O Le Paga Suesue a Ionatana
E alala le tusitala i Virgina, ISA.
Na misia e Ionatana le avea ma paga suesue a Kilisi. Ona ia maua lea o se manatu lelei lava!
“Le Agaga e taitai ai, ma ou iloa ai mea moni” (Tusipese a Tamaiti, 66).
Ua ova ma se tausaga e lei toe vaai Ionatana i lona tuafafine o Kilisi—ae na pei lava ua faavavau! E le o toe umi ae sau o ia i le fale mai lana misiona e fai lona taotoga. Sa faanoanoa Ionatana ona sa mai o ia, ae sa fiafia ona e le toe umi ae la toe faatasi.
Ina ua foi mai o ia mai le aoga i le aso na soso ai, sa saofai atu Kilisi i luga o le nofoa. Sa momoe atu Ionatana ma fusi o ia.
“Malo, Ionatana! Sa ou misia lava oe!” na fai atu ai Kilisi.
Sa ataata Ionatana. “Sa ou misia foi oe! Tai leaga ua e mai.”
“Faafetai, uo,” o le tala lea a Kilisi. Sa ia uuina le Tusi a Mamona i luga o ona vae.
“E mafai ona ou faitau ma oe?” sa ia fesili ai.
“Aisea e te le alu ai e aumai lau Tusi a Mamona, ona ta amata faatasi lea i le amataga.”
Sa tamoe atu Ionatana i lona potu ma uu mai lana kopi. “Lea ua i ai!” o lana alaga lea ao toe tamoe mai. Sa ia soso atu i autafa o Kilisi.
Sa la susue i le itulau autu. “O Le Tusi a Mamona: O Se Tasi Molimau ia Iesu Keriso,” na faitau ai Ionatana. Sa la faitau feauauai.
“I lau misiona e suesue ai au tusitusiga paia faatasi ma lau soa i aso uma lava,” o le tala lea a Kilisi. “E mafai ona avea oe ma au paga suesue seia oo i le taimi ou te toe foi ai i lau misiona?” o le fesili lea a Kilisi.
“Ia!” o lana tala lea.
O ni nai aso mulimuli ane, sa faia ai le taotoga a Kilisi. Sa sau o ia i le fale mai le falemai e malolo ma sei toe manuia mo ni nai vaiaso. Sa la suesueina faatasi ma Ionatana le Tusi a Mamona i aso uma.
Ao lei toe foi atu o ia i lana misiona, sa fai atu Kilisi, “Ionatana, ou te manao e lui oe e faauma le faitauina o le Tusi a Mamona ae e te lei papatiso!”
Sa mafaufau Ionatana i lena mea. O lona aso fanau lona valu sa na o ni nai masina oo i ai. O le a tele ana faitauga e fai. Ae sa ia manao e fai. “Ioe,” na fai atu ai Ionatana.
“Ao e faitau, e mafai ona e tatalo ma fesili pe moni?” sa fesili atu ai Kilisi. “Na folafola mai Moronae, a tatou faia lena mea, o le a tau mai e le Agaga Paia ia i tatou pe moni.”
“Lelei la,” na fai atu ai Ionatana.
E oo ane i le taimi na toe foi ai Kilisi i lana misiona, ua oo le la faitauga faatasi i le 2 Nifae.
Sa matuai misia lava e Ionatana ia Kilisi. Sa faapitoa lava ona ia misia le avea ma ana paga suesue. Peitai, sa ia maua se manatu lelei lava!
I le aoga i le aso na sosoo ai, sa ia savali atu i le kesi a lana uo lelei lava o Siaki.
“O le a ou faitauina atoa le Tusi a Mamona ao lei oo i lou papatisoga,” na fai atu ai Ionatana. “Talu ai o le a papatisoina i taua i le aso lava e tasi, e te fia faia foi la?”
“Ioe,” o le tala lea a Siaki. “Ou te lei faitauina atoa muamua lava le Tusi a Mamona.”
O aso uma lava i le aoga, e fesili ai le tasi i le isi i le fesili lava e tasi.
“O fea lena ua e oo i ai?”
“O le faaiuga o Iakopo. Ae o fea lena ua e oo i ai?”
E lei leva ae le toe manaomia ona la toe faia lena fesili. Sa na o le tilotilo atu o le tasi i le isi ma la iloa ai le fesili.
“Ou te manatu ta te faaumaina i le taimi tonu mo o ta papatisoga,” o le tala lea a Ionatana.
Mulimuli ane, na oo mai le aso o o la papatisoga.
“Sa ou faaumaina anapo,” sa musumusu atu ai Ionatana.
“Ma au foi!” Na fai mai ai Iakopo. “Ma sa ou tatalo ia iloa pe moni, ma sa ou lagonaina le mafanafana ma le fiafia tele.”
Sa ataata Ionatana. “Faapena foi [au]. Sa ou fiafia lava ao ou tatalo.” Sa matuai faafetai o ia mo le lui a Kilisi. O lea sa ia atinaeina lana lava molimau.