O Le Tusi
Saunia e Elder Allan F. Packer
O Le Fitugafulu
O le galuega o talafaasolopito o aiga ma malumalu e tatau ona avea ma se vaega masani o la tatou tapuaiga patino.
A o avea au ma se Sikauti talavou e 12 tausaga, sa ou mauaina se meaalofa o se meafaigaluega faaleSikauti sa ou manao lava i ai. O se tamai toi ma sona ufi pa’u mamoe mamafa! O le isi tolauapiga, sa matou taunuu ua pogisa, susu ma maalilili mai le mamafa o le kiona i le ala. Pau lava le mea sa i lou mafaufau o le faia o se afi tele o le tolauapiga. Sa ou alu i lena lava taimi ma tata se laau sa pa’ū i lalo i la’u toi fou. A o ou tataina le laau, sa ou ita ona e foliga mai e le lelei tele i le taina o le laau. I lou ita tele, sa ou matua taina ai ma le malosi. Sa ou toe foi, ma le le fiafia, i le tolauapiga ma ni nai fasi fafie. O le malamalama o le afi a se isi tagata, sa ou iloa ai le faafitauli. Ou te lei aveesea le ufi o le toi. Ae ou te tau atu, sa matua tipitipi ninii le ufi. O le lesona: sa aveesea mai lou mafaufau isi mea taua.
A o tatou galulue e agai atu i le faaeaga, e tatau ona tatou galulue i tulaga manaomia uma ae aua nei faatosinaina i le taulai atu i se tulaga manaomia e tasi pe lua po o nisi mea e le fesootai. O le sailia o le malo o le Atua e taitai atu ai i le olioli ma le fiafia. Afai e manaomia, e tatau ona tatou loto ina ia sui. O faasa’oga laiti fai soo e itiiti le tiga ma le faalavelave nai lo faasa’oga tetele i o tatou olaga.
E lei leva atu, sa ma malaga ai ma Sister Packer i le tele o atunuu ese. Sa saunia a ma tusifolau ma isi pepa malaga. Sa fai a ma tui, suesuega faafomai, visa, ma oomi faailoga i tusifolau. Ina ua ma taunuu, sa suesueina a ma pepa malaga, ma ina ua ausia mea manaomia uma, sa faataga i maua e ulufale atu.
O le agavaa mo le faaeaga e pei lava o le ulufale atu i se isi atunuu. E tatau ona tatou mauaina taitoatasi a tatou tusifolau faaleagaga. Tatou te le faatulagaina mea e manaomia, ae, e tatau ona tatou ausiaina mea uma. O le ata o le faaolataga o loo i ai uma aoaoga faavae, tulafono, poloaiga, ma sauniga e manaomia e tagata uma e agavaa ai mo le faaeaga. Ona mafai lea “e ala i le Togiola a Keriso, … ona faaolaina tagata uma.” E fesoasoani le Ekalesia ae e le mafai ona faia mo i tatou. O le agavaa mo le faaeaga e avea ma o se sini o le olaga atoa.
Sa faatulagaina e Keriso Lana Ekalesia e fesoasoani ia i tatou. Ua Ia valaauina ni tamalii e toa 15 ua tatou lagolagoina o ni perofeta, tagata vaai, ma talifaaaliga e taitai le Ekalesia ma ia aoao atu tagata. O le Au Peresitene Sili ma le Korama a Aposetolo e Toasefululua e tutusa lava le mana ma le pule, faatasi ai ma le Aposetolo sinia ua tofia o se Peresitene o le Ekalesia. Ua valaauina Fitugafulu e lagolagosua. E lei faatulagaina e taitai ni mea e manaomia mo le faaeaga. O le Atua na faia! O nei taitai ua valaauina e aoao atu, faamalamalama atu, apoapoai atu, ma e oo lava i le lapatai atu ina ia tatou tumau ai i le ala.
E pei ona faamalamalama mai i le tusitaulima o le Ekalesia: “I le faataunuuina o lona faamoemoega e fesoasoani i tagata taitoatasi ma aiga ia agavaa mo le faaeaga, e taulai atu le Ekalesia i tiutetauave ua tofia mai le lagi. O nei tiutetauave e aofia ai le fesoasoani i tagata o le ekalesia ia ola i le talalelei a Iesu Keriso, faapotopotoina o Isaraelu e ala i le galuega faafaifeautalai, tausiga o e matitiva ma e le tagolima, ma faataunuuina le faaolataga o e ua maliliu e ala i le fausiaina o malumalu ma le faatinoina o sauniga sui mo i latou.” O nei taulaiga e fa atoa ai ma isi tulafono, poloaiga, ma sauniga uma e manaomia ma e le faia i ai se filifiliga. O le Togiola a Iesu Keriso ma le faia o nei mea taitasi, o loo tatou faaopoopo ai ia faailoga manaomia i o tatou tusifolau faaleagaga.
I le faagasologa o lenei konafesi ua aoaoina ai i tatou i suiga o le a fesoasoani ia i tatou uma ina ia saunia lelei ai.
O le aiga o le ogatotonu lea o le ata o le faaolataga ma atonu o le mafuaaga lea ua ta’ua ai o le “fuafuaga tele o le fiafia.” Sa saunoa Peresitene Boyd K. Packer, “O le taunuuga sili o gaoioiga uma i le Ekalesia o le mafai lea e se alii ma lana ava ma le la fanau ona maua le fiafia i le aiga.”
Sa saunoa mai Peresitene Spencer W. Kimball, “O lo tatou manuia, faaletagata lava ia ma i le avea ai o se Ekalesia, o le a matua faalagolago lea i le ala o loo tatou taulai atu ai ma le faamaoni i le ola ai i le talalelei i le aiga.” O le galuega o malumalu ma talafaasolopito o aiga o se vaega o le ola ai i le talalelei i le aiga. E tatau ona sili atu ona avea ma se gaoioiga faaleaiga nai lo se gaoioiga faale-Ekalesia.
Ua i ai se faamamafa faafouina i le galuega o talafaasolopito o aiga ma le malumalu mai le Au Peresitene Sili ma le Korama a Aposetolo e Toasefululua. O lou tali atu i lenei faamamafa o le a faateleina ai lou olioli ma le fiafia faaletagata lava ia ma faaleaiga.
Mai le Mataupu Faavae ma Feagaiga ua tatou faitau ai: “Ua oo mai lava le aso tele o le Alii. … O lea, ia tatou osi atu, o se ekalesia ma se nuu, ma se Au Paia o Aso e Gata Ai, se taulaga i le Alii i le amiotonu; ma ia tatou tuu atu i lona malumalu paia, … se tusi ua i ai talafaamaumau o o tatou tagata maliliu, lea o le a agavaa mo le talia atoatoa.”
O lenei “tusi” o le a saunia e faaaoga ai talafaamaumau o igoa ma sauniga o loo i ai i utuofaamatalaga o le FamilyTree a le Ekalesia.
O loo ou siakiina ma faaopoopo i ai ia talafaamaumau i lenei utuofaamatalaga ona ou te manao i igoa o tagata uma ou te alofa i ai ia i ai i le tusi. Ae a oe?
O loo ta’ua i le Mataupu Faavae ma Feagaiga vaega 128 faapea, “Ona o i tatou e aunoa ma [o tatou tuaa] e le mafai ona faaatoatoaina; pe mafai foi ona faaatoatoaina i latou e aunoa ma i tatou.”
O le talafaasolopito o aiga ua sili atu nai lo gafa, tulafono, igoa, aso, ma nofoaga. E sili atu nai lo le taulai atu i mea ua tuanai. O le talafaasolopito o aiga e aofia ai foi le taimi lenei a o tatou fatuina o tatou lava talafaasolopito. E aofia ai le lumanai a o tatou mamanuina talafaasolopito o le lumanai e ala i o tatou tuaa. O se tina talavou, mo se faataitaiga, o loo faasoaina mai ana tala faaleaiga ma ata ma lana fanau o loo faia le galuega o talafaasolopito faaleaiga.
O le aai ma feinu i le faamanatuga, auai i sauniga, faitauina o tusitusiga paia, ma faia tatalo faaletagata lava ia, faia galuega o talafaasolopito o aiga ma le malumalu e tatau ona avea ma se vaega masani o la tatou tapuaiga faaletagata lava ia. O le tali atu o a tatou talavou ma isi i valaaulia faaperofeta e faagaeetia ma ua faamaonia ai o lenei galuega e mafai ma e tatau ona faia e tagata uma i soo se vaitausaga.
E pei ona faamatalaina e Elder Quentin L. Cook, “Ua tatou maua [nei] le aoaoga faavae, o malumalu, ma tekinolosi.” Ua sili atu ona faigofie le faia o le galuega i le taimi nei ma ua faatapulaaina i le na o se fuainumera o tagata o e o loo avea lenei mea ma se faamuamua. O le galuega e alu ai pea le taimi ma osigataulaga, ae e mafai e tagata uma ona faia, ma ua faigofie atu pe a faatusatusa lea i ni nai tausaga ua mavae.
Ina ia fesoasoani i tagata, ua ao mai e le Ekalesia ni faamaumauga ma saunia ni meafaigaluega ina ia mafai ai ona faia le tele o le galuega i o tatou lava aiga po o fale o uarota faapea ma le malumalu. O le tele o faafitauli ua aveesea. Po o a lava ni ou lagona ma manatu sa i ai i le taimi ua tuanai, ua ese nei la!
Peitai, e i ai se faafitauli e tasi e le mafai e le Ekalesia ona aveesea. O le faatuai lea ona faia e se tagata o le galuega. Pau lava le mea e manaomia o se faaiuga ma se taumafaiga laitiiti. E le manaomia ai se taimi tele. Na o sina taimi laitiiti lava i se tulaga faifai pea o le a gaosia ai le fiafia i le galuega. Fai le faaiuga ina ia faia se laa, ia aoao ma talosaga atu i isi e fesoasoani mai ia te oe. O le a latou faia! O igoa e te mauaina ma ave i le malumalu o le a avea ma faamaumauga mo “le tusi.”
E oo lava i le faateleina naua o le auai o tagata, ua tatou iloaina ua na o ni nai tagata o le Ekalesia o loo auai e le aunoa i le sailia ma le faia o sauniga o le malumalu mo o latou aiga. O lenei tulaga e manaomia ai se suiga i mea tatou te faamuamuaina. Au’a nei teenaina se suiga, ae ia talia! O suiga o se vaega ia o le ala sili o le fiafia.
E manaomia le faia o lenei galuega, e le mo le manuia o le Ekalesia ae mo o tatou tagata ua maliliu ma mo i tatou lava. E manaomia e i tatou ma o tatou tuaa ua maliliu ni faailoga i o tatou tusifolau faaleagaga.
O le “tuufaatasia” o o tatou aiga i augatupulaga e tele ua na o malumalu e mafai ona faataunuu ai e ala i sauniga faamau. E faigofie lava ona laasaga: na o le sue o se igoa ma ave i le malumalu. O le a mafai ona e fesoasoani atu i isi e faia foi i le aluga o taimi.
Faatasi ai ma ni nai tuusaunoaga, e mafai e tagata uma—tagata uma—ona faia lenei mea!
O loo i ai ni faamanuiaga moni e fesootai ma lenei galuega. E toatele naua matua ma taitai o loo popole i tulaga o le lalolagi o i ai nei ma aafiaga i aiga ma le autalavou.
Sa folafola mai e Elder David A. Bednar: “Ou te valaau atu i tupulaga talavou o le Ekalesia ina ia aoao ma ia iloa le Agaga o Elia. … Ou te folafola atu [o le a] puipuia oe mai le uunaiga faateleina a le tiapolo. A outou auai i le faatinoga ma outou fiafia i lenei galuega paia, o le a malupuipuia outou i lo outou talavou ma i o outou olaga.”
Uso e ma tuafafine, ua oo mai le taimi e aveese ai le ufi o a tatou tamai toi ma ō e galulue. E le tatau ona tatou maumaua o tatou faaeaga po o o tatou aiga mo mea e itiiti le taua.
O le galuega lenei a le Atua, ia faia e tagata o le ekalesia ma tagata le lolotu, talavou ma matutua, tane ma fafine.
Ou te faamaea atu i le sii mai o le fuaiupu muamua o le viiga 324, ma suia le upu e tasi:
O Iesu Keriso o le Tupu! Ou te molimau atu ai ia te Ia i le suafa o Iesu Keriso, amene.