O Le Mana o le Tusi a Mamona
Ou te augani atu ia i tatou uma ia suesue ma le agaga tatalo ma mafaufau loloto i le Tusi a Mamona i aso taitasi.
Ou uso e ma tuafafine pele, ou te faafeiloai atu ia te outou ma le agaga fiafia tele a o tatou toe feiloai ai foi i se konafesi aoao matagofie a Le Ekalesia a Iesu Keriso o le Au Paia o Aso e Gata Ai. Ae ou te lei amataina lau lauga aloaia i le aso, ou te fia faalauiloa atu malumalu fou e lima lea o le a fausia i nofoaga nei: eria o Brasília, Pasila; Manila lautele, Filipaina; Nairobi, Kenya; Pocatello, Idaho, ISA; ma Saratoga Springs, Iuta, ISA.
O lenei taeao ou te talanoa atu ai e uiga i le mana o le Tusi a Mamona atoa ai ma le manaomia na’ua e i tatou o tagata o lenei Ekalesia ona suesue, mafaufau loloto i ai, ma faaaoga ona aoaoga i o tatou olaga. O le taua o le i ai o se molimau mausali ma mautinoa o le Tusi a Mamona e le mafai ona faamamafa atili [i lo lenei].
O loo tatou ola i se taimi o faafitauli ma le amioleaga tele. O le a le mea o le a puipuia i tatou mai le agasala ma le leaga ua matua salalau solo i le lalolagi i nei aso? Ou te faamausali atu o se molimau malosi e uiga i lo tatou Faaola, o Iesu Keriso, ma Lana talalelei o le a fesoasoani e taitai i tatou i le saogalemu. Afai e te le o faitauina le Tusi a Mamona i aso taitasi, faamolemole ia fai loa. Afai o le a outou faitauina ma le agaga tatalo, ma se naunautaiga faamaoni ina ia iloa le upumoni, o le a faaali atu e le Agaga Paia ia te outou lona moni. Afai e moni—ma ou te molimau faamaoni atu e monilava—o lona uiga o Iosefa Samita o le perofeta na vaai i le Atua le Tama ma Lona Alo o Iesu Keriso.
Ona e moni le Tusi a Mamona, o Le Ekalesia a Iesu Keriso o le Au Paia o Aso e Gata Ai o le Ekalesia lea a le Alii iinei i le lalolagi, ma ua toefuatai mai le perisitua paia a le Atua mo le manuia ma faamanuiaga o Lana fanau.
Afai e te lei maua lava se molimau mausali o nei mea, ia e faia mea e tatau ai ina ia maua ai se molimau. E taua mo oe le i ai o sau lava molimau i nei taimi faigata, aua o molimau a isi e faatapulaa lona aoga mo oe. Peitai, a maua loa, e manaomia e se molimau ona faatumauina le taūa ma le ola e ala i le usitai faifai pea i poloaiga a le Atua faapea ma le tatalo e le aunoa ma le suesueina o tusitusiga paia i aso uma.
A’u uo pele i le galuega a le Alii, ou te augani atu ia i tatou uma ia suesue ma le agaga tatalo ma mafaufau loloto i le Tusi a Mamona i aso taitasi. A tatou faia lea mea, o le a tatou i ai i se tulaga e lagona ai le siufofoga o le Agaga, e tetee atu ai i faaosoosoga, e faatoilalo ai le masalosalo ma le fefe, ma maua ai le fesoasoaniga a le lagi i o tatou olaga. Ou te molimau atu ai ma lo’u loto atoa i le suafa o Iesu Keriso, amene.