O Lo Tatou Tama, O Lo Tatou Fautua

Saunia e Peresitene Dieter F. Uchtdorf

Fesoasoani Lua i le Au Peresitene Sili

Pe na e tatalaina se atigipusa o ni vaega [o se mea faitino], aumai i fafo faatonuga o le faapipiiga, ma mafaufau faapea, “E matuai le fetaui lava lenei mea”?

O nisi taimi, e ui lava i a tatou faamoemoega sili ona lelei ma le mautinoa i totonu, tatou te aumaia ai i fafo se vaega ma fesili, “O le a le mea e faaaoga i ai lena mea?” po o le “E faapefea ona fetaui lena mea?”

E faateleina lo tatou ita pe a tatou tilotilo atu i le atigipusa ma matauina ai se faamatalaga e teena ai le tiutetauave o faapea mai, “E manaomia le tuufaatasia—o tai 8 tausaga le matutua ma luga atu.” Ona tatou te lei iloa lava le faiga, e le faateleina ai e lenei mea lo tatou mautinoa po o lo tatou mitamita ia i tatou lava.

O nisi taimi e i ai se tatou aafiaga faapea ma le talalelei. Ao tatou vaavaai atu i nisi o ona vaega, atonu e valu o tatou ulu ma mafaufau, po o le a le mea e faaaoga i ai lena vaega. Po o le, ao tatou iloiloina se isi vaega, e mafai ona tatou iloa ai, e tusa lava pe sa taumafai malosi ia malamalama atoatoa, ae e le mafai lava ona tatou faavasegaina le mafuaaga na ala ai ona faaaofia ai lena vaega.

O Lo Tatou Tama Faalelagi O Lo Tatou Fautua

O le mea e lelei ai, ua tuuina mai e lo tatou Tama Faalelagi ia i tatou ni faatonuga matagofie mo le faatulagaina o o tatou olaga ma tuufaatasi ai o tatou lava tagata sili ona lelei. O na faatonuga e fetaui lelei lava e tusa lava po o le a lo tatou matua po o le tulaga. Ua Ia tuuina mai ia i tatou le talalelei ma le Ekalesia a Iesu Keriso. Ua Ia tuuina mai ia i tatou le fuafuaga o le togiola, le ata o le faaolataga, o le fuafuaga lava lea o le fiafia. Na te lei tuua lava na o i tatou faatasi ai ma le le mautonu uma po o luitau o le olaga, ma fai mai, “Ia o lea. Ia manuia. Sue le faiga.”

Afai e tau lava o le tatou onosai ma vaai ma se lotomaualalo ma se mafaufau matala, o le a tatou maua ai, ua tuuina mai e le Atua le tele o meafaigaluega ia malamalama lelei ai i Ana faatonuga uma mo lo tatou fiafia i le olaga:

Ua Ia tuuina mai ia i tatou le meaalofa anagata o le Agaga Paia, lea e mafaia ona avea ma o tatou faiaoga patino faalelagi, ao tatou suesue i le upu a le Atua ma taumafai e aumai o tatou manatu ma amioga ia ogatasi ma Lana upu.
Ua Ia tuuina mai ia i tatou le avanoa e 24/7 e maua ai o Ia e ala i tatalo o le faatuatua ma olega o faamoemoega moni.
Ua Ia tuuina mai ia i tatou aposetolo ma perofeta o aso nei, o e faaali mai le afioga a le Atua i o tatou aso, ma i ai le pule e fusifusia pe faamau ai i le lalolagi ma i le lagi.
Ua Ia toefuataiina mai Lana Ekalesia—o se faalapotopotoga o tagata talitonu o e galulue faatasi e fesoasoani i le tasi ma le isi ao latou sailia o latou faaolataga i le matau, tetemu, ma le olioli e le faatusalia.¹
Ua Ia tuuina mai ia i tatou tusitusiga paia—o Lana afioga tusitusia ia i tatou.
Ua Ia tuuina mai ia i tatou le anoano o meafaigaluega o tekinolosi faaonaponei e fesoasoani i la tatou savaliga o le avea ma soo. O le tele o nei mea faigaluega ofoofogia e mafai ona maua i le LDS.org.

Aisea ua tuuina mai ai e le Tama Faalelagi ia i tatou le tele naua o le fesoasoani? Ona e alofa o Ia ia i tatou. Ma ona, e pei ona Ia fetalai e uiga ia te Ia, “Aua faauta, o laʼu galuega ma loʼu mamalu lenei—ia aumaia le tino ola pea ma le ola faavavau o le tagata.”²

I se isi faaupuga, o le Tama Faalelagi o lo tatou Atua, ma o le Atua o se fautua ia i tatou.

E silafia lelei lava e lo tatou Tama oi le Lagi manaoga o Lana fanau nai lo o se isi lava tagata. O Lana galuega ma le mamalu o le fesoasoani pea lava pea ia i tatou, ma tuuina mai ia ni punaoa matagofie faaletino ma faaleagaga e fesoasoani i la tatou savaliga e toe foi atu ia te Ia.

O Tama Uma Lava o se Fautua

I nisi o itu o le lalolagi, o tama e faamamaluina e aiga ma atunuu i le masina o Iuni. O se mea lelei i taimi uma le ava ma faaaloalo i o tatou matua. E tele mea lelei o loo fai e tama mo o latou aiga ma i ai foi le tele o uiga faaalia lelei. O le lua o matafaioi aupito taua o loo i ai i tama i olaga o a latou fanau, o le avea lea ma se faataitaiga lelei ma se fautua. E tele atu mea e fai e tama nai lo na o le tau atu i a latou fanau le mea sao pe sese; e tele atu mea latou te faia nai lo nao le velo atu o le tusi lesona ia i latou ma le manatu e faavasega lava e i latou le olaga mo i latou.

O tama e fautuaina a latou fanau faapelepele ma faaali atu e ala i a latou faataitaiga lelei le ala e ola ai i se olaga faamaoni. O tama latou te le tuua nao a latou fanau, ae faanatinati atu e fesoasoani ia i latou, fesoasoani e faatutu i latou i luga i taimi uma latou te tau pauu ai. Ma o nisi taimi pe afai o le mea talafeagai lea e fai, e tuu ai e tama a latou fanau e tauivi, ma le iloa atonu o le auala sili lea ona lelei mo i latou e aoao ai.

O Tatou Uma o Fautua

Ao faia e tama faalelalolagi ia lenei mea mo a latou lava fanau, o le agaga o le fautuaina o se mea lea e tatau ona tatou ofoina atu i fanau uma a le Atua, e tusa lava po o le a le matua, nofoaga, po o tulaga. Ia manatua, o fanau a le Atua o o tatou uso ma tuafafine; o i tatou uma o le aiga faavavau e tasi.

I lenei la itu, ia avea i tatou uma ma fautua—ia naunau e aapa atu ma fesoasoani le tasi i le isi ia avea ma tagata sili e mafai ona avea ai i tatou. Ona o i tatou o fanau a le Atua, ua i ai ia i tatou le gafatia e avea ai e faapei o Ia. O le alofa i le Atua ma o tatou uso a tagata, tausia o poloaiga a le Atua, ma mulimuli i le faataitaiga a Keriso, o le ala sao, vaapiapi, ma le fiafia lea e toe foi atu ai i le afioaga o o tatou matua faalelagi.

Afai e alofa tele le Atua o le atulaulau ia i tatou o lea ua avea ai o Ia ma fautua ia i tatou, atonu e mafai foi la ona tatou aapa atu i o tatou uso a tagata, e tusa lava po o le a o latou lanu, atunuu, tulaga faaleagafesootai ma le tamaoaiga, gagana po o tapuaiga. Talosia ia avea i tatou ma ni fautua musuia ma faamanuia ai olaga o isi—e le na o a tatou lava fanau, ae faapena foi i fanau uma a le Atua i le lalolagi atoa.