Ua Ou Iloa Nei Mea Mo Au Lava Ia
Saunia e Elder Craig C. Christensen
O Le Au Peresitene o Fitugafulu
O le iloaina mo i tatou lava e moni le talalelei toefuataiina a Iesu Keriso, e mafai ona avea ma se tasi o aafiaga silisili ma matua olioli i le olaga.
O ou uso pele, o loo uunaia pea i tatou e ala i le faataitaiga patino ma le auaunaga faaleperisitua a Peresitene Thomas S. Monson. Talu ai nei, sa fesiligia ai nisi o tiakono, “O le a se mea e sili ona e faamemelo i ai e uiga ia Peresitene Monson?” Sa ta’ua e se tasi tiakono le auala na avatu ai e Peresitene Monson, a o laitiiti, ni ana meataalo i se uo e le tagolima. O le isi sa ta’ua le auala na tausia ai e Peresitene Monson le toatele o tina ua oti a latou tane i lana uarota. O le lona tolu sa ta’ua le valaauina o ia o se Aposetolo a o laitiiti lava ma ua faamanuiaina ai le toatele o tagata i le lalolagi atoa. Ona fai mai lea o se tasi o alii talavou, “O le mea e sili ona faamemelo i ai e uiga ia Peresitene Monson o le malosi o lana molimau.”
E moni, ua tatou lagonaina uma le molimau faapitoa a lo tatou perofeta e uiga i le Faaola o Iesu Keriso ma lana tautinoga ia mulimuli e le aunoa i musumusuga a le Agaga. O aafiaga taitasi na ia faasoa mai, ua valaaulia ai i tatou e Peresitene Monson ina ia ola atoatoa atili i le talalelei ma ia saili ma faamalosia a tatou lava molimau patino. Manatua lana saunoaga mai lenei pulelaa i ni nai konafesi ua mavae: “Ina ia mafai ona tatou malolosi ma tetee atu i malosiaga uma o loo tosoina ai i tatou i le itu sese … , e tatau ona i ai ni a tatou lava molimau. Pe ua e 12 pe 112—po o soo se mea lava i le va—e mafai ona e iloaina mo oe lava ia o le talalelei a Iesu Keriso e moni.”
E ui o lau savali i lenei po e faatatau ia i latou o e ua taulalata atu i le 12 nai lo le 112, ae o mataupu faavae ou te faasoa atu e faatatau i tagata uma. I le tali atu i le saunoaga a Peresitene Monson, ou te fesili atu ai: Pe o tatou iloa ea mo i tatou lava e moni le talalelei a Iesu Keriso? Pe mafai ea ona tatou fai atu ma le mautinoa o tatou e ana moni lava a tatou molimau? Ou te toe fia siiina mai le saunoaga a Peresitene Monson: “Ou te folafola atu o se molimau malosi o lo tatou Faaola ma Lana talalelei o le a … puipuia oe mai le agasala ma le amioleaga o siomiaina oe. … Afai e te lei maua lava se molimau o nei mea, ia e faia mea e tatau ai ina ia maua ai se molimau. E taua mo oe le i ai o sau lava molimau, aua o molimau a isi e faatapulaa lona aoga mo oe.”
Ua Ou Iloa Nei Mea Mo Au Lava Ia
O le iloaina mo i tatou lava e moni le talalelei toefuataiina a Iesu Keriso, e mafai ona avea ma se tasi o aafiaga silisili ma matua olioli i le olaga. Atonu e tatau ona tatou amata i le faalagolago atu i molimau a isi—i le faapea atu, e pei ona sa faia e autau totoa talavou, “Matou te le masalosalo lava sa mautinoa lena mea e o matou tina.” O se nofoaga lelei lea e amata ai, ae e tatau ona tatou fausia mai iina. Ina ia malosi i le ola ai i le talalelei, e leai se isi mea e sili ona taua nai lo le mauaina ma le faamalosia o a tatou lava molimau. E tatau ona tatou folafola atu, e pei o Alema, “ua ou iloa nei mea mo au lava ia.”
“Ma o le a so outou manatu e faapefea ona ou iloa lo latou moni?” sa faaauau le tala a Alema. “Faauta, ou te fai atu ia te outou sa faailoa mai i latou ia te au e ala i le Agaga Paia o le Atua. Faauta, sa ou anapogi ma tatalo i aso e tele ina ia mafai ona ou iloa nei mea mo au lava ia. Ma o lenei ua ou iloa mo au lava ia ua moni nei mea.”
Ou Te Fia Vaai i Mea sa Vaai i ai Lo’u Tama
E pei o Alema, sa iloa foi e Nifae le mea moni mo ia lava. Ina ua uma ona faalogo atu i lona tama o tautala i le tele o ona aafiaga faaleagaga, sa manao Nifae ia iloa mea na iloa e lona tama. O se tulaga na sili atu nai lo le na o se fiailoa—o se mea sa ia galala e fiaai ma fiainu i ai. E ui sa “talavou lava” o ia ae sa ia te ia “le naunau tele e fia iloa mealilo a le Atua.” Sa ia naunau ia “vaai, ma faalogo, ma iloa e uiga i ia mea, i le mana o le Agaga Paia.”
A o “mafaufau loloto [Nifae] i [lona] loto,” sa aveina atu o ia “i le Agaga … i se mauga maualuga lava,” lea na fesiligia ai o ia, “O le a le mea ua e manao i ai?” O lana tali e faigofie: “Ou te fia vaai i mea sa vaai i ai lo’u tama.” Ona o lona loto talitonu ma ana taumafaiga maelega, sa faamanuiaina ai Nifae i se aafiaga ofoofogia. Sa ia maua se molimau o le soifua mai, soifuaga, ma le Faasatauroga o le Faaola o Iesu Keriso lea o le a oo mai; sa ia vaai i le oo mai o le Tusi a Mamona ma le Toefuataiga o le talalelei i aso e gata ai—o taunuuga uma ia o lona manaoga faamaoni ia iloa mo ia lava ia.
O nei aafiaga patino ma le Alii na saunia ai Nifae mo faigata ma luitau o le a vave ona feagai ma ia. O i latou na mafai ai ona ia tu malosi e oo lava ina ua tauivi isi tagata o lona aiga. Na mafai ona ia faia lenei mea ona sa ia aoaoina mo ia lava ma na ia iloaina mo ia lava. Na faamanuiaina i le i ai o lona ia lava molimau.
Ina Ole Atu Ia i le Atua
Faapei foi o Nifae, sa “talavou lava” foi le Perofeta o Iosefa Samita ina ua “faaosoina [lona] mafaufau e manatunatu mamafa” e uiga i mea moni faaleagaga. Mo Iosefa, sa avea o se taimi o le “tele naua [o] le faanunununu,” o le siomiaina i savali feteenai ma le le mautonu e uiga i lotu. Sa ia fia iloa po o fea lotu ua sa’o. Faapei foi o Nifae, sa “talavou lava” foi le Perofeta o Iosefa Samita ina ua “faaosoina [lona] mafaufau e manatunatu mamafa” e uiga i mea moni faaleagaga. Mo Iosefa, sa avea o se taimi o le “tele naua [o] le faanunununu,” o le siomiaina i savali feteenai ma le le mautonu e uiga i lotu. Sa ia fia iloa po o fea lotu ua sa’o.” sa ia galue ai mo ia lava ma maua ai se tali. I se taeao matagofie o le tautotogo i le 1820, sa ulu atu ai o ia i le togavao ma tootuli i le tatalo. Ona o lona faatuatua ma ona sa i ai le galuega faapitoa a le Atua mo ia e fai, sa maua ai e Iosefa se faaaliga mamalu e uiga i le Atua le Tama ma Lona Alo, o Iesu Keriso, ma iloa ai mo ia lava le mea e tatau ona ia faia.
O e vaaia i aafiaga o Iosefa se mamanu e mafai ona e faaaogaina e maua ai pe faamalosia ai lau oe lava molimau? Sa faatagaina e Iosefa ia tusitusiga paia ia ulufia lona loto. Sa ia mafaufau loloto i ai ma faaaogaina i lona lava tulaga. Ona ia galue lea i le mea sa ia aoaoina. O le taunuuga, o le Uluai Faaaliga mamalu lea—ma mea uma na sosoo mai ai. O lenei Ekalesia sa faavae moni lava i luga o se mataupu faavae e mafai e soo se tasi—e aofia ai se tamaitiiti fai faatoaga e 14 tausaga—ona “ole atu i le Atua” ma maua se tali o ana tatalo.
O Le A La Le Molimau?
E masani ona tatou faalogo i tagata o le Ekalesia o fai mai o a latou molimau i le talalelei o se mea e sili ona taua ia i latou. O se meaalofa paia mai le Atua lea e oo mai ia i tatou e ala i le mana o le Agaga Paia. O se faamautinoaga toafimalie ma le maluelue tatou te mauaina pe a tatou suesue, tatalo, ma ola i le talalelei. O le lagona lea e molimau mai e le Agaga Paia i o tatou agaga o mea o tatou aoaoina ma faia e sa’o.
O nisi tagata e talanoa i se molimau e peisea’i o se ki o se moli—a le o kiina pe o tapeina foi; a le o le i ai o se molimau, po o le leai foi. O le mea moni, o se molimau e pei lava o se laau lea e pasia le tele o laasaga o le tuputupu ae ma le atiaeina. O nisi o laau sili ona maualuluga i le lalolagi o loo maua i le Paka Faavaomalo o le Redwood i sisifo o le Iunaite Setete. A e tu i vae o nei laau tetele, e ese le ofoofogia o le mafaufau atu o nei laau taitasi na tutupu mai se tamai fatu laau. E faapena foi i a tatou molimau. E ui e amata i se aafiaga faaleagaga se tasi, latou te tuputupu ae ma atiae i le aluga o taimi e ala i le tausia pea ma aafiaga faaleagaga masani.
E le o se mea e faateia ai la, ina ua faamatala mai e le perofeta o Alema le auala e atiae ai se molimau, sa ia talanoa mai e uiga i se fatu na tuputupu ae e avea o se laau. “Afai e te tuu ane se avanoa,” sa ia fai mai ai, “e mafai ona toto ai o se fatu i lou loto, faauta, afai o se fatu moni, po o se fatu lelei, afai e te le tiaia i fafo i lou le talitonu, … o le a amata ona malena ae i totonu o lou fatafata; ma pe a e lagona ia faalogona o le malena ae, o le a amata ona e fai ifo ia te oe lava—Ua tatau ona lelei lenei fatu, pe ua lelei le afioga, ona ua amata ona faalauteleina ai lo’u agaga; ioe, ua amata ona faamalamalama ai lo’u malamalamaaga, ioe, ua amata ona suamalie ia te au.”
O le auala lea e masani ona amata ai se molimau: o ni lagona paia, faagaeetia, ma mautinoa lea e faaalia mai ia i tatou e moni le afioga a le Atua. Peitai, po o le a lava le matagofie o nei lagona, ua na o se amataga. O lau galuega ina ia tupu lau molimau e lei maea—e pei lava foi o le totoina o se laau redwood pe a feosofi ae ni ona tamai laau mai le palapala. Afai tatou te le amanaia pe tuulafoai nei uluai musumusuga faaleagaga, afai tatou te le tausia i latou e ala i le faaauau pea ona suesue i tusitusiga paia ma tatalo ma e ala i le saili atili i aafiaga ma le Agaga, o le a mouese atu o tatou lagona ma faavaivaia ai a tatou molimau.
E pei ona faauiga ai e Alema: “Afai e te tuulafoai i le laau, ma le manatu i ai mo lona tausiga, faauta o le a le mauaa; ma pe a oo mai le vevela o le la ma mu ai, talu ai ona ua leai ni ona aa, o le a mamae, ma o le a e liaina i luga ma lafo i fafo.”
I le tele o tulaga, o le a tuputupu ae a tatou molimau i le auala lava e tasi lea e tuputupu ae ai se laau: e faasolosolo, ma tau le iloa, o se taunuuga o a tatou tausiga faifaipea ma taumafaiga filiga. “Ae afai tou te tausia le afioga,” sa folafola mai Alema, “ioe, tausi le laau ina ua amata ona ola mai, i lo outou faatuatua ma le filiga tele, ma le onosai, ma tepa taulai i luma i lona fua, o le a mauaa; ma faauta o le a avea ma laau e puna ae i le ola tumau-faavavau.”
O Le Taimi Lenei; O Le Aso Lenei
Na amata lau lava molimau a o ou suesue ma mafaufau loloto i aoaoga o loo maua i le Tusi a Mamona. A o ou tootuli i lalo e ole atu i le Atua i se tatalo faamaualalo, sa molimau mai e le Agaga Paia i lou agaga o le mea sa ou faitauina e moni. O lenei tautinoga amata sa oo ai ina avea ma a’u molimau e uiga i le tele o isi upumoni o le talalelei, e pei ona aoao mai Peresitene Monson: “Pe a tatou iloa le moni o le Tusi a Mamona, ona tatou iloa foi lea o Iosefa Samita o se perofeta moni ma sa ia vaai i le Atua le Tama ma Lona Alo, o Iesu Keriso. Ona tatou iloa foi lea ua toefuataiina mai le talalelei i aso nei e gata ai e ala mai ia Iosefa Samita—e aofia ai le toefuataiga o le Perisitua Arona ma le Mekisateko.” Talu mai lena aso, sa ou mauaina le tele o aafiaga paia faatasi ma le Agaga Paia lea na faamautinoa mai ia te au o Iesu Keriso o le Faaola o le lalolagi ma e moni Lana talalelei toefuataiina. Faatasi ai ma Alema, e mafai ona ou fai atu ma le mautinoa ua ou iloa nei mea mo au lava ia.
Au uo talavou e, o le taimi lenei ma le aso lenei e aoao ai pe faamautu ai mo outou lava le moni o le talalelei. Ua tofu i tatou ma se galuega taua e fai. Ina ia faataunuuina lena galuega, ma ia puipuia mai uunaiga a le lalolagi ia ua matua salalau solo, e tatau ona tatou maua le faatuatua o Alema, Nifae, ma le taulealea o Iosefa Samita ina ia maua ma atiaeina sau oe lava molimau.
E pei o le tiakono talavou lea na ou ta’ua muamua, ou te faamemelo foi ia Peresitene Monson ona o le malosi o lana molimau. E pei lava o se laau redwood tele, sa tuputupu ae foi le molimau a Peresitene Monson ma atiaeina i le aluga o taimi. E mafai ona tatou iloaina mo i tatou lava, e pei o Peresitene Monson, o Iesu Keriso o lo tatou Faaola ma le Togiola o le lalolagi, o Iosefa Samita o le perofeta o le Toefuataiga, e aofia ai le toefuataiina o le perisitua a le Atua. O loo tatou tauaveina lena perisitua paia. Tau ina ia tatou aoao i nei mea ma iloaina mo i tatou lava ia o lau tatalo faamaulalo lea i le suafa paia o Iesu Keriso, amene.