Ola e Tusa ma Upu a Perofeta
Saunia e Carol F. McConkie
Fesoasoani Muamua i le Au Peresitene Aoao o Tamaitai Talavou
Ina ia ogatasi ma faamoemoega paia o le lagi, tatou te lagolagoina le perofeta ma filifili e ola e tusa ma ana upu.
E alofa lo tatou Tama i le Lagi i Ana fanau uma ma e finagalo ia latou iloa ma malamalama i Lana fuafuaga o le fiafia. O le mea lea, ua Ia valaauina ai perofeta, o i latou ua faauuina i le pule ma le mana e galulue i le suafa o le Atua mo le faaolataga o Lana fanau. O i latou o avefeau o le amiotonu, o molimau a Iesu Keriso ma le mana e le i’u o Lana Togiola. Latou te umia ki o le malo o le Atua i le lalolagi ma faatagaina le faatinoga o sauniga faaola.
I le Ekalesia moni a le Alii, “e lē sili atu lava i le toatasi lē e i luga o le lalolagi e faaee atu i ai lenei mana ma ki o le perisitua.” Tatou te lagolagoina Peresitene Thomas S. Monson o lo tatou perofeta, tagatavaai, ma talifaaaliga. Na te faaali mai le afioga a le Alii e taiala ma taitaia ai la tatou Ekalesia atoa. E pei ona faamalamalama mai e Peresitene J. Reuben Clark Jr., “O le Peresitene o le Ekalesia … e toatasi o loo i ai le aia tatau e maua ai faaaliga mo le Ekalesia.”
E faatatau ai i le perofeta soifua, ua poloaiina ai e le Alii tagata o Lana Ekalesia:
“Ia outou uai atu i ana upu uma ma poloaiga o le a ia tuu atu ia te outou e pei ona maua e ia, ma savavali i le paia atoa i o’u luma;
“Ona o lana upu ia outou talia, e pei lava ua mai i lo’u lava gutu, i le onosai ma le faatuatua atoa.
“Ona o le faia o nei mea o le a le manumalo ai faitotoa o seoli ia te outou.”
Ina ia ogatasi ma faamoemoega paia o le lagi, tatou te lagolagoina le perofeta ma filifili e ola e tusa ma ana upu.
Tatou te lagolagoina foi fesoasoani o Peresitene Monson ma le Korama a Aposetolo e Toasefululua o ni perofeta, tagatavaai, ma talifaaaliga. “Latou te maua le aia tatau, le mana, ma le pule e folafola atu ai le mafaufau ma le finagalo [o le Alii] … , e ala … i le Peresitene o le Ekalesia.” Latou te saunoa atu i le suafa o Keriso. Latou te vavalo atu i le suafa o Keriso. Latou te faia mea uma i le suafa o Iesu Keriso. I a latou upu tatou te faalogoina ai le siufofoga o le Alii ma e tatou te lagona ai le alofa o le Faaola. “Ma o soo se mea o le a latou tautala atu ai pe a uunaia ai e le Agaga Paia, o tusitusiga paia ia, … ma o le mana lea o le Atua mo le olataga.” Ua fetalai le Alii lava Ia: “Pe i lo’u lava leo po o i le leo o a’u auauna, ua tutusa lava.”
Tatou te faafetai mo se ekalesia “ua atiina ae i luga o le faavae o le au aposetolo, atoa ma le au perofeta, o le maa tulimanu o Iesu Keriso lava lea.” O le fale o le Alii o se fale o le maopoopo, ma e le mafai ona faaseseina ai i tatou po o fea e saili i ai mo ni tali i a tatou fesili pe le mautonu ai foi po o le a le leo e mulimuli i ai. Tatou te le manaomia ona “felafoaiina e pei o peau, ma feaveaiina i matagi uma lava o mataupu.” E faaali mai e le Atua Lana afioga e ala mai i Ana auauna faauuina, “ina ia faaatoatoaina ai le au paia, latou te fai ai galuega a auauna, ia atiina ae ai le tino o Keriso: seia tatou oo atu o i tatou uma lava ma le loto gatasi i le faatuatua ma le iloa lelei o le Alo o le Atua.” Pe a tatou filifili e ola e tusa ai ma upu a perofeta, ua tatou i ai i luga o le ala o feagaiga lea e tau atu i le atoatoaga e faavavau.
Mai i se tina nofofua o loo tauivi ia sao mai se vaitau o le oge, ua tatou aoao ai i le uiga o le lagolagoina o se perofeta. Na faatonuina e le Alii le perofeta o Elia e alu i Sarefata, lea o le a ia maua ai se tina ua oti lana tane o lē ua poloaiina e le Atua e lagolagoina o ia. A o latalata atu Elia i le aai, na ia vaaia o ia o aoina ni fafie. Na ia valaau atu ia te ia, “Se’i e au mai sina vai itiiti i se ipu, so’u inu ai.”
“Ua alu o ia e au mai ai, ona [toe] valaau ai lea o ia ia te ia, ua faapea atu, Se’i e au mai i lou lima se fasi areto ma’u.
“Ona tali mai lea o ia, O loo soifua Ieova lou Atua, e leai se potoi areto ia te au, ua na o le luutaga o falaoa i le kate, ma sina suāuu itiiti i le fagu: faauta, ua ou fai nei ni fafie se lua ina ia ou alu, ma tunu ai mā maua ma si a’u tama tane, ma te aai ai, ona ma oti lea.”
Ona tali atu lea o Elia, “Aua e te fefe; alu ia, ina e faia le mea na e fai mai ai; a e muamua, ona e fai se potoi areto itiiti ma’u, ma au mai ai ia te au; e mulimuli ane ona e faia lea mā oulua ma lau tama tane.”
Vaai faalemafaufau mo se taimi i le faigata o le mea na talosaga ai le perofeta i se tina matelaina ina ia faia. E moni lava, na mafai lava e le Atua Lava Ia ona saunia meaai taumafa mo Lana auauna faamaoni. Ae, i le galue ai i le suafa o le Alii, na faia ai e Elia e pei ona poloaiina ai, o le fai atu lea i se afafine faapelepele o le Atua e ositaulaga mea na ia te ia ina ia mafai ona lagolagoina ai le perofeta.
Ae na folafola atu foi e Elia se faamanuiaga mo le usiusitai: “Auā ua faapea ona fetalai mai o Ieova le Atua o Isaraelu, E le uma le kate falaoa, e le faaitiitia le suāuu i le fagu.” Na tuuina atu e le Alii i le fafine ua oti lana tane le avanoa e filifili ai e talitonu ma usiusitai i upu a le perofeta.
I se lalolagi ua faamata’uina i se oge o le amiotonu ma le matelaina faaleagaga, ua poloaiina ai tatou e lagolago le perofeta. A o tatou usiusitai, lagolagoina, ma faamautu upu faaperofeta, tatou te molimauina le i ai ia i tatou o le faatuatua e gauai atu ai ma le lotomaualalo i le finagalo, le poto, ma le taimi a le Alii.
Tatou te faalogo i upu faaperofeta e tusa lava pe foliga mai e leai sona uiga, le talafeagai, ma faigata. E tusa ai ma tulaga faatonuina o le lalolagi, o le mulimuli i le perofeta e ono inosiaina, lē sa’o i manatu faaupufai, po o le lē taliaina faaleagafesootai. Ae o le mulimuli i le perofeta e sa’o i taimi uma lava . “Auā e pei ona sili ona maualuga o le lagi i le lalolagi, ua faapea ona sili ona maualuga o o’u ala i o outou ala, ma o’u manatu e sili i o outou manatu.” “Ia e faatuatua ia Ieova ma lou loto atoa; a e aua le faalagolago i lou lava atamai.”
E faamamalu ma fiafia le Alii ia i latou o e o le a faalogo i le taitaiga faaperofeta. Mo le fafine ua oti lana tane i Sarefata, o le usiusitai ia Elia na faasaoina ai lona ola ma mulimuli ane le ola o lona atalii. E pei ona folafola mai e le perofeta, “ua latou aai ai, o ia, ma Elia, ma lona aiga, ua tele aso … e tusa ma le afioga a Ieova na fai atu ai Elia.”
O le Alii “e foai ia i latou o e faatuatua ia te Ia.” O upu a perofeta e pei o le manai i o tatou agaga. A tatou aai ai, e faamanuiaina i tatou, puipuia, ma tausia uma ai le faaletino ma le faaleagaga. A tatou aai i a latou upu, o le a tatou aoao i le auala e omai ai ia Keriso ma ola ai.
Na tusia e Elder Bruce R. McConkie e faapea, e ala i perofeta “e faaali mai i ai e le Alii upumoni o le faaolataga; … le faaolataga o loo i totonu o Keriso; ma e na te iloiloina … le ala e taitai atu i le ola e faavavau. … I vaitau uma: e tuuina mai ai e le Alii i ona tagata le taitaiga latou te manaomia i lena taimi o o latou faigata ma tulaga lamatia. Ma e moni lava i le lumanai, o le a i ai taimi o le a leai lava se mea sei vagana ai le poto o le Atua, e to ifo mai le lagi ma fofogaina e perofeta, o le a mafai ona faasaoina ai ona tagata.”
Mo au, o upu a perofeta na aoao mai e lau faiaoga o le Lora na ou maua ai se vaaiga mamao e tatau ona foliga i ai se sootaga o le faaipoipoga i le feagaiga. O upu a perofeta na tuuina mai ia te au le faatuatua ma le faamoemoe lea na mafai ona ou sauniuni i ai ma maua ai se aiga fiafia. O le suesue pea i aoaoga a perofeta, o anamua ma aso nei, na lagolagoina ai au i tausaga o le malosi ma le tele o tausaga o le vaivai o le fanauina, aoaoina, ma le faafaileleina o fanau e toafitu. O upu a perofeta i tusitusiga paia ma upu na aoaoina mai i lenei pulelaa o upu faamafanafana, alofa, malosi, ma le fiafia o loo aoga ia i tatou uma.
A tatou faalogo i upu a perofeta, tatou te fausia o tatou aiga ma o tatou olaga i luga o se faavae mautu e faavavau, “o le papa o lo tatou Togiola, o le o Keriso lea, le Alo o le Atua, … ina ia pe a auina mai e le tiapolo ana matagi malolosi, ioe, ana ufanafana i le asiosio, ioe, pe a pesi mai ia te oulua ana uatoa uma ma lana afa malosi, o le a leai sona mana i luga o oulua e toso ifo ai oulua i lalo … i le to o le pagatia ma le malaia e le gata.”
E i ai sa tatou filifiliga. E mafai ona tatou filifili ia lē amanaiaina, manatu faatauvaa i ai, le ano i ai, pe fouvale foi i afioga a Keriso ua saunoa i ai Ana auauna faauuina. Ae ua aoao mai le Faaola e faapea o i latou o e faia ia mea o le a vavaeese mai Lona nuu o le feagaiga.
A o tatou faitau ma suesue ma le agaga tatalo i upu paia faaperofeta ma le faatuatua ia Keriso, ma le manatu moni, o le a fetalai mai le Agaga Paia i upumoni i o tatou mafaufau ma loto. Ou te faamoemoe o le a tatala o tatou taliga ina ia faalogo, o tatou loto ina ia malamalama, ma o tatou mafaufau ina ia mafai ona tatala mai mealilo a le Atua i la tatou vaai.
Ou te molimau atu o Iosefa Samita o se perofeta na valaauina e le Atua e toefuatai le talalelei a Iesu Keriso ma Lana perisitua i le lalolagi. Ma ou te molimau atu e ala ia Peresitene Monson, o loo taitaia ai i tatou e se perofeta moni a le Atua i le asō. Tau ina ia tatou filifili e tutu faatasi ma perofeta ma ola e tusa ma a latou upu seia oo ina tatou lotogatasi i le faatuatua, faamamaina ia Keriso, ma faatumulia i le malamalama o le Alo o le Atua. I le suafa paia o Iesu Keriso, amene.