Pe Aoga Moni Ea?

Brandon Comstock, Iuta, ISA

Sa tuuina mai ma le mitamita e le ma atalii e fa tausaga le matua o Kolatone, se fasipepa na tuuina atu ia te ia mai lona faiaoga Peraimeri e faamatalatala mai ai lana vaega i le polokalama o loo loma a le Peraimeri. O le ma galuega o le aoao ia te ia o lana laina e fitu-upu ao lei faia le polokalama i le lua vaiaso.

I le afiafi o le Aso Gafua, sa matou liliuina ai le afiafi faaleaiga i se taimi atoa o le faataitaiga. Faatasi ai ma se ataata i ona foliga, sa faia ai e Kolatone le tele o taumafaiga e faataitai, ae ma tuuina atu ma lou toalua ni manatu faaalia e pei o le, “Aua e te tato ao e faia” ma le “Ia mautinoa e tautala manino.”

E ui lava ia maua taumafaiga uma, na oo lava ia te au sa ou le mautinoa pe na lelei atu nai lo le mea na matou amata ai.

O le sauni ai mo le lotu i le taeao o le Aso Sa na sosoo ai, na aofia ai ni totini se lua na leiloloa, o se pepe e valu masina le matua ua tulioso ona nifo, ma se tamaitiiti e fa tausaga le matua na tagi.

O le taimi lava na amata ai le sauniga, ma sa lei uma lelei le viiga amata, ae ua faalua ona ou alu i le falefaafiafia ma se tamaitiiti ua tagi. E oo ane i le taimi na tutu ai i luga le aufaipese e pepese, ua toeitiiti lava a ou lafoaia le faamoemoe o le i ai o se aafiaga faagaeetia o le aiga, a lo o lena foi, e faamoemoe ia tau lava ina matou oo atu i le faaiuga o le sauniga.

Ina ua tau le amene faaiu, sa ou faamatuu atu se mapuea lelava o le matuu atu o se avega. Ae ao ou fiafia i le manumalo, sa le mafai lou mafaufau e faapea, “Pe aoga moni ea? Pe o ma faia moni se alualu i luma i le ma fanau e ala i le aumaia o i latou i le lotu i vaiaso uma?”

Na oo mai i lou mafaufau upu a Elder David A. Bednar o le Korama a Aposetolo e Toasefululua. Sa ia saunoa: “Na i ai taimi sa ma feita ai ma Sister Bednar ona o faiga masani amiotonu sa ma galulue malosi ai e faia, sa lei foliga mai na maua vave ai ni taunuuga faaleagaga sa ma mamanao i ai ma tatalia. …

“Sa ma mafaufau ma Sister Bednar, o le fesoasoani i le ma fanau tama ia malamalama i le aano o se lesona faapitoa po o se mau patino, o le taunuuga lava lena o le faamoemoe. Peitai e lei tulai mai se taunuuga faapena i taimi taitasi sa matou suesue ai pe tatalo pe aoao faatasi. O le faia e le aunoa o lo ma faamoemoe ma galulue, atonu o le lesona aupito sili lea—o se lesona ma te lei malamalama atoatoa i ai i lena taimi” (“Ia Matua Maelega ma Mafaufau I le Aiga,” Liahona, Nov. 2009, 17).

Faatasi ai ma le lototele faafouina, sa ou toe foi ai i le fale ma faaauau ona faataitai ma saga faataitai faatasi ma lou atalii. Ina ua oo i lona taimi e lauga ai, sa ma matuai fiafia i le faalogo atu i le manino ma le toa na ia folafola mai ai, “O Iesu Keriso o le Alo o le Atua.”

Sa ma faalogo o ia faia faafia le laina ao lei faia le faaaliga, ae o se mea e uiga i le faalogo atu o ia faia e ese mai i le fale, ma faia e ia lava, sa ese ma sa sili atu ona faamalieina.

E tele ni a ma aoaoga e fai ao lei avea le ma tamaitiiti laitiiti ma se tama matua, ae o le a faaauau pea ona ma faia le mea sili e auai atu ai i a matou sauniga, fai a matou afiafi faaleaiga, ma fai a matou tatalo i aso uma, ma le faamoemoe e i ai se aso, pe a aluese o ia mai le aiga ma alu na o ia lava, o le a ia toe manatua lena lava laina taua tele: “O Iesu Keriso o le Alo o le Atua.”