O Lona Aao Taiala i Aso Uma
E silafia e le Tama Faalelagi le mea e sili ona manaomia e oe ma au i lo se isi lava.
O se tasi o meafaigaluega sili ona pele a le Tama Faalelagi e taitai ai Lana fanau o matua matutua amiotonu. Sa faapena le tina o lo’u tama. I se mea sa tupu a o ou latiiti tele e manatuaina, sa aoa’i ai au e lou tama. O le matauina o lenei aoaiga, sa faapea mai ai lou tinamatua, “Monte, ou te talitonu o loo e so’ona aoa’i o ia.”
Sa tali lo’u tama, “Tina, ou te faasa’oina lau fanau e pei ona ou manao ai.”
Ma sa faailoa lemu atu e lou tinamatua atamai, “Ma ou te faia foi.”
Ou te mautinoa sa lagona e lou tama le taitaiga atamai a lona tina i lena aso.
Pe a mafaufau i le taitaiga, atonu tatou te mafaufau i se viiga tatou te iloa uma ma fiafia ai—“O A’u se Atalii o le Atua.” I le tali tatou te maua ai upu “Ta’u mai, savali mai i o’u tafatafa, ina ne’i o’u sese.”
Talu ai nei, sa faatoa ou malamalama ai i lena tali o le taitaiga paia i matua. A o mafaufau ai i nei upu, sa ou iloaina a o aofia ai lena taitaiga, o loo i ai se faauigaga sili atu. Tatou te augani atu taitoatasi i aso uma ia taitai i tatou e le Tama Faalelagi, faasino i tatou, ma savali i o tatou autafa.
Sa faamatala e Peresitene Dieter F. Uchtdorf: “E silafia lelei lava e lo tatou Tama oi le Lagi manaoga o Lana fanau nai lo o se isi lava tagata. O Lana galuega ma le mamalu o le fesoasoani pea lava pea ia i tatou, ma tuuina mai ia ni punaoa matagofie faaletino ma faaleagaga e fesoasoani i la tatou savaliga e toe foi atu ia te Ia.”
Faafofoga i na upu: E silafia lelei lava e lo tatou Tama oi le Lagi mea e manaomia e oe ma au i lo o se isi lava tagata. O se taunuuga, ua Ia atiaeina se ato o mea manaomia e fetaui ia i tatou taitoatasi. E i ai ni vaega e tele. E aofia ai Lona Alo ma le Togiola, le Agaga Paia, poloaiga, tusitusiga paia, tatalo, perofeta, aposetolo, matua, matua matutua, taitai o le Ekalesia i le lotoifale, ma le tele o isi—e fesoasoani uma ia i tatou ia toe foi atu ma nonofo faatasi ma Ia i se aso.
Sei ou faasoa atu i le aso na o ni nai vaega o le ato o mea manaomia lea ua ou iloa ai o se Tama agaalofa o loo taitaia, faasino, ma savali i o’u autafa ma lou aiga. O lau tatalo o le a iloa e outou taitoatasi i o outou aafiaga o le Tama oi le Lagi e taitaia, faasino, ma savali i o outou autafa ma, faatasi ma lena malamalama, tou te amata i le lototoa, ma le iloaina e le o tuuatoatasi moni lava outou.
O poloaiga a le Tama Faalelagi o vaega autu ia o le ato o mea manaomia. Sa tautino mai Alema “E lei avea lava le amioleaga ma fiafia.” O le faatagaina o amioga le talafeagai e aunoa ma le aoaiga agaalofa o le alofa sese ma e faamalosia ai le manatu masani atonu o le amioleaga lava o le fiafia moni lea. Sa faamanino mai e Samuelu le sa Lamana le sese o lenei manatu: “Sa outou saili mo le fiafia i le fai o le amioletonu, o se mea lea ua le tusa ai ma le natura o lena amiotonu lea o loo i lo tatou FaaAo silisili ma Faavavau.”
E ala i Ana perofeta, e faamanatu mai pea e le Tama Faalelagi ia i tatou o le amiotonu o le fiafia lea. Mo se faataitaiga, sa aoao e le Tupu o Peniamina e “manaomia [e le Tama Faalelagi] ia outou faia e pei ona ia poloaiina ai outou; o se mea a outou faia, e faamanuia vave mai lava o ia ia te outou.” E sau mai i se isi viiga le faamanatu faapena:
I le vaitaimi o lou aso fanau lona 14, sa ou aoao e uiga i nisi o faamanuiaga nei. Sa ou matauina ai le eseese o uiga mai i o’u matua. O le mafaufau ai i le mea sa ou matauina, sa ou fesili atu ai, “Tatou te o i se misiona?” Sa faamautinoa e foliga te’i a lou tina lou fia iloa. Mulimuli ane, i se fonotaga faaleaiga, sa matou iloaina ma o’u tei ua valaaulia o matou matua e pule faamalumalu i se misiona.
Sa matou nonofo i se faatoaga matagofie i Wyoming. Mai i lau vaaiga, sa lelei atoatoa le olaga. E mafai ona ou sau i le fale mai le aoga, faamaea au feau, ma alu e tulimanu, fagota, pe tafafao ma la’u taifau.
E lei leva talu le iloaina e uiga i le valaauga, sa ou iloaina e ao ona ou tuua la’u taifau, o Blue. Sa ou alu atu i lo’u tama, ma fesili po o le a sa’u mea e tatau ona fai ia Blue. Sa ou manao e faamamafa atu le le fea o le mea na manaomia e le Atua. O le a le galo ia te au lenei tali. Sa ia faapea mai, “Ou te le o mautinoa. Masalo e le mafai ona alu o ia ma i tatou, o lea e tatau la ona e fesili atu i le Tama Faalelagi.” E le o le tali lena sa ou faamoemoe i ai.
Sa amata ona ou faitauina le Tusi a Mamona. Sa ou tatalo faatauanau ia iloa pe tatau ona ou aveesea la’u taifau. E lei oo mai lau tali i se taimi vave; o se manatu faapitoa sa oo mai pea i lou mafaufau: “Aua le avea ma se avega i ou matua. Aua nei avea ma se avega. Ua ou valaauina ou matua.”
Sa ou iloa le mea na manaomia e le Tama Faalelagi. E lei tuuitiitia e lena malamalama le tiga o le aveesea o la’u taifau. Peitai, e ala i lena ositaulaga itiiti, sa faamaluluina lou loto ma ou maua le filemu i le sailia o le finagalo o le Tama Faalelagi.
Ou te faafetai i lou Tama Faalelagi mo faamanuiaga ma le fiafia sa ou maua e ala i tusitusiga paia, tatalo, le Agaga Paia, ma se tama faalelalolagi agavaa o lē na opomauina lana matafaioi o se faiaoga autu o le talalelei o lana fanau. Sa la taitaia au, faasino au, e oo lava i le savavali i ou autafa e fesoasoani ia te au ia maua le ala—aemaise pe a tatau ona ou faia se mea faigata.
E faaopoopo i le mauaina o le ato o vaega o mea manaomia sa ou ta’ua, ua faamanuiaina taitoatasi i tatou i se taitai perisitua e taitai ma faasino i tatou.
Na saunoa mai Peresitene Boyd K. Packer: “O Epikopo e musuia! O i tatou uma e i ai le faitalia e talia pe teena fautuaga mai o tatou taitai, ae ‘aua lava ne’i le amanaiaina le fautuaga a lau epikopo, pe tuuina atu i luga o le pulelaa pe tuuina atu taitoatasi.”
E taumafai nei tamalii e fai ma sui o le Alii. Pe o tatou matutua pe talavou, e manao Satani ia tatou mafaufau ua leai se faamoemoe, o loo i ai iina epikopo e taiala i tatou. A talanoa ma epikopo, ua ou maua se autu masani e faatatau i le ta’uta’u atu o le lē usiusitai po o le mafatia ma le lē iloa mai i mea sese matautia. E manao vave Epikopo e faailoa atu le alofa o le Tama Faalelagi mo le tagata ma se manao ia savali i ona autafa a o ia sailia le ala i le aiga.
Atonu o le vaega aupito sili o le ato o mea manaomia ua faamatalaina i upu nei: “Aua ua faapea lava ona alofa mai o le Atua i le lalolagi, ua ia au mai ai lona Atalii e toatasi.”
Ia aoao i tatou uma i mea e tatau ona fai, sa taitai e Iesu Keriso le ala i le tuuina mai o le faataitaiga atoatoa lea e tatau ona tatou taumafai e faataitai i ai. Ua Ia augani mai ia i tatou faatasi ai ma aao mafola e o mai, ma mulimuli ia te Ia. Ma pe a tatou toilalo, lea tatou te oo uma ai, Na te faamanatu mai ia i tatou, “Aua faauta, o A’u, o le Atua, na mafatia i nei mea mo tagata uma, ina ia latou le mafatia pe afai latou te salamo.”
Oka o se meaalofa ofoofogia! O le salamo e le o se faasalaga, o se faamanuiaga. O se faamanuiaga e taitai ma faasino i tatou. Leitioa a tautino mai tusitusiga paia e tatau ona tatou lē aoao atu se mea, vagana ai le salamo.
E i ai i le Tama Faalelagi le tele o punaoa, ae e masani ona Ia faaaogaina le isi tagata e fesoasoani ia te Ia. Na te aumaia avanoa i aso uma e taitai ai, faasino, ma savali ai i autafa o se tagata e manaomiaina. E tatau ona tatou mulimuli i le faataitaiga a le Faaola? O i tatou foi e faia le galuega a le Tama Faalelagi.
I le avea ai ma Au Peresitene Aoao o Alii Talavou, matou te iloa e faamanuiaina le autalavou pe a latou maua ni matua ma taitai o e galulue mo le Tama Faalelagi i le taitaiina, faasinoina, ma le savavali ai i o latou autafa. E tolu mataupu faavae o le a fesoasoani ia i tatou e avea ma vaega o le ato o mea manaomia a le Tama Faalelagi mo isi:
Muamua, ia faatasi ma le autalavou. Sa faamamafa e Peresitene Henry B. Eyring lenei tulaga: “E i ai nisi mea e mafai ona tatou faia e sili atu ona taua. O le a sili atu ona mamana a tatou faataitaiga o le ola ai i le aoaoga faavae nai lo le faaaogaina o upu tatou te aoao atu ai le aoaoga faavae.” Ina ia taitai le autalavou e manaomia le i ai faatasi ma i latou. O le taimi tuuto o se faailoaga o le alofa lea e faatagaina i tatou e aoao atu i le upu ma le faataitaiga.
Lua, ina ia taitai moni le autalavou, e tatau ona tatou faafesootaia i latou ma le lagi. E oo mai pea le taimi e tatau ai ona tu taitoatasi le tagata na o ia. Ua na o le Tama Faalelagi e mafai ona i ai iina e taitai i taimi uma ma i nofoaga uma. E tatau ona iloa e o tatou talavou le auala e saili ai le taitaiga a le Tama Faalelagi.
Tolu, e tatau ona tatou tuu atu ia taitai le autalavou. E pei o matua alolofa o e uuina le lima o se tamaitiiti laitiiti o aoao e savali, e tatau ona tatou tuu i latou ina ia alualu i luma le autalavou. O le tuu atu i autalavou e taitai e manaomia ai le onosai ma le alofa. E faigata atu ma e manaomia ai le tele o le taimi i lo le faia e i tatou lava. Atonu latou te tautevateva i le ala, ae tatou te savavali i o latou autafa.
Uso e ma tuafafine, o le a i ai taimi i o tatou olaga e foliga mai ai o loo mamao pe e leai ni faamanuiaga o le taitaiga. Mo ia taimi o le lē mautinoa, sa folafola mai Elder D. Todd Christofferson: “Ia avea au feagaiga ma mea e sili ona taua ma ia tonu foi ma atoatoa lou usiusitai. Ona mafai lea ona e ole atu i le faatuatua, aua lava nei masalosalo, e tusa ai ma mea e te manaomia, ona tali mai lea o le Atua. O le a Ia lagolagoina oe a o e mataituina ma galue. I Lona lava taimi e tatau ai ma Lana lava ala, o le a Ia faaloaloa mai ai Lona aao ia te oe ma faapea mai, ‘O A’u lenei.’”
I se taimi faapea, sa ou saili ai le apoapoaiga a le Tama Faalelagi e ala i le tatalo faifai pea ma le faamaoni mo le silia ma le tausaga e saili le fofo i se tulaga faigata. Sa ou iloaina lava e tali mai e le Tama Faalelagi tatalo faamaoni uma. Ae sa ou oo i se atugaluga i se tasi o aso lea na ou auai atu ai i le malumalu ma se fesili e tasi: “Tama Faalelagi, E te popole moni ea?”
Sa ou nofo latalata i le pito i tua o le potu faatalitali o le Malumalu o Loga Iuta ma, sa faate’ia au, sa ulufale mai i le potu i lena aso le peresitene o le malumalu o Vaughn J. Featherstone, o se uo mamae ia te au. Sa ia tu i le pito i luma o le faapotopotoga ma faafeiloai i matou uma. Ina ua ia iloa mai au faatasi ma tagata ulu, sa ia le toe talanoa, tilotilo mai i o’u mata, ma faapea mai, “Brother Brough, fiafia lava e vaai ia oe i le malumalu i le aso.”
O le a le galo lava le lagona o lena taimi faigofie. E pei sa faaloaloa mai e le Tama Faalelagi—i lena faafeiloaiga—Lona aao ma fetalai mai, “O A’u lenei.”
E popole moni le Tama Faalelagi ma faafofoga ma tali mai i tatalo a tamaiti uma. I le avea ai o se tasi o Lana fanau, ou te iloa o le tali i a’u tatalo sa oo mai i le taimi a le Alii. Ma e ala i lena aafiaga, sa sili atu ona ou malamalama nai lo seisi lava taimi o i tatou o fanau a le Atua ma sa Ia auina mai i tatou iinei ina ia mafai ona tatou lagona Lona faatasi mai i le taimi nei ma ia toe foi atu ma mau faatasi ma Ia i se aso.
Ou te molimau atu, o le Tama Faalelagi e taitai, faasino, ma savali i o tatou autafa. A tatou mulimuli i Lona Alo ma faalogo i Ana auauna, o aposetolo ma perofeta, o le a tatou maua le ala i le ola e faavavau. I le suafa, o Iesu Keriso, amene.