Auala e Avea Ai ma se Uo Lelei

Saunia e David Morales

E alala le tusitala i Santa Cruz, Polivia.

Tatou te mananao uma lava ia lagona le faaaofiaina. O mea nei e mafai ona e faia pe afai e te lagona po o se isi foi tagata le le faaaofiaina.

Ata

friends doing things together

Ata na tusia e Pablo Luebert

Sa amata ona ou suesue i le Ekalesia ao ou talavou, ae sa ou le toe alu i sauniga i aso Sa ona sa ou lagonaina le le faaaofiaina e le toatele o le autalavou. O se taimi mulimuli ane, sa valaaulia ai au e se tasi o na talavou i se gaoioiga a le Ekalesia. Sa ou taliaina ma fiafia i gaoioiga aua o mea ia sa ou fiafia e fai: faatino [ni tala], taalo pasiketipolo, ma le momo’e.

Ao faaauau ona ou auai i gaoioiga, sa amata ona ou masani i le autalavou ma ou iloa ai, o le toatele o i latou sa aooga i lau aoga. I le aluga o taimi, sa mafai ona ou atiina ae ni faauoga ma alii ma tamaitai talavou o e sa tutusa ia tulaga faatonuina ia sa ou ola ai. Ou te faafetai ona sa valaaulia au e se tasi i se gaoioiga a le Ekalesia, ma ou te faafetai ona sa ou taliaina.

Pe na e oo i lagona sa ou oo i ai: o le le faaaofiaina pe faapea ona e le tutusa [ma isi tagata]? Pe sa e iloa se tasi na te lei lagona le taliaina ma sa lei tele ni ana uo sa i ai? Po o le aoga, i le lotu, po o nisi nofoaga, e toatele tagata sa manatu faapena i se taimi o o latou olaga.

Auala e Fai Ai Ni Uo Lelei

E tiga le le faaaofiaina, ae o le ita po o le taofimau i le ita o le a le fesoasoani lea e te maua ai se lagona lelei. Nai lo o lena, taumafai e fai mea nei:

Auai i gaoioiga a le Ekalesia. O avanoa lelei nei e siomia ai oe lava i tagata o e faaaloalo i ou tulaga faatonuina.
Aoao ma atiina ae tomai. Auai i faalapotopotoga a tamaiti aoga, au taalo, po o kalapu, o se auala lelei lea e faamasani ai i tagata o e tutusa ia mea tou te fiafia i ai.
Aua le faatali i taimi uma mo isi tagata e fai atu ia te oe e avea ma a latou uo. Faailoa atu oe lava i isi.
Ia avea ma tagata sili ona lelei e mafai ona e avea ai, ma ia tumau pea i ou tulaga faatonuina. O le a e maua ni uo e talisapaia oe mo lou tagata ma le malamalama e te faasusuluina atu.
Faaalu lou taimi ma lou aiga. E mafai ona e iloa ai, o nisi o au uo sili ona lelei o loo maua lea i totonu o lou lava aiga.

Auala e Faaaofia ai Isi Tagata

O nisi taimi e ono foliga faigata ai ona aluese mai mea ua tatou masani ai ma faauo atu i isi tagata, ae a tatou manatua o i tatou uma o fanau a le Atua, o le a tatou vaaia le taua o le fesoasoani atu i isi. O nisi nei o manatu:

Talanoa atu i tagata fou i le aoga ma le lotu. Faailoa atu i latou i au uo.
Valaaulia se tasi o loo manaomia se uo i se gaoioiga a le aoga po o le Ekalesia.
Aoai—ma le agalelei ma le onosai—tagata o e faia ma le loto i ai ina ia lagona e isi le le taliaina.
Saofai i talane o se tasi o nofo toatasi pe valaaulia o ia tou te nonofo faatasi ma au uo.
Tatalo i le Tama Faalelagi pe a e le iloa se auala e fesoasoani ai i se tasi. O loo Ia silafia lelei le mea o loo manaomia e lena tagata ina ia fiafia ai, ma e mafai ona fesoasoani ia te oe e te ofoina atu lena fesoasoani.