O Le Mafuaaga mo lo Tatou Faamoemoe

Saunia e Peresitene Boyd K. Packer

Peresitene o le Korama a Aposetolo e Toasefululua

O se molimau i le faamoemoega o le togiola o se mea lea e le mafai ona fuatiaina pe faitauina. O Iesu Keriso o le punavai o lena faamoemoe.

I le tele o tausaga ua mavae, sa ma asiasi atu ai ma Sister Packer i le Iunivesite o Oxford. Sa ma sailia ia faamaumauga o lo’u tuaa o le augatupulaga lona iva i tua. Sa agalelei mai le taiulu o le Kolisi a Keriso i Oxford, o Dr. Poppelwell, ia aumai e le tagata o loo teuina faila ia faamaumauga. O le tausaga 1583 sa ma maua ai le igoa o lou tuaa, o John Packer.

O le tausaga na sosoo ai sa ma toe foi atu ai i Oxford e tuuina atu se seti o tusitusiga paia ua tuufaatasia ma le matagofie mo le potutusi i le Kolisi a Keriso. Na fai sina le mautonu o Dr. Poppelwell. Masalo sa ia manatu e le o ma’ua o ni Kerisiano moni. O lea sa ia valaau ai i le faifeau o le kolisi ia taliaina ia tusi.

A o lei tuuina atu ia tusitusiga paia i le faifeau, sa ou tatalaina le Topical Guide ma faaali atu ia te ia le mataupu e tasi: e 18 itulau, matua lelei lava le lolomiina, e taitasi laina, o loo lisiina ai o mau faasino ia “Iesu Keriso.” O se tasi lea o tuufaatasiga sili ona atoatoa o mau faasino i le mataupu e uiga i le Faaola e lei tuufaatasia muamua lava i le talafaasolopito o le lalolagi—o se molimau mai le Feagaiga Tuai ma le Feagaiga Fou, le Tusi a Mamona, le Mataupu Faavae ma Feagaiga, ma le Penina Tau Tele.

“Po o fea lava le auala e te mulimuli ai i nei mau faasino,” sa ou tau atu ia te ia, “pito i le pito, luga ma lalo, tusi i le tusi, o lea mataupu i lea mataupu—o le a e iloaina lava o se molimau tutusa ma ogatusa ma le paia o le misiona a le Alii o Iesu Keriso—Lona soifua mai, Lona soifuaga, Ana aoaoga, Lona Faasatauroga, ma Lana Togiola.”

Ina ua uma ona faasoa atu i le faifeau nisi o aoaoga a le Faaola, sa suia ona lagona ia i maua, ma sa ia faamatamataina i maua i le nofoaga, e aofia ai se nofoaga i lalo o le eleele lea sa faaalia ai ni atavali i le vaitaimi o le malo o Roma.

Na i ai i mau faasino sa lisiina i le Topical Guide le mau lea e tasi mai le Tusi a Mamona: O Se Tasi Molimau ia Iesu Keriso: “Ua matou talai atu Keriso, ua matou vavalo e uiga ia Keriso, ma ua matou tusitusi foi e tusa ma a matou valoaga, ina ia mafai ona iloa e a matou fanau po o le a le puna e mafai ona latou tepa taulai i ai mo se faamagaloga o a latou agasala” (2 Nifae 25:26).

I Ana lava upu, sa fetalai mai ai le Faaola, “O a’u nei le ala, ma le upu moni, ma le ola, e le alu atu lava se tasi i le Tama, pe a le ui mai ia te au” (Ioane 14:6).

Ma mai le Tusi a Mamona ua Ia tautino mai ai: “Faauta, o au o le na saunia mai le faavaega o le lalolagi e togiola lou nuu. Faauta, o au o Iesu Keriso. … O au e maua ai e tagata uma le ola, ma e faavavau, ia i latou lava o e e talitonu i lou igoa; ma o le a avea i latou ma ou atalii ma ou afafine” (Eteru 3:14).

E tele naua isi mau faasino i totonu o tusitusiga faavae lea o loo folafola mai ai le matafaioi paia a Iesu Keriso o le Togiola mo tagata uma o e ua fananau mai pe o le a fananau mai i le olaga faaletino.

O le Togiola a Iesu Keriso ua togiolaina ai i tatou mai le Pa’ū o le tagata, lea na tupu ina ua ‘ai e Atamu ma Eva le fua faasaina i le Faatoaga o Etena, e pei ona ta’ua i le 1 Korinito, “Aua faapei ona oti uma ia Atamu, faapea foi ona faaolaina uma ia Keriso” (1 Korinito 15:22).

O loo aoao mai le Tusi a Mamona, “Aua e tatau ona faia o se togiola …, a leai o le a le maalofia le fano o tagata uma; ioe, ua maaa uma; ioe, ua pauu uma ma ua leiloloa, ma o le a fano vagana ai e ala i le togiola … o se taulaga e ao ina le gata ma faavavau” (Alema 34:9–10).

Atonu tatou te le o ola i ni olaga atoatoa, ma o loo i ai ni faasalaga mo a tatou mea sese, peitai ae tatou te lei o mai i le lalolagi, sa tatou malilie ai ia noatia i Ana tulafono ma ia talia faasalaga mo le soliina o na tulafono.

“Aua ua agasala tagata uma lava, ma ua le oo i le viiga mai le Atua;

“Ua tauamiotonuina fua i lona alofa tunoa i le togiola e a Keriso Iesu” (Roma 3:23–24).

Sa faatinoina e le Faaola le Togiola, lea ua saunia ai se auala mo i tatou ina ia mama ai. O Iesu Keriso o le Keriso toetu. Tatou te tapuai atu ma faamamaluina o Ia mo le tiga sa Ia mafatia ai mo i tatou uma i se tulaga aoao atoa ai ma le tiga sa Ia onosaia mo i tatou taitoatasi, i le Faatoaga o Ketesemane faapea ma luga o le satauro. Sa ia tauaveina uma ma le lotomaualalo tele ma se malamalamaaga e faavavau i Lana matafaioi ma le faamoemoega paia.

O i latou o le a salamo ma lafoai agasala o le a iloaina o loo faaloaloa mai pea Lona aao alofa mutimutivale. O i latou o e faalogo ma usiusitai i Ana afioga ma upu a Ana auauna filifilia o le a maua le filemu ma le malamalama e oo lava i le lotolotoi o le lototiga ma faanoanoaga sili. O le taunuuga o Lana taulaga o le faasaoloto lea o i tatou mai aafiaga o le agasala ina ia mafai e tagata uma ona tafiesea le tausalaina ma lagona le faamoemoe.

Pe ana faapea Na te lei faataunuuina le Togiola, semanu e leai se faaolataga. Semanu e avea ma se lalolagi faigata e ola ai pe ana faapea e le mafai ona faamagaloina i tatou i a tatou agasala, pe ana faapea e le mafai foi ona faamamaina i tatou lava ma agai i luma.

O le alofa mutimutivale ma le alofa tunoa o Iesu Keriso e le faatapulaaina na o i latou o e faia le agasala, a le o le faia o se mea sese po o le le faia o se mea sa’o, ae e aofia ai le folafolaga o le filemu e faavavau ia i latou uma o e o le a talia ma mulimuli ia te Ia ma Ana aoaoga. O Lona alofa mutimutivale o se faamalologa sili lea, e oo lava i se tagata le sala sa faamanualia.

Sa ou mauaina talu ai nei se tusi mai se tamaitai sa ia tau mai le onosaia o mafatiaga maoae i lona olaga. O se mea sese matautia, lea na te lei iloaina ae sa ia iite i ai, lea sa faia ia te ia. Sa ia tautino mai lona tauivi ma lagona o le le fiafia tele. I lona ita, sa ia tagi ai i ona manatu, “E tatau ona totogi e se tagata lenei mea sese matautia.” I lena taimi matuitui o le faanoanoa ma le tuufesili, sa ia tusia ai e faapea, sa oo mai i lona loto se tali faafuasei, “Ua uma ona totogiina e se tasi.”

Afai tatou te le o iloa le mea e mafai ona faia e le taulaga a le Faaola mo i tatou, e mafai ona tatou feoai i le olaga ma tauaveaina o tatou faanoanoaga o mea sa tatou faia sa le sao pe sa faatiga ai i se tasi. O le lagona tausalaina lea e o mai faatasi ma mea sese e mafai ona fufuluesea. Afai tatou te saili ia malamalama i Lana Togiola, o le a tatou lagona le faaaloalo tele mo le Alii o Iesu Keriso, i Lana galuega faalelalolagi, ma Lana misiona paia i le avea ai ma o tatou Faaola.

O Le Ekalesia a Iesu Keriso o le Au Paia o Aso e Gata Ai sa toefuataiina mai ina ia faasalalau atu i le lalolagi atoa le malamalama e uiga i le soifuaga ma aoaoga a le Faaola. O lenei konafesi maoae o loo faasalalauina atu i gagana e 94 e ala i satelite i atunuu e 102 ma o loo maua foi i le Initoneti i malo uma o loo i ai le Ekalesia. Ua silia ma le 3,000 a tatou siteki. O a tatou faifeautalai faamisiona ua sili atu ma le 88,000, ma o le aofai o tagata auai o le Ekalesia ua silia ma le 15 miliona. O nei fuainumera ua avea ma faamaoniga o le “maa na tofi mai le mauga e aunoa ma lima” o le a faaauau pea ona taavale atu, ma o le a iu ina tumu ai le “lalolagi atoa” (MF&F 65:2).

Ae po o le a lava le telē e oo i ai le faalapotopotoga o le Ekalesia pe fia foi miliona tagata e auai mai, e tusa lava pe fia konetineta ma atunuu e ulufale atu i ai a tatou faifeautalai pe fia gagana eseese tatou te tautatala ai, ae o le manuia moni o le talalelei a Iesu Keriso o le a fuaina lea e ala i le malosi faaleagaga o ona tagata taitoatasi. Tatou te manaomia le malosi o le tuuto lea o loo maua i le loto o soo faamaoni uma o Keriso.

O se molimau i le faamoemoega o le togiola o se mea lea e le mafai ona fuatiaina pe faitauina. O Iesu Keriso o le punavai o lena faamoemoe.

Tatou te saili atu e faamalolosia molimau a talavou ma tagata matutua, faaipoipo ma nofofua. E manaomia ona tatou aoao atu le talalelei a Iesu Keriso i alii, tamaitai, ma fanau, i latou o soo se ituaiga ma tagatanuu, mauoa ma e matitiva. Tatou te manaomia tagata faatoa liliu mai ma i latou o e na tupuga mai i paionia anamua. E manaomia ona tatou sailia i latou o e na se ese ma fesoasoani ia i latou ia toe foi mai i le lafu. Tatou te manaomia le atamai ma le malamalama ma le malosi faaleagaga o tagata uma. O tagata taitoatasi o lenei Ekalesia o se elemene taua o le tino o le Ekalesia.

“Aua pei o le tino ua tasi ia, ma ona itu tino e tele, a o itu tino uma, e ui ina tele, o le tino e tasi lava ia; e faapea lava Keriso.

“Aua foi o le Agaga e toatasi na papatisoina ai i tatou uma i le tino e tasi. …

“Aua foi o le tino e le se itu tino e tasi lea, a e peitai o itu tino e lasi” (1 Korinito 12:12–14).

E auauna atu tagata uma o se molimau i le soifuaga ma aoaoga a Iesu Keriso. Ua tatou tau ma autau a le fili, ma e tatou te manaomia tagata taitoatasi ma i tatou uma pe afai tatou te fia manuia i le galuega ua aumai e le Faaola ia i tatou e fai.

Atonu e te manatu ifo, “O le a se mea e mafai ona ou faia? Ua na o au e toatasi.”

E mautinoa lava sa lagona e Iosefa Samita le tuuatoatasi i nisi taimi. Sa oo ina avea ma tagata maoae, ae sa ia amata atu o se tamaitiiti e 14 tausaga sa i ai se fesili: “O fea o nei mau lotu e tatau ona ou auai?” (tagai Iosefa Samita—Talafaasolopito 1:10). Sa tuputupu ae le faatuatua ma le molimau a Iosefa e pei foi o i tatou, “ma lea mataupu i luga o lea mataupu, o sina mea itiiti i i ma sina mea itiiti i o” (2 Nifae 28:30; tagai foi MF&F 128:21). Sa tootuli Iosefa e tatalo, ma oka se mea ofoofogia sa tulai mai ai ona o se taunuuga o lena tatalo ma le Uluai Faaaliga.

I le avea ai ma se tasi o Aposetolo e Toasefululua, ou te molimau atu ai i le Alii o Iesu Keriso. O loo soifua o Ia. O Ia o lo tatou Togiola ma lo tatou Faaola. “E ala i le Togiola a Keriso, e mafai ai ona faaolaina tagata uma” (Mataupu Faavae o le Faatuatua 1:3). O loo Ia pulefaamalumalu i lenei Ekalesia. E le o se tagata ese o Ia i Ana auauna. A o tatou agai atu i le lumanai ma le talitonuga filemu, o le a faatasi Lona Agaga ma i tatou. E leai se mutaaga i Lona mana e faamanuia ma taitai ai olaga o i latou o e sailia le upumoni ma le amiotonu. Ou te molimau atu ai ia te Ia i le suafa o Iesu Keriso, amene.