Lagonaina o le Agaga o le Malumalu

Kathy Rossier, Kalefonia, ISA

Sa ou maua le avanoa e asiasi atu ai i lau tama teine o Callie i Las Vegas, Nevada, ISA, lea na faatoa mei atu i ai ma lona toalua ma le la fanau e toalua. O le uarota a Callie e fai i le aoauli, o lea sa matou maua ai se taeao manaia e sauni ma talanoa ai i ni mea e mafai ona fai pe a tuua le lotu. Ona sa lei maua e Callie se avanoa e asiasi atu ai i le malumalu, o lea sa matou filifili ai e o atu ma pue ni ata o tamaiti i lotoa o le malumalu.

E pei lava o malumalu uma, o lotoa o le Malumalu o Las Vegas Nevada sa matagofie ma tausia lelei i vaipuna ma fugalaau mananaia.

Ina ua uma ona faitau se tala sa faamatala e Peresitene Thomas S. Monson, sa naunau lava Callie e ave lana fanau i le malumalu ina ia mafai ona latou fepai atu i ai (tagai “Mauaina o le Filemu,” Liahona, Mat. 2004, 2–7). O le mea muamua lava sa ia faia, o le faamalamalama atu o le paia ma le taua o le malumalu i lana tama teine o Sitela.

Sa malamalama lelei Sitela e pei ona malamalama ai soo se tamaitiiti tolu tausaga, ma sa matou uunaia o ia e pai i le malumalu. Sa matou pueina ni ata o Sitela ma lona tuagane e tolu masina o fepai atu i le malumalu.

Ina ua oo i le taimi matou te o ai, sa faapitoa le musu o Sitela e alu. Sa matou manatu sa matou malamalama i le pogai; sa ia maua se taimi sili ona fiafia i se nofoaga matagofie ma sa le masalomia lava lona lagonaina o le agaga lava lea sa matou [maua foi].

Ina ua uma ona faasaofai i le taavale ma faamau lona fusipau, sa amata loa ona matou o ese. Sa ou faliu atu i tua, talotalo, ma fai atu ia Sitela, “Fai, tofa malumalu.” Sa tilotilo atu o ia i le malumalu, talotalo, ma fai atu, “Tofa, malumalu. Tofa, Tamamatua.” Sa ou le mautinoa pe na sao lau faalogo atu ia te ia, ae ina ua ou faliu atu ia Callie, sa ou vaaia loimata i ona mata, na ou iloaina sa ma lagonaina le mea e tasi.

O le tamamatua o Sitela—o lou toalua o Timi—e fa tausaga talu ona maliu ae lei fanau ia Sitela. E mautinoa lava sa vaai o ia i ona ata, ma faalogo o talanoa le aiga e uiga ia te ia, ae sa lei taua o ia i a matou talanoaga i lena aso.

Ina ua maliu Timi, sa na o le toatasi le tama a le ma fanau na i ai. O lenei ua toa 12, ma soo se taimi lava ou te siiina ai se tasi o na pepe fou faapelepele o le e lei leva ona aluese mai le afioaga o le Tama Faalelagi, ou te fia fesili lava i ai, “Sa e feiloai i lou tamamatua? O a ni ana fautuaga na ia tuuina atu e te sau ma oe?”

O lena aso, sa faamalosia ai lau molimau i le paia o malumalu. Atonu e le mafai ona tatou aveina atu a tatou fanau laiti i totonu faatasi ma i tatou, ae e mafai ona tatou ave atu seia oo lava i faitotoa ma faataga i latou e tuu o latou lima i faitotoa e le mafaitaulia tagata agavaa o le ekalesia ua faaaogaina e ulufale atu ai i le maota o le Alii.