Pe Le o i Tatou Uma Ea o Ni Tagata Aisi?
Saunia e Elder Jeffrey R. Holland
O Le Korama a Aposetolo e Toasefululua
Mauoa pe matitiva, e tatau ona tatou ‘fai le mea ua tatou mafai” pe a i ai nisi e le tagolima.
Oka se matagofie o le elemene fou ua faalauiloaina i le faatulagaga o la tatou konafesi aoao. Bien hecho, Eduardo.
I le mea o le a avea ma se taimi sili ona faateia o le amataga o Lana auaunaga, sa tulai ai Iesu i le sunako i Lona nuu o Nasareta ma faitau ia upu nei lea na valoia e Isaia ma tusia i le Talalelei a Luka: “Ua i ou luga le Agaga o le Alii, aua ua na faauu mai ia te au e folafola le talalelei i e matitiva; ua auina mai au e ia e faamalolo i e loto momomo, e talai le saolotoga i le tafeaga, … [ma] tuu saoloto i e ua faasauaina.”
O le mea lea na faia ai e le Faaola se uluai faasilasilaga faalauaitele e uiga i Lana galuega faamesia. Ae o lenei foi fuaiupu ua faamanino mai foi e faapea o luga o le ala e tau atu i Lana taulaga togiola lemafuatia ma le Toetu, o le uluai tiute faamesia muamua lava ma le taua a Iesu o le faamanuia lea i e matitiva, e aofia ai e matitiva i la le agaga.
Mai le amataga o Lana galuega, sa alofa Iesu i tagata matitiva ma e le tagolima i se auala tulagaese. Sa soifua mai o ia i totonu o le aiga o le toalua o i latou ma tuputupu ae faatasi ma le toatele o i latou. Tatou te le iloa ni auiliiliga uma o Lona soifuaga faaletino, ae sa Ia fetalai mai i se tasi taimi, “E fai lua o alope, e fai … mea e momoe ai manu felelei; a o le Atalii o le tagata, e leai se mea e moe ai o ia.” E foliga mai o le Foafoa o le lagi ma le lalolagi “ma mea uma o i ai” sa i ai i Lona soifuaga faatagata matua, e leai se aiga.
I le talafaasolopito atoa, o le mativa ua mafaufauina o se tasi o faafitauli silisili ma sili ona taatele i tagata. O ona mafatiaga manino lava e masani ona faaletino, ae o faatamaiaga faaleagaga ma faalelagona na te aumaia atonu e sili atu ona faataumaoi. I soo se tulaga lava ua tuuina mai ai e le Faaola sili se valaau naunautai ina ia tatou aufaatasi ma Ia i le aveesea o lenei avega mai tagata. I le avea ai ma Ieova, sa Ia fetalai ai o le a Ia faamasinoina ma le saua le aiga o Isaraelu ona “o mea na faoa i e [le tagolima] ua i ai i o outou fale.”
“Se a le mea,” sa Ia fetalai mai ai, “ua outou tuimomomo ai lo’u nuu, ma outou olo ai mata o e matitiva?”
Ua matua faamanino mai e le tusitala o le Faataoto lea mataupu: “O le ua faasaua i le tagata mativa, e faalumaina e ia Le na faia o ia,” ma “o le na te punitia ona taliga i le valaau a le tagata mativa …, e valaau [foi] o ia, a e le talia.”
I o tatou aso, e lei oo i le faamanatuina o le uluai tausaga talu ona toefuatai mai le Ekalesia a Iesu Keriso ae poloaiina e le Alii ona tagata ina ia “latou vaaia ē ua matitiva ma … le tagolima, ma auauna atu mo lo latou toomaga ina ia latou le mafatia.” Matau le gagana o i lena fuaitau—“ina ia latou le mafatia.” O le gagana lena e faaaoga e le Atua pe a finagalo o Ia e faataunuu se mea.
I le mafaufau ai i le faigata tele ona foia o le faailoga tagata i le lalolagi, o le a se mea e mafai ona fai e se alii po o se tamaitai e toatasi? Sa tuuina mai e le Matai Lava Ia se tali. A o lumanai ai Lona faalataina ma le Faasatauroga, sa uuina ai e Maria le ao o Iesu i se suauu taugata, sa tetee i ai Iuta le Sekara i lenei faiga ma “muimui lea i le fafine.”
Na fetalai atu Iesu:
“Se a le mea tou te faalavelave ai ia te ia? O le mea lelei ua faia e ia. …
“Ua faia e ia le mea ua ia mafai ai.”
“Ua faia e ia le mea ua ia mafai ai”! O se faamatalaga mamana ma puupuu lena! Sa fesiligia e se failipoti i se tasi taimi Mother Teresa o Kalakata e uiga i lana galuega faigata o le laveai o e matitiva i lena aai. Fai mai a ia, pe a fua i faamaumauga faafuainumera, e matuai leai lava se mea o ia ausiaina. Sa tali malosi lenei tamaitai faatinoiti ma ofoofogia e faapea o lana galuega e faatatau i le alofa, ae le o fuainumera. E ui i le toatele naua o tagata e le oo i ai lana fesoasoani, ae sa ia fai mai e mafai ona ia tausia le poloaiga o le alofa i le Atua ma tuaoi i le auauna atu ia i latou e oo i ai lana fesoasoani ma soo se punaoa na te maua. “O le mea o tatou faia o se mea noa ma ua na o se matāua i le sami,” sa ia fai mai ai i se tasi taimi. “Ae afai tatou te le faia, o le a faaitiitia le sami i lena matāua e tasi e le o i ai.” Ma le faanoanoa, na faaiuina e le failipoti e faapea o le FaaKerisiano ua manino lava e le o se taumafaiga e fua i fuainumera. Sa ia mafaufau afai o le a tele le olioli i le lagi i se tagata agasala e toatasi ua salamo nai lo le ivasefulu iva e le o manaomia ona salamo, ona foliga mai lea e le o popole tele le Atua i ni pasene.
E faapefea la ona tatou “faia le mea ua tatou mafai”?
Mo se tasi mea, e pei ona aoao mai le Tupu o Peniamina, e mafai ona tatou tuu le limau’u i a tatou tupe po o punaoa ona ua tatou vaai atu i tagata matitiva ma faapea ua latou aumaia lo latou malaia i o latou lava luga. Atonu o nisi ua oo i faafitauli ona o i latou lava ae tatou te le o faia uma ea lea lava mea e tasi? Pe le o le mafuaaga ea lena na fesili ai lenei taitai agaalofa, “Pe le o i tatou uma ea o ni tagata aisi?” Tatou te le o tagi uma atu ea mo se fesoasoani ma se faamoemoe ma ni tali i tatalo? Tatou te le o aioi atu ea mo le faamagaloina o mea sese ua tatou faia ma faafitauli ua tatou faatupuina? Tatou te le o aioi atu ea ina ia totogiina e le alofatunoa o tatou vaivaiga, ma ia manumalo le alofa mutimutivale i le faamasinoga tonu i o tatou tulaga? Leitioa foi a fai mai le Tupu o Peniamina ua tatou maua le faamagaloga o a tatou agasala e ala i le aioi atu i le Atua, o lē tali mai ma le agaalofa, ae tatou te faatumauina le faamagaloina o a tatou agasala e ala i le tali atu ma le agaalofa i e matitiva o loo aioi mai ia i tatou.
E le gata i le faatinoina o le alofa mutimutivale mo i latou, e tatau foi ona tatou tatalo mo i latou e le tagolima. O se vaega o sa Sorama, o e sa manatu o latou uso e “eleelea” ma o ni “otaota,”—o faaupuga na faatusitusiga paia—sa tutuli i fafo mai o latou fale e tatalo ai “ona o le matua-tua o o latou ofu.” Fai mai Mamona, o e “matitiva e faatatau i mea o le lalolagi; ma … matitiva foi i le loto”—o tulaga ia e lua e toeitiiti lava ō faatasi i taimi uma. Sa finau atu soa faifeautalai o Alema ma Amoleka mo tagata ofu eleelea ia na teenaina ma le le tonu e ala i le tau atu ia i latou e faapea, po o a lava avanoa ua aveesea e isi mai ia i latou, e mafai lava ona latou tatalo e le aunoa—i o latou fanua ma i o latou fale, i o latou aiga ma i o latou loto.
Ae, i lenei lava vaega o e na tutuli i fafo, sa fai atu i ai Amoleka, “A uma ona [outou tatalo], afai [tou te] liliu ese e ua le tagolima, ma e ua le lavalava, ma le asiasi atu i e ua mamai ma puapuagatia, ma le faasoa atu a outou mea, pe afai ua i ai ia te [outou] [ni mea], ia i latou o e ua tutu le tagolima—ou te fai atu ia te outou, … ua le aoga lau tatalo, ma ua leai se mea e te maua mai ai, ma ua tusa [outou] o ni tagata pepelo o e ua faafitia le faatuatua.” O se faamanatu mamana lea pe tatou te mauoa pe matitiva, e tatau ona tatou ‘fai le mea ua tatou mafai” pe a i ai nisi e le tagolima
Ia, ina nei tuuaia au i le fautuaina atu o ni polokalama le mo’i faaleagafesootai i le lalolagi po o le faamaonia o le aisi tupe i magaala e avea o se pisinisi lelei, ou te faamautinoa atu ia te outou o lou faamamaluina o mataupu faavae o le galue malosi, ola faasoasoa, ola faalagolago o le tagata ia te ia lava, ma le naunautai e malosi e pei lava o soo se alii po o tamaitai o loo soifua. O loo faamoemoeina i tatou i taimi uma ina ia tatou fesoasoani ia i tatou lava ae tatou te lei saili atu se fesoasoani mai isi. Ma le isi, ou te le iloa tonu pe o le a se tulaga e tatau ona outou faataunuu ai a outou matafaioi ia i latou o e e le fesoasoani pe ua le mafai ona fesoasoani ia i latou lava. Ae ou te iloa o loo silafia e le Atua, ma o le a Ia fesoasoani ma taiala outou i ni galuega agaalofa faalesoo pe afai o outou mananao ma le lotofuatiaifo ma tatalo ma saili mo ni auala e tausi ai se poloaiga ua Ia tuuina mai pea lava pea ia i tatou.
O le a outou iloaina o loo ou talanoa atu iinei i manaoga faigata i totonu o malo ia e le na o tagata o le Ekalesia e faatatau i ai. Ae o le mea e lelei ai o le ala a le Alii e fesoasoani ai i o tatou lava tagata e faigofie: o tagata uma o e malolosi faaletino e tatau ona usitaia le tulafono o le anapogi. Sa tusia e Isaia:
“E le o lenei ea le anapogi ou te loto i ai? …
“Ona ia tofitofi au mea e ‘ai i le ua fia ‘ai, ia au mai i lou fale e ua matitiva ma faasauaina? a e iloa le ua le lavalava e te faaofuina o ia, … ? [ia e] tatala fusi o le amo, ma … tuuina atu ia faasaoloto e ua faasauaina … ?”
Ou te molimau atu i vavega, faaleagaga ma faaletino, lea e oo mai ia i latou o e ola i le tulafono o le anapogi. Ou te molimau atu i vavega ia na oo mai ia te au. E moni, e pei ona tusia e Isaia, sa ou tagi atu i le anapogi e sili atu ma le faa-tasi, ma sa tali moni mai lava le Atua, “O A’u lenei.” Ia faataua lena avanoa paia tai masina, ma ia limafoai i lau taulaga anapogi ma isi foai agaalofa, faaleaoaoga, ma faifeautalai pe a talafeagai ai ma tulaga. Ou te folafola atu o le a agalelei le Atua ia te outou, ma i latou o e maua le toomaga ona o outou ma o le a faaamuia i lou igoa e faavavau. Na silia ma le tolu-kuata miliona tagata o le Ekalesia na maua le fesoasoani i le tausaga ua tea e ala atu i taulaga anapogi na faatautaia e epikopo ma peresitene o Aualofa tuuto. Ua matua toatele lava le Au Paia o Aso e Gata Ai loto faafetai.
Uso e ma tuafafine, o sea tautalaga e manaomia ai lo’u faailoa atu o faamanuiaga e lei galueaiina, e maua fua, ma e le muta i lo’u olaga, e faaletino ma le faaleagaga. Faapei foi o outou, sa ou popole i mea tautupe i nisi taimi, ae ou te lei mativa lava, pe ou te iloa pe faapei lagona o le mativa. Ma le isi mea, ou te leiloa uma ni mafuaaga ua tele ai le eseesega o tulaga o le fananau mai, soifua maloloina, o avanoa i aoga ma tamaoaiga iinei i le olaga faitino, ae pe a ou vaai i manaoga o le toatele, ua ou iloa ai “pe ana leai le alofatunoa o le Atua, semanu ou te le i ai i lenei tulaga.” Ua iloa foi e ui atonu e le o au o se leoleo o lo’u uso, ae o au o le uso o lo’u uso, ma “[ona] ua tele [mea] ua ou maua, [e tatau foi ona] ‘ou foai [atu].”
I lena tulaga, ou te tuuina atu ai se faamamaluga patino ia Peresitene Thomas Spencer Monson. Ua faamanuiaina au i le fegalegaleai ai ma lenei tamalii mo le 47 tausaga, ma o le ata o ia o le a ou faatauaina pea seia ou oti o le taimi na lele ai mai lena Siamani Sasae ua faatamaia le tamaoaiga e foi atu i le fale i ona seevae tosotoso ona e le gata sa ia foai atu lona suti lona lua ma isi ona ofutino ae o seevae na talai mai i ona vae sa see ai. “E matua matagofie i luga o mauga [ma le faatotosoina i totonu o le malaevaalele] o vae o le [e au] mai le tala lelei, o le logologo mai le manuia.” E sili atu i soo se tagata ua ou iloa, o Peresitene Monson na te “faia lava e le aunoa mea uma e mafai ona ia faia,” mo tina ua oti a latou tane ma i latou ua matuaoti, o [e] matitiva ma mafatia.
I se faaaliga i le 1831 i le Perofeta o Iosefa Samita, sa fetalai mai ai le Alii o le a i ai se aso o le a vaai ai e matitiva i le oo mai o le malo o le Atua e laveai i latou “i le mana ma le mamalu tele.” Tau ina ia tatou fesoasoani e faataunuu lena valoaga e ala i le oo mai i le mana ma le mamalu o le avea ai o i tatou ma tagata o le Ekalesia moni a Iesu Keriso e fai le mea tatou te mafaia e laveai soo se tasi tatou te mafaia mai le mativa o loo nofopologa ai i latou ma olopalaina ai le tele o a latou miti, ou te tatalo atu ai i le suafa alofa mutimutivale o Iesu Keriso, amene.