O Le Fuafuaga Mamalu a lo Tatou Tama
Ona o le fuafuaga paia a le Atua, ua tatou iloa ai o le fanau mai ma le oti ua na o ni taimi iloga ia o la tatou malaga i le ola e faavavau e faatasi ma lo tatou Tama Faalelagi.
I le popofou o a’u aoaoga o se fomai, sa ou maua ai le avanoa e fesoasoani ai i se tina talavou e faafanau lana uluai pepe. Sa to’a o ia, gauai, ma fiafia. Ina ua fanau mai le pepe, sa ou tuu atu ia te ia le pepe fou faapelepele. Faatasi ma loimata o le fiafia na tafe ifo i ona fofoga, sa ia avatu le pepe fou, sii i ona lima ma suesue o ia mai le ulu i tamaivae. Sa ia fusi ia te ia ma alofa ia te ia i le auala e na o le tina na te mafaia. O se faamanuiaga le i ai i totonu o lena potu faatasi ma ia.
E faapena le amataga o le olaga mo i tatou taitoatasi. Ae o lo tatou fanau mai ea o le amataga moni ea lena? E vaai le lalolagi i le fanau mai ma le oti o le amataga ma le gataaga. Ae ona o le fuafuaga paia a le Atua, ua tatou iloa ai o le fanau mai ma le oti ua na o ni taimi iloga ia o la tatou malaga i le ola e faavavau e faatasi ma lo tatou Tama Faalelagi. O ni vaega taua ia o le fuafuaga a lo tatou Tama—o taimi paia ia lea e fesootai ai le olaga faaletino ma le lagi. O le asō, i le mafaufau ai i le mea ua ou aoaoina mai le matauina o le fanau mai ma le oti e ala i le tele o tausaga o faatinoga faafomai ma auaunaga faale-Ekalesia, ou te fia molimau atu ai e uiga i le fuafuaga mamalu a lo tatou Tama.
“Ae tatou te lei fananau mai, sa tatou mau faatasi ma le Atua, le Tama o o tatou agaga. O [i tatou uma] lava i le lalolagi o ni uso ma tuafafine moni i Lona aiga, ma e pele i tatou taitoatasi ia te Ia. Sa tatou ola faatasi ma Ia mo se taimi umi lava ae tatou te lei fananau mai i le olaga nei—aoao, filifili, ma saunia.
Ona e alofa le Tama Faalelagi ia i tatou, ua Ia finagalo ai ia tatou maua le meaalofa aupito silisili e mafai ona Ia foai mai, le meaalofa o le ola e faavavau. E le mafai ona tau na ona Ia foai maia lenei meaalofa; sa ao ona tatou taliaina e ala i le filifili o Ia ma Ona ala. Sa manaomia ai i lenei mea lo tatou tuua o Lona afioaga, ma amatalia se malaga matagofie ma luitauina o le faatuatua, tuputupu ae, ma le avea ai. O le malaga na saunia e lo tatou Tama mo i tatou ua ta’ua o le ata o le faaolataga po o le fuafuaga o le fiafia.
I se fono tele i le lagi, sa ta’u mai ai e lo tatou Tama ia i tatou Lana fuafuaga. Ina ua tatou malamalama i ai, sa tatou fiafia tele lea sa tatou alalaga ai i le olioli, ma “sa pepese faatasi fetu o le taeao.”
O lena fuafuaga o loo fausia i luga o ni poutu autu se tolu: o poutu o le faavavau.
O le poutu muamua o le Foafoaga o le lalolagi, o le faatulagaga mo la tatou malaga faaletino.
O le poutu lona lua o le Pa’u o o tatou uluai matua, o Atamu ma Eva. Ona o le Pa’u, sa tuuina mai ai ia i tatou nisi o mea ofoofogia. Na mafiai ai ona tatou fananau mai ma maua se tino faaletino. O le a ou faafetai pea e faavavau i lo’u tina mo le aumaia o o’u uso ma a’u i lenei lalolagi ma aoao i matou e uiga i le Atua.
Ua tuuina mai foi e le Atua ia i tatou le faitalia—o le tomai ma le avanoa e filifili ai ma faatino mo i tatou lava. Ina ia fesoasoani ia i tatou ia filifili lelei, na aumai ai e le Tama Faalelagi ia i tatou ia poloaiga. O aso taitasi, pe a tatou tausia Ana poloaiga, ua tatou faaali atu i le Atua tatou te alolofa ia te Ia ma Ia faamanuia ai o tatou olaga.
I le silafia ai o le a le lelei pea a tatou filifiliga—pe i nisi faaupuga—agasala, na aumai ai e le Tama ia i tatou le poutu lona tolu: o le Faaola o Iesu Keriso ma Lana Togiola. E ala i Ona puapuaga, na totogi ai e Keriso le tau mo le oti faaletino ma le agasala. Sa Ia aoao mai: “Aua ua faapea lava ona alofa mai o le Atua i le lalolagi, ua ia aumai mai ai lona Atalii e toatasi, ina ia le fano se tasi e faatuatua ia te ia, ae ia maua le ola e faavavau.”
Na soifua Iesu Keriso i se olaga atoatoa, i le tausiga o poloaiga a Lona Tama i taimi uma. “Na ia femaliuai i auala o Palesitina,” aoao atu upumoni o le faavavau, “faamalolo i e mama’i, faapupula i e tauaso, ma faatutu mai e na oti.” Sa Ia “femaliuai ma agalelei” ma “augani atu i tagata uma ina ia mulimuli atu i Lana faataitaiga.”
I le faaiuga o Lona soifua i la le tino, sa Ia tootuli ai ma tatalo, ma faapea atu:
“Tama e, a e finagalo i ai, ia e ave ese lenei ipu ia te au; a e aua le faia lo’u loto, a o lou finagalo. …
“Ua puapuaga o ia, ua atili ai lana tatalo; o lona afu foi ua pei o alualu toto ua pau ifo i le eleele.”
Ua fesoasoani Keriso ia tatou malamalama atili i le loloto o Ona puapuaga ina ua Ia ta’u atu i le Perofeta o Iosefa Samita:
“O A’u, o le Atua, na mafatia i nei mea mo tagata uma, ina ia latou le mafatia pe afai latou te salamo;
“A e peitai, afai latou te le salamo e ao ina latou tiga e pei o A’u;
“O le tiga lea na faagateteina ai a’u lava, o le Atua, le silisili ese i mea uma, ona o le tiga, ma na maligi ai le toto mai pu laiti uma lava o le tino, ma na tiga le tino atoa ma le agaga.”
O iina i le Faatoaga o Ketesemane, na amata ai ona Ia totogia le tau mo a tatou agasala ma ma’i, o tatou tiga ma o tatou vaivaiga. Ona sa Ia faia, o le a le tuua ai lava na o i tatou i na vaivaiga pe afai tatou te filifili e savavali faatasi ma Ia. “Na pue faapagotaina o Ia ma faasalaina i ni tuua’iga sese, na ta’usalaina ina ia faamalie ai le motu o tagata, ma faasalaina i le oti i luga o le satauro i Kalevario.” I luga o le satauro “na Ia foai atu ai Lona soifua e togiola ai mo agasala a tagata uma [i] se meaalofa maoae e fai ai ma sui mo tagata uma o le a ola ma soifua mai i le lalolagi.”
Sa Ia tautino mai:
“Faauta, o Au o Iesu Keriso, o le na molimau i ai perofeta o le a sau i le lalolagi.
“Ma faauta, o A’u o le malamalama ma le ola o le lalolagi, ua ou inu foi i lena ipu oona na tuuina mai ia te au e le Tama, ma ua ou faamamaluina le Tama i le aveina i ou luga o agasala a le lalolagi.”
Ona oo lea i le uluai aso o le vaisapati, sa Ia toetu mai le tuugamau ma se tino toetu atoatoa, e le toe oti lava. Ma ona sa Ia [toetu], o le a faapena foi i tatou.
Ou te molimau atu e moni lava na toetu mai le Keriso mai le tuugamau. Ae ina ia toetu mai lena tuugamau, sa ao ona maliu muamua o Ia. Ma e faapena foi i tatou.
O le isi o faamanuiaga maoae o lo’u olaga o le lagonaina lea o le latalata mai o le lagi i na taimi ou te nofo ai i talaane o moega o nai tagata a o latou maliliu atu. I se taeao po lava i ni nai tausaga ua mavae, sa ou ulufale atu ai i le potu o le falemai o se tina ua oti lana tane o le Au Paia o Aso e Gata Ai na maua i le kanesa. E toalua lana fanau teine sa latou saofafai faatasi ai. A o ou alu atu i talaane o lona moega, sa vave ona ou iloaina e le o toe tigaina o ia, ona faatoa maliu atu lava.
I lena taimi o le maliu, sa faatumulia le potu i le filemu. Sa maua ana tama teine i se faanoanoaga suamalie, ae sa faatumulia o la loto i le faatuatua. Sa la iloaina e le o alu ese atu lo latou tina ae ua toe foi atu i le aiga. E oo lava i o tatou taimi o le loloto sili o le faavauvau, i taimi e foliga mai e le te’a ese faigata ma foliga mai e le fea le olaga, e mafai ona tatou maua le mafanafana i lo tatou Faaola, ona na puapuagatia foi o Ia. O se faamanuiaga mo a’u le i ai i totonu o lena potu.
A tatou feoti, e tuua e o tatou agaga o tatou tino ma tatou o atu ai i le isi laasaga e sosoo ai o la tatou malaga, le lalolagi o agaga. O se nofoaga o aoaoga, salamo, faamagaloga, ma le avea ai le nofoaga tatou te faatalitali ai i le Toetutu.
I se aso sili i le lumanai, o tagata uma na fananau mai o le a toetutu mai le tuugamau. O le a toe faatasia o tatou agaga ma o tatou tino faaletino i lo latou tulaga atoatoa. O le a toetutu tagata uma, “o e matutua ma e talavou, … tane uma ma fafine, o e amioleaga ma e amiotonu,” ma “o le a toefuataiina mea taitasi i lona tulaga atoatoa.”
A uma le Toetutu o le a tatou maua le faamanuiaga silisili o le faamasinoina e lo tatou Faaola, lea na fetalai mai:
“O le a ou aumai ai tagata uma ia te au, ina ia faamasinoina i latou e tusa ma a latou galuega.
“Ma o le a oo mai foi, o le a faatumuina soo se tasi e salamo ma papatiso i loʼu igoa; ma afai e tumau o ia seia oo i le iuga, faauta, o ia lea o le a ou le tausalaina i luma o lou Tamā i lena aso pe a ou tu e faamasino i le lalolagi.”
Ona oo lea, e ala ia Keriso ma Lana Togiola, o i latou uma na filifili e mulimuli ia te Ia e ala i le faatuatua, salamo, papatisoga, taliaina o le Agaga Paia, ma le tumau seia oo i le iuga o le a iloaina o le mutaaga o la latou malaga o le mauaina lea “o lo latou taunuuga faalelagi o le avea ma suli o le ola e faavavau.” O le a latou toefoi atu i le afioaga o lo latou Tama e mau faatasi ma Ia e faavavau. Ia tatou filifili lelei.
E tele lava isi mea sili atu i lo tatou olaga nai lo mea e tutupu i le va o le fanau mai ma le oti. Ou te valaaulia outou ia o mai ma mulimuli ia Keriso.
Ou te valaaulia tagata uma o Le Ekalesia a Iesu Keriso o le Au Paia o Aso e Gata Ai, ia “o mai ia Keriso [i aso uma], ma faaatoatoaina ia te ia, ma faafiti outou lava mai mea uma e le faaleatua, … [lea] e ala i le faamaligiina o le toto o Keriso, … [e mafai ai ona] outou paia, ua aunoa ma se ila.”
Ou te valaaulia i latou e le o ni tagata o lenei Ekalesia ia o mai ma faitau i le Tusi a Mamona ma faafofoga atu i faifeautalai. O mai ma ia maua le faatuatua ma salamo mai i a outou agasala. O mai ma ia papatisoina, ma maua le Agaga Paia. O mai ma ola i se olaga fiafia e faatumulia ia Keriso. A o outou o mai ai ia te Ia ma tausi i Ana poloaiga, ou te folafola atu e mafai ona outou mauaina le filemu ma le faamoemoega i lenei olaga faaletino ua tele ina faigata atoa ai ma le “ola e faavavau i le lalolagi a sau.”
Mo i latou ua lagonaina nei upumoni ma mo soo se mafuaaga lava ua tou se ese ai, ou te valaaulia outou e toefoi mai. Toe foi mai nei. E alofa lo tatou Tama ma le Faaola ia te oe. Ou te molimau atu o loo i ai ia Keriso le mana e tali ai au fesili, faamalolo ai ou tiga ma faanoanoaga, ma faamagalo ai au agasala. Ou te iloa e moni lenei mea. Ou te iloa e moni nei mea uma lava. O loo soifua Keriso; O Lana Ekalesia lenei. I le suafa, o Iesu Keriso, amene.