O Le A le Mea Sa Sili Ona Taua Ia te Au?

Eleonora Sonnellini, Trieste, Italia

Pe a o le afa o lou tausaga lona tolu i le kolisi, na ou iloa ai o le tupe sa ou sefeina e totogi ai lou potu mautotogi ma mea e faaaoga, o le a le lava lea ou te ola ai i le taumafanafana. O le taimi foi lea o le tausaga e mafai ai ona ou faigaluega e totogi le semesa e sosoo ai. Sa ou maua se galuega faavaitaimi o se faatauoloa.

Sa lelei lava mea uma seia oo ina suia ou aso faatulagaina e faigaluega ai ia aofia ai ma aso Sa. I le taimi o le faatalanoaga mo le galuega, sa leai sau tala na faia e uiga i le le faigaluega i aso Sa ona o le vaitaimi lea, sa tapuni le faleoloa i le aso lena. E ui i lea, sa taua le galuega ia te au, ma sa ou fiafia i le mea sa ou faia. Sa ma faigaluega ma sau uo, ia i maua, sa mafai ona ma avanoa i aso Sa e lua ae faigaluega i le isi lua. O lenei mea sa mafai ai ona ou auai i nisi o sauniga a le Ekalesia ma fai lou valaauga.

Ae peitai, e lei leva ae ou iloaina e le mafai ona ou alualu ai pea i lenei faatulagaga. Sa ou maua moni se lagona sa le mafai ona ou faia ou tiutetauave o le aso Sa e tusa lava pe ou te le faigaluega i aso Sa uma. Sa amata ona ou fesili ifo ia te au lava, po o le a se mea e mafai ona ou faia i lenei tulaga. Ina ua uma ona ou tatalo ma ole atu mo se auala e faamaluluina ai loto o supavaisa, sa ou faitau i le 1 Nifae 7. Ou te manatua le faitauina o le fuaiupu e 19, lea, ina ua uma ona tatalo Nifae, sa faapea ona faamaluluina loto o ona uso. Mulimuli ane, sa mafai ona ou talanoa atu i ou pule o le galuega e uiga i le le faigaluega i aso Sa.

Sa ou tau atu i ou supavaisa o au o se tagata O Le Ekalesia a Iesu Keriso o le Au Paia o Aso e Gata Ai, ma sa latou fesili mai ia te au i mea e talitonu i ai le Au Paia o Aso e Gata Ai. Ina ua ou talosagaina i latou pe mafai ona ou malolo i aso Sa, o le tali o le leai. Sa latou faailoa mai, i le taimi o lou faatalanoaga muamua lava, sa ou fai atu ou te avanoa e faigaluega i soo se aso o le vaiaso, ma ou te lei taua lava ni manaoga faalelotu.

Sa mavae le lua masina e aunoa ma se suiga, seia oo i se tasi aso Sa, sa ou teleai mai i fafo mai sauniga Lotu e topetope atu e faigaluega. Sa ou fesili ifo ia te au lava, “O le a le mea e sili ona taua ia te oe?” Sa vave oo mai le tali ma faigata lava ona misia: o le Ekalesia, o le talalelei, auaunaga i lou valaauga, auai ma lou loto atoa i sauniga o le aso Sa, ma le avea ma soo i le upu ma le amio.

Sa ou filifili ou te toe talosagaina ina ia ou le faigaluega i aso Sa, ae o le taimi lenei, o le a ou faia ma se tusi faamavae sa uu i lou lima, ina nei latou fai mai faalua ia te au e leai.

Sa ou tatalo, anapogi, ma maua ni savali tesi lagolagosua mai uo.

I le taimi o lou faatalanoaga, e ui lava sa tatavale lou fatu, ae sa ou toa ona sa ou iloa sa ou faia le mea sao. O le taimi la lenei sa fai mai lou supavaisa, ioe. Na tali mai au talosaga. O le taimi lava na ou taunuu ai i le fale, na ou sasaeina ai lau tusi faamavae.

Sa ou maua le tele o faamanuiaga mai lenei aafiaga, ae o le faamanuiaga aupito vave ma vaaia, o le sa mafai ona ou faigaluega pea ma tausia pea le paia o le aso Sapati. Ou te matuai faafetai moni ai i le Alii mo lena mea.