Ua Ia Talosagaina i Tatou e Avea ma Ona Aao
Saunia e Cheryl A. Esplin
Fesoasoani Muamua i le Au Peresitene Aoao o le Peraimeri
O le auaunaga moni faaKeriso e lē manatu faapito ma e taulai atu i isi.
“Ia outou fealofani; faapei ona ou alofa atu ia te outou.” O nei upu, na lagiina e lenei aufaipese matagofie, na fetalai ai Iesu i nai itula ao lei oo i Lana taulaga togiola maoae—o se taulaga na faamatala e Elder Jeffrey R. Holland o “le faaaliga aupito taua o le mama na faatino i le talafaasolopito o lenei lalolagi.”
E le gata ina aoao i tatou e Iesu ia alolofa, ae na Ia soifua foi i mea na Ia aoaoina. I Lana galuega, o Iesu “sa femaliuai ma agalelei” ma “augani mai i tagata uma ina ia mulimuli atu i Lana faataitaiga.” Sa ia aoaoina, “Aua ai se fia faasaogalemuina lona ola, e maumau ai ia te ia: a o lē faamaumau i lona ola ona o a’u, e faasaoina e ia.”
O Peresitene Thomas S. Monson, o lē ua malamalama ma soifua i le fautuaga ia alofa atu, ua saunoa mai: “Ou te talitonu ua ta’u mai e le Faaola ia i tatou, vagana ua tatou faamaumau o tatou ola ona o isi, o le a itiiti se faamoemoega o o tatou lava olaga. O i latou o e ola mo na o i latou lava, e iu ina maanuminumi ma … maumau ai lo latou ola, a o i latou o e faaalu o latou lava ola e auauna atu ai i isi, e ola ma lauusiusi—ma faasaoina ai o latou ola.”
O le auaunaga moni faaKeriso e lē manatu faapito ma e taulai atu i isi. O se tasi o fafine sa tausia lona toalua ua le toe aoga i se mea sa faamatalaina, “Aua e te manatu i lau galuega o se avega; mafaufau i ai o se avanoa e aoao ai i le uiga moni o le alofa.”
I le talanoa atu i se faigalotu a le BYU, na fesili ai Sister Sondra D. Heaston: “Ae a pe a mafai ona tatou vaai moni i loto o le tasi ma le isi? O ai o le a sili atu ona tatou malamalama i le tasi ma le isi? I le lagonaina o mea e lagona e isi, vaaia o mea e vaaia e isi, ma faalogoina o mea e faalogoina e isi, tatou te faia, ma faaalu, le taimi e auauna ai i isi, ma faamata e ese lo tatou taulimaina o i latou? Pe tatou te taulimaina i latou ma le onosai e sili atu, agalelei e sili atu, ma le faapalepale e sili atu?”
Sa faasoa mai e Sister Heaston se aafiaga ao ia auauna atu i se tolauapiga a Tamaitai Talavou. Sa ia fai mai:
“O se tasi o a matou … failauga o le faigalotu … sa aoaoina i matou e uiga i le ‘avea ai.’ O se tasi o ana faamatalaga … o le, ‘Avea ma se tasi e aapa atu ia iloa ma auauna atu i isi—tiai ese ia faaata ma vaai e ala i le faamalama.’
“Ina ia faatino lenei mea, sa valaauina se tasi o tamaitai talavou e alu atu i luga ma fai atu i le tamaitai talavou e tu faasaga atu ia te ia. Ona [ia] aumaia lea o se faaata ma tuu i le va o le tamaitai talavou ma ia ina ia tilotilo, [le failauga], i le faaata ao ia taumafai e talanoa ma le tamaitai talavou. E le o se mea e ofo ai, sa lei amatalia ai se talanoaga mataalia pe ootia. O se lesona faitino mamana lea sa faaalia ai le faigata o le fesootai ma auauna atu i isi pe afai tatou te popole tele e uiga ia i tatou lava ma vaai ai na o i tatou ma o tatou manaoga. Ona [ia] tuuese lea o le faaata, toso i fafo se faavaa o le faamalama, ma tuu i le va o ona fofoga ma le fofoga a le tamaitai talavou. … Sa mafai ona matou vaai na avea le tamaitai talavou ma [ona] taulaiga autu ma o le auaunaga moni e manaomia ai lo tatou taulai i manaoga ma lagona o isi. E masani ona tatou popole e uiga ia i tatou lava ma o tatou lava olaga pisi—ao tatou vaai i faaata ao taumafai e vaai mo ni avanoa e auauna atu ai—o lena mea tatou te le vaaia le manino e ala i faamalama o le auauna atu.”
E masani ona faamanatu mai i tatou e Peresitene Monson ua “siomia i tatou e i latou e manaomia lo tatou gauai atu i ai, la tatou faamalosiau, o la tatou lagolago, la tatou faamafanafanaga, lo tatou agalelei—pe o nisi o le aiga, uo, paaga po o ni tagata ese.” Na ia saunoa, “O i tatou o aao o le Alii i luga o le fogaeleele, faatasi ma le poloaiga e auauna atu ma sii a’e Ana fanau. O loo faalagolago mai o Ia ia i tatou taitoatasi.”
O le tausaga ua tea ia Ianuari, o mekasini o le Friend ma le Liahona na valaaulia ai fanau i le lalolagi atoa e mulimuli i le fautuaga a Peresitene Monson—ina ia avea ma aao o le Alii. Sa valaaulia fanau e faatino galuega o le auauna atu—pe telē pe itiiti. Ona uunaia lea e tusi le ata o o latou lima i luga o se fasi pepa, oti, tusi i luga le galuega na latou faia, ma auina atu i le mekasini. E toatele outou o loo faafofoga mai i lenei po atonu o nisi o le faitau afe o fanau o e na faia se galuega alofa ma auina atu i totonu [na fasi pepa].
A aoao e fanau le auala e alolofa ma auauna atu ai i isi a o latou laiti, latou te setiina se mamanu o le auauna atu mo o latou olaga atoa o totoe. E masani ona aoao i tatou e fanau o le faaali atu o le alofa ma auaunaga e le tau faia o se mea telē ma silisili ina ia anoa ma faia ai se eseesega.
Sa faasoa e se faiaoga o le Peraimeri le faataitaiga lenei. “O le asō,” na ia fai mai ai, “na faia e la matou vasega o le lima ma le ono tausaga le matutua ni ula o le alofa. Sa tusi e tamaiti taitasi ata i luga o fasi pepa: se ata o i latou lava, se ata o Iesu, ma nisi ata o tagata o o latou aiga ma e pele. Sa matou faapipii pepa i ni li’o e sosoo i le tasi ma le isi e faia ai se filifili na matou liliuina i ni ula o le alofa. A o latou tusia ata, sa talanoa le fanau e uiga i o latou aiga.
“Fai mai Heather, ‘Ou te manatu e le alofa lo’u uso ia te au. Ma te fufusu i taimi uma. … Ou te ita foi ia te au. E leaga lo’u olaga.’ Ma sa ia tuu lona ulu i ona lima.
“Sa ou mafaufau e uiga i tulaga o lona aiga ma lagona atonu e moni e ia te ia se olaga faigata. Ae ina ua uma ona fai mai e Heather lenei tala, sa tali mai Ana, mai le isi faatausiusiuga o le laulau, ‘Heather, ou te tuuina oe i la’u ula i le va o ma’ua ma Iesu aua e alofa o Ia ia te oe ma ou te alofa foi ia te oe.’
“Ina ua fai mai e Ana lena tala, sa totolo atu Heather i lalo o le laulau ina ia oo atu ia Ana ma fusi mau mai o ia.
“I le faaiuga o le vasega, ina ua sau lona tinamatua e piki o ia, na faapea atu Heather, ‘E te iloa, Tinamatua? E alofa Iesu ia te au.’”
Pe a tatou aapa atu i le alofa ma le auauna atu e oo lava i ni auala aupito iti, e suia loto ma faamaluluina a o lagona e isi le alofa o le Alii.
Peitai, o nisi taimi ona o le le mafaitaulia o tagata uma o loo siomia ai i tatou o e manaomia le fesoasoani ma le toomaga mai avega, e ono faigata ai ona ausia le tele o manaoga faananati.
Uso e, o nisi o outou o loo faafofoga mai atonu o loo lagonaina lo outou faia o mea uma tou te gafatiaina e auauna atu ai i manaoga o tagata o le aiga. Manatua, i na faiga masani ma galuega fai soo, ua e “auauna atu lava lea i lo outou Atua.”
Atonu o nisi o outou o loo lagonaina se gaogao lea e mafai ona faatumulia a o outou vaai atu i o outou tuaoi po o nuu mo ni avanoa e fesoasoani ai e faamāmā le avega a se isi tagata.
E mafai e i tatou uma ona faaaofia nisi o auaunaga i o tatou olaga o aso taitasi. Ua tatou ola i se lalolagi fefinauai. Tatou te tuu atu le auaunaga pe a tatou lē faitio, pe a tatou mumusu e faitala, pe a tatou lē faamasino atu, pe a tatou mata ataata, pe a tatou fai atu faafetai, ma pe a tatou onosai ma agalelei.
O isi ituaiga o auaunaga e alu ai le taimi, fuafuaga faamoemoeina, ma le malosi faaopoopo. Ae e aoga i latou i a tatou taumafaiga uma. Atonu e mafai ona tatou amata fesili ia i tatou lava fesili nei:
-
O ai se tasi ua ou iloaina e mafai ona ou fesoasoani i ai i le asō?
-
O a taimi ma punaoa o loo ou mauaina?
-
O a auala e mafai ona ou faaaogaina ai au taleni ma tomai e faamanuia ai isi?
-
O a ni mea e mafai ona matou faia o se aiga?
Na aoao mai Peresitene Dieter F. Uchtdorf:
“E tatau ona e faia … mea na faia e soo o Keriso i tisipenisione uma: fefautuaai faatasi, faaaoga uma punaoa o loo maua, saili atu i musumusuga a le Agaga Paia, ole atu i le Alii mo Lana faamautinoaga, ona afe lea i luga o lima o lou ofu, ma alu e galue.
“Ou te tuu atu ia te outou se folafolaga,” na ia saunoa ai. “Afai tou te mulimuli i lenei mamanu, o le a outou mauaina taitaiga patino e faatatau i le o ai, o le a, o afea, ma pe o gafea o le faia i le ala a le Alii.”
Soo se taimi lava ou te mafaufau ai pe faape’i pe a toe afio mai le Faaola, ou te mafaufau lava i Lana asiasiga i sa Nifae ina ua Ia fesili:
“E i ai ea ni isi o ia te outou ua mamai? Ia aumai i latou iinei. E i ai ea ni isi o outou ua pipili, pe ua tauaso, pe ua setu, pe ua manua, pe ua lepela, pe ua supa, pe ua tutuli, pe ua puapuagatia i soo se ala? Ia aumai i latou iinei ma o le a ou faamaloloina i latou, ona ua ou agaalofa tele ia te outou; ua tumu ou loto i le alofa mutimutivale. …
“… [O le Faaola] sa faamaloloina i latou uma taitoatasi.”
Mo le taimi nei, ua Ia talosagaina i tatou ia avea ma ona aao.
Ua ou iloa o le alofa i le Atua ma tuaoi ua maua ai le uiga o le olaga. Tau ina ia tatou mulimuli i le faataitaiga a le Faaola ma Lana apoapoaiga e aapa atu i isi ma le alofa.
Ou te molimau atu i le moni o le folafolaga a Peresitene Henry B. Eyring “afai [tatou te] faaaogaina [a tatou] meaalofa e auauna atu ai i se isi tagata, [o le a tatou] lagona le alofa o le Alii mo lena tagata. [Tatou te] lagona foi lona alofa mo i [tatou].” I le suafa o Iesu Keriso, amene.
Faamatalaga: I le aso 2 o Aperila, 2016, sa faamaloloina Sister Esplin i le avea ai o se fesoasoani muamua i le au peresitene aoao o le Peraimeri.