O Le Nofoaga Paia o le Toefuataiga
Saunia e Elder Jairo Mazzagardi
O Le Fitugafulu
O Palamaira o le tulaga lea o le Toefuataiga, lea o le a lagona ai le siufofoga o le Tama ina ua toeitiiti mavae le lua afe tausaga.
Mo le tele o tausaga sa taumafai sau uo lelei o se tagata o le Ekalesia, e aoao mai ia te a’u le talalelei e uiga i aiga e faavavau. Pe ana ou le auai i le faletatala o le Malumalu o São Paulo ia Oketopa 1978 ma ulu atu i le potu o faamauga, lea na oo mai ai le aoaoga faavae o aiga e faavavau i lo’u loto, ma sa ou tatalo mo le tele o aso ia iloa po o le Ekalesia moni lenei.
E le o a’u o se tagata lotu ae na tausia a’u e ni matua o e sa ma na ou vaai ai i mea lelei i isi lotu. I lena taimi i lo’u olaga, sa ou faapea o lotu uma e taliaina e le Atua.
I le mavae ai o la’u asiasiga i le faletatala a le malumalu, sa ou saili i se tali e ala i le tatalo, o le mauaina o le faatuatua ma le talitonuga mautinoa o le a tali mai le Atua ia te a’u po o fea Lana Ekalesia i le lalolagi.
Ina ua mavae se tauiviga maoae faaleagaga, sa iu ina ou mauaina se tali manino, sa valaaulia a’u ina ia papatiso. Sa faia lo’u papatisoga i le aso 31 Oketopa, 1978, o le po ao lumanai le sauniga o le faapaiaga o le Malumalu o São Paulo.
Sa ou iloaina na silafia ma matua popole le Alii ia te a’u ao Ia tali mai i a’u tatalo.
I le taeao na sosoo ai, sa ma o ma lo’u toalua i São Paulo e auai i le sauniga o le faapaiaga o le malumalu.
Sa ma i ai iina, ae ou te lei iloaina pe faapefea ona faafetai i lena avanoa matagofie. O le aso na sosoo ai sa ma auai ai i se konafesi faale-eria.
Sa amata la maua faigamalaga i le Ekalesia, ma sa maua ni ma uo lelei o e na taliaina i maua i le taimi o lenei suiga i o maua olaga.
O vasega a tagata fou lea sa ma auai ai ia matou sauniga i Aso Sa i vaiaso taitasi na matagofie. Sa faatumuina i maua i le malamalama ma ma mananao ia vave ona uma le vaiaso ina ia ma maua atili ai lena meaai faaleagaga i le Aso Sa.
Sa ma tulimatai atu ma le naunautai ma lo’u toalua e ulu atu i le malumalu ia faamauina le ma aiga mo le faavavau. Na tupu lena mea i le tasi le tausaga ma le fitu aso mulimuli ane talu ona mavae lo’u papatisoga, lea sa avea ma se taimi matagofie. Sa ou lagona le pei ua vaeluaina le faavavau i le fata faitaulaga i le va o mea na tutupu muamua ma mea na tutupu ina ua maea le faamauga.
O le nonofo ai faaletulafono i le Talafatai i Sasae o le Iunaite Setete mo ni nai tausaga, sa ou masani i nisi o aai, ma sa tele ina laiti.
A ou faitau pe faalogo e uiga i mea na tutupu e oo atu ai i le Uluai Faaaliga, sa ta’ua se motu o tagata, lea ou te lei malamalama i ai.
Sa amata ona tulai ae ni fesili i lo’u mafaufau. Aisea na toefuataiina ai le Ekalesia i le Iunaite Setete ae le o Pasila po o Italia, le laueleele o ou tuaa?
O fea sa i ai na motu o tagata, o e sa aofia i le vaitaimi o le toe fiafia mai faalelotu ma le fememeai o lotu—lea na tupu uma lava i se nofoaga filemu ma le toafimalie?
Sa ou fesili i le toatele o tagata e uiga i ai ae lei maua se tali. Sa ou faitauina mea uma na ou iloaina i le faaPotukale sosoo ai ma le Peretania ae sa lei maua se mea e faatoafilemuina ai lo’u loto. Sa faaauau pea ona ou saili.
Ia Oketopa 1984, sa ou auai i se konafesi aoao o se fesoasoani i se au peresitene o le siteki. Ina ua maea, sa ou alu i Palamaira, Niu Ioka, naunau ia maua le tali.
O le taunuu ai iina, sa ou taumafai ina ia malamalama: Aisea na i ai ai iinei le Toefuataiga, ma aisea na i ai ai se vevesi faaleagaga? O fea na o mai ai tagata ia na ta’ua i le faamatalaga a Iosefa? Aisea na latou i ai ai iina?
O le tali sili ona talafeagai i lena taimi ona sa faamaonia e le Constitution a le I.S. le saolotoga.
Sa ou asiasi i le Fale o le Grandin, i lena taeao lea na lolomiina ai le lomiga muamua o le Tusi a Mamona. Sa ou alu i le Vao Paia, lea sa ou tatalo soo ai.
Sa tau leai se tasi i luga o le auala i lena tamai aai o Palamaira. O fea ua i ai le motu o tagata ia na ta’ua e Iosefa?
Sa ou filifili i lena aoauli ou te alu i le faatoaga a Peter Uitimera ma ina ua ou oo iina sa ou mauaina se alii i le faamalama o se fale laupapa. Sa i ai se susulu malosi i ona mata. Sa ou faafeiloai atu ia te ia ma amata ona fai atu na fesili e tasi.
Ona ia fesili mai lea ia te a’u, “E i ai sou taimi?” Sa ou fai atu ioe.
Sa ia faamatala mai o Vaituloto o Erie ma Ontario ma le Vaitafe o Hudson o loo i ai i lena eria.
I le amataga o le vaitau o le 1800 sa latou fuafua e fausia se ava mo le faatautaiga, lea e tatau ona pasia lena eria, ma e silia ma le 300 maila (480 km) le umi e oo atu i le Vaitafe o Hudson. O se galuega maoae mo lena taimi, ma sa na o le malosi faaletagata ma manu sa faalagolago i ai.
Sa avea Palamaira ma nofoaga autu mo nisi o na fausaga. Sa manaomia e kamuta ni tagata talenia, tagata tomai faapitoa, aiga, ma a latou uo. Sa amata ona fai mai le toatele o tagata mai nuu tuaoi, ma nofoaga tumamao, e pei o Aialani, e galulue i le ava.
Sa avea lea ma se taimi paia ma faaleagaga aua ua iu lava ina ou mauaina le motu o tagata. Sa latou aumaia a latou tu ma aga ma talitonuga. Ina ua ta’ua e le tagata a latou talitonuga, sa faamalamalamaina lo’u mafaufau ma tatalaina o’u mata faaleagaga e le Atua.
Sa ou malamalama i lena taimi, i le ala na saunia ai e le aao o le Atua, lo tatou Tama, i Lona malamalama sili, na saunia i Lana fuafuaga se nofoaga e aumai ai i le tama talavou o Iosefa Samita, tuu o ia i le ogatotonu o lena le mautonu faalelotu, aua o iina, i le Mauga o Kumora, na natia ai ia papatusi taua o le Tusi a Mamona.
O le tulaga lea mo le Toefuataiga, lea o le a lagona ai le siufofoga o le Tama ina ua toeitiiti mavae le lua afe tausaga, i se faaaliga matagofie, talanoa ai i le tama talavou o Iosefa Samita, ina ua alu o ia i le Vao Paia e tatalo ma faalogo: “O Lo’u Atalii Pele lenei, Faalogo ia te Ia!”
Sa ia vaai iina i ni Tagata se toalua, o lo laua pupula ma le mamalu e le mafaamatalaina. Ioe, sa toe faaali mai e le Atua o Ia Lava i le tagata. Sa amata ona mouese atu le pogisa lea na ufitia ai le lalolagi.
O valoaga e faatatau i le Toefuataiga ua amata ona faataunuuina: “Na a’u iloa foi le tasi agelu ua lele i le taulotoaiga o le lagi, ua ia te ia le tala lelei e faavavau e folafola atu i e nonofo i le lalolagi i atunuu uma, ma itu aiga, ma gagana eseese, ma nuu.”
I ni nai tausaga puupuu sa taitai atu ai Iosefa i faamaumauga o valoaga, feagaiga, ma sauniga ia na tuua e perofeta anamua, o la tatou Tusi a Mamona faapelepele.
Sa le mafai ona toefuataiina le Ekalesia a Iesu Keriso e aunoa ma le talalelei e faavavau, lea sa faaalia i le Tusi a Mamona o se isi molimau ia Iesu Keriso, o le Alo o le Atua, o le Tamai Mamoe a le Atua, o lē na aveese agasala a le lalolagi.
Sa fetalai atu Iesu i Lona nuu i Ierusalema:
“Ua ia te au foi isi mamoe e le o i lenei lotoa.”
“O au nei o le leoleo mamoe lelei, ua ou iloa a’u mamoe, ua iloa foi a’u e a’u mamoe.”
Ina ua tuua le faatoaga a Uitimera, ou te le manatua le faatofa atu. Na o lou manatuaina o loimata o tafe saoloto mai o’u mata. Sa tu tonu le la i le lagi matagofie.
Na i ai le olioli tele i lo’u loto ma sa faatoafilemuina lo’u agaga e le filemu. Sa faatumulia a’u i le agaga faafetai.
Ua ou iloa ma le manino le mafuaaga. Ua toe aumaia e le Alii ia te au le poto ma le malamalama.
I le taimi o la’u malaga i le fale, sa faaauau pea ona oo mai mau i lo’u mafaufau: o folafolaga na faia ia Tama Aperaamo o ona fua o le a faamanuiaina ai aiga uma i le lalolagi.
Ma mo lenei mea, o le a fausia malumalu ina ia mafai ai ona toe tuuina mai le mana faalelagi i le tagata i luga o le lalolagi ina ia mafai ona toe tuufaatasia aiga, e le o le oti e va ai i taua ae ia faatasia i le faavavau atoa.
“O aso e gata ai, e oo ina faatumauina ai o le mauga o i ai le fale o Ieova i tumutumu o atu mauga, e faamaulugaina foi e sili i mauga, ona gasolo ane ai lea o nuu uma i ai.”
Afai o oe lagonaina mai a’u ma e i ai ni fesili i lou loto, aua le faavaivai!
Ou te valaau atu ia te outou ia mulimuli i le faataitaiga a le Perofeta a Iosefa Samita ina ua ia faitau i le Iakopo 1:5, “A e afai ua leai se poto i so outou, ina ole atu ia i le Atua, o le foai tele mai i tagata uma ma le le toe tautaua.”
O le mea na tupu i Kumora o se vaega taua o le Toefuataiga, aua sa maua ai e Iosefa Samita papatusi ia na aofia ai le Tusi a Mamona. E fesoasoani lenei tusi ia tatou latalata atili ia Keriso nai lo se isi lava tusi i le lalolagi.
Ou te molimau atu ua valaauina e le Alii perofeta, tagatavaai, ma talifaaaliga e taitaia Lona malo i nei aso e gata ai ma i Lana fuafuaga e faavavau o aiga e ao ina tuufaatasia e faavavau. E popole o Ia i Ana fanau ma e Na te taliina a tatou tatalo.
Ona o Lona alofa tele, ua togiolaina e Iesu Keriso a tatou Agasala. O Ia o le Faaola o le lalolagi. Ou te molimau atu ai i le suafa paia o Iesu Keriso, amene.