Filiga ma le Avea ma Soo

Saunia e Elder David F. Evans

O Le Fitugafulu

Mai se lauga sa faia i se faigalotu, “Tenacity,” sa fofogaina atu i le Iunivesite o Polika Iaga i le aso 4 Novema, 2014. Mo le saunoaga atoa i le gagana Peretania, alu i le speeches.byu.edu.

Ia faatuatua i le Atua ma Ana folafolaga, ma fai le mea sao i taimi uma, e tusa lava po o ai na te iloa.

Ua faauigaina e se tasi o lomifefiloi i luga o le initoneti le filiga o le “faapalepale, onosai, ma le finafinau malosi.” O loo faapea mai foi, “O le filiga o le uiga e faaalia e se tasi e le fati—o le e taumafai pea seia oo lava ina ausia la latou sini.”¹

Tatou te manaomia le filiga ina ia mafai ona avea ma ni soo moni o le Faaola, ma ia ausia ai sini lelei moni—avea ma se faifeautalai maoae, faamaeaina o a tatou aoaoga, mauaina o se soa e faavavau, ma le amataina o se aiga—lea e silafia e lo tatou Tama Faalelagi e manaomia ona tatou ausia e saunia ai mo le faavavau. O lo tatou gafatia ina ia filiga i mea lelei uma, o le a iloa ai pe avea i tatou ma atalii ma afafine o le Atua lea ua Ia silafia e mafai ma e ao ona avea ai i tatou.

O le augatupulaga i aso nei o faifeautalai faamisiona ua taua “o le augatupulaga aupito maoae o faifeautalai i le talafaasolopito o le Ekalesia” ma ua faatusaina i le autau totoa e 2,000 a Helamana.² E ui lava i uiga faaalia lelei ma faatuatua ma taumafaiga filiga a nei alii talavou, fai mai Helamana lo latou taitai: “Ma sa oo ina sa i ai le toalua selau, mai lau lua afe ma le onosefulu, o e na matapogia ona o le tele o le toto sa masaa; e ui i lea, e tusa ma le agalelei o le Atua, ma lo matou ofo tele, ma le olioli foi o la matou autau atoa, sa leai se tagata e toatasi o i latou na fano” (Alema 57:25).

Sa laveaiina i latou “ona o lo latou faatuatua tele i ia mea sa aoaoina i latou ia talitonu i ai—e faapea o loo i ai se Atua faamasinotonu, ma o soo se tasi e le masalosalo, o le a faasaoina i latou i lona mana faavavega” (Alema 57:26).

Fai mai Helamana e uiga ia i latou: “Ua latou talavou, ma ua mausali o latou mafaufau, ma ua latou tuu atu o latou faalagolago i le Atua e le aunoa” (Alema 57:27).

E tatau foi ona faapena i tatou. I le olaga, o le taimi e to mai ai timuga ma tatafe mai lologa, ma agi mai matagi ma taia ai i tatou ma luga o o tatou fale, tatou te iloa ai pe faamata e malosi o tatou faatuatua ma pe faamata o tatou faalagolago atu e le aunoa i le Atua. O le mea sao lava ia e leai se tofotofoga seiiloga e i ai se faalavelave.

Aua Le Faavaivai

I ni nai tausaga ua mavae, sa ma pulefaamalumalu ai ma lou toalua o Mele i le Misiona a Iapani Nagoya. O faaupuga totoa, lototetele, malolosi, toaaga, ma faamaoni lea e faamatalaina ai fitafita totoa e 2,000 (tagai Alema 53:20) e faamatalaina ai foi faifeautalai sa matou galulue faatasi. O le isi faamatalaga o fitafita totoa e 2,000—o nisi sa matapogia (tagai Alema 57:25)—e faamatalaina ai foi nisi o a matou faifeautalai.

E le faigofie se misiona. E le faapena foi le olaga. E i ai lava se itu o le a faamanualia ai tagata uma. O nisi o nei tiga e oo mai mai solitulafono e lei faaleleia. O nisi e oo mai i ala o faalavelave poo mai. O nisi e oo mai pe a tatou vaai atu ia i latou tatou te alolofa i ai a le ua teena le talalelei a Iesu Keriso, pe ua le faamaoni i le mea ua latou iloa e moni. Ae e ala mai i nei mea uma, e oo ai ina tatou iloa le Atua, ma tatou tuputupu ae ai ia avea ma soo o le Faaola. E suia o tatou loto, ma o lena suiga e oo ina tumau ao faaauau ona tatou filifilia le amiotonu nai lo o le agasala ma le masalosalo.

O na fitafita totoa e 2,000 sa filiga i o latou faanaunauga. O le mea moni sa le mafai ona latou fati, e tusa lava pe na faigata lo latou ala. O se augatupulaga na muamua atu, o o latou tama ma tina, sa aoaoina e Amona ma ona uso. Sa tele le faamanuiaina o na faifeautalai, ae sa tatau foi ona latou pipiimau pea ma le fati ina ua oo ina faigata ma lotovaivai a latou misiona.

Ua faamatalaina e Amona na taimi: “O lenei ina ua vaivai o tatou loto, ma toetoe a tatou toe foi i tua, faauta, sa faamafanafanaina i tatou e le Alii, ma fetalai mai: O atu i totonu o o outou uso, o sa Lamanā, ma tauave ma le onosai ou puapuaga, ma o le a ou tuu atu ia te outou le manuia” (Alema 26:27).

Faatasi ai ma le onosai ma le filiga, sa galulue ai Amona ma ana soa i faafitauli ma iu ai ina maua le faamanuiaina tele.

Filiga i le Talalelei

I le 1999, na sau ai Sister Marci Barr i le Misiona a Iapani Nagoya, mai Columbus, Ohaio, i le ISA. Sa lei faigofie le faaSapani ia te ia, ae sa filiga lava o ia. O le taimi lava na ia iloa ai tautala [faaSapani], sa lei toe taofia lona talanoa atu i tagata e uiga i le talalelei.

Ua folafola atu ni folafolaga maoae i faifeautalai e faamaoni, finafinau, ma filiga, o e tatala o latou gutu ma le totoa ma le alofa, ma o e galulue ma o latou malosi atoa i auala ua faatulaga mai e le Alii (tagai MF&F 31:7). Ae peitai, o nisi faifeautalai ua matatau ona o le teenaina ma faataga ai lo latou matatau e faatoilalo ai lo latou totoa alofa.

Ae sa lei faapena Sister Barr! Sa ia maua ma aoao, ma sa ia aoao ma maua i lana misiona atoa.

I le aso mulimuli o lana misiona, sa malaga mai ai Sister Barr i le ofisa o le misiona i Nagoya. O le po lena, o le a ou faatalanoaina ai o ia ma tau atu i ai sa ia faia se galuega matagofie. O le aso na sosoo ai o le a alu ai o ia i le fale.

Ao malaga mai o ia, sa ia vaaia se faapotopotoga o ni teineiti o le vaitausaga o le aoga maualuga o talanoa faatasi i le nofoaga e faatali ai nofoaafi. Sa alu atu o ia ia i latou ma talosaga pe mafai ona latou feiloai. Sa talanoa atu i ai e uiga i le talalelei ma lona Toefuataiga. Ona ia tuu atu lea o se tamaitusi o lesona a faifeautalai i se tasi o teineitiiti sa foliga mai sa fiailoa atili, ma tau i ai ia tamaitai faifeautalai e mafai ona aoaoina o ia i le talalelei.

Ona sau lea o Sister Barr i le ofisa o le misiona ma fai lana faatalanoaga, ae lei faamatalaina mai lava ia te au lona aafiaga i le nofoaga faatali nofoaafi. Ia te ia, sa le o se mea mataina. Sa na ona ia faia o le mea sa ia iloa sa sao, seia oo lava i le faaiuga. Atonu o le faauigaga sili lea ona lelei o le filiga i le talalelei ou te iloa: E tusa lava po o le a, ia faaauau pea ona faatuatua i le Atua ma Ana folafolaga, ma fai le mea sao i taimi uma lava, e tusa lava po o ai e iloaina.

Sa toe foi atu Sister Barr i Columbus. O iina i se uarota o tamaiti aoga, sa feiloai ai i lana tane i le lumanai, ma o loo la tausia faatasi se aiga i le talalelei a Iesu Keriso.

O le teineitiiti i le nofoaga faatali nofoaafi—o Hitomi Kitayama—sa aoaoina e tamaitai faifeautalai. Sa finafinau Hitomi ma faaalia lona lava ituaiga o filiga ao ia taliaina upumoni o le talalelei, faatoilalo le tetee mai tagata o lona aiga ma ona lava masalosaloga.

Sa matou feiloai ia Hitomi i le toeitiiti ono tausaga mulimuli ane i se konafesi a le misiona i Tokyo, lea sa auauna atu ai o se faifeautalai. Sa ia faamatala mai ia i matou le feiloaiga ma Sister Barr i le nofoaga faatali nofoaafi ma lona liliu mai i le talalelei mulimuli ane ai.

Ina ua uma lana misiona, sa feiloai o ia ma faaipoipo atu i se isi faifeautalai na maea lana misiona, o Shimpei Yamashita. O le mea e malie ai, o Shimpei o le atalii o se alii sa ma aoaoina ma Elder Randy Checkettes i le taumafanafana o le 1971 ao ou auauna atu i lau misiona muamua i Iapani.

E le na o le faasalalauina atu o le talalelei e manaomia ai lo tatou filiga e fai le mea sao. Tatou te manaomia lenei lava filiga amiotonu ao tatou faatoilaloina agasala patino ma faaosoosoga, faamaea a tatou aoaoga, ma saili faaipoipoga faalemalumalu ma se aiga e faavavau. O le a tatou manaomia le filiga, alofa, ma le le faalogologo tiga ao tatou taofimau i o tatou taitoalua ma fanau ma galulue i luitau ia e oo mai i faaipoipoga ma aiga uma lava. Ma o le a tatou manaomia le filiga, tuuto, ma le onosai pe afai e le oo mai faamanuiaga o loo tatou sailia i le taimi tatou te mananao ai.

I nei mea uma ma i isi mea amiotonu uma, o lo tatou tuuto e fai le mea sao ma ia sao o le a luitauina e le lalolagi. Ae le tatau ona tatou fati. E manaomia ona tatou taumafai pea seia oo ina ausia la tatou sini. O la tatou sini, i le uiga, o le ola e faavavau faatasi ma a tatou tane po o le ava, ma a tatou fanau, ma a latou fanau mo augatupulaga e oo mai.

Faatutu ni Sini Tauaogaina

E faapefea ona tatou atiina ae lo tatou tuuto e fai le mea sao, ma e faapefea ona tatou maua le malosi e tausia ai?

Muamua, tatou faatutu ni sini tauaogaina o mea e ausia ma faia faatasi ma la tatou sini tupito o le ola e faavavau. E aofia ai sini faaleaoaoga ma faalegaluega lea o le a taitai atu ai ma ia atiina ae faatasi ma o tatou aiga, tuputupu ae patino, auauna atu, toaga i le Ekalesia, ma le fiafia patino. O se vaega o le faia o nei sini o la tatou lava lea filifiliga patino, ae o le isi vaega e ao ona aofia ai le tatalo ma faaaliga faaletagata lava ia. Afai e te fia saili lava i le finagalo o le Alii, o le a tali mai o Ia.

Faatasi ai ma le tele o mea e tatau ona e tatalo e uiga i ai, o le sueina o se soa agavaa e mafai ona lua o i le malumlau ma osia feagaiga paia. Afai e te manao e osia ma tausia feagaiga paia ma maua le uunaiga ia ausia au sini e sili ona amiotonu, ia saili ma le agaga tatalo i faamanuiaga ma tiutetauave o le faaipoipoga.

I lenei vaega ma isi vaega o lou olaga, ia saili po o le a le mea o loo finagalo le Atua e te faia. Suesue i ai. Fai faaiuga. Tuu atu i le Alii ma ia maua [mai Lona finagalo]. Ona agai lea i luma i le ausiaina o au sini.

I nei mea uma, afai o le a e filiga i mea amiotonu, e tatau ona tatou ola latalata atu i le Alii e ala i le ola amiotonu. E i ai ni nai mea o le a tele ina faasalaveia i tatou mai le ausia o a tatou sini amiotonu nai lo le agavaa i faamanuiaga a le Agaga i o tatou olaga.

Fai ni sini amiotonu. Ia tatalo e le aunoa ma saili le taitaiga a le Alii. Ia agavaa ma aloese i mea na o le a faalavefau mai pe taotaomia ai lou alualu i luma. Ia i ai ma faaaoga lou pepa faataga o le malumalu. Ia tausia au feagaiga, ae maise lava pe a faigata le olaga. Saili i faamanuiaga o le faaipoipoga ma aiga e faavavau. Ona pipiimau lea. Aua le fiu! Aua le fati.

Ia filiga i mea amiotonu uma. O le a e vaaia le faamalosia o lou faatuatua, ma o le a e vaaia le faalolotoina ma le faalauteleina o ou malosiaga ma taleni ao faateleina lou faatuatua. Ma ia manatua le mea ua folafolaina mai e Elder Jeffrey R. Holland o le Korama a Aposetolo e Toasefululua: “O nisi faamanuiaga e vave oo mai, o nisi e tuai mai, ae o isi e le oo mai seia oo atu i le lagi; ae mo i latou o e talia le talalelei a Iesu Keriso, e oo mai lava.”³