Aufono a le Ekalesia

Vaaiga Aoao

O aufono e fesoasoani tatou te sailia ai le finagalo o le Alii i le lotogatasi ma le faatuatua. O aufono e galulue i tulaga uma o le Ekalesia, e aofia ai [tulaga] aoao, eria, siteki, uarota, korama, ma isi aufono faaleautaitai.

O le faamoemoega o aufono a le Ekalesia o le, saili lea ma maua mai faaaliga faalelagi. O aufono a le Ekalesia o ni siosiomaga ia e mafai ona tatou maua ai musumusuga e faia ai faaiuga, e tautua lelei atili ai tagata taitoatasi ma aiga, ma e fuafua ma faamaopoopo ai le galuega a le Ekalesia.

O aufono e ese lona faatinoga i totonu o le Ekalesia nai lo le faiga e fai ai i isi tino e faia faaiuga. E lē pulea e se vaega e matele i ai le toatele po o se faiga aoga, ma e le faia toatasia e le taitai ni faaiuga. Pe a folasia se fesili po o se manaoga i le aufono mo le iloiloina, “e fautuaina sui o le aufono e talanoa faamaoni mai o latou lava aafiaga patino ma mai o latou tulaga o ni taitai o faalapotopotoga” (Tusitaulima 2: Taitaiina o le Ekalesia [ChurchofJesusChrist.org], 4.6.1). A mae’a ona fefulifulisa’i ma le toto’a le fesili po o le manaoga, o i latou o loo auai i le aufono e tagai i faatonuga mai taitai o le Ekalesia ma mea na aoao mai e le Alii i totonu o tusitusiga paia. Latou te tagai foi po o a punaoa atonu e sili ona tali lelei ai le fesili pe faafetauia ai le manaoga.

O aufono e aumai faatasi ai le malamalamaaga loloto o tagata mai siosiomaga, aafiaga, ma manatu faaalia eseese. O nei eseesega e faamalosia ai le aufono, ma e tatau ona lagona e tagata uma le saogalemu e faaali ai ona lava manatu i se agaga o le alofa ma le agalelei. O faailoaga faapena e taua i le faamoemoega o aufono, o lea, e tatau ai i taitai ona faavae se agaga lea e lagonaina ai tagata uma ma faatauaina manatu faaalia uma. Pe a faafofoga atu sui o le aufono, ma manatulia ma le lotomaualalo lagona o isi, ma saili ia iloa le finagalo o le Tama Faalelagi, o le a mafai ona i ai se agaga o musumusuga ma le lotogatasi (tagai Mataupu Faavae ma Feagaiga 107:27–31).

Na saunoa mai le Perofeta o Iosefa Samita i le faamatalaina o aufono e faapea, e tatau i tagata taitoatasi ona, “saunoa i lona lava taimi, ma i lona lava tulaga, … ina ia i ai le faatulagaga atoatoa i mea uma, ma o tagata uma lava, ae na te le’i faia se faauilavea i soo se mataupu ua [aumaia] i o latou luma, mo la latou iloiloga, e tatau ona mautinoa e mafai ona latou tuuina atu se manatu malamalama i le mataupu ae le o le faasalalau o le pogisa, ma o lana faauilavea ia faavaeina i le amiotonu, lea e mafai ona faia i le tuuina faalatalata o i tatou lava e suesue le mafaufau ma le finagalo o le Alii, o lona Agaga e faailoa mai ai i taimi uma, ma faaalia ai i le malamalamaaga o tagata uma, o loo i ai lona Agaga” (Manuscript History of the Church, vol. B-1, pp. 688–89, josephsmithpapers.org).

E sili ona manuia aufono a le Ekalesia pe a faataatitia ese e i latou uma e aafia ai mea patino e fiafia i ai ae saili ia iloa le finagalo o le Alii—pe a latou mulimuli i le apoapoaiga a Alema: “Filifili faatasi ma le Alii i au mea uma e fai, ma o le a ia taitai oe mo le lelei” (Alema 37:37).

E le faia e le taitai o le aufono le faaiuga i le ala e foia ai se fesili sei vagana ua ia faafofoga i le talanoaga. O le taitai e “fautuaina le talanoaga e aunoa ma le fuaaoina” ma “fesili atu i fesili ma e mafai ona fesili i sui patino o le aufono mo a latou fautuaga.” O le taitai “e faalogologo o ia ma le toto’a a o lei faia se faaiuga. O nei talanoaga e tatau ona aumaia ai se agaga o musumusuga” (Tusitaulima 2, 4.6.1). O le taitai, pe a uma ai ona fefautuaai ma le vaega, i le mulimuli ai i le musumusuga a le Agaga, e mafai ona faia se faaiuga pe fautua atu se ala o faatinoga e iloilo e le aufono.

Pe a iloiloina manaoga po o fesili ma’ale’ale, e faaeteete lava sui auai o le aufono ia le talanoaina faamatalaga patino. O nisi mataupu e sili atu le taatia mo talanoaga e le faalauaiteleina ma taitai.

E saili aufono ia autasi i a latou faaiuga (tagai Mataio 18:19; Mataupu Faavae ma Feagaiga 42:3; 107:27). “Afai e malosi ni lagona lē mautinoa o sui auai o le aufono e uiga i se faaiuga taua, e mafai ona faatali le [taitai] mo le isi fonotaga a le aufono, e iloilo atili ai le mataupu ma sailia le faamautinoaga faaleagaga ma le lotogatasi.” A uma ona ia faia o se faaiuga, “e ao i sui o le aufono ona lagolagoina i se agaga o le lotogatasi ma le paegamalie” (Tusitaulima 2, 4.6.1).

Tusifaamaumau Ou Lagona Uunai