Manatunatuga
Hurei!
E alala le tusitala i Oregon, ISA.
Sa fesoasoani se tamaitiiti e fa tausaga le matua ou te talisapaia le faamanatuga i se auala fou.
Ata na tusia e Carolyn Vibbert
Sa taulai atu lou mafaufau i le Faaola ao faauma e le au lotu ona usu le pese o le faamanatuga, ae ina ua ou amata ona tapuni le tusipese, sa faaauau le musika. O se aulotu toatele i lena aso sa alagatatau ai i le ta okeni ona tata isi fuaiupu e lua ao faauma ona tofitofi e le au ositaulaga le falaoa. Sa ou faafetai mo le taimi faaopoopo. Sa mafai ai ona ou maua se taimi faaopoopo e mafaufau loloto ai ma le migao ao lei faia tatalo o le faamanatuga.
I le taimi o tatalo, sa ou mulimuli ma le totoa i upu na tautalagia e ositaulaga ao laua faamanuiaina faatusa o le ositaulaga a Keriso mo i tatou. Na fetaui lava le faaiuina o le tatalo mulimuli, ma i le taimi na faaleo ai e le aulotu lo latou loto i ai, sa maona ae i le ogatotonu o “amene” le leo o se tamaitiiti e fa tausaga le matua, mai laina e lua i tua atu o au.
“Hurei!” o lana alaga lea.
O lona lagona na oso faafuasei ae sa lava le leotele na mafua ai le featai o nisi o tamaiti na lata ane. Ou te tautino atu, sa ou ataata le malamalama ai ma au ia.
“Hurei?” Sa ou mafaufau ai. O se tali ese lea i tatalo faamanatuga. Sa mautinoa lava o se tali ou te lei faalogo muamua lava i ai ma atonu o le a le toe faalogoina lava. Aua, tatou te faaiuina a tatou tatalo i le “amene.”…
Atonu na tele atu upumoni na lagona e lena tamaitiiti laitiiti nai lo o au.
O le Hurei e tau atu ai le fiafia. O se alagaina o le olioli, e masani lava mo se manumalo. O nisi taimi e alagaina e faaalia ai le taliaina o se tasi ua faamaeaina lelei se galuega faigata.1
O le taimi lava lena, na pue ai e lou mafaufau le manatu. Sa ou mafaufau, ioe, hurei ona ua manumalo Iesu Keriso i le oti ina ia mafai e i tatou uma ona toetutu. Hurei ona o Lana Togiola, ua mafai ai ona Ia faamagalo a tatou agasala! O le mea tonu lava, e mafai ona Ia faamagalo au i au agasala! Hurei ona o Lona alofa tunoa e mafai ai ona ou toe foi atu i lou Tama Faalelagi ma olioli i le faamoemoe o le ola e faavavau! Ioe! Hurei!
Ao ou alagaina ma le le leoa nei viiga o le faafetai i lou Tama Faalelagi, sa faatumulia lou loto e le Agaga Paia i se olioli lea na toetoe lava a ou tagi ai. Sa taitaiina au i lena aso e se tamaitiiti laitiiti (tagai Isaia 11:6), ma sa ou fiafia ma se vaaiga fou mo faamanuiaga o le Togiola a le Faaola i lou olaga.