Faalagolago i le Agaga Lena Lea na te Taitai ia Fai le Mea Lelei
Saunia e Peresitene Henry B. Eyring
Fesoasoani Muamua i le Au Peresitene Sili
Tatou te tuputupu ae atili i le Faaola pe a tatou auauna atu i isi mo Ia i le alofa mama.
Ou te faafetai lava i le faatasi ai ma outou i lenei afiafi o tapuaiga, manatunatuga, ma le tuuto. Na tatou tatalo faatasi. Ua fafofogaina e lo tatou Tama Faalelagi alofa i tatou. Ua tatou manatuaina lo tatou Faaola, le Alii o Iesu Keriso, e pei ona ootia ai i tatou i pese o viiga ia te Ia. Ua musuiaina i tatou ia faia nisi mea e fesoasoani ai i lo tatou Matai i Lana galuega ia siitia i luga ma fesoasoani i fanau a lo tatou Tama Faalelagi.
O lo tatou manao ia auauna atu i isi ua falauteleina e lo tatou lotofaafetai mo mea ua faia e le Faaola mo i tatou. O le mea lena e maena ai o tatou loto pe a tatou faalogo i upu nei ua usuina: “Ona ua ou maua tele, e tatau foi ona ou foai atu.”1 Na folafola mai e le Tupu o Peniamina i lana lauga maoae o loo tusia i le Tusi a Mamona, o le a oo mai lena lagona o le lotofaafetai (tagai Mosaea 2:17–19).
Pe a taitai atu e lo tatou faatuatua ia Iesu Keriso i tatou ia agavaa mo le olioli o Lana faamagaloga, tatou te lagonaina se manao ia auauna atu i isi mo Ia. Sa aoao mai e le Tupu o Peniamina e faapea o le faamagaloga e le ausiaina i se taimi se tasi.
Ma sa ia saunoa ai faapenei, “Ma o lenei, ona o nei mea ua ou tautala atu ai ia te outou—o lona uiga, mo le [faatumauina] pea o le faamagaloina o a outou agasala mai lea aso i lea aso, ina ia outou savavali ma le le sala i luma o le Atua—ou te manao ia outou faasoa atu a outou mea i e matitiva, ia taitasi le tagata ma faia e tusa ma mea ua ia te ia, e pei o le fafagaina o e ua fia aai, faaofuina o e ua le lavalava, asiasi atu i e mamai ma auauna atu mo lo latou mapusaga, faaleagaga ma faaletino, e tusa ma o latou manaoga” (Mosaea 4:26).
Sa aoao mai foi e le soa maoae a Alema, o Amoleka le upumoni e tatau ona tatou faaauau pea i la tatou auaunaga ia te Ia i le faatumauina o le faamagaloga: “Ma o lenei faauta, ou uso pele e, ou te fai atu ia te outou, aua tou te manatu ona pau lea; aua a uma ona outou faia o nei mea uma, afai tou te liliu ese ē ua le tagolima, ma ē ua lē lavalavā, a le asiasi atu i ē ua mama’i ma puapuagatia, ma lē faasoa atu a outou mea, pe afai ua i ai ia te outou ni mea e faasoa atu ia i latou o ē ua tutu lē tagolima—ou te fai atu ia te outou, afai tou te le faia se tasi o ia mea, faauta, ua le aoga lau tatalo, ma ua leai se mea e te maua mai ai, ma ua tusa outou o ni tagata pepelo o ē ua faafitia le faatuatuaga” (Alema 34:28).
Ua ou mafaufau i le po nei i tamaitai i lo’u olaga. E 31 tamaitai ma teineiti i lo matou aiga, e amata i lo’u toalua ma agai i luma e aofia ai afafine toatolu sili ona fou a le ma fanau a fanau a fanau. O nisi o loo faatasi mai iinei ma i tatou i lenei afiafi. E toalima e i lalo ifo ma le 12 tausaga. E pei lava o le latou uluai sauniga lenei i le Nofoaga Autu mo Konafesi faatasi ma o latou uso i le Ekalesia a le Faaola. O le a tofu i latou ma ni manatuaga eseese mai lenei sauniga ma faia a latou lava tautinoga mai lenei aafiaga i lenei po.
E tolu ni manatuaga ma ni tautinoga se tolu ou te tatalo o le a tumau ia i latou i le aluga o le olaga ma tala atu. O manatuaga o ni lagona. Ao tautinoga o ni mea e fai.
O le lagona e aupito silisili ona taua, o le alofa. Ua outou lagonaina le alofa o taitai maoae o tamaitai ua saunoa atu. Ma ua outou lagonaina le Agaga e alolofa i latou ia te outou e aunoa ma le iloaina o outou ona na latou lagonaina le alofa o le Tama Faalelagi ma le Faaola mo outou. O le mafuaaga lena latou te matua mananao ai e auauna atu ia te outou ma ia outou mauaina faamanuiaga e finagalo ai le Atua mo outou.
Ua outou lagonaina le alofa mo isi i le po nei—mo uo, uo i le a’oga, tuaoi, ma e oo lava foi i se tagata faato’a oulua fetaui, se tagata ese. O lena lagona o le alofa o se meaalofa mai le Atua. O loo ta’ua e tusitusiga paia, o le “alofa mama” ma “le alofa le pona o Keriso” (Moronae 7:47). Ua outou lagonaina lena alofa i le po nei, ma e mafai foi ona outou mauaina soo pe a outou saili atu i ai.
O se lagona lona lua ua outou mauaina i le po nei o le faatosinaga a le Agaga Paia. Ua folafola atu e tuafafine ia te outou i lenei aso o le a taialaina outou e le Agaga Paia ia maua le auaunaga lea e finagalo le Alii ia outou tuu atu i isi mo Ia. Ua outou lagonaina e ala i le Agaga o la latou folafolaga sa sau mai le Alii ma e moni lena mea.
Na fetalai mai le Alii: “Ma o lenei, e moni, e moni, Ou te fai atu ia te oe, ia tuu atu lou faalagolago i le Agaga lena lea na te taitai ia fai mea lelei—ioe, ia fai mea sao, ia savali ma le lotomaualalo, ia faamasino ma le amiotonu; ma o lo’u Agaga lea” (MF&F 11:12).
Atonu ua outou mauaina lena faamanuiaga i le po nei. Mo se faataitaiga, o se igoa po o se foliga o se tagata o loo mafatia ua oo atu i lou mafaufau i le taimi o lenei sauniga. Atonu a na o se mafaufauga faananati, ae ona o mea ua outou faafofoga i ai le po nei, o le a outou tatalo ai, faalagolago o le a taitai outou e le Atua e faia mea lelei ua Ia finagalo ai mo outou. A oo ina avea nei tatalo ma se mamanu i lou olaga, o le a suia oe ma isi mo le lelei atili.
O le lagona lona tolu ua outou maua i lenei po o lo outou mananao lea ia latalata atili atu i le Faaola. E oo lava i le teineitiiti aupito i laitiiti lava iinei ua lagonaina le moni o le valaaulia i le pese: “Mulimuli mai ia te a’u, le fetalaiga a Iesu. Na o lea tatou te tasi ai.”2
O lea, faatasi ma na lagona, o le mea muamua lava e tatau ona outou tautino atu e fai o le ō atu lea ma auauna atu ma le iloaina tou te le o ō na o outou. Pe a outou o atu e faamafanafana ma auauna atu i soo se tasi mo le Faaola, Na te saunia le ala i o outou luma. Ia, e pei lava ona tau atu e faifeautalai ua foi mai le misiona ia te outou i le po nei, e le faapea la o tagata uma lava i tua atu o faitotoa ua saunia e faafeiloai outou pe o tagata uma foi tou te taumafai e auauna i ai o le a faafetai atu. Ae o le a muamua atu le Alii i o outou luma e saunia le ala.
Ua faafia ona saunoa Peresitene Thomas S. Monson na te silafiaina le moni o le folafolaga a le Alii: “Ma ai se na te talia outou, o iina o le a Ou i ai foi, ona o le a Ou alu muamua atu i o outou luma. O le a Ou i ai i lo outou lima taumatau ma lo outou agavale, ma o le a i ai lo’u Agaga i o outou loto, ma si’o faataamilo outou e a’u agelu, e sapasapai outou i luga” (MF&F 84:88).
O se tasi o auala e afio atu ai muamua o Ia i o outou luma o le saunia lea o le loto o se tagata ua Ia faatonuina oe e te auauna atu i ai. O le a ia saunia foi lou loto.
O le a e iloaina foi e tuu e le Alii nisi e fesoasoani atu i ou autafa, i lou taumatau, lou agavale, ma siomia atoa ai oe. E te lē alu na o oe e auauna atu i isi mo Ia.
Sa Ia faia lena mea mo au i le po nei. Sa saunia e le Alii le “tele o molimau” (Eperu 12:1), i upu uma ma musika, ia tuufaatasia ma faateleina ai le mana o mea na Ia finagalo ia ou ta’u atu. Ia tau lava o lo’u mautinoa e mafai ona ou faaofi atu la’u vaega i mea ua Ia finagalo i ai. Ou te faamoemoe ma tatalo o le a outou lagonaina le lotofaafetai ma le olioli a o tuufaatasia ai e le Alii outou ma isi e auauna atu mo Ia.
A o e mauaina soo lena aafiaga, ma o le a e mauaina lava, o le a e ataata ma le iloaina, e pei foi ona ou iloaina, i soo se taimi lava tatou te usuina ai le viiga “Le Atua Malie Lau Galuega.”3
O le a e ataata foi pe a e manatuaina lenei fuaiupu: “Ona tali atu ai lea o le Tupu, e faapea atu ia te i latou, E moni, ou te fai atu ia te outou, aua na faia e outou i le tasi o e aupito itiiti o o’u uso nei, o a’u lea na outou faia i ai” (Mataio 25:40).
O le mea lona lua e tatau ona e faia o le manatuaina lea o le Alii a o e alu ma auauna atu mo Ia. E le gata e muamua atu le Alii i o tatou luma ma auina mai agelu e auauna faatasi ma i tatou, ae Na te lagonaina foi le mafanafana tatou te avatu i isi e peiseai ua tatou tuuina atu ia te Ia.
O afafine uma o le Atua e faalogo ma talitonu i savali o lenei sauniga o le a fesili, “O le a se mea e finagalo le Alii ou te faia e fesoasoani ai ia te Ia e tuu atu le fesoasoaniga ia i latou o loo mafatia?” E tulaga ese lava tulaga o tuafafine taitasi. E moni lena mea mo la’u vaega toalaiti o afafine, afafine faaletulafono, afafine a fanau, ma afafine a fanau a fanau. Ia i latou, ma afafine uma o le Tama Faalelagi, ou te toe ta’u atu le fautuaga atamai a Sister Linda K. Burton.
Ua ia talosagaina outou ia tatalo i le faatuatua ia iloa mea e finagalo le Alii tou te faia i o outou tulaga. Ona ia saunoa atu lea ia te outou o se folafolaga o le mafanafana matagofie lea na tuu atu e le Alii lava Ia i le tamaitai sa faitioina mo le uuina o Lona ao i le suauu taugata ae sa ono mafai ona faatau atu e fesoasoani ai i e matitiva.
“A ua fetalai atu Iesu, Tuu pea ia ia te ia; se a le mea tou te faalavelave ai ia te ia? O le mea lelei ua faia e ia ia te au nei.
“Auā tou te nonofo pea ma ē matitiva, o aso uma foi tou te loto i ai ua outou mafaia ona agalelei atu ia te i latou, a o a’u nei tatou te le nonofo pea ma outou.
“Ua faia e ia le mea ua ia mafai ai; ua na uuina lo’u tino e fai ma faata’imuaga o lo’u tanuga.
“E moni, ou te fai atu ia te outou, o nuu uma lava i le lalolagi e tala’iina ai lenei tala lelei, e ta’ua ai foi lenei mea ua faia e ia, e faamanatu a’i ia te ia” (Mareko 14:6–9).
O lena mau puupuu o se fautuaga matagofie ma atamai mo tuafafine faamaoni i le malo o le Alii i taimi lē matāofiofia. O le a outou tatalo ia iloa po o ai ua finagalo le Tama tou te auauna i ai i le alofa mo Ia ma mo lo tatou Faaola. Ma o le a outou le faamoemoeina e faailoa atu i tagata lautele, ma mulimuli i le faataitaiga a le tamaitai i le tala faatusi paia i le Mareko, o ana galuega paia e faamamaluina ai le Faaola o le lalolagi e manatuaina ae le o lona igoa.
O lo’u faamoemoe, o le a faia e tuafafine i lo matou aiga le mea sili latou te mafai ona o le alofa mo le Atua e auauna atu ai i ē mafatia. Ma o le mea lona tolu ou te faamoemoe o le a latou faia, ia tauagafau le tagata lava ia i a latou galuega lelei. Ae o le a ou tatalo o le a latou taliaina le fautuaga a le Alii, ina ua Ia fetalai; lea ua ou toafimalie ai e manaomia ona tatou faafofoga uma i ai:
“Ia outou ne’i avatu ni a outou mea alofa i luma o tagata, ina ia iloa ai e i latou; a faapea ona leai ai lea o so outou taui mai lo outou Tama i le lagi.
Ona Ia fetalai lea:
“A e avatu ni mea alofa, aua ne’i iloa e lou lima tauagavale le mea ua faia e lou lima taumatau:
“Ina ia lilo au mea alofa, o lou Tama foi, o le silafia i le mea lilo, o ia lava na te avatu faaaliali se taui ia te oe” (Mataio 6:1, 3–4).
O la’u tatalo mo taufafine i le malo, po o fea lava o latou i ai ma i soo se tulaga foi o i ai, ina ia taitai atu e lo latou faatuatua i le Faaola ma le lotofaafetai mo Lana Togiola i latou ia faia mea uma latou te mafaia mo ē ua faatonuina e le Atua ia latou auauna atu i ai. A latou faia, ou te folafola atu o le a latou alualu i luma i le ala e avea ai ma tamaitai paia, o ē o le a faafeiloai e le Faaola ma lo tatou Tama Faalelagi ma le mafanafana ma tauia faaaliali.
Ou te molimau atu o le Ekalesia lenei a Iesu Keriso toetu. Ua toetu o Ia. Na Ia totogia le tau mo a tatou agasala uma. Ou te iloa ona o Ia o le a tatou toetutu ai ma mafai ai ona maua le ola e faavavau. O Peresitene Thomas S. Monson o Lana perofeta soifua. E faafofogaina ma tali mai le Tama Faalelagi i a tatou tatalo. Ou te molimau atu tatou te tuputupu ae atili i le Faaola pe a tatou auauna atu i isi mo Ia i le alofa mama. Ou te tuuina atu lena molimau mautinoa i le suafa o Iesu Keriso, amene.