Seia Tatou Toe Feiloai
O Le A ma le Aisea ma le E Faapefea o le Tuuina Atu o se Molimau
Mai le “President Kimball Speaks Out on Testimony,” New Era, Aok. 1981, 4–7; ua faalaugatasia le faamataitusi tetele.
O taimi uma lava e tuu atu ai lau molimau e faapea ona faamalosiaina ai.
E mafai ona maua e tagata uma i lenei lalolagi se faaaliga, e tutusa lava ma le faaaliga na maua e Peteru [tagai Mataio 16:13–17]. O lena faaaliga o le a avea ma se molimau, o se malamalama o loo soifua Keriso, o Iesu Keriso o le Togiola o lenei lalolagi. E mafai ona maua e tagata uma lenei faamautinoaga, ma a ona maua loa lenei molimau, o le a sau mai le Atua ae le na o le suesue lava ia. Ioe, o le suesue o se elemene taua, ae e tatau ona i ai faatasi ma le suesue ma le tatalo tele ma le aapa atu, ona oo mai ai lea o le faaaliga lenei. …
O sauniga molimau o nisi ia o sauniga sili ona manaia i le uarota i le masina atoa, pe afai e ia te oe le Agaga. Afai e te faaivaiva i se sauniga molimau, e i ai se mea o tupu ia te oe, ae le o isi tagata. E mafai ona e tu i luga e fai lau molimau ma e mafaufau o le sauniga aupito sili lea ona manaia i le masina; ae afai e te saofai iina ma faitau mea sese o le kalama ma ata i le tamaloa e le lelei lana tautala, o le a e iva, ma o lena tulaga, o le a e sesee sao atu ai i fafo o le malo. …
O masina uma lava e fono ai le Au Peresitene Sili ma le Toasefululua ma Au Pulega Aoao uma i le malumalu. Latou te tuuina atu molimau ma latou tau atu i le tasi ma le isi lo latou alolofa i le tasi ma le isi e pei lava o outou uma. Aisea e manaomia ai e le Au Pulega Aoao se sauniga molimau? O le mafuaaga lava e tasi lea e te manaomia ai se sauniga molimau. E te manatu e mafai ona e alu i le tolu, ma le ono, ma le iva, ma le sefululua masina e aunoa ma le tuuina atu o lau molimau ma e tausisia ai pea lona taua atoa?
O nisi o o tatou tagata lelei, e matuai fefefe lava i le faia o faamatalaga masani o lea latou te taumafai e aloalo ese mamao ai lava mai a latou molimau e ala i le talanoa i mea e le faatatau i le molimau. Aua lava nei popole i faamatalaga fai soo i moilmau. A tuuina mai e le Peresitene o le Ekalesia lana molimau, e faapea mai o ia, “Ou te iloa o Iosefa Samita sa valaauina e le Atua, o se sui o le lagi. Ou te molimau atu o Iesu o le Keriso, o le Alo o le Atua soifua.” Ua e vaai, o le mea lava e tasi lea e fai atu e outou uma lava. O le molimau le mea lena. …
O se molimau e le o se apoapoaiga; o se molimau e le o se lauga (e leai se tasi o outou ua i ai iina e apoapoai atu i tagata uma); e le o se talatalaga o se malaga. E te i ai iina e tuuina atu la oe lava tautinoga. E ese le maoae o mea e mafai ona e tautala atu ai i le 60 sekone e ala i le molimau, pe 120, pe 240 po o le a lava le taimi e tuuina atu ia te oe, pe afai tou te tausisi lava na o le molimau. Matou te fia iloa po o a ou lagona. E te fiafia moi lava i le galuega? O e fiafia i le galuega? E te alofa i le Alii? O e fiafia i le avea o oe ma se tagata o le Ekalesia?
… Aua e te saofai iina i le tou sauniga anapogi ma e pepelo ia te oe lava ma fai mai, “E matea o le a le tuuina atu nei lau molimau. Ou te matea o le a le fea lena mea i isi nei o tagata ona ua tele ou avanoa sa maua.” Ia e tuuina atu lau molimau. Ma o le tasi le minute ua lava lena umi e tuuina atu ai.
E i ai sau molimau! E tatau ona atiina ae ma sii ae ma faalautele, ioe, o le mea lena o loo e faia. O taimi uma lava e tuu atu ai lau molimau e faapea ona faamalosiaina ai.