Saunia le Ala
E ui lava e eseese o latou tiute ma le pule, ae o le Perisitua Arona ma le Perisitua Mekisateko o ni paaga le mavaevae i le galuega o le faaolataga.
Ina ua 30 ou tausaga, sa amata ona ou faigaluega mo se kamupani tumaoti i Farani. I se tasi aso sa valaau mai ai le peresitene o le kamupani ia te a’u, o se tamalii lelei e ese lana tapuaiga, ou te alu atu i lona ofisa. O lana fesili na ou tei ai: “Faatoa ou iloa o oe o se ositaulaga i lau ekalesia. E sa’o lena mea?”
Na ou tali atu, “Ioe, e sa’o. Ou te umia le perisitua.”
O le faagaeetia i la’u tali, na ia fesili ai, “Na e a’oga i se seminālio faalelotu?”
“Ioe,” na ou tali atu ai, “i le va o vaitausaga o le 14 ma le 18 ma sa ou suesue i lesona seminare e toetoe lava o aso uma!” Na toeitiiti a pauese o ia mai lona nofoa.
I lo’u te’i tele, o nai vaiaso mulimuli ane sa ia toe valaauina atu a’u i lona ofisa e ofa mai ia te a’u se avanoa o le pule faatonusili i se tasi o vaega o kamupani. Sa ou ofo ma faailoa atu lo’u popolega ou te laitiiti tele ma e le lava se poto masani e umia ai sea tiutetauave taua. Ma se ataata agalelei, sa ia fai mai, “Atonu e moni lena mea, ae e le afaina. Ou te iloa ou mataupu faavae, ma ou te iloa mea na e aoaoina i lau ekalesia. Ou te manaomia oe.”
Na sa’o o ia i mea sa ou aoaoina i le Ekalesia. O tausaga na mulimuli mai sa luitauina, ma ou te lei iloa pe na mafai ona faamanuiaina a’u e aunoa ma le poto masani sa ou mauaina i le auauna atu i le Ekalesia mai le taimi a o ou alii talavou.
Sa faamanuiaina a’u i le tuputupu ae i se tamai paranesi. Talu ai na toalaiti la matou fuainumera, na valaauina le autalavou ina ia auai ma le naunautai i vaega uma o le paranesi. Sa ou matuai pisi lava ma fiafia i le lagona o le aogā. I Aso Sa sa ou galue i le laulau o le faamanatuga, auauna atu i la’u korama o le perisitua, ma faatino isi valaauga eseese. I le aluga o le vaiaso e masani ona matou o ma lo’u tama ma isi matutua e umia le perisitua e fai a matou asiasiga a faiaoga o aiga, faamafanafana i e mama’i ma mafatia, ma fesoasoani i e le tagolima. E leai ma se tasi na mafaufau ou te laitiiti tele e auauna atu pe taitai foi. Ia te au, na foliga lava o se mea masani.
O auaunaga na faia i na taimi o le talavou na fesoasoani e fausia la’u molimau ma taula lo’u olaga i le talalelei. Sa siosiomia a’u e ni tamalii lelei ma agaalofa o e na tuuto atu i le faaaogaina o o latou perisitua e faamanuia ai olaga o isi. Sa ou fia avea e pei o i latou. I le auauna atu ma i latou, na sili atu nai lo o lo’u iloaina i lena taimi, sa ou aoao e avea ma taitai i le Ekalesia faapea foi i le lalolagi.
E toatele alii talavou o loo auai po o faalogo mai i lenei sauniga i lenei po, o e umia le Perisitua Arona. A o ou vaavaai atu i lenei aofia, ua ou vaai i le toatele o outou o loo saofafai i autafa o tamalii matutua, atonu o o outou tamā, o outou tamā matutua, o outou uso matutua, po o outou taitai perisitua—o ē umia uma le Perisitua Mekisateko. Latou te alolofa ia te outou, ma i se vaega toatele, na latou malaga mai iinei i lenei po e faatasi ma outou.
O lenei potopotoga o augatupulaga o loo aumaia ai se vaaiga matagofie o le lotogatasi ma le tulaga faaleusoga o i ai i le va o perisitua e lua a le Atua. E ui lava e eseese o latou tiute ma le pule, ae o le Perisitua Arona ma le Perisitua Mekisateko o ni paaga le mavaevae i le galuega o le faaolataga. E o faatasi lava ma e manaomia tele e le tasi le isi.
O le faatusa tonu lava o le sootaga vavalalata o i ai i le va o perisitua e lua na maua lea i le fesootaiga i le va o Iesu ma Ioane le Papatiso. E mafai e se tasi ona mafaufau ia Ioane le Papatiso e aunoa ma Iesu? Mata e faapei le misiona a le Faaola pe a na aunoa ma le galuega sauniuni na faia e Ioane?
Na tuuina ia Ioane le Papatiso se tasi o misiona sili ona matagofie na i ai: “e teuteu le ala o le Alii,” e papatiso o Ia i le vai, ma saunia se nuu ia taliaina o Ia. O lenei tamalii “amiotonu … ma … paia,” o le na faauuina i le perisitua maualalo, na malamalama atoatoa i le taua ma le tapulaa o lana misiona ma lana pule.
Na lolofi atu tagata ia Ioane e faalogo ma ina ia papatisoina e ia. Sa faamamaluina ma faaaloalogia o ia i lona foi aia tatau o se tagata o le Atua. Ae ina ua faaali ane Iesu, na gauai atu Ioane i se Tasi e sili atu nai lo ia ma tautino atu, “Ou te papatiso i le vai: a o loo tu mai i totonu ia te outou le tasi, … o ia lea o loo mulimuli mai, e sili lava o ia ia te au, ou te le aoga ona ou tatalaina le nonoa o lona seevae.”
Mo Lana vaega, na silafia ma le lotomaualalo, e Iesu Keriso, le Alo e Toatasi na Fanaua e le Tama, o le na umia le perisitua maualuga, le pule a Ioane. O ia, na fetalai ai le Faaola, “E lei tu mai i e na fananau i fafine sē sili ia Ioane le Papatiso.”
Mafaufau po o le a se mea e mafai ona tupu i a tatou korama o le perisitua pe afai na musuia ia fegalegaleaiga i le va o e umia ia perisitua e lua e le mamanu na faavaeina e Iesu ma Ioane le Papatiso. O’u uso talavou pele o le Perisitua Arona, e pei o Ioane, o lau matafaioi o le“saunia le ala” mo le galuega maoae o le Perisitua Mekisateko. O loo outou faia lenei mea i le tele o auala eseese. O loo outou faatinoina sauniga o le papatisoga ma le faamanatuga. O loo outou fesoasoani e saunia se nuu mo le Alii e ala i le talai atu o le talalelei, e ala i le “[asiasi atu] i fale o tagata taitoatasi,” ma e ala i le “[leoleo] i luga o le ekalesia.” O loo outou tuuina atu le fesoasoani i e matitiva ma lē tagolima i le aoina o taulaga anapogi, ma o loo outou auai i le tausiga o falelotu o le Ekalesia ma isi punaoa faaletino. E taua, manaomia, ma paia la outou matafaioi.
O’u uso e matutua, pe o outou o ni tamā, epikopo, faufautua o Alii Talavou, pe nao e o umia le Perisitua Mekisateko, e mafai ona outou mulimuli i le faataitaiga a le Faaola i le liliu atu i o outou uso o e umia le perisitua maualalo ma valaaulia i latou ia galulue faatasi ma outou. O le mea moni, o le valaaulia e sau mai le Alii Lava Ia. Na fetalai mai o Ia, “O lea, ia outou ave faatasi ma outou e ua faauuina i le perisitua maualalo, ma auina atu i latou e muamua atu ia te outou e fai tuutuuga, ma saunia le ala, ma faataunuu tuutuuga ua lē mafai e outou lava ona faataunuu.”
A o outou valaauina o outou uso talavou e “saunia le ala,” ua e fesoasoani ia i latou ia iloa ma faamamalu i le pule paia o loo latou umiaina. O le faia o lea mea, ua e fesoasoani ai ia i latou e saunia lo latou lava ala a o latou saunia mo le aso latou te maua ai ma faaaoga le perisitua maualuga.
Faataga mai a’u e faasoa atu se tala moni ia Alex, o se aoao talavou filemu, magafagafa, ma atamai. I se tasi Aso Sa, sa maua ai e le epikopo Alex o loo nofo nao ia i se potuaoga i se tulaga o le faanoanoa tele. Sa faamatala e le alii talavou le tiga o le faigata o le auai i le lotu e aunoa ma lona tamā, lea e le auai i le lotu. Ona ia fai mai lea ma loimata atonu e sili ona lelei mo ia le tuua o le Ekalesia.
O le popole moni mo lenei alii talavou, na vave ai ona tuufaatasia e le epikopo le aufono a le uarota e fesoasoani ia Alex. Sa faigofie lana fuafuaga: ina ia faatoagaina pea Alex ma fesoasoani ia te ia e atiae se molimau loloto o le talalelei, e manaomia ona latou “siosiomia o ia ma tagata lelei ma tuu atu ia te ia ni mea taua e fai.”
Na vave ona tuufaatasia le usoga o le perisitua ma tagata uma o le uarota e fesoasoani ia Alex ma faaali lo latou alolofa ma le lagolago. O le taitai vaega o faitaulaga sili, o se tagata faatuatua ma alofa, na filifilia e avea ma ana soa o faiaoga o aiga. Na lagolagoina patino o ia e uso o le au epikopo ma avea o ia ma o latou uo sili ona latalata i ai.
Na saunoa le epikopo: “Sa matou faapisiina Alex.Sa ia faasino nofoa i faaipoipoga, i maliu, fesoasoani ia te a’u i faapaiaga o tuugamau, papatiso nisi o tagata fou, faauu alii talavou i tofi o le Perisitua Arona, faiaoga i le autalavou, aoao atu ma faifeautalai, tatalaina falelotu mo konafesi, ma lokaina fale i le leva o le po pe a maea konafesi. Sa ia faia ni galuega faatino, na ma o faatasi e asiasi i tagata matutua ua lata ina maliliu, faia ni lauga i sauniga faamanatuga, tuuina atu le faamanatuga i e mama’i i falemai po o i o latou fale, ma avea ma se tasi o se vaega toalaiti lava o tagata ou te matuai faalagolago i ai o se epikopo.”
Na suia lemu Alex i sina mea itiiti ma sina mea itiiti. Na faateleina lona faatuatua i le Alii. Na ia maua le talitonuga ia te ia lava ma i le mana o le perisitua lea sa ia umia. Na faa’iu le saunoaga a le epikopo: “Na avea Alex ma e avea pea ma se tasi o faamanuiaga sili i lo’u taimi o se epikopo. O se faamanuiaga le fegalegaleai faatasi ai ma ia. Ou te talitonu faamaoni e leai se alii talavou ua alu i le misiona e lei matua saunia lelei e lana auaunaga faaleperisitua.”
O’u epikopo pele, ua ia te outou, e aofia i lou faauuga ma le vaetofiaina o se epikopo o lau uarota, le valaauga paia e auauna atu o se peresitene o le Perisitua Arona ma le korama a ositaulaga. Ou te iloa o loo outou tauaveina ni avega mamafa, peitai e tatau ona avea o outou tiute i nei alii talavou ma se tasi o a outou faamuamua aupito maualuga. E le mafai ona outou faatamala pe faamatuu atu a outou matafaioi i lenei tiutetauave i isi.
Ou te valaaulia outou ina ia mafaufau i talavou taitasi o loo umiaina le Perisitua Arona i lau uarota. E le tatau ona lagona e se tasi o i latou le tuulafoaia po o le le aoga. O i ai se alii talavou e mafai e oe ma isi uso o le perisitua ona fesoasoani i ai? Valaaulia o ia e galue i ou autafa. E tele taimi tatou te taumafai ai e faafiafia a tatou alii talavou ma tuua i latou i se tulaga o se tagata maimoa, ae e sili ona atiae o latou faatuatua ma le alofa mo le talalelei pe a faalauteleina o latou perisitua. E ala i le auai ma le naunautai i le galuega o le faaolataga, o le a latou fesootai ai ma le lagi ma o le a latou malamalama ai i lo latou gafatia paia.
O le Perisitua Arona e sili atu nai lo na o se vaega o le vaitausaga, se polokalama po o se gaoioiga faaleaoaoga, pe oo lava i se faaupuga e faailoga ai alii talavou o le Ekalesia. O le mana ma le pule lea e auai i le galuega sili o le laveaiina o agaga—o agaga o na alii talavou o loo umiaina faapea ma agaga o i latou o loo latou auauna atu i ai. Sei o tatou tuuina le Perisitua Arona i lona nofoaga moni, o se nofoaga filifilia—o se nofoaga o auaunaga, sauniuniga, ma mea e ausia mo alii talavou uma o le Ekalesia.
O o’u uso pele o le Perisitua Mekisateko, ou te valaaulia outou ina ia faamalosia le sootaga taua lea e tuufaatasia ai ia perisitua e lua a le Atua. Ia faamalosia a outou talavou o le Perisitua Arona e saunia le ala i o outou luma. Tau atu ia i latou ma le mautinoa, “Ou te manaomia oe.” Ia te outou talavou o loo umiaina le Perisitua Arona, ou te tatalo, a o outou auauna faatasi ma o outou uso matutua, o le a outou faalogo i le siufofoga o le Alii o fetalai atu: “Ua faamanuiaina oe, ona o le a e faia mea tetele. Faauta sa auina atu oe, e pei lava o Ioane, e saunia le ala i oʼu luma.” I le suafa, o Iesu Keriso, amene.