Elder Gary E. Stevenson: O Se Loto Malamalama
Saunia e Elder Robert D. Hales
O Le Korama a Aposetolo e Toasefululua
Atapue o talafou o le faaaloaloga a Kristin Murphy, Talafou a Tesareta; ma Sarah Jane Weaver, Talafou a le Ekalesia
Ina ua 11 tausaga o Gary Stevenson, sa ave o ia e lona tama i se savaliga sopo. “Sa ou puna mai lea maa i lea maa i luma o lo’u tama,” sa ia manatuaina. “Sa ou faamoemoe ou te pea i luga o se maa tele lava ma tilotilo mai i lalo. A o ou pea atu agai i le pito i luga o le maa tele, sa mau o ia i lou fusipau ma toso mai au i lalo.
“‘O le a le mea ua tupu?’ Sa ou fai atu ai, ma sa ia tali mai, ‘Aua e te pea i le maa lena. Ta tumau pea i le ala.’ O sina taimi mulimuli ane ao ma tilotilo mai i lalo mai luga ae, o le ala, sa ma iloaina se gata uogo i luga o le maa, o taotooto ai i le la.
“‘O le mea lena na ou toe tosoina mai ai oe i tua,’ o le tala lea a lou tama.
“I se taimi mulimuli ane ao ma tietie agai i le fale, sa ou iloaina o loo ia faatali mo au e tuuina atu le fesili: ‘Na faapefea ona e iloa le gata sa i ai iina?’ Fai mai a ia, ‘Sei ou aoao atu ia te oe e uiga i le Agaga Paia.’ Sa faia se ma lesona e lei fuafuaina e uiga i matafaioi e mafai ona i ai a le Agaga Paia i o tatou olaga: tagata e puipuia, faamafanafana, ma le e molimau. ‘I le tulaga la lea,’ sa faasoa mai lou tama, ‘sa puipuia oe e le Agaga Paia e ala mai ia te au. Sa ia lapataia au e toso ese mai oe.’”
O lenei aafiaga, e ui e faigofie, na fesoasoani ia Elder Stevenson e malamalama ai pe a maua uunaiga a le Agaga, e tatau ona taliaina ma faatino loa. O se tasi o le tele o lesona sa aoaoina mai lona tama.
Tina Ofoofogia, Faiaoga Ofoofogia
Ata o le faaaloaloga a le aiga o Stevenson, sei vagana ai ua faamatalaina; tauagavale: fualaau © tukkata/iStock/Thinkstock; taumatau: atapue o le Malumalu o Logan Iuta e Jarvie Digital
E tusa ai ma Elder Stevenson, o lona tina sa avea ma faataitaiga o le agalelei moni: “O ona faamoemoega na uunaia ai au. Toeitiiti lava o faatinoga uma ou te faia na fuaina i le manatu, ‘Ou te le manao e faatiga lou tina.’”
Na faamalosia faatasi e ona matua ia mataupu faavae o le talalelei i taimi o afiafi faaleaiga ma isi gaoioiga faaleaiga po o faatasiga. “Sa la taulaina lo matou aiga i aoaoga o le talalelei. Sa avea ma faavae o o matou olaga,” o lana tala lea.
Na taitaiina foi o ia e isi faiaoga taua. “Ou te manatua i nisi o au aoaoga faamasani amata o se Pulega Aoao lea na fautuaina mai ai e Peresitene Henry B. Eyring, Fesoasoani Muamua i le Au Peresitene Sili, ia tatou faia se lisi o ni tagata se toa 20 o e o i ai se aafiaga lelei i o tatou olaga. Ou te manatu e mafai ona manuia tagata uma mai lea ituaiga gaoioiga. O se tulaga faagaeetia le mafaufau i tamalii ma tamaitai lelei uma o e na i ai iina e fesoasoani ia te au, aemaise lava i lou talavou.”
Faamalosiauina e Aiga ma Uo
O Gary Evan Stevenson sa soifua mai i le aso 6 Aokuso, 1955, ma sa ola ae i Logan, Iuta, ISA. O ona matua o, Evan ma Jean Hall Stevenson, e toafa o laua alo. O Gary o le lona lua o le fanau ma o le tama ulumatua.
“Sa vavalalata le matou mafutaga ma lou uso ma tuafafine. Sa faamoemoeina au e lou tuafafine matua, o Debbie, ina ia faia le mea sao. Sa faamoemoe ou tei laiti ifo, o Merilee ma Doug, o le a avea au ma se faataitaiga. Sa matou lagonaina uma se tiutetauave ina ia ola amiotonu ma auai i gaoioiga o le Ekalesia.” Na maualuga foi faamoemoega o lona aiga lautele: “Mo se faataitaiga, ina ua malaga atu lou tausoga matua i se misiona, sa ia sainiina se $2 pepa ma pasi atu i le tausoga e sosoo ai o loo sauniuni e auauna atu talai. O lena $2 pepa na fepasiai solo i tausoga e toa 16 o e na auauna atu i ni misiona i le lalolagi atoa, faamanatu atu i le tasi ma le isi o loo tuufaatasia i matou i le auauna atu i le Alii.”
Na faatosinaina foi o ia e uo perisitua mo le lelei. “Sa ou aoao vave i le olaga i le uiga o le fegalegaleai ma le korama, e le gata i le Aso Sa ae faapea foi i totonu o le nuu ma i le aoga,” na ia fai mai ai. “Sa aumaia ia te au se lagona o le faasinomaga, auai, usoga, ma le auauna atu.” Na te manatua lelei lava le o faatasi ma uso o le korama e ao mai ia taulaga anapogi mai se tuafafine i le uarota ua faataotolia i le fale, tauaso, ma e le tele ni ana tupe. “E ui i ona tulaga, e i ai lava sana lima sene po o se sefulu sene e ave o se taulaga anapogi,” na te manatuaina.
O Se Meaalofa Lea e Manaomia ai se Galuega
Ina ua uma ona faauu mai le aoga maualuga ma i se taimi puupuu auai i le Iunivesite o le Setete o Iuta, sa valaauina Elder Stevenson e auauna atu i le Misiona a Iapani Fukuoka. “Sa ou lagona le atuatuvale e uiga i le aoaoina o le faaIapani. Sa faaauau ona faateleina lou popole i le nofoaga autu mo le aoaoina o faifeautalai. Ae ina ua mavae le ono vaiaso, o le tatalo faatauanau ma le suesue maelega na taitaiina atu au i se lagona o le toafilemu o le a faamanuiaina au e le Alii ia aoaoina le gagana Iapani, ae e aunoa ma le leai o se galue malosi. Na aoaoina au e lenei mea o le meaalofa o gagana e tai pei lava o le faatuatua ma galuega ma isi mataupu faavae o le talalelei. Pe a mavae ona e faia mea uma e te mafaia, ona faaee atu lea ia te oe o le faamanuiaga.”
Ina ua mavae lana misiona, na atiaeina e Elder Stevenson se lagona fiafia mo le talafaasolopito o le Ekalesia, suesueina o le Tusi a Mamona ma le Mataupu Faavae ma Feagaiga, ma sailiili i api o talaaga anamua ma talafaasolopito o aiga. Na faapitoa lava lona fiafia ia Iosefa Samita ma lona aiga, o le aiga o Uitimera, Oliva Kaotui, ma Matini Harisi. Sa ia toe sailiili i le faaliliuga ma le lolomiina o lomiga eseese o le Tusi a Mamona.
Sa ia toe aoaoina foi o le faatuatua ma le galue malosi e o faatasi. “O tali uma i fesili uma o le talalelei e le oo mai i se taimi vave,” na ia fautua mai ai. “E faamoemoeina i tatou e le Alii ia faitau, suesue, mafaufau loloto, ma tatalo. Ma pe a tatou faia lenei mea ma le faatuatua ma se manao amiotonu, o le a oo mai se molimau matagofie i le aluga o taimi.”
I lona olaga atoa, sa ia lagona le matua faamanuiaina o ia ina ua valaauina e faiaoga i vasega a le autalavou i le Aoga Sa, Aoaoga Faavae o le Talalelei, ma Alii Talavou. O nei valaauga na faatagaina o ia e molimau atu i ona lagona loloto mo le moni o tusitusiga paia, o se talitonuga na atinaeina mai le tele o tausaga o suesuega.
I le toe foi ai i le Iunivesite o le Setete o Iuta, na toe foi atu Elder Stevenson i ana suesuega i pulega faapisinisi ma mea tau maketi. Sa ia faaaluina le tele o itula i le potutusi. “O taimi uma lava ou te ulufale atu ai, e faafeiloai au e se faailoga … e faitauina faapea, ‘O mea uma e te maua ia maua mai ai le atamai’ [Faataoto 4:7].” Na tamauina lenei mau i totonu o lou loto ma i le tele o tausaga mulimuli ane na avea ma autu o se saunoaga o le faigalotu na ou tuuina atu i le Iunivesite o Polika Iaga.
“O lenei malamalamaaga na oo mai i se tuufaatasiga o le suesue ma le tatalo,” sa ia faamatalaina i lena saunoaga. “A tatou talitonu ma faalagolago i le Alii, o le a oo mai se fuatuaga sili o le malamalama mai ia te Ia i o tatou loto.”1
Mafutaga Faauo i le Inisitituti
I le taimi o le vasega o le Feagaiga Fou i le inisitituti o mataupu faalelotu, sa ia feiloai ai ia Lesa Jean Higley, lea sa siitia atu mai Kalefonia i Idaho ma sa aoga i le taimi lena i le Setete o Iuta. “Sai fai le faiaoga ia Lesa e faatino le vaega a Eva ma o au e faatinoina le vaega a Satani e faaosooso o ia. O se taunuuga, sa alu se tele o ou tauanauina o ia ma te tafafao,” sa ia manatuaina ma se ataata. Sa la tafafao faamasani mo le na o le silia ma le tausaga ona faaipoipo lea i le Malumalu o Idaho Falls Idaho i le 1979.
O le fiafia ia o Elder Stevenson pe a ia talanoa e uiga ia Lesa. Na te faatatau ia te ia o “le lasusulu i lou olaga.”2 Sa faauu Sister Stevenson ma se tikeri i aoaoga faatausiaiga, vave ona avea ma faiaoga i le popofou o le la faaipoipoga, ma sa faaauau pea ona saofaga atu lona taimi ma taleni i aoga, faatonu mo nuu ma alalafaga, faalapotopotoga, ma isi gaoioiga. Peitai e mafaufauina e Elder Stevenson ana meaalofa o se tausiaiga o ona uiga sili ia na tuuina mai e le Atua: “Ua ia te ia se tomai e fatu ai se aiga e totonugalemu i le talalelei, se faasinomaga saogalemu ma talisapaia lea e nofo ai le Agaga.” O lenei tomai, faatasi ai ma se malamalamaaga loloto o le olioli moni e sau mai le auauna atu i isi, ua faamanuiaina ai olaga o lana tane, lona aiga, ma le toatele o siomiaina o ia.
Na avea Elder ma Sister Stevenson ma matua o ni fanau tama se toafa. “Na matou fiafia faatasi i mea uma i le aluga o tausaga,” na ia fai mai ai. “Na taaalo pasiketipolo, lakapi faaAmerika, pesipolo, ma tenisi ia tama. Matou te fiafia uma lava i gaoioiga e fai i fafo e pei o le fa-pau, tietie taavale i le kiona, faasee i seevae faasee i le kiona, faasee i le laupapa i le kiona, ma taaloga eseese i le vai. Ae ui i lea, na uunaia foi e Lesa le ma fanau tama i nisi o aga ma tu, atinaeina i totonu o i latou o se fiafia i le musika ma faatufugaga. Ma ina ia mafai ona faalautele atu le meaalofa o le auaunaga i isi e ala i lo matou aiga, sa manaomia lona faaaofia ai o le ‘malosi faaletino’ o tama.”
Fausiaina o se Pisinisi
O le galuega faapisinisi a Elder Stevenson na mafua mai i lona fiafia mo tagata o Asia. Ina ua ia toe foi mai i le aiga mai lana misiona, sa amata e ia ma nisi o ana uo le auina mai o ni mea teuteu mo meaalofa mai Asia. Na oo atu lenei mea i le faatauina atu o oloa fai faamalositino. I le aluga o le isi tolu sefulu tausaga, na tuputupu ae le latou tamai pisinisi i se pisinisi faamanuiaina ma sa faafaigaluegaina le silia ma le 2,500 tagata.
Na manatua e se tasi o tagata faigaluega le mea sa i le loto o Elder Stevenson o se tamalii faipisinisi: “Sa ma talanoaina se filifiliga faigata o le pisinisi. Sa ou tauina ia te ia e tatau ona matou faamautinoaina o faia le mea e aloaia. Sa ia tauina mai ia te au e le gata i lo matou faia o le mea e aloaia ae ia matou faia le mea sao.”
“O le taliaina ma le faaaogaina atoatoa o mataupu faavae lelei i tulaga faapisinisi e lelei mo le pisinisi,” na taua e Elder Stevenson. “O le amiosao, galue malosi, agaalofa, taulimaina o tagata ma le faaaloalo—ma i le taimi lava e tasi manaomia ai le tali atu o le tagata lava ia—e le o ni aoaoga ia e te talanoa i ai ma e na o Aso Sa e faataitaia ai. O vaega ia e tatau ona faataitaia i aso taitasi o le vaiaso.”
Ao tuputupu ae le pisinisi, na faapea foi ma le manaomia o lona taimi: “Sa avea au ma se epikopo talavou ma se fanau laiti ma ou te faia foi le tele o malaga i Asia e sili atu ma le 100 aso i tausaga taitasi. Sa sau lou tama ma faapea mai, ‘O loo ou matauina a e faatasi ma lou aiga, e te le o taulai moni atu lava ia i latou. Ou te fefe nei faapea a e faigaluega, e te le o taulai atoatoa atu iina, ma ao e faatinoina lau matafaioi o se epikopo, atonu o e popole i lau galuega po o le aiga. E te manaomia le faapaleniina sili o lou olaga.”
O lenei fautuaga e i ai se aafiaga taua tele. Fai mai Elder Stevenson, “Sa ou aoaoina e taua le faatumauina o le faapaleniina o le aiga, galuega, ma valaauga o le Ekalesia, ma ia faamautinoa o e tausiaina lelei oe lava.”
Tofia e Auauna Atu—I Lea Taimi ma Lea Taimi
Na fautuaina e se taitai pisinisi iloga i se tasi taimi ia Elder Stevenson ina ia, “aoao, mauaina, ma auauna atu.” I le 2004 na tototofoina ai le vaega o le “auauna atu” o lena fautuaga ina ua valaauina uma ia Elder Stevenson ma lana paaga faipisinisi mo se taimi umi o Scott Watterson e auauna atu o ni peresitene o misiona. Sa la lagona e tatau ona la faamalamalama atu i tagata fai siea ma tagata faatau eseese le mafuaaga o le a la tuua ai mo se taimi e le tumau le la pisinisi. Sa la asiasi atu ia i latou taitoatasi.
“Ina ua ma faamatalaina atu ia ma valaauga ma o le a ma auauna atu mo le tolu tausaga e aunoa ma se totogi mai le Ekalesia, sa latou faaaloalo i le lelei o lena tulaga,” na ia fai mai ai. Sa la tuua le pisinisi e puleaina e se au faapitoa, ma sa faamanuiaina.
I le avea ai ma peresitene o le Misiona a Iapani Nagoya, na iloa ai e Elder Stevenson le faateleina o lona alofa mo Asia. “Ou te mafaufau i ai o sou aiga lona lua,” o lana tala lea. Na faateleina foi le loloto o lona alofa mo lona faletua ao ia vaavaai atu i lona opoina o le aganuu o le atunuu, aapa atu i isi, e aofia ai faifeautalai ma tagata o le ekalesia, ma faaauau pea ona faafaileleina le la fanau tama e toalua lea na latou malaga faatasi. O le toatele o papatisoga o tagata liliu mai na mafua ona o se taunuuga o ana taumafaiga e faauo atu ia i latou o siomiaina o ia.
E na o le fitu masina talu ona la taunuu mai i le fale mai le la misiona ae valaauina loa Elder Stevenson e auauna atu i le Korama Muamua a Fitugafulu i le 2008.
“Sa lofituina au ma ou lotomaualalo. Sa ou faapea ‘E toatele atu isi o e e sili atu le latou auaunaga nai lo au.’ Ae sa ou manatu i taimi ua tuanai—i le avea ma se peresitene o le korama a toeaina, fautua maualuga, epikopo, ma se fesoasoani i le au peresitene o le siteki—ina ia ou faapea sa lei lava lou tomai e faia mea ua talosagaina au ou te faia. Na ou aoaoina ao lei valaauina i tatou, atonu tatou te le o agavaa, ae o le valaauga e amataina se faaagavaaina faalelagi.
“O se tasi o mau e sili ona ou fiafia i ai o loo tauina mai ia i tatou ni mea e lua e tatau ona tatou faia pe a valaauina i tatou: Muamua, ‘ia e faamaoni.’ Lona lua, tu i le tofi ua tofia i ai oe (tagai MF&F 81:5). O le uiga o lenei mea ia te au o le faaalia lea o le faatuatua, aoao mea e manaomia, ona faia lea o mea uma e mafai ona e faia e faalautele ai le valaauga. Afai tatou te faia lenei mea, o le a faalauteleina ma faaagavaaina i tatou e le Alii e faamanuia i isi.”
Ua Toe Asia Foi
I le avea ai ma se Fitugafulu, sa tofia Elder Stevenson o se fesoasoani i le Au Peresitene o le Eria ona sosoo ai lea ma se peresitene o le Eria i Asia Matu.
Ia Mati 2011, na taia Iapani i se mafuie ma se sunami. O le mafuie e 9.0 le malosi lea na mafua ai se sunami ma maliliu ai le toa 20,000 o tagata, tuua ai le faitau afe o tagata ua leai ni fale, ma faaleagaina fale e 550,000.
Sa ia asia eria na pagatia i le tele o taimi. “A o matou feiloai ma tagata, sa tele ni lagona na matou lagonaina,” sa ia toe taua. “Na matou molimauina i le taimi lava e tasi le faalavelave ma aafiaga ua tuufaatasia ma le faamoemoe ma le toefuataiina. Sa ootia o matou loto i lea taimi ma lea taimi ao matou molimauina le aao faamalolo o le alofa a lo tatou Faaola.”
E le gata i lea, sa ia molimauina patino le auala na fesoasoani ai le Ekalesia ia i latou na mafatia: “O le mafai ona tali atu i se mala ma fesoasoani e faatulaga se fesoasoaniga—o se faataitaiga lena o le faataunuuina e le Ekalesia a Iesu Keriso o se tasi o ona tiutetauave na tofiaina ai faalelagi o le tausiga o e matitiva ma e le tagolima.” Sa ia faamatalaina o se faamanuiaga paia e auauna atu ai ia i latou e le tagolima ma vaai o faia foi e isi: “Ua tatou aoao e uiga i le agalelei o tagata.”
O Talatuu o Epikopo
O lona malamalamaaga i le agaalofa sa tele sona aafiaga ia te ia ina ua valaauina o ia i le 2012 o se Epikopo Pulefaamalumalu. I lena valaauga sa ia vaaia ai se vaega lautele o le Ekalesia lea e tilivaina fesoasoani o le uelefea ma tali atu i faalavelave faafuasei i le Au Paia o Aso e Gata Ai ma isi, faapea foi ma galuega alofa i fanau a le Tama Faalelagi i “nisi o nofoaga sili ona faigata, nisi o nofoaga sili ona matitiva, nisi o nofoaga sili ona pagatia i le salafa o le lalolagi.”3
O le matafaioi o le epikopo e i ai se tulaga taua mo Elder Stevenson. “Ina ua 12 ou tausaga, sa valaauina lou tama o se epikopo,” sa ia toe taua. “Sa toatele fafine ua maliliu o latou tane i le uarota, ma e masani ona ave au e lou tama pe a alu e auauna atu ia i latou. Na te fai mai ia te au e vaai kalone lapisi, faamama se mea i le fale, pe aumai ni au uo matou te saluina laulaau pe saluese le kiona. Pe a ma o ese, ou te lagonaina pea le lelei i totonu. O le asiasi atu i fafine ua oti a latou tane na fesoasoani ou te iloa ai lena vaega o mea e fai e epikopo e auauna atu ai i tagata taitoatasi. O epikopo o le Ekalesia o ni a’u totoa moni lava.”
O Se Folafolaga mai se Perofeta
I le Aso Lua ao lumanai le konafesi aoao ia Oketopa 2015, na maua ai e Epikopo Stevenson i lena taimi se valaauga o talosaga ai o ia e feiloai ma Peresitene Thomas S. Monson ma ona fesoasoani.
“O Peresitene Monson [na tuuina mai] se valaauga i le Korama a le Toasefululua ia te au. Sa ia fesili mai ia te au pe ou te taliaina. … Sa ou tali atu ioe. Ona … aapa mai lea ma le agalelei o Peresitene Monson ia te au, faamatala mai le valaauina o ia i le tele o tausaga ua mavae o se Aposetolo, … sa ia lagonaina foi le le agavaa. Sa ia faatonuina ma le toafilemu au, ‘Epikopo Stevenson, o le a faaagavaaina e le Alii i latou Na te valaauina.’ o nei upu malu a se perofeta ua avea ma se puna o le filemu [talu mai lena taimi].”4
O Elder Gary E. Stevenson o se tamalii moni lava e aunoa ma le faaoleole. I le avea ai ma se Aposetolo, e pei ona ia faia o se Epikopo Pulefaamalumalu ma o se Fitugafulu ma e pei ona ia faia i lona olaga atoa, o le a faaauau pea ona ia aapa atu i tagata matitiva ma e le tagolima. O le a ia mulimuli i le poloaiga a le mau ina ia “fesoasoani i e vaivai, sii i luga lima ua tautau i lalo, ma faamalosi tulivae ua vaivai” [MF&F 81:5]. O se valaauga luitauina, ae o se [valaauga] ua fetaui ma ia ona o lona loto malamalama.