O Mai, Mulimuli Mai Ia te Au: Aoaoina o Mea Faavae i le Aiga
Vaega 2
E alala tusitala i Iuta, ISA.
O le mulimuli ai i faataitaiga a nei tagata o le ekalesia, e mafai foi ona e aumaia ai mataupu faavae mai le mataupu aoaoina a le autalavou i totonu o lou aiga.
E pei ona aoao mai e le aunoa ia perofeta, “O lo tatou manuia, faaletagata lava ia ma o se Ekalesia, o le a matua faalagolago lea i le ala o loo tatou taulai atu ai ma le faamaoni i le ola ai i le talalelei i le aiga.”1
O le ola i le talalelei o le auala sili lea e aoao mai ma aoao atu ai le talalelei. Ao tatou ola i nei aoaoga faavae, o le a tatou aumaia o tatou aiga ma i tatou lava ia latalata atili atu i le Agaga. Faatasi ai ma le fesoasoani a le Agaga, e mafai ai ona sili atu ona tatou aoao atu ma aoao mai nei mataupu faavae. O le a taialaina i tatou i metotia faaleaoaoga e sili ona aoga mo o tatou manaoga ma tulaga ma, faatasi ai ma o tatou aiga, e ola latalata atili ai i le Faaola.
Iulai: Sauniga ma Feagaiga
Luga: ata na tusia e David Stoker
Sauniga o le Perisitua ma feagaiga paia—o folafolaga tatou te faia ma le Tama Faalelagi—e aumaia ai faamanuiaga mamana i o tatou olaga. O se tasi o auala e vaaifaalemafaufau ai i faamoemoega o sauniga o le mafaufau lea i ai o ni maa e faailoa ai le mamao i maila o se auala e toe oo atu ai le afioaga o le Tama Faalelagi—le ola e faavavau. Tatou te tumau i luga o lena auala e ala i le tausia o feagaiga na tatou faia.
Mo se faataitaiga, ua faamatala e se tamaitai talavou le ala ua tumau ai o ia i le auala o le feagaiga: “Sa i ai se taimi na talosaga mai ai se tagata o lau vasega mo se fesoasoani. Ou te lei ano tele i ai, sa na ona tuu atu ia te ia o le fesoasoani sa ia manaomia. Ae mulimuli ane, sa faamanatu mai e le Agaga ia te au, o le fesoasoani atu e tauave ana avega, sa ou tausia ai feagaiga na ou faia i le taimi na ou papatiso ai (tagai Mosaea 18:8–10). Ou te faafetai mo avanoa e tuuina mai e le Tama Faalelagi ia te au i aso uma e filifili ai e savali i le auala o le feagaiga.”
I le avea ai o se aiga, atonu tou te faailoa mai sauniga o loo manaomia lava ona maua e tagata taitoatasi o le aiga, ona iloilo lea po o le a le lelei o lou tausia o feagaiga sa e faia. Mo se faataitaiga, o le a se mea o atagia mai i au tapenapenaga ia maua le sauniga faalevaiaso o le faamanatuga e faatatau i lou tautino i au feagaiga? E mafai e le Agaga Paia ona aoao oe i auala e fai ai mea e faaleleia atili.
Aokuso: Faaipoipoga ma le Aiga
O le faaipoipoga ma le aiga e totonugalemu i lo tatou fiafia ma i le ata o le faaolataga a le Tama Faalelagi. O le aiga o le iunite faavae i le olaga nei ma le faavavau.
O le aoaoina o lau fanau e uiga i le faaipoipoga ma le aiga e mafai ona faigofie e pei o le faasoaina atu o se aafiaga patino. Sa faasoa mai e se talavou matua auala sa ia maua ai se agaga faafetai mo lona faamauga i le malumalu:
“Ou te manatua le nofo toatasi ai i se potu selesitila avanoa o le malumalu. Sa ou popole, sa ou le iloa pe o le a ou faamau i le malumalu i lena aso ona o se feeseeseaiga i le fesootaiga e uiga i pepa faataga na manaomia e lau paaga.
“Sa amata ona ou tatalo faatauanau ina ia faataga i maua e le Alii ona faamauina i Lona malumalu i lena aso. Ao ou faia, na oo mai se manatu ia te au: E ui lava ina na o oe i le potu selesitila, o le malo selesitila e selesitila, aua o le a le na o oe. O le a e i ai faatasi ma lou aiga e faavavau ma lou aiga faalelagi. O le mafuaaga lena e faamauina ai oe.
“O le fasefulu minute ma ni nai telefoni mulimuli ane, na mafai loa ona faamauina i maua ma lou toalua. Sa lofituina au i le agaga faafetai ma le matuu atu o le popole. Sa oo ina anoa atili le sauniga ia te au ona e mafai ona ma atinaeina se olaga selesitila faatasi ma le Atua i le mea o le a le mafai ona tuuatoatasi ai.”
O a ni aafiaga na aoaoina ai oe e uiga i le matafaioi o le faaipoipoga ma le aiga i le fuafuaga a le Tama Faalelagi? E mafai e le Agaga Paia ona fesoasoani e te manatua ma faasoa atu aafiaga talafeagai. E tusa lava po o le a le tulaga o lou aiga, e mafai e le Agaga Paia ona aoao oe i auala e faaaoga ai mataupu faavae o le faaipoipoga ma le aiga i lou olaga.
Setema: Poloaiga
O poloaiga o tulafono ma tulaga e manaomia ua tuuina mai e se Tama Faalelagi alofa e faamanuia ai o tatou olaga.
O se tasi o auala mamana e aoao ai i latou, e ala lea i le suesue o tusitusiga paia e aoao ai e uiga i faamanuiaga e oo mai mai le usiusitai, e pei ona sa faia e le talavou matua lenei:
“A ou suesue i se poloaiga, ou te fiafia e faitau i mau uma e mafai ona ou maua e uiga i ai, ma faia se lisi o faamanuiaga ua folafola mai e le Tama Faalelagi mo lou usiusitai. O le aoao atili i faamanuiaga folafolaina ua faamalosia ai lau molimau e alofa le Tama Faalelagi ia te au ma finagalo e faamanuia mai au.”
Ina ia aoao mai pe aoao atu e uiga i poloaiga, e mafai ona outou faitau ma lau fanau le lesona 4 i le mataupu e 3 o le Talai Lau Talalelei, suesue i mau e faatatau i ai, ma fai a outou lava lisi o faamanuiaga folafolaina. E mafai ona outou faaaogaina lenei faiga e aoao ai i faamanuiaga e faatatau i soo se mataupu faavae o le talalelei.
Oketopa: Avea Atili e Faapei o Keriso
Faamatalaga mai le Tamaitai na Faamaloloina, saunia e J. Kirk Richards
I le galuega a Keriso, sa ia poloaiina ai i tatou, “O lenei, ia atoatoa ona lelei o la outou amio, e pei o lo outou Tamā o i le lagi e atoatoa ona lelei o ia” (Mataio 5:48). Tatou te taumafai atu i le atoatoa pe a tatou galulue i le atinaeina o se tasi o uiga e tele auaumama o Keriso i le taimi ma taumafai e faaleleia lena vaega faatasi ai ma Lana fesoasoani. Sa amataina e se tasi alii talavou i le galue i le maelega.
“Sa ou manao e atinae ni uiga auaumama se tele o Keriso, o lea sa ou suesueina ai au tusitusiga paia ma le Talai Lau Talalelei. I le mataupu e 6 o le Talai Lau Talalelei, sa ou tau ai i se mamanu ua fautuaina mai mo le atinaeina o uiga faaKeriso ma filifili ai loa e faataitai i le uiga o le maelega. Sa ou tusia muamua i lalo lau lava faauigaga o le maelega ma au fesili e uiga i ai. Ona ou sueina lea i mau fautuaina e faatatau i le maelega ma faamaumau ou lagona ma tali sa ou mauaina ao ou faitau. Ina ua uma lena, sa ou faatuina se sini ina ia maelega atili i au meaaoga, ma sa oo ina ou lagona ai le uunaia atili i taimi uma ao ou tatalo i po taitasi mo le maelega.”
Ao e taumafai e atinae ma aoao lau fanau i auala e atinae ai uiga faaKeriso, e mafai ona fesoasoani punaoa o le Ekalesia e te iloa ai le mea e amata ai. E tuuina mai i taimi uma i mau ia faataitaiga a Keriso, ma o punaoa e pei o le Talai Lau Talalelei ua ofo mai ai mamanu e fesoasoani tatou te faatuina ai ni faiga masani o le suesue ma faatutu ni sini. Pe a faaaoga faatasi, e fesoasoani tusitusiga paia ma isi punaoa tatou te faaaoga ai mea tatou te aoaoina ina ia mafai ona tatou avea atili e faapei o Keriso.
Novema: Ola Tutoatasi Faaleagaga ma le Faaletino
O le atinaeina o le ola tutoatasi o lona uiga, o le faaaogaina o lo tatou faitalia e tausia ai i tatou lava ma o tatou aiga, ma le faia o le mea sili tatou te mafaia e sue ai fofo i a tatou lava faafitauli. O le faateleina o le ola tutoatasi e tuuina mai ai ia i tatou le gafatia faateleina e auauna ai i o tatou aiga, le Ekalesia ma o tatou alalafaga. O se tasi o auala sili ona lelei e aoao ai nei mataupu e ala lea i faataitaiga, e pei ona faamatala mai e le tagata lenei o le ekalesia:
“Mo se umi e mafai ona ou manatua ai, e alapo ai lou tina i aso taitasi e suesue tusitusiga paia. Ua ou vaai i le ala ua ia atinaeina ai le malosi faaleagaga lea na fesoasoani ia te ia i taimi faigata. E faalagolago o ia i lana lava mafutaga ma le Tama Faalelagi e fai ma ona fesoasoani. Faatasi ai ma lona malosiaga faaleagaga, ou te maofa lava i lona mafai ona tausia lo matou aiga. Sa ou vaai o ia paketi, ositaulaga mea sa ia manaomia, saili i aoaoga, ma faaalia le tele o le lotomaualalo i auala na faapea ona mafai ai ona ia taulimaina manaoga tautupe a le matou aiga ma i ai pea i le fale mo lana fanau i le tuua o le aoga. Ou te manao i le ituaiga malosi lea o loo ia te ia, ma ou te matuai faafetai mo lana faataitaiga ua aoao ai au i le ala e maua ai.”
E mafai faapefea ona avea oe ma se faataitaiga lelei atu o le ola faasoasoa lelei i lau fanau? Afai e le tele ni mea ua e iloa e uiga i vaega faapitoa o le ola tutoatasi, e mafai ona e valaaulia lau fanau e aoao faatasi ma oe, o lena mea o le a avea ma se faataitaiga sili lava.
Tesema: Fausiaina o le Malo o le Atua i Aso e Gata Ai
“E iloa e ai po ua fai oe ma masiofo ona o se aso faapenei?” (Eseta 4:14). O le ituaiga fesili lenei e mafai ona e fesili ai ia te oe lava ma lau fanau ao outou iloa o a outou matafaioi i le fausia o le malo o le Atua.
Sa iloa e lenei tagata o le ekalesia ona faalagolago i le Alii e fesoasoani ia te ia i le fausia o le malo: “Ou te manatua le aoaoina o au e ou matua mai lava o ou laitiiti, tatou te talia i taimi uma o tatou valaauga ona e tuuina mai e le Alii. Ao ou i ai i le kolisi, sa tuuina mai ai ia te au le valaauga o le peresitene o le Aualofa. Sa lofituina au, ae sa lei oo mai lava i lou mafaufau e faapea e fai atu leai. O lea sa amata ai le tausaga i le silia ma le 100 tamaitai e vaai, itiiti se potomasani, ma le faatuatua o le a faaatoa e le Alii mea e le o atoa. O se tausaga mulimuli ane sa faamaloloina ai au. A ou toe tepa i taimi o faaaliga, i taimi na ou iloa lelei ai lava po o le a le lesona e fai po o manatu e faasoa atu, po o taimi e tele e fai mai ai e se tasi se meaai mo au ona sa ou pisi tele e fai se kuka, po o le faaputuga o faamatalaga faamalosiau sa ou mauaina, sa ou iloa ma se mautinoa, sa faalauteleina e le Alii au taumafaiga i le fausiaina o le malo.”
Ao outou mafaufau ma lau fanau i auala e fausia ai le malo o le Atua, manatua e ofo atu ia i latou le faamalosiauga ma avanoa e auauna atu ai. Atonu e te mafaufau e talanoa i auala e auauna atu ai i isi i valaauga o loo ia te oe. O a isi auala e mafai ona e fesoasoani ai e faaagai i luma le galuega? E le afaina po o fea e te auauna ai, e taua au taumafaiga. E pei ona saunoa Peresitene Dieter F. Uchtdorf, Fesoasoani Lua i le Au Peresitene Sili, “Tutu faaputuputu faatasi ma faamaualuga le mea [e te] tu ai.”2