O Le Vaega Aupito Faigata o le Avea ma se Faifeautalai

Saunia e Wendy Ulrich, PhD.

E alala le tusitala i Iuta, ISA.

O nisi taimi, o le luitau aupito tele lava i le galuega faafaifeautalai e le o le galuega faafaifeautalai.

Sa tau mai e se faifeautalai ia te au, “A fai mai tagata o se misiona o le a faigata, sa ou faapea o le uiga o lena mea, o le a ou maalili pe feagai ma ni tulaga faigata o mea e nonofo ai, pe tauivi foi ma le gagana. Ae mo au o le vaega aupito faigata, o mea ou te mafaufau ai i totonu o lou ulu—e pei o le lagonaina o le faavaivai po o le oo o le ita i soa po o le le fiafia e talanoa i tagata ese—o le feagai ma aafiaga lelei ma leaga, o le teenaina, o suiga.”

Ina ia saunia mo se misiona, e mafai ma e tatau ona e faitau le Talai Lau Talalelei, suesue i tusitusiga paia, ma aoao e kuka ma fai tagamea. Ae e tatau foi ona e maua ni aafiaga faatino i le taimi nei ma le faalelagona, faaleagafesootai, ma isi tomai o le a e manaomia o se faifeautalai. O se lisi lenei o nisi o na tomai. E mafai ona e siaki faasao se tasi pe lua o na mea e amata faataitai i le taimi nei.

O Tomai o le Lotomaualalo e aunoa ma le Lagonaina o le Faalumaina.

E pei ona tau mai e se tamaitai faifeautalai i Apalama, ISA, ia te au, “Ou te matea sa ou mafaufau ina ua latou vaetofia au, atonu o le a ou maua ni mana. O lea sa fai si ou tei i le iloaina ina ua ou taunuu i lau misiona, o au lava lea. Sa i ai lava mea ia sa ou vaivai, fefe, ma le atoatoa ai. Ma sa lei o ese moni na mea. Sa faapea ona ou aoao i le auala e taulima ai le le atoatoa i le faiga o le galuega a le Alii.”

Pe e te sau i totonu o le misiona ma le tele o mea ua faamanuiaina ai oe pe itiiti foi, afai e te lotomaualalo, aoaogofie, ma naunau e taumafai pea ma galue, e mafai ona oulua galulue ma le Alii. Ae na pau le ala e mafai ona faaleleia atili ai ou tomai faafaifeautalai o lou faataitai, fai atu fesili, sue mai le fesoasoani, ma taumafai pea. Afai ua faatalitonuina oe e faapea, o tagata e masani lava e lelei (pe masani lava e leaga), i le galuega faafaifeautalai, gagana, molimau, po o mafutaga, o le a e maua se taimi faigata atu.

Sa fai mai se faifeautalai ia te au, “Sa manaomia ona ou iloa o le galuega lea a le Alii, ae le o sau [galuega]. Ma e le afaina pe a ou lagona le le atoatoa ai, aua ou te le atoatoa. O le a le mafai lava ona ou atoatoa i le faiga o le mea e nao le Atua lava e mafai ona faia. E tele mea e mafai ona ou faia ia alualu ai i luma, ae e le faapea e tatau ona ou faia nao au lava. E mafai ona ou faalagolago ia te Ia.”

Taumafai e fai ni mea fou ma ni mea faigata. O le a e iloa ai ona le faamamafaina fua ia lagona o le le atoatoa. Mo se faataitaiga:

Faataitai ona fai mea e aveese teisi atu ai oe mai mea ua e masani ai, e pei o ni galuega fou, gaoioiga faaopoopo i le kosi aoaoina masani, po o ni vasega e le masani ai. Fai atu ni fesili, sue mai ni fesoasoani, iloilo mea sese, ma taumafai pea. Faaaoga mea e tatau ona e faamasani ai ma galue i ai ina ia e aoao e talitonu o le a e alualu i luma pe a faia se taumafaiga.
Toe talanoa atu i leo i lou mafaufau lea e fai atu ia te oe o tagata e fananau mai pe leai foi ma taleni, atamai, po o tomai faaleagafesootai. O tagata o le lalolagi e aupito sili ona lelei i afeleti, musika, ma atamamai—ma faifeautalai—e oo i le tele o le toilalo ma le tele o itula e faataitai ai, i o latou ala i le manuia.

O Tomai o le Fetaiaiina o le Ono Teenaina (ma le Teenaina Moni)

O le teenaina ma le le fiafia o aafiaga na o aso uma i se misiona. Ia faataitai ona fai mea e ono afaina ai ma le fetaiai ma le teenaina, ina ia e lelei ai i le taulimaina o na lagona.

Talosaga mo se galuega, fai faatalanoaga o galuega, ma faigaluega faavaitaimi pe tumau foi.
Faataitai ona taalo mo se au po o se tala faatino.
Talosaga atu i tagata mo ni tafaoga pe fai ni gaoioiga.
Pe a le sologa lelei ni mea, ia matau ni manatu ma ni amioga e fesoasoani ia te oe e taulima lelei ai ma lagona ai le fiafia.
Aoao mai mea sese ma toe taumafai.

O Tomai o le Taulimaina o Faaosofiaga

O i tatou uma e tatau ona iloa auala e faaosofia ai i tatou lava pe a tatou iva ma faatoafilemu i tatou lava pe a tatou soona popolevale foi.

Afai o se tulaga e iva pe e le o agai i luma, ia e fia iloa po o le a le mea ua sese ma pe faapefea ona faaleleia, ia fai ai se taaloga, pe sue ni mea e mafai ona e aoao mai ai.
Ia iloa taimi e te popolevale ai ma aoao mea e mafai lava ona e faia i se misiona e faatoatoa malie ai (talanoa atu i se tagata, malolo, tusitusi, pese, savalivali). Mafaufau i le faafitauli, vaevae le faafitauli, ia faaaofia ai isi, fai ni suiga laiti, tatalo, ma teena mafaufauga le lelei e oo atu i lou mafaufau.

O Tomai o le Taulimaina o Feeseeseaiga

O soa, taitai, tagata o le au paia, ma tagata sailiili o le a lelei tele, ae e i ai taimi o le a tofotofoina ai foi lou onosai.

Faataitai ma nai ou tei ma uo ona:

Aoao e talisapaia isi e ala i le fesili atu pe aisea latou te faia ai mea o loo latou faia.
Talia le tiutetauave ma faatoese faamaoni pe afai ua tiga se tasi ona o sau amio, e tusa lava pe e te lei fuafuaina ia afaina ai.
Vaavaai mo se faamalamalamaga agaalofa mo le amio a se isi tagata. Aua le taofiofia se mea e tiga ai.
Faailoa atu se faafitauli ma talosaga mo se fesoasoani i le fofoina nai lo o le tautuuai po o le faapopoleina ai.
A tulai mai ni feteenaiga, faaaoga se leo malu ma faaali atu le faaaloalo mo lagona o isi.
Ia potu faatasi ma se tagata e ese mai ia te oe. Ia i ai se manatu lelei ma fia iloa e uiga i mea latou te mananao i ai.

O Tomai i Talanoaga

E tusa pe o oe o se tagata matamuli po o tagata e tau le faamasania, e mafai ona e aoaoina tomai o le talanoa lelei o le a e manaomia i se misiona ma i lou olaga atoa.

Afai o oe o se tagata e matamuli tele:

Faatu se sini e talanoa atu i se tagata fou (aemaise lava o tagata matutua e te le masani ai) mo le lima minute i vaiaso uma.
Ataata, ia fia iloa e uiga i tagata, ma aoao ni fesili lelei ia faatalanoa mai ai isi tagata.
Vaai ni auala e amata ai se talanoaga ma faauma faalelei ai se talanoaga.
Ia matau taimi e taumafai ai isi e amata se talanoaga ina ia mafai ona e malamalama ma tali atu i ai.

Afai o oe o se tagata e tau le faamasania lava:

Ia tatai mai isi e ala i le fai atu o ni fesili.
Faataitai ona avea ma se tagata e lelei le faalogo.
Vaavaai mo faailoga e faapea ua lelava lau tagata faalogologo. Tuu le avanoa i isi.

O Tomai Faaletino o le Ola Manuia

I le avea ai ma se peresitene o le misiona, sa talanoa atu ai lou toalua i se tasi o faifeautalai o le sa matuai atuatuvale lava ma sa faigata [ia te ia le galuega]. Sa lagona e lou toalua le musuia e fesili atu ia te ia, “A, Elder, o le a lau malutaeao na fai?”

“Aisa kulimi.”

“O le a lau mea na tausami i le aoauli?”

“Pateta falai.”

“O le a sau mea na tausami i le afiafi?”

“Pateta falai ma le aisa kulimi.”

“O le a le umi talu ona e tausami na o Pateta falai ma le aisa kulimi?”

“Pe a ma se masina.”

“O le mea la lenei e te alu e fai: alu i le fale e ai se mea lanumeamata—ae le o le aisa kulimi lanumeamata [mint].”

O meaai paleni ma le faamalositino e aafia moni ai le ala tatou te manatu ai e uiga i le olaga. Amata nei ona:

Aoao e uiga i le taumafa tatau. Ai meaai paleni. Afai e te filifili meaai, amata ona faataitai i ni nai mea fou.
Faamalositino. O le faamalositino soo e fesoasoani i tagata uma ia taulima lelei ai le atuatuvale ma le le fiafia. Amatamata malie ma faasolosolo lemu ae lava, e pei o se savalivali i le afiafi (atonu faatasi ma se uo pe ma se musika), savali i le mea o loo e tu ai i le taimi o faalauiloa a le televise, po o ni nai nofo i luga ma uunai i luga.
Aoao e vaai faalelei au meatotino, lavalava, tupe ma taimi.
Pulea [lau] moe. Afai e faigata ona e alu e moe pe ala i luga, fesili atu i ni tagata mo ni manatu. Fai ni taimi masani e moe ai ma ala i luga, e mafai ona e faaaogaina o se faifeautalai.

O Tomai o le Maua Soo o Lagona Lelei

Atiina ae se aga malie. Ata ia te oe lava, ae leo i isi. Aua e te maemaea i mea uma e faapea ona oso ai lou le fiafia.
Fai atu ia i latou sa avea muamua ma ni faifeautalai e faamatala atu se mea sa faigata ia i latou ma pe na faapefea ona latou taulimaina. Saili ni manatu e mafai ona e faaaogaina.
Lisi ni mau ma ni viiga e faagaeetia ai oe ma faatumulia ai oe i le faatuatua.
Teena le leo le lelei o loo i lou mafaufau i se manatu lelei. Afai o lena leo e tausuaaiga, faipona, faalumaluma, ita, le alofa, pe faia ai oe ina ia e lagona le leai o se faamoemoe po o se aoga, e le mai le Alii lea. O Lona siufofoga i taimi uma o le faamoemoe, faamalosiau, ma agaalofa, ae maise lava pe ao e taumafai.

O Tomai Faaleagaga o le Ola Manuia

Ia tatalo moni. Valaaulia le Tama Faalelagi e alala i ou talaane, ma talanoa sao atu ia te Ia e uiga i ou faafitauli, manaoga, ma le loto faafetai. Taumafai e tatalo leotele, tatalo ma se pepa ma se peni e tusitusi ai uunaiga, pe tatalo ia na o le tuuina atu o le faafetai.
Suesue i tusitusiga paia. Saili mo, ma faatalitali mo ni tali i ou atugaluga.
Ia avea ma se faifeautalai i le taimi nei. O atu ma auauna atu faatasi ma faifeautalai faamisiona, ia avea le autu o le talalelei e faaaofia i talanoaga o aso uma ma au uo, ma tuuina atu se molimau faamaoni i le lotu. O le a faateleina lou fiafia i le galuega faafaifeautalai ao e faia.

O Ituaiga Tagata e Toalua E Masani ona Tauivi

O tagata o e tauivi faalelagona i luga o se misiona e masani ona aofia ai:

O i latou na maea aoga e aunoa ma le matuai galue malosi. O tagata o e atamai pe lava le talenia e ola ai, e aunoa ma le tau galue malosi, e ono vaai i o latou gafatia o se mea maneta. A le sao la le maneta (ma e i ai lava le taimi e le sao ai), latou te le iloa le mea a fai, vagana ai le taumafai e faalafi a latou mea sese. I le iuga, e tatau ai i tagata uma ona aoao ia lotomaualalo, galue malosi, faataitai, saili mo le fesoasoani, ma manumalo i mea faalavefau ma faatoilaloga ina ia faaauau ai pea ona tuputupu ae ma alualu i luma.
O i latou e lei tele se faamanuiaina na latou oo i ai. O nisi o tagata e vaai atu i mea faigata o se faamaoniga o i latou e valelea pe le talenia. Ae o le faiai o soo se tagata lava e oo lava ina poto ma sili atu ona mafai ona faia se mea pe a latou tepataulai [i se mea], iloilo po o le a le mea na sese, faataitai ni fofo fatufatuai, saili le fesoasoani, galue malosi, ma faataitai.

Afai o loo e i ai i se tasi o ia vaega, ia faamanatu ia te oe lava, e leai se tasi e fanau mai ua avea ma se faifeautalai maoae. O tomai faafaifeautalai e tuputupu ae faatasi ma le faataitai, tele o le galue malosi, faia tulaga e ono afaina ai, faatoilaloina o mea faalavefau, toe taumafai pe a uma ni mea sese, aoao mai isi, ma le faalagolago atoa atu i le Alii. E alofa o Ia ia te oe, ma o le a fesoasoani ia te oe e faataunuu au sini patino faapea foi ma se misiona talai.