O Le Agaga Paia
Saunia e Elder Rober D. Hales
O Le Korama a Aposetolo e Toasefululua
Ou te faailoa atu lou alofa ma le talisapaia i le Tama Faalelagi mo le meaalofa o le Agaga Paia, lea e Na te faaali mai ai Lona finagalo ma lagolagoina i tatou.
Ou uso e ma tuafafine, ou te talanoa atu i le asō o se auauna a le Alii ma o se tama o le tamamatua. Ia te outou ma lau fanau faapelepele, ou te aoao atu ma faasoa atu le molimau ofoofogia o le meaalofa o le Agaga Paia.
Ou te amata i le faailoaina o le Malamalama o Keriso, lea ua tuuina mai i “tagata uma [ma tamaitai] e o mai i le lalolagi.” Tatou te manuia uma mai lenei malamalama paia. I “mea uma ma ala atu i mea uma,” ma e na te faatagaina i tatou e iloa le lelei mai le leaga.
Ae o le Agaga Paia e ese mai le Malamalama o Keriso. O ia o le sui lona tolu o le Aiga Atua, o se peresona o agaga tulaga ese faatasi ai ma ni tiutetauave paia, ma e tasi i le faamoemoega ma le Tama ma le Alo.
O ni tagata o le Ekalesia, e mafai ona tatou lagonaina pea le mafutaga o le Agaga Paia. E ala i le perisitua toefuataiga a le Atua, ua papatiso i tatou e ala i le faatofuina mo le faamagaloina o a tatou agasala ona faamauina lea o ni tagata o Le Ekalesia a Iesu Keriso o le Au Paia o Aso e Gata Ai. I lenei sauniga ua tuu mai ia i tatou le meaalofa o le Agaga Paia e ala i le faaee atu o lima o e umia le perisitua. A maea, e mafai ona tatou maua ma faatumauina le mafutaga o le Agaga Paia e ala i le manatua pea o le Faaola, tausi i Ana poloaiga, salamo i a tatou agasala, ma aai ma feinu ma le agavaa i le faamanatuga i le aso Sapati.
Ua saunia e le Agaga Paia faaaliga patino e fesoasoani ia i tatou e faia filifiliga taua o le olaga e uiga i na mea e pei o aoaoga, misiona, galuega, faaipoipoga, fanau, po o fea o le a tatou nonofo ai ma o tatou aiga, ma isi mea. I nei mataupu, e faamoemoe le Tama Faalelagi ia i tatou e faaaoga lo tatou faitalia, suesue le tulaga i o tatou mafaufau e tusa ai ma mataupu faavae o le talalelei, ma aumai se faaiuga ia te Ia i le tatalo.
E taua faaaliga faaletagata lava ia, ae ua na o se vaega e tasi o le galuega a le Agaga Paia. E pei ona faamaonia e tusitusiga paia, e molimau foi le Agaga Paia i le Faaola ma le Atua le Tama. Na te aoao i tatou i “mea filemu o le malo” ma mafua ai ona “tele [lo tatou] faamoemoe.” Na te “taitai [i tatou] ia fai mea lelei … [ma] ia faamasino ma le amiotonu.” Na te tuu atu “i tagata uma [ma tamaitai] … se meaalofa [faaleagaga] … ina ia mafai ona manuia ai o tagata uma.” Na te “tuuina mai [ia i tatou] le malamalama” ma “faamanatu mai foi o ia te [i tatou] o mea uma.” E ala i le Agaga Paia, ina ia “faapaiaina [tatou]” ma maua “se faamagaloga o [a tatou] agasala.” O Ia o Lē “Faamafanafana,” o [Ia] lava lea e tasi na “folafola atu i soo [o le Faaola].”
Ou te faamanatu ia i tatou uma e le’i tuuina maia le Agaga Paia ia pulea i tatou. O nisi o i tatou e saili ma le lē faautauta le taitaiga a le Agaga Paia i faaiuga lē taua uma i o tatou olaga. E tuuitiitia e lenei mea Lona matafaioi paia. E faamamalu e le Agaga Paia le mataupu faavae o le faitalia. Na te saunoa lemu mai i o tatou mafaufau ma loto e uiga i le tele o mataupu e taua.
E mafai e i tatou taitoatasi ona ese le lagonaina o le uunaiga a le Agaga Paia. O Ana musumusuga o le a lagonaina i ni tulaga eseese o le malosi e tusa ai ma o tatou manaoga taitoatasi ma tulaga.
I nei aso e gata ai, tatou te lagolagoina e faapea ua na o le perofeta e mafai ona maua faaaliga e ala i le Agaga Paia mo le Ekalesia atoa. E faagalo e nisi lenei mea, e pei ona taumafai Arona ma Miriama e tauanau Mose e ioe faatasi ma i latou. Ae o le Alii na aoaoina i latou ma i tatou. Na Ia fetalai mai:
“Afai e i ai se perofeta a Ieova o ia te outou, Ou te faailoa A’u ia te ia. …
“Ma te faafesagai ona ma tautala ma ia.”
O nisi taimi e faaosoosoina i tatou e le fili i manatu sese lea e mafai ona tatou faaluafesasi ai ma le Agaga Paia. Ou te molimau atu o le faamaoni i le tausiga o poloaiga ma tausiga o a tatou feagaiga, o le a puipuia i tatou mai le faaseseina. E ala mai i le Agaga Paia, o le a mafai ona tatou iloatino na perofeta sese o ē aoao mo aoaoga faavae ia poloaiga a tagata.
Ao tatou maua le musumusuga a le Agaga Paia mo i tatou lava, e taua le manatua e le mafai ona tatou maua faaaliga mo isi tagata. Ou te iloa se alii talavou na tau atu i se tamaitai talavou, “Sa ou faia se miti o oe o le a avea ma a’u ava.” Sa mafaufau loloto le tamaitai talavou i lena faamatalaga ona tali atu lea, “A ou faia le miti e tasi, o le a ou sau ma talanoa atu ia te oe.”
E ono faaosoosoina i tatou uma e tuu atu a tatou manaoga patino e faatoilalo ai le taitaiga a le Agaga Paia. Sa augani atu le Perofeta o Iosefa Samita i le Tama Faalelagi mo le faatagaga e tuu atu ia itulau e 116 muamua o le Tusi a Mamona ia Matini Harisi. Sa faapea Iosefa Samita o se manatu lelei. I le taimi muamua, e lei tuuina atu e le Agaga Paia ia te ia ni lagona maumaututu. E ui i lea, na iu lava ina faatagaina e le Alii ia Iosefa e tuuina atu ia itulau. Sa leiloa ia Matini Harisi na itulau. Mo se taimi, na aveese ai e le Alii le meaalofa a le Perofeta e faaliliu ai, ma sa aoaoina e Iosefa se lesona tiga ae sa taua na uunaia ai le taimi na totoe o lana auaunaga.
O le Agaga Paia e totonugalemu i le Toefuataiga. E faatatau i lona faitauina ao tama talavou o le Iakopo 1:5, sa toe faamatalaina e le Perofeta o Iosefa, “E leai lava se mau o tusitusiga paia na oo mai i le loto o se tagata ma le mana tele nai lo o lenei mau i lo’u loto i lea taimi.” O le mana na faamatalaina e Iosefa Samita o le uunaiga a le Agaga Paia. O se taunuuga, sa alu atu Iosefa i se togalaau o laau e latalata ane i lona aiga ma tootuli ai i lalo e ole atu i le Atua. O le Muai Faaaliga na mulimuli mai ai sa moni le taua ma ofoofogia. Ae o le ala i lena asiasiga faaletagata o le Tama ma le Alo na amata i se musumusuga mai le Agaga Paia ia tatalo.
O upumoni faaalia o le talalelei toefuataiga na sau mai le mamanu o le saili atu i le tatalo, ona maua lea ma mulimuli i musumusuga a le Agaga Paia. Mafaufau i nei faataitaiga: o le faaliliuina o le Tusi a Mamona, le toefuataiga o le perisitua ma ona sauniga—e amata i le papatisoga, ma le faatulagaga o le Ekalesia—o ni nai vaega e tau atu. Ou te molimau atu o le asō, e oo mai faaaliga mai le Alii i le Au Peresitene Sili ma le Toasefululua i le mulimuli ai i lenei mamanu paia e tasi. O le mamanu paia lava lea e tasi e mafai ai ona maua faaaliga faaletagata lava ia.
Tatou te faamamaluina tagata uma o e na mulimuli i le Agaga Paia ina ia maua le talalelei toefuataiga, e amata ia Iosefa Samita ma tagata o lona lava aiga. Ina ua tau atu e Iosefa talavou i lona tama e uiga i le asiasiga a Moronae, sa maua e lona tama se molimau maumaututu mo ia lava. Na vave lava, na faamalolo Iosefa mai ona tiutetauave faifaatoaga ma uunaia e mulimuli i le taitaiga a le agelu.
Ia tatou faapea ona fai, i le avea ai o ni matua ma taitai. Ia tatou uunaia a tatou fanau ma isi e mulimuli i le taitaiga a le Agaga Paia. I le faia o lea mea, ia tatou mulimuli i tatou lava i le faataitaiga a le Agaga Paia, taitai e ala i le agamaualalo, agamalu, agalelei, tali tiga, ma le alofa faamaoni.
O le Agaga Paia o se ala o fesootaiga mo le galuega a le Atua, i aiga ma le Ekalesia atoa. Faatasi ai ma lena malamalamaaga, e mafai ona ou faasoa atu ni nai faataitaiga patino o le Agaga Paia i lou lava olaga ma auaunaga i le Ekalesia? Ou te ofo atu i latou o se molimau patino e faamanuia i tatou uma e le Agaga Paia.
I le tele o tausaga talu ai, sa ma fuafua ma Sister Hales e talimalo i nisi o au paaga faigaluega i se aiga o le afiafi faapitoa i lo matou fale. I le ala e agai atu i le fale mai le ofisa, sa ou maua se lagona e tu i le fale o se tina ua maliu lana tane sa ou asia. Ina ua ou tuitui i le faitotoa o le tuafafine, sa ia fai mai, “Sa ou tatalo mo oe ina ia e sau.” O fea na sau ai lena lagona? O le Agaga Paia.
I se tasi o taimi, i le maea ai o se gasegase tuga, sa ou pulefaamalumalu i se konafesi faalesiteki. Ina ia faasaoina lou malosi, sa ou fuafua e vave tuua le falesa i le maea ai o le sauniga a le au taitai perisitua. Peitai, i le maea ai o le tatalo faaiu, sa faapea mai le Agaga Paia ia te au, “O fea e te alu i ai?” Sa musuia au e faatalofa ma tagata uma ao latou tuua le potu. Ao laa mai i luma se toeaina talavou, sa musuia au e tuu atu ia te ia se savali faapitoa. Sa ia autilo i lalo, ma sa ou faatali seia autilo mai i luga ma autilo sao mai ia te au, ma sa mafai ona ou faapea atu, “Tatalo i le Tama Faalelagi, faafofoga i le Agaga Paia, mulimuli i musumusuga e tuuina atu ia te oe, ma o le a lelei mea uma i lou olaga.” Mulimuli ane, sa tau mai e le peresitene o le siteki ia te au, le auala na faato’ā faafoi vave mai ai le alii talavou mai lana misiona. I le faatinoga a le peresitene o le siteki, i luga o se lagona manino, sa ia folafola atu i le tamā o le alii talavou, afai na te aumai lona atalii i le sauniga perisitua, “O le a talanoa Elder Hales ia te ia” Aisea na ou tu ai e faatalofa lima o tagata uma? Aisea na ou tu ai e talanoa atu i lenei alii talavou taua? O le a le puna o lou fautuaga? E faigofie: o le Agaga Paia.
I le amataga o le 2005, sa taitaiina au e saunia se savali o le konafesi aoao e uiga i ulugalii faamisiona matutua. I le maea ai o le konafesi, sa faamatala e se uso: “Ao matou faalogologo i le konafesi … sa vave ona pai mai le Agaga o le Alii i ou lagona ma manatu. … Sa manino le savali mo au ma mo lau manamea. Sa tatau ona ma auauna atu i se misiona, ma o le taimi, o le asō. Ina ua ou … autilo atu i lou toalua, sa ia iloa sa ia mauaina le lagona lava lea e tasi mai le Agaga.” O le a le mea na aumaia ai lenei tali malosi o le mea na tupu? O le Agaga Paia.
I lau lava fanau ma i latou o faafofoga mai, ou te tuuina atu lau molimau o faaaliga patino ma le auauai mai pea o taitaiga o aso taitasi, o lapataiga, faamalosiauga, malosi, faamamaina faaleagaga, mafanafana, ma le filemu e oo mai i o tatou aiga e ala mai i le Agaga Paia. E ala mai i le Agaga Paia, tatou te lagona “le tele o le alofa mutimutivale [o Keriso]” ma vavega e lēmataofiofia.
Ou te faasoa atu lou molimau faaptioa o loo soifua le Faaola. Ou te faailoa atu lou alofa ma le talisapaia i le Tama Faalelagi mo le meaalofa o le Agaga Paia, lea e Na te faaali mai ai Lona finagalo ma lagolagoina i tatou i o tatou olaga. I le suafa o Iesu Keriso, amene.