Fesili & Tali
“E palauvavale ou matua, faalogologo i musika malomaloa, ma matamata i ata le talafeagai o le televise. O le a se mea e mafai ona ou faia ia lagonaina ai le Agaga i le fale, ae maise lava i aso Sa?”
Ina ua papatisoina oe, na e maua le meaalofa o le Agaga Paia. O le uiga o lenei mea, e le afaina po o a ou tulaga, e mafai ona e maua le mafutaga a le Agaga pe afai e tausisia lou agavaa ma fai faaiuga lelei faaletagata lava ia.
Ao e ai ma inu i le faamanatuga i vaiaso taitasi, o le a faamanatu atu ai au feagaiga ma le Tama Faalelagi e “tauave i [ou] luga le suafa o [Lona] Alo, ma manatua pea o ia ma tausi ana poloaiga … ina ia mafai ona [e] maua i taimi uma lona Agaga e faatasi ma [oe]” (MF&F 20:77). E ala i le tausia o au feagaiga, e tumau ai lou agavaa mo le mafutaga a le Agaga.
O le auai i sauniga faamanatuga ma isi sauniga a le Ekalesia, e le na o le pau lea o le auala e taulai atu ai lou Aso Sa i le tausia o feagaiga. E tusa lava po o a tulaga o lou aiga, e mafai ona e faaali atu i le Tama Faalelagi lou tautino i au feagaiga e ala i le galue i lou talafaasolopito o aiga, suesue i le talalelei, ma auauna atu i isi, ae maise lava i latou e lagona le tuuatoatasi pe mamai. O le filifilia o nei ituaiga o gaoioiga, e tusa lava pe le faia e tagata o lou aiga, o le a aumaia ai ia te oe le fiafia ma le olioli. (Tagai Russell M. Nelson, “O Le aso Sapati o se Aso Fiafia,” Liahona, Me 2015, 129–32.)
Tautala Atu
E tusa lava pe o ou matua o ni tagata o le Ekalesia pe leai, talanoa i ai i le pogai e taua ai ia te oe le i ai i taimi uma o le Agaga i lou aiga, ae maise lava i Aso Sa. I lou tulaga, e mafai ona e filifilia le nofoaga aupito toafilemu i totonu o le fale ma valaaulia isi tagata o le Ekalesia e o mai e faatasi ma oe ma valaaulia faatasi ai le Agaga ia i ai iina. Ou te iloa afai e te tausia le paia o le Aso Sapati, o le a faamanuia tele oe e le Alii.
Joskares C., 16 tausaga, Santo Domingo, Dominican Republic
Tatalo mo Ou Matua
E mafai ona e tatalo mo ou matua. E pei ona tusia e Mamona, “Ma o le a manatua foi e le Alii tatalo a e amiotonu, ia sa tuuina atu ia te ia mo i latou” (Mamona 5:21). Atonu o le a le taofi e ou matua i le tami lava lena, ae o le a fesoasoani le Alii ia te oe.
Cole M., 17 tausaga, Arisona, ISA
Taulai atu i le Faia o Mea Lelei
O Aso Sa e faigata lava ia te au i le fale. E na o au le tagata o le Ekalesia i le matou fale, ma o ou matua ma ou uso e matamata televise ma faalogologo a latou musika i le Sapati. Ou te manao e faaali atu lou alofa i le Tama Faalelagi e ala i le tausia ia paia le aso Sapati. E mafai ona ou alu i lou potu ma faitau au tusitusiga paia, faalogologo i musika Lotu, ma alu a matou asiasiga ma au uo pe faatasi foi ma faifeautalai. Ou te faafetai lava i le i ai o le fesoasoani a le Alii e faamamalu ai le aso Sapati ma le maelega, ma mo le malosiaga o loo Ia tuuina mai i taimi uma ia te au.
Lais de Jesus M., 19 tausaga, Sergipe, Pasila
Liliu atu i Tusitusiga Paia
Talanoa i ou matua e uiga i mea o latou faia, ae afai e le faalogo mai, e mafai ona e tatalo mo le taitaiga i auala e fesoasoani ai e te lagona le Agaga i lou aiga. Ina ia lagona le Agaga i lou aiga, ou te faitau i tusitusiga paia, ma o lena mea e aumaia vave ai le Agaga i totonu o le potu.
Blake E., 14 tausaga, Iuta, ISA
Faaaoga Punaoa a le Ekalesia
Afai e i ai sau telefoni poto po o se tamai komepiuta feaveai, e mafai ona e siimaia polokalama o le Mormon Channel ma le LDS Youth. E tumu i pese, vitio, ma tautalaga matagofie e aumai ai lava i taimi uma le Agaga pe a ou kiina! E faigofie lava, ae e fesoasoani tele ia te au e lagona ai le Agaga e tusa lava pe siomia au i le pisapisao. E faia ai se eseesega ma aumai ai le filemu i le fale atoa.
HunterEve V., 16 tausaga, Texas, ISA
Mulimuli i le Faataitaiga a Keriso
E taua le faatumulia o se fale i le Agaga, ae e sili atu le taua o le faatumulia ai o se tagata. O Keriso o le faataitaiga silisili lea o le i ai o le Agaga faatasi ma Ia i taimi uma. Tau lava o le taumafai ia ola atili e pei o Keriso, o le agalelei i isi, ma le vaai atu i le lalolagi i le ala o le a Ia vaai ai, atonu o le auala sili lea ona lelei e faatumau ai le Agaga ia te oe po o fea lava e te i ai.
Isabel W., 16 tausaga, Oregon, ISA
Fautua Atu ni Gaoioiga Faaleaiga
I Aso Sa, atonu e fautua atu gaoioiga e mafai ona tou faia faatasi o se aiga. Fautua atu se mea e mafai ona fai e le aiga e faatasitasi ai, lea e le mafai ai ona tutupu na mea e le talafeagai. Afai o loo outou faia se mea faatasi o se aiga, e aumaia vavalalata ai outou. Ma e avatu ai foi ia i latou se manatu ese o mea e mafai ona tou faia i Aso Sa. Atonu o le Aso Sa e sosoo ai, o le a latou faapea atu, “Ei, o le mea sa tatou faia i le taimi ua tea sa malie—tatou toe faia.”
Ryan B., 19 tausaga, Idaho, ISA