O Le Perisitua Sauniuni
Saunia e Peresitene Henry B. Eyring
Feasoasoani Muamua i le Au Peresitene Sili
I le sauniuniga faaleperisitua, o le “faaali mai ia te au” e sili ona taulia nai lo le “ta’u mai ia te au.”
Ou te faafetai i le faatasi ai ma le au perisitua a le Atua, o loo salalau ai i le salafa o le lalolagi. Ou te faafetai mo lo outou faatuatua, o a outou auaunaga, ma a outou tatalo.
O lau savali i lenei po e faatatau i le Perisitua Arona. E mo i tatou uma foi o e fesoasoani i le faataunuuina o folafolaga a le Alii mo i latou o e umia le mea ua faamatalaina i le mau o le “perisitua maualalo.” Ua ta’ua foi o le perisitua sauniuni. O le sauniuniga faamamaluina lena lea o le a ou talanoa atu ai i lenei po.
O le fuafuaga a le Alii mo Lana galuega ua tumu i sauniuniga. Sa Ia saunia le lalolagi ina ia tatou oo ai i tofotofoga ma avanoa o le olaga faitino. A o tatou i ai iinei, o loo tatou i ai i le mea ua ta’ua e tusitusiga paia o se “olaga sauniuni.”
Sa faamatalaina e le perofeta o Alema le taua tele o lena sauniuniga mo le ola e faavavau, lea e mafai ona tatou ola faavavau ai i ni aiga faatasi ma le Atua le Tama ma Iesu Keriso.
Sa Ia faamatala mai le manaomia o se sauniuniga i le auala lenei: “Ma ua tatou vaai ua oo mai le oti i le fanauga uma tagata, ioe, le oti lea na tautala i ai Amoleka, o le oti lea faaletino; e ui i lea sa i ai se avanoa na tuu mai i le tagata e mafai ai ona ia salamo; o lea ua avea ai le olaga lenei ma tulaga nofovaavaai; o se taimi e saunia ai e fetaiai ma le Atua; o se taimi e saunia ai mo lena olaga e le gata, lea na ma tautatala atu ai, lea pe a mavae atu le toetutu mai o e ua oti.”
E pei ona tuuina mai ia i tatou le taimi tatou te feola ai i le olaga faaletino ina ia saunia e feiloai ai ma le Atua, o le taimi ua tuuina mai foi ia i tatou e auauna atu ai i le Perisitua Arona o se avanoa lea tatou te saunia ai ina ia aoao i le auala e tuu atu ai se fesoasoani taua i isi. E pei lava foi ona tuu mai e le Alii le fesoasoani tatou te manaomia e manumalo ai i tofotofoga o le olaga faitino, ua Ia auina mai foi ia i tatou le fesoasoani i la tatou sauniuniga mo le perisitua.
O lau savali e mo i latou o e na auina mai e le Alii e fesoasoani ia saunia faapea foi ma i latou o e umia le Perisitua Arona. Ou te tautala atu i tamā. Ou te tautala atu i epikopo. Ma ou te tautala atu ia i latou o le Perisitua Mekisateko o e ua faatuatuaina e avea ma soa ma faiaoga o alii talavou o e o i ai i sauniuniga mo le perisitua.
Ou te tautala i le mamalu ma le loto faafetai mo le toatele o o outou i le salafa o le lalolagi faapea ma e maimoa mai i se isi taimi.
O le a ou faatalale pe afai ou te le talanoa atu e uiga i se peresitene o le paranesi ma se epikopo a o o’u talavou. Sa avea au ma se tiakono i le 12 o tausaga i se tamai paranesi i le itu i sasae o le Iunaite Setete. Sa toalaiti tele le paranesi lea sa na o i maua ai ma lou uso matua ē na umia le Perisitua Arona seia oo ina valaaulia e lou tama, lea sa avea ma peresitene o le paranesi, se alii e le matua tele ina ia auai i le Ekalesia.
Sa maua e le tagata fou liliu mai le Perisitua Arona ma, faatasi ai ma se valaauga e leoleoina le Au Perisitua Arona. Ou te manatua pea e pei o ananafi. Ou te manatua lau matagofie o laau o le tautoulu a o matou o faatasi ma lena tagata fou liliu mai ma lou uso e faia se mea mo se tina ua oti lana tane. Ou te le manatua po o le a le galuega fesoasoani, ae ou te manatua le lagonaina o le faatasi mai o le mana o le perisitua i le faia o le mea lea sa ou iloa mulimuli ane na poloai mai le Alii e tatau ia i tatou uma ona faia ina ia faamagalo ai a tatou agasala ma saunia ai e vā’ai ia te Ia.
A o ou toe manatuaina lena mea i le taimi nei, ou te lagona le faafetai mo se peresitene o le paranesi lea sa valaauina se tagata fou liliu mai e fesoasoani i le Alii e saunia ni tama se toalua o le a avea i se aso ma ni epikopo e poloaiina e tausia ē matitiva ma ē le tagolima ma ia pulefaamalumalu foi i le perisitua sauniuni.
Sa avea pea au o se tiakono i le taimi na siitia atu ai lo matou aiga i se uarota telē i Iuta. O se taimi muamua lea sa ou lagonaina ai le mana o se korama atoa i le Perisitua Arona. O le mea moni, o le taimi muamua lea faato’a ou vaai ai i se korama. Ma mulimuli ane o se taimi muamua foi lea sa ou lagona ai le mana ma faamanuiaga a se epikopo a o pulefaamalumalu ai i se korama a ositaulaga.
Sa valaauina au e le epikopo e avea ma ona fesoasoani muamua i le korama a ositaulaga. Ou te manatua o ia lava e aoaoina le korama—po o le a lava lona pisi faatasi ai ma isi alii talenia o e sa mafai ona ia valaauina e aoao i matou. Na ia faatulagaina nofoa i le potuaoga i se li’o. Sa fai mai o ia ou te saofai i le isi nofoa i lona itu taumatau.
Sa mafai ona ou tilotilo i luga atu o lona tauau a o ia aoao mai. Sa fai ma ia tilotilo mai i lalo i pepa na taina lelei i le laau lomitusi o loo i totonu o se tamai faila pa’u mamoe i luga o ona vae faapea ma tusitusiga paia tuai ua faailogaina lea sa ia tatalaina i luga o le isi tulivae. Ou te manatuaina le fiafia i lona toe faamatalaina o tala o le lototoa mai le tusi a Tanielu ma lana molimau i le Faaola, le Alii o Iesu Keriso.
O le a ou manatua pea le ala na valaauina ai e le Alii ni soa na filifilia ma le faaeteete mo e umia le perisitua sauniuni.
Sa i ai i lo’u epikopo ni fesoasoani malolosi, ma mo ni mafuaaga ou te lei malamalama i ai i lena taimi, sa sili atu ma le faatasi ona ia valaau mai ia te au i le telefoni i le fale ma fai mai, “Hal, ou te manaomia oe ta te ō o se soa e fai ni asiasiga.” E faatasi ona ia ave au i se fale o se tina ua oti lana tane sa nofotoatasi ma sa leai ni meaai i totonu o le fale. A o ma toe foi atu i le fale, sa ia faatu lana taavale, tatala ana tusitusiga paia, ma tau mai ia te au le mafuaaga na te tausia ai lena tina nofotoatasi e peisea’i ua na o ia e i ai le mana e le gata e tausia ai ia lava ae, i se taimi i le lumanai, o le a ia mafai ona fesoasoani atu i isi.
O le isi asiasiga sa faia i se alii ua leva ona le toe sau i le Lotu. Sa valaaulia o ia e lou epikopo e toe foi mai e faatasi ma le Au Paia. Sa ou lagonaina le alofa o lo’u epikopo mo se tasi sa foliga mai o ia o se fili e le alofagia ma faatautee.
O se isi mea na tupu sa ma asia ai se aiga lea sa auina mai ni teineiti se toalua e o laua matua inupia e faafetaui i maua i le faitotoa. Sa fai mai teineiti i le va o le faitotoa valavala o loo tofafa lo la tina ma lo la tama. Sa talanoa atu pea i ai le epikopo, ataata ma viia lo la lelei ma lo la totoa, lea na foliga mai ia te au e 10 minute pe sili atu. A o ma savavali ese mai le fale, sa ia fai mai ma le lemu, “O se asiasiga lelei lena asiasiaga. O le a le galo lava i la teineiti laiti na ta o mai.”
E lua ni faamanuiaga e mafai ona tuuina atu e se soa perisitua sinia, o le faatuatuaina ma se faataitaiga o le alofa. Sa ou vaaia lena mea ina ua tuuina mai i lo’u atalii se soa o faiaoga o aiga lea sa tele naua ni ona aafiaga faaleperisitua nai lo ia. O lana soa sinia na faalua ona avea ma peresitene o le misiona ma sa auauna atu i isi tofiga faaletaitai.
Ae la te lei asiasi atu i se tasi o a la aiga ua tofia i ai, sa talosaga lena taitai perisitua atamai ina ia asiasi muamua mai i lo’u atalii i lo matou fale. Sa la faatagaina au e faalogologo. Sa ia amata i se tatalo, ole atu mo se fesoasoani. Ona ia fai mai lea o se mea faapenei i lou atalii: “Ou te manatu e tatau ona ta aoao atua se lesona o le a faalogo i ai lenei aiga e pei o se valaau ia salamo. Ou te manatu o le a latou lē faalogo lelei mai ia te au. Ou te manatu e sili atu ona latou fia faalogo i le savali mai ia te oe. O le a sou lagona i lena mea?”
Ou te manatua le fefe tele na i ai i mata o lo’u atalii. Ou te lagona pea le fiafia i lena taimi ina ua talia e lo’u atalii le faatuatuaina.
E le o se mea na tupu fua le tuufaatasia e le epikopo o lena soa. Sa auala atu i se sauniuniga toto’a faapea sa iloa e le soa sinia lagona o lena aiga lea o le a la aoaoina. Sa auala mai i se musumusuga lona lagonaina o le tuu atu o le avanoa, e faatuatuaina ai se talavou e le lava le poto masani e valaau atu i fanau matutua atu a le Atua ia salamo ma o mai i le saogalemu.
Ou te le iloa le taunuuga o le la asiasiga, ae ou te iloa i le avea ai ma se epikopo, o sē umia le Perisitua Mekisateko, faatasi ai ma le Alii, sa sauniaina se tamaitiiti ia avea ma se alii perisitua ma se epikopo i se aso.
O lenei, o ia ituaiga tala o le faamanuiaina i sauniuniga o le perisitua e te masani ai mai mea sa e vaai i ai ma mea ua e oo i ai i lou lava olaga. Ua outou silafia ma avea ma nei ituaiga epikopo, soa, ma matua. Ua outou vaai i le aao o le Alii i a outou sauniuniga mo tiute faaleperisitua ia ua Ia silafia o loo taoto mai i o outou luma.
Ua tofu i tatou uma i le perisitua ma se matafaioi e fesoasoani i le Alii e saunia isi. E i ai nisi mea e mafai ona tatou faia e sili atu ona taua. O le a sili atu ona mamana a tatou faataitaiga o le ola ai i le aoaoga faavae nai lo le faaaogaina o upu tatou te aoao atu ai le aoaoga faavae.
O le tulaga sili ona taua i la tatou auaunaga faaleperisitua o le valaaulia lea o tagata ia o mai ia Keriso e ala i le faatuatua, salamo, papatisoga, ma le mauaina o le Agaga Paia. Sa tuuina mai e Peresitene Thomas S Monson, mo se faataitaiga, ni lauga ina ia faagaepuina ai loto i na aoaoga faavae uma. Ae o le mea ua ou iloa e uiga i mea sa na faia ma tagata ma faifeautalai ma uo a le Ekalesia a o pulefaamalumalu ai i le misiona a Toronto ua uunaia ai au ia faatino.
I sauniuniga faaleperisitua, o le “faaali mai ia te au” e sili ona taulia nai lo le “ta’u mai ia te au.”
O le mafuaaga lena ua matua taua ai lava ia tusitusiga paia i le sauniaina o i tatou i le perisitua. Ua faatumulia i faataitaiga. Ou te lagona e peisea’i o ou vaai atu ia Alema o mulimuli i le faatonuga a le agelu ona toe faananati mai lea e aoao atu tagata amioleaga i Amonaea o e na teenaina o ia. E mafai ona ou lagona le malulu i totonu o le sela o le falepuipui ina ua fetalai atu le Atua i le Perofeta o Iosefa ina ia lototele o loo leoleoina o ia. Faatasi ai ma na ata faatusitusiga paia i le mafaufau, e mafai ai ona tatou saunia ai ina ia tumau i la tatou auaunaga pe a foliga mai e faigata.
E mafai e se tamā po o se epikopo po o se soa sinia a faiaoga o aiga o lē faaalia lona faatuatuaina o se talavou e umia le perisitua ona suia lona olaga. Sa talosagaina lo’u tamā i se tasi taimi e se uso o le Korama a Aposetolo e Toasefululua ina ia tusia se tamai faamatalaga i mataupu faasaienisi ma faalelotu. O lo’u tamā o se saienitisi ma sē umia ma le faamaoni le perisitua. Ae ou te manatua pea le taimi sa ia tuuina mai ai ia te au le pepa sa ia tusia ma fai mai, “Ia, ae ou te lei auina atua lenei pepa i le Toasefululua, ou te manao e te faitau i ai. O le a e iloaina pe o sa’o.” E 32 tausaga e matua ai o ia ia te au, ma e lemafuatiaina lona poto ma lona atamai tele.
O loo faamalosia pea au i lena faatuatuaina mai se tamā maoae ma se alii perisitua. Sa ou iloa o lona faatuatuaina sa lei faapea na i ai ia te au ae o le Atua e mafai ma o le a tau mai ia te au le mea moni. E mafai e outou na o soa ua lava le poto masani ona faamanuiaina se talavou o umia le perisitua i sauniuniga i soo se taimi lava e mafai ona e faaali atu ai ia te ia lena ituaiga o faatuatuaina. O le a fesoasoani ia te ia ina ia faatuatuaina lagona filemu o musumusuga mo ia lava pe a oo mai a o ia faaee atu ona lima i se aso e faamauina se faamanuiaga o se tamaitiiti na fai mai fomai o le a oti. O lena faatuatuaina na silia ma le faatasi ona fesoasoani ia te au.
O le faamanuiaina o i tatou i le sauniaina o isi i le perisitua o le a oo mai i ni vaega i le tele o lo tatou alolofa ia i latou. E matua moni lava lena mea pe afai e tatau ona tatou faasa’oina i latou. Mafaufau i se taimi e faia ai e se tasi e umia le Perisitua Arona, atonu i le laulau o le faamanatuga, se mea sese i le faataunuuina o se sauniga. O se tulaga ogaoga tele lena. O nisi taimi e manaomia ai e le mea sese se faasa’oga i luma o tagata lautele faatasi ai ma se avanoa e ono tupu ai le le fiafia, o se lagona o le maasiasi po o le teenaina.
O le a outou manatuaina le fautuaga a le Alii: “E aoai atu i taimi e tatau ai ma le maatiati, pe a uunaia ai e le Agaga Paia; ma ona faaali atu ai lea pe a mavae, o se alofa faateleina ia te ia o le na e aoaiina, nei manatu o ia ia te oe o sona fili.”
O le upu faateleina e i ai se uiga faapitoa i le sauniaina o ē umia le perisitua pe a manaomia le faasa’oina o i latou. O loo fautua mai e le upu se faateleina o se alofa ua leva ona i ai iina. O le “faaali atu” e faatatau i le faateleina [o le alofa]. O outou o ē saunia i latou e umia le perisitua o le a mautinoa lava le vaaia o i latou o faia ni mea sese. Ae latou te lei mauaina se aoaiga mai ia te oe, atonu e tatau ona latou muai lagonaina lou alofa i le amataga ma faaauau ai lava. Atonu sa latou lagonaina lou viia faamaoni o i latou ae latou te lei taliaina lau aoaiga.
E faamamaluina e le Alii Lava Ia i latou o le perisitua maualalo o ē faamamaluina o latou gafatia ma lo latou taua ia te Ia. Faafofoga i upu nei, sa fetalaia e Ioane le Papatiso ina ua toefuatai mai le Perisitua Arona: “I luga o oulua o’u uso a auauna e, i le suafa o le Mesia, ou te faaee atu i ai le Perisitua o Arona, ua umia ki o le auaunaga a agelu, ma o le talalelei o le salamo, ma o le papatisoga i le faatofuina mo le faamagaloina o agasala; ma o le a le toe aveesea lava lenei perisitua mai le lalolagi, seia toe osia e atalii o Levi se taulaga i le Alii i le amiotonu.”
O le Perisitua Arona o se faaopoopoga lea i le Perisitua Mekisateko. I le avea ai ma peresitene o perisitua uma, e pulefaamalumalu ai foi le Peresitene o le Ekalesia i le perisitua sauniuni. O ana savali i le aluga o tausaga e uiga i le ō e laveai mai e fetaui tonu lava ma le poloaiga ina ia avatu le talalelei o le salamo ma le papatisoga i olaga o isi.
E fefautuaai soo ia korama a tiakono, aoao, ma ositaulaga ina ia tosina atu tagata uma o le korama i le Alii. E tofia e au peresitene ia tagata ina ia aapa atu ma le faatuatua ma le alofa. E tufatufa atu e tiakono le faamanatuga ma le migao ma le faatuatua faapea o le a lagona e tagata o le ekalesia le aafiaga o le Togiola ma naunau e tausia poloaiga a o latou aai ma feinu i na faatusa paia.
E tatalo faatasi aoao ma ositaulaga ma a latou soa ina ia taitoatasi ma faataunuuina le tiute o le leoleoina o le Ekalesia, e lea tagata ma lea tagata. Ma e tatalo faatasi na soa a o latou aoao i manaoga ma faamoemoega o ulu o aiga. A o latou faia lea mea, o loo sauniaina i latou mo le aso tele o le a latou pulefaamalumalu ai o se tamā, i le faatuatua, i so latou lava aiga.
Ou te molimau atu o tagata uma o e auauna faatasi i le perisitua o loo sauniaina se nuu mo le afio mai o le Alii i Lana Ekalesia. O loo soifua le Atua le Tama. Ou te iloa—ou te iloa—o Iesu o le Keriso ma e alofa o Ia ia i tatou. O Peresitene Thomas S. Monson o le perofeta soifua a le Alii. Ou te molimau atu ai i le suafa paia o Iesu Keriso, amene.