O Le Oo i se Liliuga o le Loto

Saunia e Elder Edward Dube

O Le Fitugafulu

Tatou te maua le olioli i taumafaiga masani o le oo i se liliuga o le loto pe a tatou talia le Togiola a Iesu Keriso i o tatou olaga.

O le ma ulumatua o Rosamele, sa o se pepe fou aulelei i le taimi na asiasi mai ai lou tina mai lona nuu i le ogatotonu o Zimbabwe. I le avea ai o ni matua fou lava, sa ma fiafia ai lava ma lou toalua o Naume i le asiasi mai o lou tina. Sa ma naunau lava e aoao mai ia mea uma e tatau ona ma iloa e uiga i le tausiga o se tamaitiiti.

Ina ua taunuu mai, sa to mai i fafo e lou tina se asoa ie lapotopoto. Sa afifi i totonu o le ie, o lana faamatala mai lea, ia se mea maneta. Sa ia faalala mai le asoa ia Naume e tuu i le ua o Rosamele. O le lagonaina o le faalotolotolua o Naume, sa vave ai ona faapea mai lou tina: “Mai lava i lou laitiiti na tuuina mai ai e lou tina ma lou tinamatua ia te au lenei mea maneta, lea sa puipuia au ma lau fanau uma lava, e aofia ai ma lou toalua. O lenei asoa o le a puipui ai lou afafine mai faamai ma mai soo se ituaiga faalauatau e ono oo ia te ia, ma o le a ia faatoilalo soo se tulaga faigata o le olaga. E tatau ona ia asoaina lenei asoa seia oo ina lima ona tausaga.”

O le taimi lena, sa ou auauna atu o se peresitene o le paranesi, ma sa vave lava ona ou mafaufau, “O a manatu o tagata o le paranesi pe a latou vaai i lenei asoa ‘faamaneta’ i le ua o le ma pepe?” Ona ou mafaufau lea, “Atonu e mafai ona ma ufiufia ina ia tau le iloa mai ai.” Sa ou tilotilo atu ia Naume; o ona foliga faaalia sa tau mai ai ia te au, e le tatau ona ma talia lenei meaalofa. Sa ou fesili atu i lou tina pe mafai ona ia faalaitiitia ma faamanifi le asoa, ina ia tau le iloa ai. Sa ia tali mai sa le mafai, ma e sili atu ona aoga le mea maneta i le faiga lea sa ia saunia ai.

Sa toe tilotilo mai Naume ia te au ma ni foliga ia sa tau manino mai ai lona le ioe i ai. Sa ou faliu atu i lou tina ma faamalamalama atu i ai, i le avea ai ma se peresitene o le paranesi i le matou aulotu, o le a ou le maua ni lagona lelei i le tuu o le asoa i le ma tama. Sa tali mai lou tina ma se lapataiga: sa fai mai o ia, a leai le asoa o le a oti le ma pepe.

O Se Taimi Faigata o le Le Toa

O ni nai vaiaso talu ona mavae lenei mea na tupu, sa mai tigaina ai si ma tama laitiiti o Rosamele. Sa leai se ma tupe e ave ai o ia e vaai le fomai. Sa tupu i le po, ma i lena taimi sa amata ai ona ou mafaufau i le mea na fai mai ai lou tina i lana lapataiga. Sa amata ona ou mafaufau maimau pe ana ou talia le asoa. Semanu ou te aumaia ma tuu i le ua o Rosamele. I lena taimi o le le toa, sa ou faalogoina ai se leo malu itiiti o tauanau mai au e faaali lou faatuatua i le Alii o Iesu Keriso. Sa vave ona fai ou ofu lelei o le aso Sa. Sa ou siiina mai le ma pepe ma tuuina i ai se faamanuiaga faaleperisitua. Sa ou lagona le toafilemu ma le toa lelei, ma sa ou iloaina sa faapena foi lagona o lou toalua. Na toetoe o le taimi lava lena, na momoe filemu ai Naume ma pepe Rosamele. Sa faamaloloina le ma tama teine o Rosamele. I aso na sosoo ai, sa faasolosolo malie ona toe manuia ma toe maua atoa lona malosi. Oka se vavega na ma molimauina! Sa aapa mai le Alii i Lona alofa mutimutivale ia te au ma faamalosia lou faatuatua ia te Ia.

Sa ou faafetai ae sa ou matamuli laitiiti foi. O au lenei, o se faifeautalai ua uma se misiona ma o loo auauna atu o se peresitene o le paranesi, ae sa sili atu ona ou popole i tala o le a fai e tagata nai lo o le talitonu i le Atua (tagai Mosaea 4:9). Ioe, e oo lava i lou tina, o le ou te alofa ma faamemelo tele i ai, e le mafai ona malamalama i mea uma. Sa ou manaomia ona avea ma se tagata e sili atu nai lo na o se faifeautalai ua uma se misiona; se tagata e sili atu nai lo o se peresitene o le paranesi; sa manaomia ona ou liua: ia oo i le mea na oo i ai Alema.

O Se Taimi o le Liliuga Tele

Atonu foi na iloilo totoa e Alema, le faitaulaga a le Tupu amioleaga o Noa, o ia lava ina ua fesili atu le perofeta o Apinati i le fesili sailiili lenei: “Tou te lei faaaogaina o outou loto tou te malamalama ai; o lea, sa outou lē popoto. O lea, o ni a ua outou aoao atu i lenei nuu?” (Mosaea 12:27). E pei foi o Alema, sa ou manaomia se “liuga tele na oo mai i [lou] loto” (Alema 5:12).

I le avea ai ma se faitaulaga i le maota o le Tupu o Noa, sa masani ai Alema i se olaga o faamanuiaga. Sa ia maua se tupe e ola ai e ala i lafoga a le nuu. Sa ia fiafia i se tulaga o le pule ma le lauiloa. Sa avea o ia ma se tasi o i latou o e sa “faafefeteina i le faamaualuluga o o latou loto” (Mosaea 11:5). Ae ina ua iloa e Alema e uiga i le afio mai o le Faaola i le lalolagi—e uiga i Ana aoaoga, puapuaga, maliu, ma le Toetu ma o Iesu Keriso o “o le malamalama ma le ola o le lalolagi; ioe, o se malamalama e lē gata, e lē mafai lava ona faapouliuligia; ioe, ma se ola foi e lē gata, e lē mafai ona toe i ai se oti” (Mosaea 16:9)—sa saunia loa o ia e liliu. Sa sauni lava foi o ia e maliu pe a manaomia ai.

O le siomia ai i le tetee ma mea matautia e lamatia ai le ola, sa augani atu ma le lototele Alema i le Tupu o Noa ia tuu Apinati e alu ma le filemu. O faatinoga a Alema sa sau mai lona loto; sa ia lagona le alofa o le Faaola sa faasafua atu ia te ia e ala i le perofeta a le Alii o Apinati.

Ina ua ofoina mai e lou tina se asoa o le puipuiga e tuu i le ua o lau pepe, sa faavae ou atugaluga i le vaaiga a tagata. Sa ou popole po o a ni manatu o le a i ai o tagata o le matou paranesi ia te au. O le mea moni, ou te lei oo atoatoa i lena “liuga tele o le loto.” Mai lava i lena taimi ua ou iloa ai, o lo tatou manuia ma le fiafia e faavae i le, po o le a le atoatoa ua tatou naunau e molioo ai le talalelei i totonu o o tatou loto. Ina ia mafai ona tatou maua le fiafia, olioli, ma le filemu, “e tatau ona gotouga ifo i totonu o o [tatou] loto le talalelei a Iesu Keriso … e ala i le mana o le Agaga Paia.”¹

O Se Avanoa e Molimau Atu Ai

Faatasi ai ma lenei ituaiga o suiga, o le tepa ae i le Faaola i mea uma ma i nofoaga uma, e mafai ai ona tatou aapa atu i isi. Sa oo ina avea Alema ma se faifeautalai malosi, sa aapa atu i le toatele [o tagata] ma faatulaga le Ekalesia a Keriso i lona nuu o e sa sosola mai le Tupu o Noa.

Ua outou tagai i le ala na ou misia ai se avanoa e faasoa atu ai le talalelei i lou tina i le taimi sa ia ofo mai ai ia i maua lena mea maneta, lea sa ia talitonu sa puipuia ai i taimi uma o ia ma lana fanau? Semanu na mafai ona avea au ma se meafaigaluega i aao o le Alii—e pei lava o Alema—o le sa talaiina atu le talalelei a Iesu Keriso ma “liua o latou loto; ioe, sa ia fafagu i latou mai se moe gase, ma sa latou ala mai i le Atua” (Alema 5:7).

Ao ou tomanatu i lena mea na tupu i lou tina, faamata o le a se mea semanu e tupu pe ana ou tali atu e pei o Alema. Atonu e fagua ai lou tina i le Atua, ma o lona liuga e mafai ona i ai se aafiaga lelei i nai ou tei. O lenei liuga e semanu e i ai se aafiaga tele i olaga o fanau a nai ou tei ma faasolo atu ai i a latou fanau.

O le liuga tele o Alema sa le gata ina lagona e i latou o e sa ia aoaoina, ma i latou o e sa ia molimau atu i ai, ae na faapena foi i lana fanau ma i latou e tupuga mai ia i latou. O lona atalii o Alema, ina ua talai atu i tagata i totonu ma faataamilo i le nuu o Saraemila, sa ia faamanatu atu ia i latou le molimau a lona tama i le Faaola o Iesu Keriso:

“Faauta, e mafai ona ou tau atu ia te outou—pe sa lei talitonu ea loʼu tamā o Alema i upu ia na tuuina mai i le fofoga o Apinati? …

“Ma e tusa ma lona faatuatua, sa i ai se liuga tele na oo mai i lona loto” (Alema 5:11–12).

Mo se tagata talavou e pei o Alema, o lenei liuga tele o le loto, lea na amataina e ala i le valaaulia a Apinati ina ia faaaoga le loto o se tagata ia malamalama ai i le afioga a le Atua, o le ki lea i lona fiafia ma le manuia i le aapa atu i isi: “Ma faauta, sa ia talai atu le afioga i o outou tamā, ma sa oo mai foi se liuga tele i o latou loto, ma sa latou faamaualalaloina i latou lava ma tuu atu lo latou faalagolago i le Atua moni ma soifua. Ma faauta, sa latou faamaoni seia oo i le iuga; o lea na faaolaina ai i latou.” (Alema 5:13).

Fai se Liuga Faifaipea

O nisi o tagata talavou i aso nei ua maua i le va o le filifiliga o le mea e sao i le silafaga a le Atua po o le faamalieina o o latou matua po o tagata o loo vaaia i latou, o e atonu e le tutusa o latou lagona o loo i ai e uiga i le moni o le talalelei. Pe a feagai ma se filifiliga faapena, “Pe e fesoasoani lenei faaiuga ia ou lagona ai o au ‘galuega o galuega ia o le amiotonu’ (Alema 5:16), ma pe o ou lagonaina ai pea ‘le fia pepese i le pese o le alofa togiola?” (Alema 5:26).

E ui e tatau ia i tatou uma ona alolofa ma faamemelo i o tatou matua, e tatau ona tatou iloa o filifiliga tatou te faia, o le a i ai se aafiaga tonu i luga o a tatou fanau ma i latou e tupuga mai ia i tatou. I nisi o i tatou, atonu e alagatatau le o ese mai o tatou siosiomaga ua masani ai, e pei ona sa faia e Alema, o le na sola ese mai auauna a le Tupu o Noa, ma aoao atu le talalelei i ni tulaga sili ona faigata. Sa ia aumaia le liliuga e le gata i lona aiga ae faapea foi i isi. Ina ia oo i se liliuga o le loto, e taua ona tatou mafaufau i isi ma “aufaatasi i le anapogi ma le tatalo malosi mo le manuia o agaga o i latou o e sa latou lē [iloa] le Atua” (Alema 6:6).

Ae faapefea pe ana le manuia Rosamele mai lona mai—e tusa lava pe na uma ona ou tuuina atu se faamanuiaga faaleperisitua ia te ia? O le apoapoaiga a le Alii o se malosiaga tele lea ia te au: “O lē maua lona ola, e maumau ai ia te ia: a o le faamaumau i lona ola ona o au, e maua e ia” (Mataio 10:39).

Tatou te maua le olioli i taumafaiga fai soo o le oo i se liuga o le loto ao tatou talia le Togiola a Iesu Keriso i o tatou olaga. Ou te faafetai mo lenei malamalama, ma ou te iloa i lou loto o lo tatou Faaola na afio atu, “ma mafatia i tiga ma puapuaga ma faaosoosoga o ituaiga eseese uma; ma o le a oo ia te ia nei mea, ina ia mafai ona faataunuuina o le upu ua fai mai, o le a ia ave i ona luga tiga ma maʼi o ona tagata” (Alema 7:11). Ua ou iloa o loo i ai le saogalemu ma le puipuiga moni i le vaai atu i le Alii ma le mulimuli i Ana fautuaga.