O La Tatou Avanoa
Pe na e maua se aafiaga o le mana o le Tusi a Mamona i lou olaga? Ia faataitai i ai e pei ona faia e nei faifeautalai!
Ata na tusia e Brian Call
Sa Ou Mauaina le Vaega na Misi
Ao ou i ai i le aoga maualuga, sa ou le fiafia ai e uiga i nisi o aoaoga faavae o le Ekalesia. Sa iu ina ou oo atu ai i le le toe malosi i le lotu. Sa ou auai atu i nisi o gaoioiga a se isi lotu, ae sa lei atoa lou olioli. Sa pei lava sa i ai se mea na misi.
Sa umi se taimi ou sueina le mea sa misi, ae i se tasi aso ina ua uma lau tatalo, sa pupula ou mata ma iloa atu le Tusi a Mamona i luga o lau laulau. Sa ou tau moe, ae oo mai se manatu ia te au: “Sa ou fanau mai o se Mamona. Ae aisea la e lei uma ai ona ou faitauina le Tusi a Mamona?” O lena la aso, sa tonu ai o le a ou faaumaina le faitauina o le Tusi a Mamona.
I le mavae ai o le tele o tausaga o sailiili, o lenei ua iu ina ou maua le vaega na misi o lena fiafiaga.
Elder Jayme Promise, Misiona a Filipaina Aai o Quezon
Pe a Susue e Tagata le Tusi
I lau misiona na ou vaai ai i tagata o e inu ava, ulaula, ma faaaoga fualaau faasaina, o susue le Tusi a Mamona ma liliu mai o latou ala ma foi mai i o latou aiga ma le Ekalesia. Ua ou vaai i atalii faamaumau oa o toe foi mai i le aiga ma faia ni misiona ina ua uma ona latou susueina lenei tusi. Ua ou vaai i aiga malepelepe o faitau faatasi le Tusi a Mamona ma faamauina mulimuli ane ai i le malumalu. Ua ou vaai i tagata o e ua matuai leai se faamoemoe ma leiloa le mea e fai, o susue lenei tusi, ma amata ai ona toe sologa lelei mea uma.
O le taimi lava ou te susue ai le Tusi a Mamona ma faaaoga se fuaiupu e fesoasoani ai i se tasi, e tutupu ai vavega. O le mana o le Atua o loo taoto i lalo o na itulau, o faatalitali mo se olaga ia suia, faatalitali mo se vavega e tupu. E mafai ona ou folafola atu ia te outou, e tutupu vavega i taimi uma e te susuea ai le Tusi a Mamona. Atonu e le o taimi uma o le mea o loo tatou mananao i ai pe tupu i le taimi tatou te mananao e tupu ai, ae o le a tupu.
Elder Benjamin Baradi, Misiona a Filipaina Bacolod