“Le Alii e, O Au Ea?”
Saunia e Peresitene Dieter F. Uchtdorf
Fesoasoani Lua i le Au Peresitene Sili
E tatau ona tatou tuu ese lo tatou faamaualuga, aveese lo tatou faasausili, ae ia lotomaualalo ma fesili atu, “Le Alii e, o au ea?”
O le po mulimuli o lo tatou Faaola pele i le olaga faaletino, o le afiafi lea a o lumanai ai Lona ofoina atu o ia e fai ma togiola mo tagata uma. A o Ia tofitofi le areto faatasi ma Ona soo, sa Ia fetalai atu i se mea masalo sa faatumulia ai o latou loto i le te’i tele ma se faanoanoaga matuitui. “E faalataina a’u e so outou,” sa Ia tau atu ai ia i latou.
Sa lei fesiligia e le au soo le moni o le mea na Ia fetalai ai. Pe sa latou fetilofai solo foi, ma tusitusilima i se tasi, ma fesili, “O ia ea?”
Ae, “sa latou matua tiga ai, ua latou taitasi ma fai mai ia te ia, Le Alii e, o au ea?”
Ou te mafaufau lava po o le a se mea e fai e i tatou taitoatasi pe afai e fai mai e le Faaola lena fesili. Pe o le a tatou autilotilo atu ea ia i latou i o tatou talaane ma faapea ifo i o tatou loto, atonu o loo fetalai o Ia e uiga ia Uso Ioane. Sa ou masalomia lava o ia,” po o le “Ua ou fiafia lava o loo faatasi mai Uso Brown. E moomia ona ia faafofoga i le savali lenei”? Pe o le a tatou pei ea o na soo anamua, o le a tatou mafaufau ifo ia i tatou lava ma fesili i lena fesili matuitui: “O au ea?”
I nei upu faigofie, “Le Alii e, o au ea?” o loo taoto ai le amataga o le poto ma le ala i le liuaina faaletagata lava ia ma le suiga tumau.
O Se Faataoto o Makerita (Dandelions)
Sa i ai se alii sa fiafia lava e savalivali solo i afiafi i le latou nuu. Sa patino lava lona tulimatai atu e savali ma pasia le fale o lona tuaoi. E tausia lava e lenei tuaoi lona laufanua ma le matagofie atoa, e fuga i taimi uma ia fugalaau, e ola lauusiusi ma paolo laau. Sa manino lava na faia e le tuaoi ia taumafaiga uma ia maua ai se laufanua matagofie.
Ae i se tasi aso a o savali atu le alii lea ma pasia le fale o lona tuaoi, sa ia matauina i le ogatotonu o lona laufanua matagofie se makerita se tasi telē lava lanusamasama.
Sa faateia ai o ia aua sa le fetaui lava lona tu ai iina. Aisea na le veleesea ai e lona tuaoi? Sa le mafai ea ona ia iloaina? Na te le iloaina ea e mafai e le makerita ona fua mai ni ona fatu ia e mafai ona ola mai ai le tele o isi makerita?
O le makerita tutasi lea na matua faalavelave lava ia te ia, ma sa ia manao ai e fai i ai se mea. Pe tatau ea ona ia veleeseina? Pe fana i se fanavao? Masalo a alu o ia faalilolilo i le po e mafai ona ia seiesea e aunoa ma le iloa.
O ia manatu na tumu atoa ai lona mafaufau a o ia savali atu i lona lava fale. Sa ia ulu atu i lona fale e aunoa ma se tepa atu i lona lava lumāfale—lea sa ufitia uma i le faitau selau o makerita lanu sasama.
O Utupoto ma Fasilaau
Pe o faamanatu mai e lenei tala ia i tatou se fetalaiga a le Faaola?
“Se a le mea e te vaai atu ai i si fasi laau i le mata o lou uso, ae te le iloa e oe le utupoto i lou lava mata? …
“… Ia e muai tiai le utupoto i lou lava mata, ona e iloa lelei ai lea e eueseina atu le fasi laau i le mata o lou uso.”
O lenei mataupu o utupoto ma fasi laau e foliga mai e fesootai lelei ma lo tatou lē mafai ona vaai manino ia i tatou lava. Ou te le o mautinoa pe aisea e mafai ai ona tatou iloa lelei ma fautua atu ni vaifofo i faafitauli o isi tagata, ae e tele lava ina faigata ona tatou vaaia o tatou lava faafitauli.
I nai tausaga ua mavae sa i ai se tala fou e uiga i se alii sa talitonu afai na te niniina ona foliga i le sua o le tipolo, o le a le mafai ona vaaia o ia i luga o mea pueata. O lea sa ia nini ai ona foliga atoa i le sua o le tipolo, ma alu atu ma gaoia ni faletupe se lua. E lei leva lava ae molia o ia ina ua faasalalauina lona ata i luga o talafou i lena afiafi. Ina ua faaali atu e leoleo i le alii lea ata vitio o ona foliga mai mea pueata nana, sa ofo lava o ia. “Ae sa nini o’u foliga i le sua o le tipolo!” o lana tetee atu lea.
Ina ua faalogo i ai se saienitisi i le Iunivesite o Cornell i lenei tala, sa maofa o ia i le matuai le iloaina lava e se tagata o lona lava ia faavalevalea. Ina ia suesueina pe o se faafitauli lautele lenei mea, sa valaaulia ai e ni tagata suesue se toalua ni tamaiti aoga o le kolisi e auai i se faasologa o suesuega e uiga i tomai eseese o le olaga ona fesili atu lea ia i latou e fua pe faape’i a latou taumafaiga. O tamaiti aoga na sili ona maualalo togi, o tagata ia na pito i maualalo le maoti o le iloiloina o a latou lava faatinoga—o nisi o i latou ia sa fuaina a latou togi e faalimaina le maualuga atu nai lo le mea moni sa i ai a latou lava togi.
O lenei suesuega sa toe faia foi i le tele o auala, ma faamautu ai pea lava pea lea lava faaiuga e tasi: o le toatele o i tatou e faigata tele ona vaai ia i tatou lava i lo tatou tulaga moni o loo i ai, ma e oo foi lava i tagata faamanuiaina latou te faamaualuga lava i a latou lava taumafaiga ae manatu faatauvaa i taumafaiga a isi tagata.
Atonu e le taua tele pe a faamaualuga i le lelei tele o lo tatou aveina o se taavale po o le mamao foi e mafai ona tatou taina ai se polo i le taaga polo. Ae a amata ona tatou talitonu e sili atu a tatou taumafaiga i le fale, i le galuega, ma i le lotu nai lo mea moni o loo tatou faia, ona faatauasoina loa lea o i tatou i faamanuiaga ma avanoa e faaleleia ai i tatou lava i ni auala taua ma loloto.
Vaega o Loo [Tatou] Tauaso ai Faaleagaga
E i ai sa’u uo sa masani ona nofo i se uarota sa i ai ni faamaumauga faafuainumera sili ona maualuluga i le Ekalesia—sa maualuga le auai, sa maualuga le aofai o faiaoga o aiga e asiasi, sa amio lelei i taimi uma le fanau Peraimeri, o ‘aiga a le uarota e aofia ai ni meaai mananaia sa seasea toulu i luga o le fola o le falelotu, ma ou te manatu sa leai ma ni finauga i taimi o taaloga a le Ekalesia.
Sa mulimuli ane valaauina la’u uo ma lona toalua i se misiona. Ina ua la foi mai i le tolu tausaga mulimuli ane, sa faateia lenei ulugalii i lo la iloaina i le taimi na la malaga ese ai e faamisiona, sa tetea ia ulugalii.
E ui sa faailoa mai e le uarota foliga uma o le faatuatua ma le malosi, ae sa i ai lava se mea le manuia sa tupu i totonu o o latou loto ma olaga o tagata o le au paia. Ma o le mea e faapopoleina ai ona o lenei tulaga e le fuatasi [i se uarota]. O ia mea matautia ma lē talafeagai e tupu soo lava pe a o ese mai tagata o le Ekalesia mai mataupu faavae o le talalelei. Atonu e foliga mai i fafo o ni soo o Iesu Keriso, ae o totonu o o latou loto ua mamao lava mai lo latou Faaola ma Ana aoaoga. Ua latou faasolosolo lava ona liliu ese mai mea a le Agaga ma agai atu i mea a le lalolagi.
O e umia le perisitua ma le agavaa ua amata ona fai ifo ia i latou lava, o le Ekalesia o se mea lelei lea mo tamaitai ma tamaiti ae le mo i latou. Pe ua faatalitonuina foi nisi o a latou fuafuaga pisi po o tulaga uiga ese ua talafeauga ai le tuusaoloto o i latou mai faatinoga faaleaso o le tuuto ma auaunaga ia o le a taofia ai i latou mai le latalata atu i le Agaga. I lenei vaitau o le fai ‘alofaga ma le manatu faapito o le tagata ia te ia lava, ua faigofie ai lava ona tele auala e faia ai ‘alofaga i le le faalatalata soo atu i le Atua i le tatalo, faatalale i le suesueina o tusitusiga paia, lē fia auai i sauniga faale-Ekalesia ma afiafi faaleaiga, po o le totogiina o sefuluai ma taulaga ma le faamaoni.
Ou uso pele, e mafai ea ona outou tagai i totonu o o outou loto faamolemole ma fai le fesili faigofie lenei: “Le Alii e, o au ea?”
Ua e alu ese ea—e oo lava i sina vaega itiiti—mai “le … talalelei a le Atua manuia, ua tuuina [atu] ia te [oe]”? Pe o outou faatagaina “le atua o le lalolagi nei” e faapogisa o outou mafaufau “i le malamalama o le tala lelei i le mamalu o Keriso”?
Au uo pele, ou uso pele, fesili ifo ia te outou lava. “O fea le mea e sili ona taua ia te au?”
Pe o pupū ea lou loto i mea o lenei lalolagi, pe o taulai atu ma le filiga i aoaoga a Iesu Keriso? “Aua o le mea o i ai lo outou oa, e i ai atoa foi ma o outou loto.”
Pe o afio le Agaga o le Atua i o outou loto? Pe o mauaa ea outou i le alofa o le Atua ma o outou uso a tagata? O lava ea so outou taimi ma mafaufauga fatufatua’i o tuuto atu i le aumaia o le fiafia i a outou faaipoipoga ma aiga? O tuu atu ea lo outou malosi i le sini silisili o le malamalama ma le ola ai i le “lautele, ma le umi, ma le loloto, ma le maualuga” o le talalelei toefuataiina a Iesu Keriso?
Uso e, afai o lo outou manao sili ia atiae uiga FaaKeriso o le “faatuatua, amiomama, poto, faautauta, onosai, agalelei faaleuso, amio-atua, alofa mama, lotomaualalo, [ma le auauna atu],” o le a faia e le Tama Faalelagi outou e avea ma se meafaigaluega i Ona aao mo le olataga o agaga e toatele.
O Le Olaga Suesueina
Uso e, e leai ma se tasi o i tatou e fia tautino atu pe a tatou se ese mai le ala sa’o. E tele lava ina tatou taumafai e aloese mai le tagai totoa i o tatou loto ma faailoa o tatou lava vaivaiga, lē atoatoa, ma mea e fefefe ai. O lea, a tatou suesueina o tatou olaga, tatou te vaavaai lava i o tatou lava manatu faaletagata, o ‘alofaga, ma tala tatou te faamatala ia i tatou lava ina ia faamaonia ai o tatou manatu ma amioga lē agavaa.
Ae o le mafai ona tatou vaai manino ia i tatou lava e taua lea i lo tatou tuputupu ae faaleagaga ma le tulaga manuia. Afai e tumau pea le natiaina o o tatou vaivaiga ma lē atoatoa, ona le mafai lea e le mana togiola a le Faaola ona faamaloloina na vaivaiga ma avea i latou ma malosiaga. O le mea e faanoanoa ai, o lo tatou le iloaina o o tatou lava vaivaiga faaletagata o le a tatou tauaso ai foi e iloa le gafatia paia o loo naunau lo tatou Tama e faafaileleina i totonu o i tatou taitoatasi.
E mafai faapefea la ona tatou faasusulu atu le malamalama mama o le upumoni a le Atua i o tatou agaga ma iloa ai i tatou lava e pei ona Ia silafia i tatou?
E mafai ona ou fautua atu, o tusitusiga paia ma lauga e tuuina atu i le konafesi aoao o se faaata aoga lea e mafai ona tatou tilotilo i ai mo le suesueina o i tatou lava.
A e faalogo pe faitau foi i upu a perofeta anamua ma aso nei, ia aua ne’i e mafaufau faapea o upu ia o loo faatatau i se isi tagata ae fai le fesili faigofie: “Le Alii e, o au ea?”
E tatau ona tatou faalatalata atu i lo tatou Tama e Faavavau i le loto momomo ma ni mafaufau e aoao gofie. E tatau ona tatou loto e aoao ma sui. Ma e tele naua mea tatou te mauaina e ala i le tuuto atu e ola i le olaga lea e finagalo i ai lo tatou Tama Faalelagi mo i tatou.
O i latou e le o fia mananao e aoao ma suia e masalo lava o le a le aoao ma suia ma e foliga mai o le a amata ona tuufesili pe faamata o i ai se aoga o le Ekalesia ia i latou.
Ae o i latou e mananao ia siitia ma agai i luma, o i latou o e aoao e uiga i le Faaola ma mananao ia faapei o Ia, o i latou o e faalotomaualalaloina i latou lava e pei o se tamaitiiti ma saili ia faaogatusa o latou manatu ma amioga ma le finagalo o lo tatou Tama i le Lagi—o le a latou lagonaina le vavega o le Togiola a le Faaola. O le a latou lagonaina ma le mautinoa le Agaga ofoofogia o le Atua. O le a latou tofo i le olioli lē mafaamatalaina o le fua o se loto agamalu ma agamaualalo. O le a faamanuiaina i latou i se manao ma se loto pulea ia avea ma soo moni o Iesu Keriso.
O Le Mana o le Lelei
I le gasologa o lo’u olaga, sa ou maua ai le avanoa e soosoo tauau ai ma nisi o alii ma tamaitai sili ona atamamai ma popoto i lenei lalolagi. A o o’u talavou, sa faagaeetia lava au e i latou o e atamamai, talenia, faamanuiaina, ma viia e le lalolagi. Ae i le aluga o tausaga, ua ou iloa ai ua sili atu le faagaeetiaina o au e i latou o tagata lelei ma faamanuiaina o ē lelei moni lava ma faamaoni.
Pe le o le uiga atoa ea lena o le talalelei ma lona aoga mo i tatou? O le tala fiafia lea, ma e fesoasoani ia i tatou ia avea ma tagata lelei.
O upu a le Aposetolo o Iakopo e faatatau ia i tatou i aso nei:
“E tetee atu le Atua i e faamaualuluga, a e foai mai le alofa tunoa i e faamaulalo. …
“Ina faamaulalo ia [outou] i luma o le Alii, ona faamaualugaina lea o outou e ia.”
Uso e, e tatau ona tatou tuu ese lo tatou faamaualuga, aveese lo tatou faasausili, ae ia lotomaualalo ma fesili atu, “Le Alii e, o au ea?”
Ma afai o le tali a le Alii o le “Ioe, lo’u atalii e, o loo i ai mea e tatau ona e faaleleia, o mea e mafai ona ou fesoasoani atu ai ia te oe e faatoilalo,” ou te tatalo o le a tatou taliaina lenei tali, iloaina ma le lotomaualalo a tatou agasala ma vaivaiga, ma suia o tatou ala e ala i le avea ma ni tane lelei atu, o ni tamā lelei atu, ma ni atalii lelei atu. Tau ina ia tatou saili atu e amata i lenei taimi ma lo tatou malosi atoa e savavali ai ma le mausali i le ala faamanuiaina a le Faaola—aua o le manino o la tatou vaai ia i tatou lava o le amataga lea o le poto.
A tatou faia lea mea, o le a taitai i tatou e lo tatou Atua agalelei; o le a “faamalolosia [i tatou], ma faamanuiaina mai luga.”
Au uo pele, o se laasaga muamua lava i lenei ala ofoofogia ma faamalieloto o le avea ma soo moni e amata i lo tatou fai atu o le fesili faigofie:
“Le Alii e, o au ea?”
Ou te molimau atu ai i lenei mea ma tuu atu lau faamanuiaga ia te outou, i le suafa o Iesu Keriso, amene.