O Aiga e Faavavau
Saunia e Peresitene Henry B. Eyring
Fesoasoani Muamua i le Au Peresitene Sili
O la tatou matafaioi faaleperisitua o le tuu lea o o tatou aiga ma aiga o i latou o siomiaina i tatou i le totonugalemu o o tatou popolega.
Ou te faafetai lava i le faatasi ai ma outou i lenei afiafi i le sauniga aoao a le au perisitua o Le Ekalesia a Iesu Keriso o le Au Paia o Aso e Gata Ai. O se taimi silisili lenei i le talafaasolopito o le Ekalesia. I le selau valusefulu lua tausaga talu ai i le 1834 i Katelani, Ohaio, sa valaauina ai le au perisitua uma ina ia faatasitasi i se faleaoga laau e 14 i le 14 futu (4.2 i le 4.2 m). I lena fonotaga sa lipotia ai le saunoaga lenei a le Perofeta o Iosefa Samita: “Tou te le iloaina nisi mea faaaopoopo e uiga i taunuuga o lenei Ekalesia ma le malo nai lo se pepe i luga o vae o lona tina. Tou te lei malamalama i ai. … Ua na o sina luutaga itiiti o le Perisitua o loo outou vaai atu i ai iinei i lenei po, ae o lenei Ekalesia o le a faatumulia ai Amerika i Matu ma Saute—o le a faatumulia ai le lalolagi.”
E faitau miliona ē umiaina le perisitua, i le silia ma le 110 atunuu, o loo potopoto i lenei sauniga. Masalo sa muai vaaia e le Perofeta o Iosefa lenei taimi ma le lumanai mamalu o loo i luma atu o i tatou.
O la’u savali i le po nei o se taumafaiga e faamatala lena lumanai ma mea e tatau ona tatou faia i le avea ai ma se vaega o le fuafuaga o le fiafia lea na sauniaina e lo tatou Tama Faalelagi mo i tatou. Ae tatou te lei fananau mai, sa tatou ola i se aiga faatasi ma lo tatou Tama Faalelagi e faavavau ma faaeaina. Sa Ia faauuina se fuafuaga lea e mafai ai e i tatou ona siitia ma alualu i luma ia avea e faapei o Ia. Sa Ia faia ona o le alofa mo i tatou. O le faamoemoega o le fuafuaga o le faatagaina lea o i tatou ia maua le avanoa e ola ai e faavavau e pei ona soifua ai lo tatou Tama Faalelagi. Ua ofo mai e lenei fuafuaga o le talalelei ia i tatou se ola o le olaga faaletino lea o le a tofotofoina ai i tatou. Sa tuuina mai se folafolaga e faapea e ala mai i le Togiola a Iesu Keriso, afai tatou te usiusitai i tulafono ma sauniga faaleperisitua o le talalelei, o le a tatou maua le ola e faavavau, le meaalofa sili o Ana meaalofa uma.
O le ola e faavavau o le ituaiga ola lena o loo soifua ai le Atua lo tatou Tama Faavavau. Ua fetalai mai le Atua o Lona faamoemoega o le “aumaia o le tino ola pea ma le ola faavavau o le tagata” (Mose 1:39). O le faamoemoega sili o tagata uma e umiaina le perisitua o le lagolagosua lea i le galuega o le fesoasoani atu i tagata ia maua le ola e faavavau.
O taumafaiga uma faaleperisitua ma sauniga uma faaleperisitua ua faamoemoe e fesoasoani i fanau a le Tama Faalelagi ia suia e ala i le Togiola a Iesu Keriso ia avea ai ma ni tagata o ni iunite atoatoa faaleaiga. E mulimulitai i le “galuega sili a tagata uma o le talitonu lea i le talalelei, ia tausi i poloaiga, ma ia fatua’i ma faaatoatoa se aiga e faavavau,” ma ia fesoasoani i isi ia faia lea lava mea e tasi.
Ona e moni lena mea, o mea uma tatou te faia e tatau ona i ai le faaipoipoga faaselesitila e fai ma ona taulaiga ma faamoemoega. O lona uiga e tatau ona tatou tauivi ina ia faamauina i se soa e faavavau i totonu o le malumalu a le Atua. E tatau foi ona tatou uunaia isi ia osia ma tausia ia feagaiga e fusia faatasi ai se tane ma se ava, faatasi ma o latou aiga, i lenei olaga ma le olaga a sau.
Aisea e matua taua tele ai lenei mea ia i tatou taitoatasi—talavou ma matutua, tiakono pe faitaulaga sili, atalii pe tamā? Ona o la tatou matafaioi faaleperisitiua o le tuu lea o o tatou aiga ma aiga o i latou o siomiaina i tatou i le totonugalemu o o tatou popolega. O faaiuga tetele uma e tatau ona fua i le aafiaga o le a i ai se aiga e agavaa ai mo le olaga faatasi ma le Tama Faalelagi ma Iesu Keriso. E leai ma se mea i la tatou auaunaga faaleperisitua e taua atu e pei o lenei.
Sei ou ta’u atua ia te outou le uiga o lenei mea i se tiakono o faafofoga mai i lenei po o se sui o se iunite faaleaiga ma o se sui o se korama.
I lona aiga, atonu e i ai pe leai foi ni tatalo fai soo faaleaiga po o ni afiafi faaleaiga fai soo. Afai e malamalama lona tamā i nei matafaioi, ma valaau le aiga ia faatasi mai mo le tatalo po o le faitauga tusitusiga paia, e mafai ona tele’a’i atu le tiakono e auai ai ma le fiafia. E mafai ona ia uunaia ona uso ma tuafafine ia auai ma faamalo ia i latou pe a latou faia. E mafai ona ia talosaga atu i lona tama mo se faamanuiaga pe a amata le a’oga po o se isi taimi e manaomia ai.
Atonu e le faatuatua faapena lona tamā. Ae o le manaoga tonu o lona loto mo na aafiaga o le a aumai ai mana o le lagi ia i latou o siomiaina o ia ona o lona faatuatua. O le a latou saili atu mo le olaga faaleaiga lea e manao i ai le tiakono ma lona loto atoa.
E mafai foi e le aoao i le Perisitua Arona ona vaai i lona tofiga o se faiaoga o aiga o se avanoa e fesoasoani ai i le Alii e suia le olaga o se aiga. Sa apoapoai mai le Alii i lena mea i le Mataupu Faavae ma Feagaiga:
“O le tiute o le aoao o le leoleo lea i luga o le ekalesia e le aunoa, ma faatasi ma faamalosi i latou;
“Ma vaai ia leai se amioletonu i totonu o le ekalesia, po o se feitagai ma le tasi, po o se pepelo, faatuaupua, po o se tautala leaga” (MF&F 20:53–54).
E faapena foi i ositaulaga i le Perisitua Arona ua tuu atu i ai lenei lava poloaiga:
“O le tiute o le ositaulaga o le talai atu, aoao atu, faamalamalama atu, apoapoai atu, ma papatiso atu, ma faamanuia le faamanatuga,
“Ma asiasi atu i fale o tagata taitoatasi o le ekalesia, ma apoapoai atu ia te i latou ia tatalo atu ma le leo ma i le mea lilo ma faasaga atu i tiute uma faaleaiga” (MF&F 20:46–47).
Atonu e te tomanatu, e pei o a’u a o avea ai ma se aoao talavou ma se ositaulaga, i le auala e tulai atu ai i na luitau. Sa ou le mautinoa lava pe mafai faapefea ona ou apoapoai atu i se ala o le a uunaia ai se aiga e agai atu i le ola e faavavau e aunoa ma le faatiga pe foliga mai foi e faitioina. Sa ou aoaoina e na o le pau le apoapoaiga e sui ai loto e sau mai le Agaga Paia. E tupu soo lena mea pe a tatou molimau atu i le Faaola, o le sa avea ma o loo avea pea ma se tagata atoatoa o le aiga. A o tatou taulai atu i lo tatou alofa mo Ia, o le a faatuputeleina le fealofani ma le filemu i totonu o aiga tatou te asiasi i ai. O le a i ai le Agaga Paia ma i tatou i la tatou auaunaga i aiga.
E mafai e le alii talavou o loo umiaina le perisitua, e ala i le auala e tatalo ai, e ala i le auala e tautala ai, ma e ala i le auala na te faamalosiau atu ai i tagata o le aiga, ona aumaia le faatosinaga ma le faataitaiga a le Faaola i o latou mafaufau ma loto.
Sa faaali mai e se tasi o taitai perisitua atamai ia te a’u lona malamalama i lena mea. Sa ia ta’u atu i lo’u atalii talavou ina ia taitai i se asiasiga faaleaiga. Sa ia fai atu atonu o le a teena e le aiga ana apoapoaiga, ae na ia manatu o se aoaoga faigofie ma se molimau a se tamaitiiti atonu e sili atu ona ulufia ai o latou loto maaa.
O le a se mea e mafai ona faia e se toeaina talavou e fesoasoani ai i le fatuina o ni aiga e faavavau? Atonu o le a sauni e alu i totonu o le galuega faamisiona. E mafai ona ia tatalo ma lona loto atoa o le a mafai ona ia saili, aoao, ma papatiso ni aiga. Ou te manatua pea se alii talavou aulelei ma lana manamea lalelei ma o la afafine laiti aulelei e toalua na matou nonofo faatasi ma la’u soa i se tasi aso. Sa oo atu le Agaga Paia ma molimau atu ia i la’ua ua toefuataiina le talalelei a Iesu Keriso. Sa lava lo la talitonu lea sa la talosaga mai ai pe mafai ona ma faamanuiaina a la tama teine laiti e toalua e pei ona la vaaia o faia i se tasi o sauniga faamanatuga. Ua la maua se manao mo le la fanau ina ia faamanuiaina, ae la te lei malamalama o faamanuiaga moni lava ua na o totonu o malumalu o le Atua e mafai ai pe a uma ona latou osia ni feagaiga.
O loo ou lagonaina pea le faanoanoa pe a mafaufau atu i lena ulugalii ma na teineiti, masalo ai ua matutua, e aunoa ma le folafolaga o se aiga e faavavau. Ua na o sina matāūa lava o faamanuiaga ua maua e o la matua e ono mafai ona avanoa mo i la’ua. Ou te faamoemoe i se auala, i se mea atonu latou te maua ai le avanoa e agavaa ai e avea ma se aiga e faavavau.
O isi faifeautalai e o atu i le misiona o le a mauaina le aafiaga sili ona faafiafiaina na maua e lo’u atalii o Mataio. Sa la mauaina ma lana soa se tina ua oti lana tane ma le fanau e 11 sa soifua i tulaga maualalo. Sa ia manao mo i latou i le mea foi tou te mananao ai—ia maua se aiga e faavavau. I lo’u atalii, sa foliga mai e faigata pe le talafeagai foi mo lena taimi.
Sa ou asiasi atu i lena tamai aai i le mavae ai o le tele o tausaga talu ona papatisoina e lo’u atalii lena tina, ma sa ia valaauliaina a’u ia feiloai i lona aiga. Sa ou faatalitali mo sina taimi ona sa o mai lana fanau e toatele, ma le toatele o fanau a lana fanau mai nisi o falesa eseese i lea nofoaga. O le tasi atalii sa auauna faamaoni atu i se auepikopo, ma o le toatele o ana fanau ua faamanuiaina i feagaiga o le malumalu ma ua faamauina o ia i se aiga e faavavau. A o ma faamavae ma lea tuafafine pele, sa ia fusi lo’u puimanava ma fai mai, “Faamolemole, fai ia Mateo e toe foi mai ae ou te lei oti.” Ona o na faifeautalai faamaoni, sa tuuina atu ai ia te ia le faamoemoega fiafia o le meaalofa sili o meaalofa uma a le Atua.
E i ai mea e tatau ona faia e se faifeautalai pe a foi mai o ia mai lana misiona ina ia faamaoni ai i ana tautinoga e saili le ola e faavavau mo ia lava ma i latou e alofa i ai. E leai se isi tautinoga e sili atu ona taua i lenei olaga po o le faavavau nai lo le faaipoipoga. Ua outou faafofoga i fautuaga atamamai ia avea le faaipoipoga ma se mea faamuamua i fuafuaga vave pe a uma le misiona. O le auauna faamaoni o le perisitua o le a ia faia ma le atamai.
I le mafaufau ai i le faaipoipoga, o le a ia vaai ai o loo ia filifilia ni matua o lana fanau ma le tofi o le a latou maua. O le a ia faia le filifiliga faatasi ma se sailiga naunautai ma se iloiloga ma le agaga tatalo. O le a ia faamautinoaina o le [tamaitai] e faaipoipo i ai e tutusa o la tulaga faatonuina mo se aiga, o ona talitonuga maumaututu e uiga i le faamoemoega o le Alii mo le faaipoipoga, ma o lena tamaitai o se tagata o le a ia loto e faatuatuaina i ai le fiafiaga o lana fanau.
Sa tuu mai e Peresitene N. Eldon Tanner lenei fautuaga atamai: “O matua e tatau ona e faamamaluina e sili atu i lo se isi lava, o matua ia o lau fanau o le a fanauina. O na fanau e agavaa mo ni matua silisili lea e mafai ona e avatu ia i latou—matua ola mama.” O le mama o le a avea ma ou puipuiga ma le puipuiga o lau fanau. E te nofoaitalafu ia i latou i lena faamanuiaga.
Ia, o loo i ai nisi o tane ma tamā o loo faafofoga mai i le po nei. O le a se mea e mafai ona e faia? Ou te faamoemoe ia faateleina lou manao ia faia ni suiga talafeagai mo oe ma lou aiga ia ola ai i le malo selesitila i se aso. I le avea ai ma se tamā o le perisitua, faatasi ma lau ava i ou autafa, e mafai ona e pa’i atu i loto o tagata taitoatasi o lou aiga ma faamalosiau ia i latou ia tulimatai atu i lena aso. O le a e auai faatasi ma lou aiga i tou sauniga faamanatuga, o le a e faia ni fonotaga faaleaiga lea e valaaulia ai le Agaga Paia, o le a e tatalo faatasi ma lau ava ma le aiga, ma saunia oe lava ia e ave lou aiga i le malumalu. O le a e malaga faatasi ma i latou i luga o le ala i se aiga e faavavau.
O le a e taulimaina lau ava ma lau fanau i le ala o loo taulimaina ai oe e le Tama Faalelagi. O le a e mulimuli i le faataitaiga ma le taitaiga a le Faaola e taitai lou aiga i Lana ala.
“E leai se mana po o se aafiaga e mafai pe tatau ona faatumauina ona o le perisitua, nao i le faatauanau, i le tali-tiga, i le agamaualalo ma le agamalu, ma le alofa faamaoni;
“I le agalelei, ma le malamalama manino, lea o le a faalautele tele ai le agaga e aunoa ma le pepelo, ma aunoa ma le faa’ole’ole —
“E aoai atu i taimi e tatau ai ma le maatiati, pe a uunai ai e le Agaga Paia, ma ona faaali atu ai lea pe a mavae, o se alofa faateleina ia te ia o le na e aoaiina, ne’i manatu o ia ia te oe o sona fili” (MF&F 121:41–43).
Ua ta’u mai e le Alii i tamā o le perisitua ia ituaiga o tane e ao ona avea ai i latou. Ua Ia fetalai, “Ia e alofa i lau ava ma lou loto atoa, ma ia e pipii atu ia te ia ae le o se isi” (MF&F 42:22). Ina ua fetalai mai le Alii ia i la’ua uma o le tane ma le ava, na Ia poloai mai, “Aua e te … mulilua … pe e te faia soo se mea faapena” (MF&F 59:6).
Mo le autalavou, ua faatulaga ai e le Alii le tulaga faatonuina. “O outou le fanau, ia outou faalogo i o outou matua i mea uma, aua o le mea malie lea i le Alii” (Kolose 3:20), ma “ia e ava i lou tama ma lou tina” (Esoto 20:12).
Ina ua fetalai mai le Alii i tagata uma i le aiga, o Lana fautuaga ia fealofani ma felagolagomai.
Ua Ia faatonuina i tatou ia tauivi e faaatoatoa olaga o tagata taitoatasi o le aiga, ia faamalosia ē vaivai, laveai mai ē pele ua se ese, ma olioli i lo latou malosi faaleagaga ua faafouina.”
Ua faatonuina mai foi le Alii ia tatou faia mea uma tatou te mafaia e fesoasoani ai ia i latou o o tatou tagata ua maliliu ina ia faatasi ma i tatou i o tatou aiga e faavavau.
O le taitai vaega o faitaulaga sili o loo galue ma le filiga e fesoasoani i tagata ia saili o latou tuaa ma ave ia igoa i le malumalu, o loo laveaiina i latou ua maliliu. O le a toatele i latou e faafetai atu i na faitaulaga sili i le olaga a sau, ma i latou o loo ofoina atu ia sauniga, ona sa lei galo lava ia i latou o latou aiga o loo faatalitali mai i le lalolagi o agaga.
Ua saunoa mai perofeta: “O le galuega aupito sili ona taua o galuega a le Alii o le a e faia o le galuega e te faia i totonu o puipui o lou lava fale. O asiasiga faaleaiga, galuega faaauepikopo, ma isi tiute faaleEkalesia e taua uma, ae o le galuega aupito sili ona taua o loo faia lea i totonu o puipui o lou lava fale.”
I totonu o lou aiga, ma i au auaunaga faaleperisitua, o le tulaga faatauaina silisili lava o le a i ai i nai faatinoga iti e fesoasoani ai ia i tatou lava ma i latou tatou te alolofa i ai ia agai atu i le ola e faavavau. O na faatinoga atonu e foliga mai e faatauvaa i lenei olaga, ae o le a latou aumaia faamanuiaga tumau i le ola e faavavau.
A tatou faamaoni i la tatou auaunaga e fesoasoani i fanau a le Tama Faalelagi ia foi atu i le aiga ia te Ia, o le a tatou agavaa mo le faafeiloaiga o loo tatou matua mananao uma e faalogo atu i ai pe a maea la tatou galuega i le lalolagi. O upu nei: “Ua lelei ia, le auauna lelei e, ma le faamaoni, ua e faamaoni i nai mea itiiti, ou te tofia oe e pule i mea e tele; ina ulufale mai ia i le fiafia o lou alii” (Mataio 25:21).
Faatasi ai ma na “mea e tele” ua i ai ma le folafolaga o se uluola e le muta. Ou te tatalo ina ia tatou agavaa uma ma fesoasoani atu i isi ia agavaa foi mo lena faamanuiaga faalelagi i le aiga o lo tatou Tama ma Lona Alo Pele, o Iesu Keriso. I le suafa paia o Iesu Keriso, amene.