Tupu Susulu Pea Lava Pea seia oo i le Aso e Atoatoa Ai
E oo lava i taimi sili ona faigata ma pogisa, e i ai lava le malamalama ma le agalelei o siomia ai i tatou.
Sa faasoa atu e Paulo se savali matagofie o le faamoemoe i Korinito:
“Ua puapuagatia i matou i mea uma, a e le faaatuatuvaleina; ua fememeai, a e le matua fememeai;
“Ua sauaina, a e le tuulafoaiina; ua lafotuina i lalo, a e le fano.”
O le a le puna o le faamoemoe o Paulo? Faalogo i lana faamatalaga: “Aua o le Atua o le na fai atu ia pupula mai le malamalama mai le pouliuli, ua faapupula mai e ia i o matou loto, ina ia malamalama e iloa ai le mamalu o le Atua i fofoga o Iesu Keriso.”
E oo lava i taimi sili ona faigata ma pogisa, e i ai lava le malamalama ma le agalelei o siomia ai i tatou. Ia Oketopa ua tuanai atu, sa faamanatu mai ai e Peresitene Dieter F. Uchtdort ia i tatou, “O loo siomia i tatou e se tamaoaiga ofoofogia tele o le malamalama ma le upumoni lea ou te tomanatu ai pe o tatou talisapaiaina moni ea mea ua tatou maua.”
Ae peitai, e manao le fili ia tatou taulai i “puao o le pogisa … ia e faatauaso ai mata, … faamaaa … loto … , ma… taitai … ese atu ai.”
Ae, faatasi ai ma le malamalama atoatoa i luitau o o tatou aso, sa folafola mai le Alii, “O le mea e mai i le Atua o le malamalama lea; a o ia o le e mauaina le malamalama, ma tumau pea i le Atua, e mauaina le malamalama atili; ma o lena malamalama o le a tupu susulu malamalama tele pea lava pea seia oo i le aso e atoatoa ai.”
O i tatou o fanau a le Atua. O le mauaina o le malamalama, tumau pea i le Atua, ma le mauaina o isi malamalama o mea ia na foafoaina ai i tatou e fai. Mai i le amataga, sa tatou mulimuli i le malamalama, sa tatou mulimuli i lo tatou Tama Faalelagi ma Lana fuafuaga. O le sailia o le malamalama o loo i totonu o i tatou.
Sa ou faalogo o aoaoina ma le matagofie lenei upumoni e faavavau i se nofoaga e lei mafaufauina. A o o’u galue ai mo se faletupe tele, sa valaaulia au e auai i se polokalama faapitoa i le Iunivesite o Michigan. I le taimi o le polokalama, sa aoao e Polofesa Kim Cameron le manatu faavae o le taitaiga lelei ma ona aafiaga o le malamalama. Sa ia faamatala: “E faasino lenei mea i le fegauiaiga i vaega uma o loo feola agai i le [malamalama] malosi e lelei ma o ese mai le [pogisa] malosi e le lelei. Mai meaola ninii e taitasi sela (cell) e oo atu i le lavelave o totoga faaletagata, o mea uma e ola e i ai se manao faalenatura ia agai atu i ni mea lelei ma alu ese mai le mea e le lelei.”
I le lagolagoina ai e le tele o suesuega, sa ia taulai foi i vaega taua e tolu o se aga manuia o falefaigaluega: agaalofa, faamagaloga, ma le loto faafetai. E matua sao atoatoa le faapea, a o liliu atu tagata agai i le (malamalama) lelei, o loo i ai ia uiga e atoatoa ona faaalia e le Malamalama o le Lalolagi, o Iesu Keriso!
Uso e ma tuafafine, faamolemole ia maua le mafanafana o loo avanoa mai le malamalama mo i tatou. Tau ina ou fautua atu ni vaega se tolu lea o le a tatou maua ai pea le malamalama:
1. O Le Malamalama o le Ekalesia
O le Ekalesia o se sulu o le malamalama i se lalolagi pogisa. O se avanoa lelei lenei e avea ai o se tagata o Le Ekalesia a Iesu Keriso o le Au Paia o Aso e Gata Ai! Ua sili atu le malosi o le Ekalesia i lo seisi taimi ma e tupu malosi moni i aso taitasi a o auai mai tagata fou, fatuina faalapotopotoga fou, valaauina faifeautalai fou, ma tatalaina teritori fou i le talalelei. Tatou te vaaia i latou o e ua le o toe toaaga i le Lotu mo se taimi ma toe foi mai a o aumaia e le laveai na mafaufauina e Peresitene Thomas S. Monson ni vavega i aso taitasi.
Sa ou asiasi atu talu ai nei i le autalavou i Parakuei, Iurukuei, Chile, ma Atenitina i le taimi o le latou konafesi o le Mo Le Malosi o le Autalavou. Sa faaaluina e le faitau afe ma afe o alii ma tamaitai talavou se vaiaso e faamalolosia ai lo latou alolofa i le Faaola ma toe foi atu i o latou aiga ma uo ma faasusulu atu le malamalama ma le alofa o Keriso.
Vaai, o le a i ai pea lava tagata e faitio i le Ekalesia. Sa faapena lava mai le amataga ma o le a faaauau ai pea e oo i le iuga. Peitai tatou te le faatagaina ia faitioga e faavaivaia ai lo tatou mauaina gofie o le malamalama ua avanoa mo i tatou. O le iloaina o le malamalama ma le sailia o le a tatou agavaa ai mo le malamalama sili atu.
I se lalolagi pogisa, o le a tupu susulu pea le malamalama o le Ekalesia seia oo i le aso e atoatoa ai.
2. O Le Malamalama o le Talalelei
O le malamalama o le talalelei o le ala e “[susulu pea lava pea e oo i le aso e atoatoa ai],” ma e matua susulu lava i o tatou aiga ma i malumalu i le lalolagi atoa.
Ua taua e le Tala’i La’u Talalelei: “O le malamalama o le talalelei, e mafai ai e aiga ona foia ni feeseesea’iga, fefinaua’iga, ma luitau. O aiga ua mavaevae i le feeseesea’i e mafai ona faaleleia e ala i le salamo, faamagaloga, ma le faatuatua i le mana o le Togiola a Iesu Keriso.” Ia sili atu nei i lo se isi lava taimi, le tatau ona avea o o tatou aiga ma puna o le malamalama sili i tagata uma o siomia i tatou. E faateleina le malamalama i aiga a o latou faateleina le alofa ma le agalelei. A o tatou atiaeina ni aiga o le “faatuatua, … salamo, faamagaloga, faaaloalo, alofa, [ma le] agalelei,” tatou te lagona se alofa faateleina agai i le Faaola ma i le tasi ma le isi. O le a tupu malosi atu le aiga, ma o le a tupu susulu atili le malamalama ia i tatou taitoatasi.
Tatou te faitau i le Lomifefiloi o le Tusi Paia, “ua na o le aiga e mafai ona faatusalia i le malumalu le paia.” Ua i ai nei a tatou malumalu e 155 o loo faagaoioia ma isi o le a vave oo mai. E tele ma anoanoai aiga e faamauina mo le olaga nei ma le faavavau atoa. Ua auina mai e tagata le tele ma le tele o igoa o tuaa i le malumalu e faatino ai o latou sauniga faaola. O loo tatou lagonaina moni le olioli sili ma le fiafiaga i itu uma o le veli!
I se lalolagi pogisa, o le a tupu susulu pea le malamalama o le talalelei seia oo i le aso e atoatoa ai.
3. O Le Malamalama o Keriso
E le mafai ona e talanoa i le malamalama i le lalolagi e aunoa ma le talanoa i le Malamalama o le Lalolagi, o Iesu Keriso. O se faailoaga o se Tama Faalelagi alofa e faapea, o tagata uma e o mai i lenei olaga ua faamanuiaina i le Malamalama o Keriso e fesoasoani ai ia i latou e toe foi i le aiga. Na aoao mai Peresitene Boyd K. Packer: “O le Agaga o Keriso e i ai lava iina. O le Malamalama o Keriso e mo le lalolagi atoa e pei o le susulu o le la lava ia. Soo se mea lava o i ai le tagata ola, o loo i ai foi le Agaga o Keriso.” O le Malamalama o Keriso e “valaau ma faatosina mai ia faia mea lelei e le aunoa” ma saunia tagata uma o e saili le mea lelei ma le upumoni ia maua le Agaga Paia.
Ua aoao mai le Faaola o Ia o le malamalama e “faamalamalamaina o outou mata,” “faapupulaina o outou malamalamaaga,” ma “tuuina le ola i mea uma.” O le Malamalama o Keriso o le a fesoasoani ia i tatou e vaai ai i isi e ala i fofoga o le Faaola. O le a atili ona tatou alolofa ma malamalama ai i tauiviga a isi. O le a fesoasoani ia i tatou ia onosai atili ia i latou o e atonu e le mafai ona tapuai e pei ona tatou tapuai pe auauna atu e pei ona tatou mafaia. O le a fesoasoani ia i tatou ia malamalama atoatoa atili ai i le fuafuaga sili o le fiafia ma vaai i le auala tatou te avea uma ai ma se vaega o lena fuafuaga alofa. E avatua le ola, uiga, ma le faamoemoega i mea uma tatou te faia. I le taimi nei, faatasi ai ma le fiafiaga atoa o le a oo mai ia i tatou pe a tatou malamalama atoatoa atili i le Malamalama o Keriso, e le mafaatusaliaina i le olioli tatou te lagonaina pe a tatou vaaia le Malamalama o Keriso o galue i isi—aiga, uo, e oo lava i tagata ese.
Sa ou lagona lena olioli ina ua ou faalogo e uiga i taumafaiga a se vaega o tineiafi totoa o e sa taumafai e faasao se nofoaga autu o se siteki sa mu i Saute Kalefonia i le 2015. A o sasao le afi, sa valaau e se taitaiau sana uo o le Ekalesia e fesili i ai po o fea sa teu ai mea paia ma ipu o le faamanatuga ina ia mafai ona faasaoina i latou. Sa faamautinoa atu e lana uo ia te ia e leai ni mea paia ma o ipu o le faamanatuga e mafai tele lava ona toe sui. Ae sa lagona e le taitai e tatau ona ia faia se mea sili atu, lea sa ia toe auina atu ai le au tineiafi i totonu o le fale o loo mu e aveese mai ata vali uma o Keriso mai puipui ina ia faasaoina. Sa latou tuu foi se [ata vali o Keriso] e tasi i totonu o le loli fuimu ma le faamoemoe o le a mafai ona leoleoina le au tineiafi. Sa ou ootia moni i le agalelei, agaalofa, ma le mauaina gofie e le taitaiau o le Malamalama, i se taimi matautia ma faigata.
I se lalolagi pogisa, o le a tupu susulu pea le Malamalama o Keriso seia oo i le aso e atoatoa ai!
Ou te toe faaleo atu upu a Paulo: “Ia tatou oofu i ofu tau o le malamalama.” Ou te molimau atu e uiga ia Keriso. O Ia o le Malamalama o le Lalolagi. Tau ina ia faamalosia i tatou e ala i le malamalama o loo avanoa mo i tatou e ala i le auai atili i le lotu ma le faaaogaina atili o mataupu faavae o le talalelei i o tatou aiga. Tau ina ia tatou vaai soo i le Malamalama o Keriso i isi ma fesoasoani ia i latou ia vaaia i totonu o i latou lava. A o tatou mauaina lena malamalama, o le a faamanuiaina i tatou i isi malamalama, seia oo i le aso atoatoa pe a tatou toe vaaia “le Tama o malamalama,” lo tatou Tama Faalelagi. Ou te molimau atu ai i le suafa paia o le Malamalama o le Lalolagi, o Iesu Keriso, amene.