Sauniga ma Feagaiga o le Malumalu

Ia suesue ma le agaga tatalo lenei savali ma saili ia iloa mea e faasoa atu. O le a faapefea ona faateleina e le “O Le Aiga: O Se Folafolaga i le Lalolagi” lou faatuatua i le Atua ma faamanuiaina ai i latou e te tausia i faiaoga asiasi? Mo nisi faamatalaga, alu i le reliefsociety.lds.org.

O sauniga uma e manaomia mo le faaolataga ma le faaeaga e i ai faatasi ma feagaiga ma le Atua. “O le osia ma le tausia o feagaiga o lona uiga o le filifili lea e noatia i tatou lava i lo tatou Tama oi le Lagi ma Iesu Keriso,” o le saunoaga lea a Linda K. Burton, peresitene aoao o le Aualofa.¹

Na saunoa mai Elder Neil L. Andersen o le Korama a Aposetolo e Toasefululua, “Na fetalai mai le Alii, ‘O … sauniga ua faaalia ai le mana o le faaleatua.’

“E i ai faamanuiaga faapitoa mai le Atua mo tagata agavaa uma o e ua papatiso, maua le Agaga Paia, ma aai ma feinu soo i le faamanatuga.”²

“A o alii ma tamaitai i le malumalu,” na saunoa mai ai Elder M. Russell Ballard o le Korama a Aposetolo e Toasefululua, “ua faaeeina ia i laua uma le mana lava e tasi, o le mana o le perisitua …

“… E maua e alii ma tamaitai uma lenei mana e fesoasoani ai i o latou olaga. O i latou uma o e osia feagaiga paia ma le Alii ma e faamamaluina na feagaiga o le a agavaa e maua faaaliga faaletagata lava ia, ia faamanuiaina e ala i auaunaga a agelu, e fagatua ma le Atua, e maua le atoaga o le talalelei, ma mulimuli ane, ia avea ma suli faatasi ma Iesu Keriso i mea uma o i ai a lo tatou Tama.”³

Mau Faaopoopo

1 Nifae 14:14; Mataupu Faavae ma Feagaiga 25:13; 97:8; 109:22

O Tala Ola

I le 2007, i le aso lona fa o aso talu ona uma se mafuie tele i Peru, sa feiloai ai Elder Marcus B. Nash o le Fitugafulu i le peresitene o le paranesi o Wenceslao Conde ma lona faletua o Pamela. “Sa fesili atu Elder Nash ia Sister Conde pe na faapefea mai si ana fanau laiti. Faatasi ai ma se ataata, sa ia tali mai ai, o le agalelei o le Atua sa latou saogalemu ma manuia uma ai. Sa ia fesili atu e uiga i le fale o le au Condes.

“‘Ua leai se mea,’ sa ia tali mai ai.

“… ’Ae o lena lava,’ o le matau lea a Elder Nash, ‘o loo e ataata a o tatou talanoa.’

“’Ioe,’ sa ia fai mai ai, ‘Sa ou tatalo ma o loo ou toafilemu. O loo ia i maua mea uma ma te manaomia. O loo ia i maua le tasi ma le isi, o loo ia i maua le ma fanau, ua faamauina i matou i le malumalu, ua ia i matou lenei Ekalesia matagofie, ma o loo ia i matou le Alii. E mafai ona matou toe atinae faatasi ma le fesoasoani a le Alii.’ …

“O le a le mea e faatatau i le osia ma le tausia o feagaiga ma le Atua, e tuuina maia ia i tatou le mana e ataata ai e ui i faigata, e liliu ai tofotofoga i le manumalo … ?”

“O le pogai o le Atua. O le mafai ona tatou maua o lena mana ua ala mai i a tatou feagaiga ma Ia.”⁴