O Filifiliga
Saunia e Peresitene Thomas S. Monson
Ia tatou matua filifili i le mea faigata e sa’o, nai lo le mea faigofie e sese.
Uso e ma tuafafine, a o lei amata atu la’u savali aloaia i le asō, ou te fia faasilasila atu ia malumalu fou e fa, ia o le a fausiaina i masina ma tausaga o lumanai i nofoaga nei: Quito, Ecuador; Harare, Zimbabwe; Belém, Pasila; ma se malumalu lona lua i Lima, Peru.
Ina ua avea a’u ma uso o le Korama a Aposetolo e Toasefululua i le 1963, sa na o le 12 malumalu sa faaaogaina i le Ekalesia atoa. Faatasi ai ma le faapaiaga o le Malumalu i le Aai o Provo i le lua vaiaso talu ai, ua atoa ai nei le 150 malumalu o loo faaaogaina i le lalolagi atoa. Ua tatou matua faafetai tele mo faamanuiaga ua tatou maua ai nei maota paia.
Ia uso e ma tuafafine, ou te fia faailoa atu lo’u agaga faafetai mo le avanoa e faasoa atu ai ni nai mafaufauga ia te outou i lenei taeao.
Ua ou mafaufau lava e uiga i filifiliga. E i ai se tala faapea o nai mea iti e tutupu e i ai so latou aafiaga tele i le talafaasolopito, ma e faapena foi i olaga o tagata. O filifiliga tatou te faia e fuafua ai lo tatou taunuuga.
Ina ua tatou tuua lo tatou muai olaga ma ulufale mai i lenei olaga faaletino, sa tatou aumaia faatasi ma i tatou le meaalofa o le faitalia. O la tatou sini o le mauaina lea o le mamalu selesitila, ma o filifiliga tatou te faia, e tele lava ina fuafua ai pe tatou te ausiaina la tatou sini pe leai.
O le toatele o outou ua masani ia Alice i le tala a Lewis Carroll o le Alice’s Adventures in Wonderland. Tou te manatuaina lona tau ai i se fetaulaigaala e i ai ni auala se lua i ona luma, e tofu ma se sa’oga umi i luma ae eseese itu e agai i ai. A o ia mafaufau po o fea le itu e liliu i ai, sa fetaui ai ma le Pusi o Cheshire, lea na fesili i ai Alice, “O fea le auala e ao ona ou alu ai?”
Sa tali mai le pusi, “E faalagolago lena i le mea e te fia alu i ai. Afai e te le iloa le mea e te alu i ai, e le afaina la po o fea le itu e te alu ai.”
E le pei la o Alice, o tatou ua tatou iloa uma le mea tatou te fia o i ai, ma e afaina le itu tatou te o i ai, aua o le auala tatou te mulimuli ai i lenei olaga e tau atu i lo tatou taunuuga i le olaga a sau.
Tau ina ia tatou filifili e atiae i totonu o i tatou lava se faatuatua maoae ma le mamana lea o le a avea ma o tatou puipuiga sili ona mataalia e faasaga i faamoemoega o le fili—o se faatuatua moni, le ituaiga o faatuatua o le a lagolagoina i tatou ma o le a faamalosia lo tatou manao e filifili le mea sa’o. A aunoa ma lea faatuatua, e leiloa la po o fea tatou te o i ai. Ae a i ai [lea faatuatua], e mafai ona tatou ausiaina a tatou sini.
E ui e matua taua lo tatou filifili ma le atamai, ae e i ai taimi o le a tatou faia ai ni filifiliga faavalevalea. O le meaalofa o le salamo, ua saunia e lo tatou Faaola, ua tatou mafai ai ona faasa’o o tatou olaga, ina ia mafai ona tatou toefoi atu i le ala lea o le a taitai atu ai i tatou i lena mamalu selesitila o loo tatou sailia.
Ia tatou faatumauina le lototele e aloese ai mai manatu lautele. Ia tatou matua filifili i le mea faigata e sa’o, nai lo le mea faigofie e sese.
A o tatou mafaufau i faaiuga tatou te faia i o tatou olaga i aso taitasi—pe faia ea lenei filifiliga po o lena filifiliga—afai tatou te filifilia Keriso, o le a tatou faia le filifiliga sa’o.
Tau ia ina ia faapea lava ona tatou faia o la’u tatalo faamaoni lea ma le faamaulalo i le suafa o Iesu Keriso, lo tatou Alii ma le Faaola, amene.