Se A Se Mea Tatou Te Faia?

Saunia e Neill F. Marriott

Fesoasoani Lua i le Au Peresitene Aoao o Tamaitai Talavou

Tatou te fausiaina le malo pe a tatou faafaileleina isi. Tatou te fausiaina foi le malo pe a tatou tautatala atu ma molimau atu i le upumoni.

Ina ua mavae le Toetu ma le Afio Ae o Iesu, sa aoao mai le Aposetolo o Paulo, “Ia … iloa … uma … o Iesu lava lena na faasatauroina e outou, ua faia lea e le Atua ma Alii ma Keriso.” Na tuia loto o e na faalogo ma fai atu ia Peteru ma isi, “Sema e, le au uso e, se a se mea matou te faia?” Ona latou usiusitai lea i aoaoga a Peteru ma le fiafia.

O taeao o le Aso Sa lea o le Eseta, ma ou te faamoemoe ua tuia uma o tatou loto ia faailoa atu le Faaola, salamo, ma usiusitai ma le fiafia.

I lenei konafesi, o le a tatou faalogologo ai i ni taitaiga musuia e tuuina mai e taitai o le Ekalesia, o alii ma tamaitai uma. O le iloaina o le a ootia o tatou loto i a latou upu, ou te fesili atu ai ia te outou i lenei po, “Uso e ma tamaitai, se a se mea tatou te faia?”

Sa tautino mai e le peresitene aoao o le Aualofa o Eliza R. Snow i tamaitai i le toeitiiti 150 tausaga ua mavae, “Ua tuuina mai e le Alii ni tiutetauave maualuluga i o tatou luga.” Ou te molimau atu o loo moni lava lana tautinoga i lenei vaitaimi.

E manaomia e le Ekalesia a le Alii ni tamaitai e taitaiina e le Agaga o loo faaaogaina a latou meaalofa tulagaese e faafailele, tautatala atu ai, ma puipuia ai le upumoni o le talalelei. O a tatou uunaiga ma malamalamaaga o ni vaega taua ia mo le fausiaina o le malo o le Atua, o le uiga moni lava o le faia o la tatou vaega i le aumaia o le faaolataga i fanau a le Atua.

Fausiaina o le Malo e ala i le Faafaileleina

Tatou te fausiaina le malo pe a tatou faafaileleina isi. Ae peitai, o le atalii [po o le afafine] muamua lava o le Atua e tatau ona tatou atiaeina i le talalelei toefuataiina o i tatou lava. Fai mai Ema Samita, “Ou te manao i le Agaga o le Atua ia silafia ma malamalama ia te a’u lava ia, ina ia mafai ai ona ou faatoilaloina soo se mea o tu masani po o le natura, o le a le talafeagai ma lo’u faaeaga.” E tatau ona tatou atiaeina se faavae mautu o le faatuatua i le talalelei a le Faaola ma agai i luma, faamalosia e feagaiga o le malumalu, e agai atu i le faaeaga.

Ae a pe a leai se nofoaga o a tatou tu masani i le talalelei toefuataiina a Iesu Kerio? O le lafoaia o i latou e ono manaomia ai le lagolago ma le faafailelega faalelagona a se isi tagata, e pei ona faia mo a’u.

Ina ua ou fanau mai, sa totoina e o’u matua se laau o le magnolia i tua o le fale ina ia i ai ni magnolia i le sauniga o la’u faaipoipoga, e faia i le lotu Porotesano a ou tuaa. Ae, i le aso o la’u faaipoipoga, sa leai ni matua i o’u autafa ma leai ni magnolia, aua i le avea ai ma se tagata liliu mai i le Ekalesia i le tasi le tausaga, sa ou malaga ai i le Aai o Sate Leki, Iuta, ina ia maua o’u faaeega paia o le malumalu ma faamauina ai ia Tavita, o lou toalua o le a i ai.

Ina ua ou tuua Luisiana ma lata atu i Iuta, sa oo mai ia te a’u se lagona o le leai o se aiga. A o lei faia le faaipoipoga, o le a ou nofo i le toalua o le tama matua o Tavita, o le sa lauiloa i le alofa ia Aunt Carol.

O a’u, o se tagata ese i Iuta, o le a nofo i le fale o se tagata ese a o lei faamauina—mo le faavavau—i se aiga ou te lei iloa lelei. (O le mea na lelei ai ou te alofa ma faatuatuaina lou toalua i le lumanai ma le Alii!)

Ao o’u tu i le faitotoa i luma o le fale o Aunt Carol, sa ou fia mouese atu. Na tatala mai le faitotoa—sa ou tu iina pei o se lapiti ua fefe—ma sa aapa mai Aunt Carol, e aunoa ma se upu, ma opo atu a’u. Sa na silafia, o le sa leai sana ia lava fanau,—sa iloa i lona loto faafailele—sa ou manaomia se nofoaga e talileleia ai. Oka, o se taimi o le toafimalie ma le matagofie! Na liusuavaia lou fefe, ma sa oo mai ia te a’u se lagona o le taula atu i se nofoaga saogalemu faaleagaga.

O le alofa o le faia lea o se avanoa i lou olaga mo se isi tagata, e pei ona faia e Aunt Carol mo a’u.

E faia moni e tina ni avanoa i o latou tino e faafailele ai se pepe e lei fanau mai—ma le faamoemoe mo se nofoaga i o latou loto a o latou faafaileleina i latou—ae e le tapulaa le faafaileleina i le fanauina o fanau. Na ta’ua e Eva o se “tina” a o lei faia sana fanau. Ou te talitonu “o le fai ma tina” o lona uiga “o le tuu atu o le ola.” Mafaufau i le tele o auala e te tuuina atu ai le ola. E ono faauigaina o le tuuina atu o se ola faalelagona i se ua leai se faamoemoe po o le ola faaleagaga i se tagata masalosalo. Faatasi ai ma le fesoasoani a le Agaga Paia, e mafai ai ona tatou fatufatu ai se nofoaga o le faamalologa faalelagona mo e ua faailogalanu i ai, teena, ma se tagata ese. I nei auala agalelei ae malolosi, tatou te fausia ai le malo o le Atua. Uso e, na tatou o mai uma i le lalolagi ma nei meaalofa o le tuu atu o le ola, faafailele, faatinā aua o le fuafuaga lena a le Atua.

O le mulimuli i Lana fuafuaga ma le avea ma sē fausia le malo e manaomia ai le ositaulaga le manatu faapito. Sa tusia e Elder Orson F. Whitney faapea: “O mea uma ua tatou mafatia ai ma tatou onosaia, aemaise pe a tatou onosaia ma le faapalepale, … e faamamaina ai o tatou loto … ma avea ai i tatou ma tagata sili ona agamalu ma limafoai, … ma e ala atu … i galuega ma tiga, tatou te maua ai le a’otauina … lea o le a tatou avea atili ai e pei o lo tatou Tama ma Tina i le lagi.” O nei tofotofoga faamamaina e aumaia i tatou ia Keriso, o le e mafai ona faamaloloina i tatou ma faia ia tatou aoga i le galuega o le faaolataga.

Fausiaina o le Malo e ala i le Tautala Atu ma le Molimau Atu

Tatou te fausia foi le malo pe a tatou tautatala atu ma molimau atu i le upumoni. Tatou te mulimuli i le mamanu a le Alii. E fetalai ma aoao mai o Ia i le mana ma le pule a le Atua. Uso e, tatou te mafaia foi. E masani lava ona fiafia tamaitai e talatalanoa ma potopoto! A tatou galulue e ala i le pule faamatuu o le perisitua ua tuuina mai ia i tatou, o le a tuputupu ae a tatou talanoaga ma potopotoga i aoaoga ma le taitaiga o le talalelei.

Sa aoao mai e Sister Julie B. Beck, o le sa avea muamua ma peresitene aoao o le Aualofa: “O le tomai e agavaa ai, mauaina, ma le faatinoina o faaaliga faaletagata lava ia, o le tomai aupito sili ona taua lea e tasi e mafai ona maua i lenei olaga. … E manaomia ai se taumafaiga magafagafa lelei.”

O le a uunaia i tatou e faaaliga patino mai le Agaga Paia ia aoao, tautatala atu, ma faatinoina ia upumoni e faavavau—upumoni a le Faaola. O le faateleina o lo tatou mulimuli ia Keriso, o le faatelelina foi lena o lo tatou lagonaina o Lona alofa ma le taitaiga, o le faateleina foi lena o lo tatou mananao ia tautatala atu ma aoao atu le upumoni e pei ona sa Ia faia, e tusa lava pe tatou te fetaiai ma mea faafeagai.

I nai tausaga ua mavae, sa ou tatalo ai mo ni upu e puipuia ai le tulaga faatina ina ua ou maua se valaau i le telefoni mai se tagata lemailoa.

Sa fesili mai le tagata lea, “O oe o Neill Marriott, le tina o se aiga toatele?”

Sa ou tali atu ma le fiafia, “Ioe!” ma le faamoemoe e faalogo atu o ia fai mai se tala faapenei, “Ia, lelei tele!”

Ae leai! O le a le galo lava ia te au lana tali a o fai mai i le telefoni: “Ua matua ou tiga lava i lou aumaia o fanau i luga o lenei paneta ua faatumulia!”

“Oi,” sa ou fai atu, “Ua ou iloa ou lagona.”

Sa ia tali vave mai, “Leai—e te le iloa!”

Ona ou taumasusu atu lea, “Ia, atonu ou te le iloa.”

Sa amata ona ia tautala ma le ita e uiga i lau filifiliga faavalevalea e avea o se tina. A o ia faaauau ai pea, sa amata ona ou tatalo mo se fesoasoani ma sa oo mai se manatu filemu i lou mafaufau: “O le a se fetalaiga e ono fetalai atu ai le Alii ia te ia?” Ona ou lagona lea sa ou tu i se nofoaga mausali ma maua le lototoa i le mafaufau ai ia Iesu Keriso.

Sa ou tali atu, “Ou te fiafia i le avea ai ma se tina, ma ou te folafola atu ia te oe o le a ou faia mea uma i lo’u malosi e faafailelei ai la’u fanau i se auala o le a latou faia ai le lalolagi e avea ma se nofoaga sili atu ona lelei.”

Sa ia tali mai, “Ia, ou te faamoemoe e te faia!” ma tuu i lalo le telefoni.

Sa le o se mea tele—aua, sa ou tu saogalemu i lo’u lava umukuka! Ae ia te au lava ia, sa mafai ona ou tautala atu e puipuia le aiga, tina, ma tagata faafailele ona o ni mea se lua: (1) ua ou malamalama ma talitonu i le aoaoga faavae a le Atua o le aiga, ma le (2) sa ou tatalo mo upu e tau atu ai nei upumoni.

O le tulagaese ma le ese ai mai le lalolagi o le a aumai ai ni faitioga, ae e tatau ona tatou taula i tatou lava i mataupu faavae e faavavau ma molimau atu e uiga i na mea, po o le a lava le tali mai a le lalolagi.

A tatou fesili ia i tatou lava, “Se a se mea tatou te faia?” ia tatou mafaufau loloto i le fesili lenei: “O le a se mea o loo faia pea lava pea e le Faaola?” Na te faafailele. Na te foafoaina. Na te uunaia le tuputupu ae ma le lelei. Uso e ma tamaitai, e mafai ona tatou faia mea nei! Teineiti Peraimeri, o i ai se isi i lou aiga o manaomia lou alofa ma le agalelei? Tou te fausiaina le malo e ala i le faafaileleina o isi.

O le foafoaina e le Faaola o le lalolagi, i lalo o le taitaiga a Lona Tama, sa avea ma se galuega silisili ese o le faafaileleina. Na ia saunia se nofoaga mo i tatou e tuputupu ae ai ma atiae le faatuatua i Lona mana togiola. O le faatuatua ia Iesu Keriso ma Lana Togiola o se nofoaga tupito lea o le faamalologa ma le faamoemoe, tuputupu ae ma le faamoemoega. E manaomia e i tatou uma se nofoaga faaleagaga ma faaletino o le talileleia. O i tatou, o uso o soo se vaitausaga, e mafai ona fatufatuaiina lenei [nofoaga]; o se nofoaga paia.

O la tatou tiutetauave maualuga o le avea ma tamaitai o e mulimuli i le Faaola, faafailele ma le uunaiga, ma ola i upumoni ma le le fefe. A tatou ole atu i le Tama i le Lagi ia faia i tatou ma e e fausiaina Lona malo, o le a tafe mai Lona mana i totonu o i tatou, ma o le a tatou iloa le ala e faafailele ai, ma iu ai ina avea e faapei o o tatou matua faalelagi. I le suafa o Iesu Keriso, amene.