MAI LE GALUEGA FAAMISIONA
O Se Agaga o Loo Tagi Mai
E alala le tusitala i Misuri, ISA.
Sa lei foliga mai o ia o se tagata lelei e talanoa i ai. O se vaega o lou tagata sa fefe, ae o le isi vaega sa matuai manao lava e talanoa atu ia te ia.
Ata na tusia e David Stoker
Sa ou maua le avanoa e avea ai o se faifeautalai i Catania, Italia. Sa i ai se taimi, sa ma feagai ai ma se faafitauli faigata i le galuega. O le ma vaiaso atoa sa toetoe o mea uma lava na sese, ma o aso taitasi sa o se tofotofoga pe mata o le a tumau pea o ma agaga fiafia pe leai, ataata pea, ma faaauau ona taumafai malosi.
I se tasi afiafi, sa ma naunau ai lava e sui le faagasologa o mea. Sa ma feoai solo e talanoa i tagata i se paka e lata ane i le ma fale, ma sa ma vaaia ai le alii lenei o saofai i se nofoa umi ma lona ulu sa punou ma se sikaleti i lona gutu. Sa ofu uliuli o ia mai lava i le ulu e oo i tamaivae, ma fai le pulou o lona ofutele fefete. Sa lei foliga mai o ia o se tagata lelei tele e talanoa atu i ai. Sa ou tilotilo atu ia te ia, sa tilotilo atu i ai lau soa, sa ma tau fai autilo i le tasi ma le isi, ma toe tilotilo atu ia te ia.
Sa fesili mai Elder Farley ia te au, “Sa ta talanoa muamua ia te ia?”
“Pei uma lava na ta talanoa i ai, ona ou te manatu moni lava ou te iloa o ia,” sa ou tali atu ai.
“Ioe, e faapena foi au,” na fai mai ai Elder Farley.
O lea sa amata ai ona ma savavali atu ia te ia. O se vaega o au sa fefe ona sa le o ia o se tagata e masani ona ou talanoa i ai, ae o le isi vaega sa matuai manao lava e talanoa atu ia te ia.
“Malo le soifua, o a mai oe?” sa ma fesili atu ai.
Sa ia tilotilo ae ma ni foliga uli, e pei o loo fai mai, “O ai lea e faalavelave mai i lau moe?” Ona ia fai mai lemu lea, “Malo le soifua.” Sa ma faailoa atu i maua o ni faifeautalai, ma sa vave ona ia fai mai ia i maua o ia o se tagata e le talitonu i se atua ma e leai se mea na talitonu i ai. Sa ma fesili atu pe aisea, o lea, ou te manatu sa tei ai o ia,
“Ona, ua oti lou tina, tama, tuafafine, ma le tama teine a lou tuafafine i le masina lava e tasi, ma ua ou ola i se olaga leaga, ma tuuatoatasi ona o lena mea. E leai se mea na faia e tapuaiga ae na o le faaleaga atili mo au.”
Sa ma fesili atu pe na te iloa le mea o i ai i latou e pele ia te ia.
“I le fanuatanu i Catania, i le mea ua leva ona latou i ai,” sa ia tali mai ai.
Sa ma faamalamalama atu ia te ia le lalolagi o agaga ma le Toetu. Sa ma fai atu ia te ia, o le taimi nei, o i tatou taitoatasi o se agaga ma se tino, ma o le oti ua na o se tuueseesega le tumau o le agaga ma le tino. Sa ma tau atu i ai, o tagata o lona aiga o loo faatalitali mai mo ia, seia mafai ona latou toe faatasia uma ma o latou tino ma ola faatasi mo le faavavau.
Sa ia tilotilo mai ia i maua, ma le le mautonu ma fai mai, “Ou te lei malamalama i se mea o na mea. E mafai ona toe faamatala mai mea uma?”
O lea sa ma toe tauina atu ai mea uma. Ona ia faaalu lea i luga se fulufulumata i le le mautonu ma fai mai, “Faatali, o au o se agaga ma se tino? Ma o loo faatali mai lou aiga ia te au ma aoao i le taimi nei?”
Sa ma faitau atu ia te ia nisi o mau mai le Alema 40 ma isi mataupu, ma sa autilo mai ia i maua ma fesili mai, “Ae aisea ou te lei faalogo muamua ai i lenei mea?”
Ailoga na ou feiloai muamua i se tagata e matuai lotomaualalo faamaoni i lou olaga. O lenei alii sa matuai leiloa lava mo se taimi umi, matuai le mautonu, matuai tuuatoatasi lava. Sa ia faalogo i mea uma sa ma fai atu ai, ma fai mai sa na o se mea itiiti ua ia malamalama i ai, ona o mea uma ia na te lei faalogo muamua i ai, ae sa fiafia i ai i mea uma.
Sa ma aoaoina o ia i le auala e mafai ona tatou maua ai tali e ala i le tatalo. Ua ova i le 30 tausaga e lei tatalo o ia, ma o le taimi mulimuli o le taulotoina o le tatalo i le lotu ao laitiiti lava. Ina ua uma ona matou talanoa e uiga i tali mai le Agaga, sa ia fesili mai pe faapei le lagona o le Agaga. Talu ai e mafai ona eseese mo tagata uma, o lea sa ma faasoa atu ai auala na ma lagonaina ai. Sa ou fai atu ia te ia, o au e pei o le mauaina o se opo mai lou tina i le mavae ai o se taimi umi tele e te lei vaai ia te ia. Sa ou lagona le uunaiga e folafola atu ia te ia, e mafai ma o le a ia lagonaina lena lava mea, o se lagona e pei o se opo mai lona tina o le na misia mai lona olaga mo se taimi umi tele.
Sa ma fai atu ia te ia pe mafai ona matou tatalo faatasi ma ia. Sa matuai le mautonu lava o ia ma fai mai, “I le taimi lenei? Ii, i le paka?”
“E mafai ona tatou tatalo i soo se taimi, i soo se mea tatou te mananao ai,” Sa ou fai atu ai ia te ia. “E fia faafofoga mai le Atua ia i tatou, ma e faapitoa ona naunau o Ia e faafofoga mai ia te oe ona ua leva tele e lei toe faalogo ia te oe.”
E lei faalogo muamua lava o ia i se tatalo e le taulotoina i se tagata paia, o lea sa fai lava si ona manao e vaai pe faapefea ona fai. Sa punonou o ma ulu, ma sa fai e lau soa le tatalo mo le ma uo fou, o Alefaio, ma talosagaina ni faamanuiaga, fesoasoani, ma faamafanafanaga mo ia. Sa ia ole atu ina ia lagona e Alefaio se tali o loo manuia lona aiga ma o loo i ai moni le Atua. Sa faauma le matou tatalo, ma sa tilotilo mai Alefaio ia i maua ma ni mata lapopoa.
“E tatau ona ou tau atu se mea ia te oulua,” na ia fai mai ai. “E le o au o se tagata e pepelo, ae maise lava e uiga i se mea e pei o lenei. Ua ou lagona le pei lava na ou maua se opo lapoa mai lou tina. Ua umi tele ou te lei toe maua se opo mai se tagata. Ese le manaia o lena lagona. Ou te fia iloa pe faapefea ona ou toe maua lena lagona, ona ou te manao i nisi opo se tele faapena.”
O le aso na sosoo ai, sa matou toe feiloai ai. Sa saofai Alefaio i o ma talaane i luga o lena lava nofoa umi ma fai mai “Elders, o lou olaga atoa sa ou fealuai ma fai le pulou o lou ofu ma punou lou ulu, ma faataupupula i le eleele. Ou te lei savali lava ma lou ulu i luga. Talu mai lava lena tatalo, ua ou fealuai solo ma lou ulu ua ea i luga, ma ou autilo i mea uma. E ese le manaia o lenei lalolagi.”
E le tau tau atua, sa faaauau ona ma galulue ia Alefaio, e aumaia nisi opo se tele, malamalama e tele, ma le tele o le tepa ae i luga i lona olaga. O le alii taufaafefe sa i luga o le nofoa umi o le sa foliga mai o le a ita ia i maua, o le mea moni o se agaga o loo tagi mai, ma augani mai ia ona toe lagonaina le alofa o lona Tama Faalelagi.