ma le alofa tunoa, po o le faatagaina foi o tamaitai e auauna mai ia i tatou.”
Uso e, pe a oo ina faalavelaveina i tatou, masalosalo, faalotovaivaia, agasala, faanoanoa, po o le lofituina o le agaga, tau ina ia tatou taliaina le valaaulia a le Alii ia feinu i Lana vai ola e pei ona faia e le fafine mausali i le vaieli, ma valaaulia isi e faia lea mea e tasi a o tatou tuuina atu a tatou molimau mausali: “Pe le o le Keriso ea lenei?”
Pe a foliga mai ua lē talafeagai le olaga, e pei ona sa foliga ai ia Mareta i le maliu o lona tuagane—pe a tatou oo i le lototiga ma le tuuatoatasi, i le le mafai ona fanauina o fanau, maliliu o e pele, o avanoa ua ma’umau pe ua misia mo se faaipoipoga ma le faia o se aiga, aiga malepelepe, faanoanoaga mamafatu, faamai faaletino ma faalemafaufau, lofituina i le atuatuvale, popole, vaisu, faigata o mea tautupe, po o le anoanoai o isi avanoa—tau ina ia tatou manatuaina Mareta ma tautino atu la tatou molimau mausali talitutusa: “Ae ua ou iloa … [ma] ua ou talitonu lava, o oe le Keriso le Alo o le Atua.”
Tau ina ia tatou manatuaina le toatele o fafine mausali o e na mumusu e tuulafoai i lo tatou Faaola pele i taimi o aafiaga tiga matuitui na Ia mafatia ai i luga o le satauro ma i itula mulimuli ane na faamanuiaina ai e avea ma se tasi o molimau mausali o Lona Toetu mamalu. Ia maua lava i tatou o tumau le latalata ia te Ia i le tatalo ma le suesueina o tusitusiga paia. Ia tatou faalatalata atu i tatou lava ia te Ia e ala i le sauniaina mo, ma le taumamafa i faatusa paia o Lana taulaga togiola i vaiaso taitasi i le taimi o le sauniga o le faamanatuga ma pe a tatou tausia feagaiga e ala i le auauna atu i isi i o latou taimi o mafatiaga. Masalo atonu tatou te fia avea ma vaega o fafine mausali, o soo o Iesu Keriso, o e o le a faamanatuina Lona toe foi mai ma le mamalu pe a toe afio mai o Ia.
Uso e, ou te molimau atu i Matua Faalelagi agaalofa; i lo tatou Faaola, o Iesu Keriso; ma Lana Togiola le mafuatia mo i tatou. Ou te iloa na muai faauuina le Perofeta o Iosefa Samita e avea ma perofeta o le Toefuataiga. Ou te iloa o le Tusi a Mamona e moni ma sa faaliliuina e le mana o le Atua. Ua faamanuiaina i tatou i se perofeta soifua i o tatou lava aso, o Peresitene Thomas S. Monson. O nei upumoni ua ou mausali ai! I le suafa, o Iesu Keriso, amene.
Faaaliga: Sa faamaloloina mai Sister Burton o se Peresitene Aoao o le Aualofa i le aso 1 Aperila, 2017.