Siamupini mo le Sapati
O le tusitala e alala i Uosigitone, ISA.
Sa leai ma sau sou manatu o a tatou filifiliga e tausia le paia o le aso Sapati o le a aafia ai le toatele o tagata.
Ata mai faaaloaloga a le au lakapi a Tamaitai o le (BYU) ma Paul Meyers
Ina ua fai mai le faiaoga a le matou au lakapi o le matou taaloga o le pau ma nofo i le taamilosaga o le suega siamupini a le atunuu na faatulagaina mo se aso Sa, na pau lava le mea sa ou mafaufau i ai o le, “Aisea lava ua tuu ai i le taimi nei?”
O lau au, o le au lakapi a tamaitai i le 2010 a le Iunivesite a Polika Iaga, sa saunia i le vaitau atoa mo le suega siamupini. Sa matou tulimatai atu e taaalo ma le au sa matou faiaina ai i le taamilosaga o le tausaga na mavae atu. Sa ou mautinoa lava e mafai ona matou manumalo—sa i ai i le matou au nisi o tagata taaalo sili ona lelei a le atunuu. Sa matou mananao e faamaonia atu i matou lava i le lalolagi o lakapi e ala i le manumalo i se suega siamupini a le atunuu, ae na iu ane, sa ese le ala sa i ai a le Tama Faalelagi mo i matou.
Tumau Pea i a Matou Tulaga Faatonuina
Sa faamautinoa mai e taitai o le taamilosaga o le a faatulaga a matou taaloga i le aso Faraile ma le aso Toonai, ae ona o se faaletonu, o lea na seti ai taaloga mo le aso Toonai ma le aso Sa. Na faatoa matou iloaina le faaletonu ae toe lima lava aso amata le taamilosaga, lea na faia i Sanford, Florida, ISA. Talu ai ona o le lakapi a tamaitai sa lei avea ma se au aloaia a le IPI i lena vaitaimi, o lea, o le faaiuga pe matou te taaalo pe leai, sa tatau ona fai lava e i matou. Sa matou filifili e le taaalo. Sa o se faaiuga na autasi i ai, ma sa leai se tasi na faasea.
O le taalo i le aso Sa, sa le o se mea foi e filifili ai. Ia te au lava, sa lei faapena lava. Sa aoao au e ou matua ia tausi le paia o le aso Sapati, ma sa ou faamamaluina lena poloaiga i lou olaga atoa. O le tausia o poloaiga a le Tama Faalelagi sa sili atu ona taua nai lo o se taaloga lakapi.
Ae peitai, o le iloaina sa matou faia le mea sao sa lei faigofie ai lava. Sa matou lotovaivai ao matou felelei atu i Florida ma le iloa, pe matou te manumalo pe faiaina, o le aso Toonai o le matou taaloga mulimuli lea.
Ina ua matou taunuu i Florida, sa matou maua se valaau mai se tagata faasalalau a le New York Times o le sa manao e faasalalau le matou tala. Sa matou taufai ofo. Matou te lei faamoemoe lava e i ai se tasi e fia manatulia la matou faaiuga e faamamalu le Sapati, ae maise lava o se nusipepa a le atunuu.
I le Aso Faraile, i le taimi matou te taaalo ai pe ana faapea e lei tupu le faaletonu i le faatulagaga o taaloga, sa matou o atu ai i le Malumalu o Orlando Florida ma fai papatisoga mo e ua maliliu. Ina ua uma ona matou faia ia sauniga, sa talanoa mai le peresitene o le malumalu ia i matou. Sa ia aumai i fafo se tusiga sa tusia e uiga ia i matou ma faitau mai nisi o manatu faaalia sa tuu i luga o le initoneti e le au faitau e lagolago ai la matou faaiuga.
Sa faitau mai mulimuli ane e le matou faiaoga nisi o manatu faaalia sa ia mauaina. Sa faafetai mai le Au Paia o Aso e Gata Ai ma isi ia i matou mo la matou faataitaiga, ma fai mai sa o se mea manaia le vaaia o tagata o tumau pea i o latou tulaga faatonuina. O a latou upu sa siitia ai o matou agaga. O le taimi lena sa amata ai ona matou iloa le aafiaga e mafai ona tatou faia e tusa lava pe le avea ma ni siamupini i le atunuu.
Sa ou iloa sa silafia e le Tama Faalelagi i matou, ae ou te lei manatu sa i ai se isi tagata na matamata mai. O le tali i la matou faaiuga, na tuuina mai ai ia i matou se faamoemoega fou mo le i ai i Florida: matou te lei i ai i o ina ia manumalo, ae ia tulai atu mo a matou tulaga faatonuina.
O Se Auala Sili Atu
Na oo mai le aso Toonai, ma sa manumalo la matou taaloga e 46 i le 7. Ina ua uma, sa matou savavali atu i taitai ma tau atu i ai ua faaleaogaina le taaloga sa faatulagaina matou te taaalo ai i le aso Sa—lea sa tuu matou te fetaui ai ma le au sa matou faiaina ai i le tausaga ua mavae. Sa ou le fiafia ona ua faaiuina faapenei la matou taamilosaga. Maimau pe ana matou taaalo ma le au lenei, ae ou te le momoo e taaalo ma i latou, po o se isi lava au, i le Sapati.
E tele ni tusiga sa tusia e uiga ia i matou, ma sa faaauau pea ona matou maua ni tusi ma ni imeli e lagolago mai. O le tulai atu mo o matou tulaga faatonuina, sa tele atu ai tagata na matou aapa atu i ai nai lo le mea e ono i ai pe ana faapea matou te manumalo i le siamupini.
Ua ou aoaoina e faatuatua i le Tama Faalelagi e taitai au i se auala e sili atu nai lo o le ala o loo ou mafaufau i ai mo au lava. Sa mananao le matou au e faamaonia i matou lava e ala i le avea o ni siamupini, ae o lenei ua ou iloa sa finagalo le Tama Faalelagi matou te tau atu se mea e matuai ese mamao lava. Sa ia taitai atu i matou i le avanoa e avea ai ma faataitaiga i le taimi sa matou manatu ai, na leai se isi na matamata mai, ma sa mafai ona Ia faaaoga i matou mo le lelei ona sa matou filifili e usitai.