Amataga o le Tusi a Aperaamo

O le sailia o tali i a tatou fesili e mafai ona tatou latalata atili ai ia Iesu Keriso pe afai tatou te faaaogaina mataupu faavae lelei. E taua le suesueina o punavai faatuatuaina pe a sailia tali i fesili e faatatau i le talalelei. Tagai i le autu “Faafesootai Punavai Faatuatuaina” e suesue ai nisi motugaafa i le taliina o fesili.

Vaaiga Aoao

O le tusi a Aperaamo o se tusi o tusitusiga paia musuia na tuuina mai e ala i faaaliga i le Perofeta o Iosefa Samita. E mulimuli i le tala faaletusipaia e uiga i le augātamā anamua i nisi o itu ma faaopoopo mai ai faamatalaga tāua e uiga i lona soifuaga ma a’oa’oga. O loo i ai upumoni loloto e uiga i le natura o le Atua, Lana sootaga ia i tatou o Ana fanau, ma le faamoemoega o lenei olaga.

O lenei tusi o tusitusiga paia na faaali atu ia Iosefa Samita e amata i le 1835 i se taimi sa ia suesueina ai nisi o papairusi o Aikupito anamua na faatauina e le Au Paia. E to’atele tagata na vaai i le papairusi, ae e le o i ai se tala o se tasi na vaaitino i le faagasologa o le faaliliuga. E na o ni nai fasi pepa o tusi tā’ai uumi papairusi sa iā Iosefa o loo i ai i aso nei. E lē o iloa le sootaga o tusitusiga a Aikupito i na papairasi ma tusitusiga paia o loo i ai i aso nei.

Atonu na faaliliuina e Iosefa Samita le tusi a Aperaamo mai vaega o papairusi o loo misi nei, pe atonu foi o lana suesuega o papairusi o se mea na faaosofia ai se faaaliga e uiga ia Aperaamo. Po o le ā lava le tulaga, e le’i faaliliuina e Iosefa le tusi i ni auala masani. I le saunoa ai e uiga i le faaliliuga o le Tusi a Mamona, na fetalai ai le Alii, “E le mafai ona e tusia mea paia vagana ai ua tuuina atu ia te oe mai ia te au.” E faatatau fo’i lenā mataupu faavae e tasi i le tusi o Aperaamo.

E lē mafai ona fo’ia le moni ma le tāua o le tusi a Aperaamo e ala i felafolafoa’iga a tagata atamamai. O le tulaga o le tusi i le avea ai o se tusi e paia o loo taoto i totonu o upumoni e faavavau o loo aoaoina mai ai ma le agaga mamana o loo aumai ai. E mafai e i tatou taitoatasi ona suesue i ona aoaoga ma tatalo mo se faamaoniga mai le Agaga Paia o lana sāvali e mai le Atua.

Taiala e faatatau i le suesueina o le talalelei:

“Perofeta”
“Faaaliga”
‟Upumoni”

Suesueina o Au Fesili

Na faapefea ona faaliliu e Iosefa Samita le Tusi a Aperaamo?

E lei faamatalaina mai e le Perofeta o Iosefa Samita le auala na ia faaliliuina ai le tusi a Aperaamo. Ua tatou iloa sa latou suesueina ma isi ma le faaeteete tusi tā’ai papairusi Aikupito na maua e le Ekalesia, ae sa le’i malamalama o ia i le gagana Aikupito anamua pe sa ia mauaina ni meafaigaluega e mafai ona fesoasoani ia te ia e faaliliu ai le tusiga i auala masani. Na manatua e i latou sa galulue ma Iosefa o le faaliliuga na faaalia mai e le Atua. E pei ona matauina e Ioane Uitimera, “Na vaai Iosefa le Tagatavaai i nei Talafaamaumau ma e ala i le faaaliga a Iesu Keriso na mafai ai ona faaliliuina nei faamaumauga.” Ua fautua mai punavai atonu na faaaoga e Iosefa Samita se maa a tagatavaai a o ia faalauina atu le anotusi o le tusi a Aperaamo.

O le tele o papairusi sa iā Iosefa ua leiloloa nei, e ui lava o loo i ai nisi o fasi pepa o loo i ai. E aofia ai ni fasi vaega se lua o le Tusi o le Mānava mo Horos; fasi vaega e fa ma ni nai fasimea o le Tusi a e ua Maliliu mo Semminis; ma se fasi vaega mai le Tusi a e ua Maliliu mo Nefer-ir-nebu. E ioe uma lava tagata o le Au Paia o Aso e Gata Ai ma tagata e le o ni tagata o le Au Paia o Aso e Gata Ai e popoto i le faaAikupito e faapea, o mataitusi o loo i nei fasi vaega e le tutusa ma le faaliliuga o loo tuuina mai i le tusi a Aperaamo.

E talitonu nisi o le Au Paia o Aso e Gata Ai o le anotusi o le tusi a Aperaamo na maua i luga o papairusi o loo misi nei. O isi ua manatu faapea o le su’esu’eina e Iosefa o papairusi na uuna’ia ai se faaaliga e faatatau i mea autū na tutupu ma a’oa’oga i le soifuaga o Aperaamo, e pei lava ona sa ia mauaina muamua se faaaliga e faatatau i le soifuaga o Mose a o su’esu’eina le Tusi Paia. E tusa ai ma lenei manatu, o papairusi na avea ma mea na faaosofia ai se faaaliga e uiga ia Aperaamo.

E le tu le Ekalesia i se itu o nei manatu. Ua na ona faamautu mai ai o le faaliliuga na faataunuuina e ala i faaaliga. E pei o le Tusi a Mamona, na oo mai le tusi a Aperaamo e ala i “le meaalofa ma le mana o le Atua.”

O le a le sootaga i le va o le tusi a Aperaamo ma pepa o faamatalaga o le gagana Aikupito?

Mai ia Iulai 1835 e oo ia Novema 1835, na fatuina ai e Iosefa Samita ma ana tusiupu ni pepa o faamatalaga e faatatau i mataitusi o loo i luga o papairusi a Aikupito. E aofia ai mea ua ta’ua o “Pepa o Faamaumauga o le Alafapeta Aikupito” ma le “Kalama ma le Alafapeta o le Gagana Aikupito.” O pepa o faamatalaga e foliga mai o se vaega o se sailiga a Iosefa ma isi ina ia malamalama i gagana ma manatu faavae anamua ina ia mafai ona fesootai atu i se taimi paia ua tuanai. Sa kopiina e Iosefa Samita ma ana tusiupu ia mataitusi mai papairusi ma isi punavai i totonu o nei pepa o faamatalaga ma fautuaina mai ni faamalamalamaga se tele (ua ta’ua o “tikeri”) mo mataitusi taitasi. O nei faamalamalamaga e masani lava ona lē tutusa ma faaliliuga a tagata atamamai.

E lei faamatala mai e Iosefa Samita ma e na i ai i lena taimi pe faapefea ona fesootai nei pepa o faamatalaga i le tusi a Aperaamo. E talitonu nisi tagata atamamai o se taumafaiga e aoao le gagana Aikupito e faaaoga ai vaega ua uma ona faaalia mai o le tusi a Aperaamo. O isi ua faaiuina faapea na fatuina e Iosefa ma ana paaga ia pepa o faamatalaga o le gagana Aikupito o se vaega o le faagasologa lea na maua ai e Iosefa faaaliga—e ala i le “suesue muamua i ai i [lona] mafaufau”. Ae o isi e talitonu e leai se tasi o nei manatu e sa’o.

Pe o faaaogā e le tusi a Aperaamo le gagana mai le King James Version o le Tusi Paia?

Na i ai se aafiaga loloto o le King James Version (KJV) o le Tusi Paia i le gagana Peretania. Sa faapitoa lava le lauiloa i tagata i le taimi o Iosefa Samita. O faaaliga i le Mataupu Faavae ma Feagaiga e masani ona aofia ai fuaitau o loo maua i le KJV. E faapena foi faaliliuga o le Tusi a Mamona, tusi a Mose, ma le tusi a Aperaamo. O se mea masani le i ai o le gagana KJV po o upu ma fasifuaitau mai isi punavai na iloa e Iosefa Samita i nei mau. Na faamalamalama mai e le Alii na te tuuina mai faaaliga i Ana auauna “e tusa ma le ala o la latou gagana, ina ia latou malamalama ai.” Sa matuai aafia le gagana a Iosefa i le aganuu sa ia ola ai aemaise lava i lona masani i le KJV.

E tele fuaitau mai le tala a Aperaamo e fesootai ma le tusi o Kenese. E ui lava o nei fuaitau e aofia ai nisi o faaupuga mai le tala masani Faatusi Paia, ae o loo i ai fo’i ni eseesega tāua e mafai ona faatamaoaigaina ai lo tatou malamalama.

O le a se mea ua tatou iloa e uiga i faamalamalamaga a Iosefa Samita e uiga i ata faatusa o le tusi a Aperaamo?

O loo i ai i le tusi a Aperaamo ni ata lolomi se tolu, ua ta’ua o ata faatusa, lea e faavae i ata o loo i luga o papairusi. O nei ata faatusa na aofia ai ina ua faatoa lolomiina le tusi a Aperaamo i le 1842. O faamalamalamaga a Iosefa Samita e uiga i ata na lolomiina faatasi ma ata faatusa. O loo faasino atu ata tusi i le tusi a Aperaamo. Mo se faataitaiga, o le Aperaamo 1:12 o loo faasino i “le faatusa i le amataga o lenei talafaamaumau,” o lona uiga o le Ata Faatusa 1.

O le tele o faamalamalamaga na lolomiina e Iosefa faatasi ma ata faatusa e lē tutusa ma faaliliuga a tagata su’esu’e faaAikupito i aso nei. Peita’i, ua mātauina e tagata atamamai nisi o mea e o gatusa ai. Mo se faataitaiga, na faamatalaina e Iosefa Samita ia ata e fa i le ata 6 o le Ata Faatusa 2 o “lenei lalolagi i ona itu e fa.” Ua faapena fo’i ona faaliliuina e isi tagata atamamai ia faatusa tutusa i isi tusitusiga a Aikupito anamua. O le Ata Faatusa 1 o loo i ai se atua korokotaila o loo aau i le mea na ta’ua e Iosefa Samita “o le vateatea i luga o o tatou ulu.” Ua faapena foi ona faailoa mai e tagata atamamai ia manatu faa-Aikupito o le lagi o “se vasa faalelagi.”

Tatou te le iloa pe faapefea ona fesootai ia ata faatusa i le tusiga. E i ai faamaoniga e faapea, o nisi tusitala Iutaia i le vaitaimi na faia ai papairusi, na fetuuna’i ma faaaofia ai ata ma tala faaAikupito i a latou lava tusitusiga paia, e aofia ai tusitusiga e faatatau iā Aperaamo. Atonu na toe faaaogā fo’i nei ata tusi i se auala faapena.

Pe ua manino ea le Ekalesia i mea ua tatou iloa e uiga i papairusi ma o latou anotusi?

Ioe. I lona talafaasolopito atoa, sa faasoa faalauaitele atu ai e le Ekalesia lona malamalama e uiga i tusitusiga faa-Aikupito ia e fesootai ma le tusi a Aperaamo. Sa i ai i le Ekalesia ni papairusi Aikupito se lua ma ni fasi vaega o le tasi vaetolu mai le 1835 i le 1847. I lenā vaitaimi, e masani ona faaali atu i tagata lautele ia papairusi. Ina ua mavae le maliu o Iosefa Samita, sa faatau atu e Ema Samita ma lona toalua lona lua i se alii e igoa ia Apelu Combs, o le na vaevaeina ia le itiiti ifo ma le lua ni faaputuga ma faatau atu i isi vaega. Sa leiloloa ai le tele. Ina ua maua e le Ekalesia vaega o papairusi na totoe mai le Metropolitan Museum of Art i le Aai o Niu Ioka i le 1967, sa ia lolomiina se faasilasilaga o le mauaina ma ata o fasi vaega o loo i le Deseret News ma i le mekasini a le Ekalesia i lena taimi, o le Improvement Era. O nei tusiga na talanoaina ai le amataga o fasi vaega ma lo latou sootaga i le mea na faailoa mai i lena taimi o le Tusi o e ua Maliu a Aikupito.

Mai lena taimi, na tuuina atu ai e taitai o le Ekalesia i nisi o tagata atamamai le avanoa tuusao i fasi pepa o papairusi ma sa lolomiina uma e tagata atamamai o le Au Paia o Aso e Gata Ai ma tagata atamamai e le o ni Au Paia o Aso e Gata Ai ni faaliliuga ma ni suesuega o na tusitusiga. E na o sina vaega itiiti o papairusi e lua ma fasi papairusi eseese na umia e Iosefa Samita ua iloa na faasaoina. I le 2018, na lolomiina ai e le Pepa a Iosefa Samita ni ata fou ma ni iloiloga o nei fasi vaega uma.

E fia fasi papairusi o loo misi i aso nei?

E masani lava ona ioe tagata atamamai faapea o papairusi o loo i ai nei ua na o sina vaega itiiti o uluai tusi tā’ai e lua ma isi fasi vaega na muai maua e Iosefa Samita ma le Ekalesia. Ua faaaogā e tagata su’esu’e ni auala eseese e fuafua ai le uluai uumi o tusi tā’ai. O a latou fuafuaga o mea ua tatou maua i aso nei e eseese mai le itiiti ifo ma le 2.5 pasene i le 30 po o le 45 pasene o papairusi na iā Iosefa.

Aisea ua faapea mai ai le tusi a Aperaamo na tusia i le lima o Aperaamo lava ia?

Ina ua faatoa lolomiina le tusi a Aperaamo i le 1842, sa tatalaina i se faamalamalamaga e faitauina faapea: “O se faaliliuga o ni Talafaamaumau mai anamua na oo mai i o matou lima, mai Loa o Aikupito, ua faapea mai o tusitusiga a Aperaamo, a o i ai o ia i Aikupito, ua ta’ua o le Tusi a Aperaamo, na tusia e lona lava lima, i luga o papairusi.” O se ulua’i tusiga o le tusi a Aperaamo o loo i ai se folasaga faapena. O le folasaga e pei ona i ai i aso nei atonu na fatuina ina ua lolomiina le tusi a Aperaamo i le 1842. O folasaga faapena sa aofia ai i le lolomiina o nisi o isi tusitusiga o faaaliga a Iosefa Samita.

Ua faaalia i su’esu’ega e faapea, na tusia papairusi i le va o le seneturi lona tolu ma le seneturi lona lua T.L.M., ina ua leva ona soifua Aperaamo. E lē o faaleaoga mai i lenei aso le anotusi o le tusi a Aperaamo. O le tele o tusitusiga anamua o loo i ai i aso nei o ni kopi o kopi. E faapena fo’i le tele o taimi na toe kopiina ai le tusi o Aperaamo i le tele o seneturi, ae o loo faapea mai pea o Aperaamo o le tusitala.

Pe e ogatusa le tusi a Aperaamo ma mea ua tatou iloa e uiga i Sasa’e Latalata anamua?

O loo i ai i le tusi o Aperaamo faamatalaga au’ili’ili e lē o maua i le Tusi Paia, ae e ōgatusa ma lomiga a le lalolagi anamua. Mo se faata’ita’iga, o nisi o igoa o tagata ma nofoaga e tutusa lava ma igoa o loo maua i faamaumauga anamua. Mo se faataitaiga, o le “laufanua valevalenoa o Olisema,” sa faafesootai e nisi o tagata atamamai i se taulaga i matusisifo o Suria e ta’ua o Ulisumu. O se mea e matua talafeagai lava lenei mea mo Olisema e mulimuli i faiga masani o gagana. E faapena foi, o le atua o Elekana ua fautuaina mai e nisi o tagata atamamai o le Au Paia o Aso e Gata Ai e faatusa i se ituaiga faapuupuu o le faalaniga paia o El Koneh Artzu, lea ua lauiloa mai tusitusiga eseese a tagata Iutaia i matusisifo Semitic ma o lona uiga o se mea e pei o le “Atua, Foafoa o le Lalolagi.”

O nisi o autu lautele ma le faatulagaga o tala o le tusi a Aperaamo e ogatusa ma tala mai punavai anamua e lē faaletusi paia. E aofia ai le tamā o Aperaamo, o Tara, o se tagata ifo i tupua; o se oge na taia ai le nuu o Aperaamo; ma se agelu na laveaiina Aperaamo mai taulaga e osi i tagata i lima o se farao Aikupito. O loo faasino fo’i tusitusiga anamua i le faatonuina e Aperaamo o tagata Aikupito e uiga i le lagi. Mo se faataitaiga, na tusi Eupolema, o lē na soifua i lalo o le pulega a Aikupito i le seneturi lona lua T.L.M., e faapea, na aoao atu e Aperaamo le su’esu’eina o mea i le vateatea ma isi saienisi i ositaulaga Aikupito. O se papairusi o le seneturi lona tolu T.L.M. mai se potutusi o le malumalu o Aikupito o loo ta’ua ai le igoa o Aperaamo ma se ata e talitutusa ma le Faatusa 1 i le tusi a Aperaamo. O nisi o nei faamatalaga e uiga i le soifuaga o Aperaamo sa le iloa e le lautele i aso o Iosefa Samita.

E ui e moni nei faataitaiga, ae o loo i ai foi le tele o faataitaiga o faaliliuga a Iosefa Samita o faaupuga e le ogatusa ma mea ua tatou iloa i le taimi nei e uiga i le lalolagi anamua. E ui ina faailoa atu e tele mea tatou te le malamalama i ai e uiga i le faagasologa o le faaliliuga, ae e taua le manatua o le moni ma le taua o le tusi a Aperaamo e le mafai ona foia e ala i felafolafoaiga faaleatamai e faatatau i le faaliliuga o le tusi. O le faitauina o le tusi a Aperaamo, mafaufau loloto i ona anotusi, ma tatalo e uiga i ona aoaoga e mafai ona fesoasoani ia te oe e maua ai se molimau faaleagaga i lona taua e faavavau.

E mafai faapefea ona ou maua se molimau i le tusi a Aperaamo ma isi tusitusiga paia na faaali atu ia Iosefa Samita?

E tele mea tatou te le iloa e uiga i le auala na faaali mai ai le tusi a Aperaamo ia Iosefa Samita. Ae i le tele o itu, o a tatou fesili e uiga i le faagasologa e itiiti le taua nai lo le fesili pe na faaali mai e le Atua se tusitusiga paia fou ia Iosefa Samita. O se mataupu lenei o le faatuatua. O le auala sili e maua ai le faamaoniga faaleagaga i lenei fesili o le faitau lea o le tusi a Aperaamo, mafaufau loloto i upumoni o loo faaalia mai ai, faatino ona aoaoga, ma saili se molimau mai le Agaga Paia. O lenei faagasologa e mafai ona fesoasoani ia i tatou e latalata atili atu ai ia Iesu Keriso. O le tofotofoga sili lena o le taua o le tusi a Aperaamo.

Aoao atili

O le Tusiga o Autu o le Talalelei: “Faaliliuga ma le Talafaasolopito o le Tusi a Aperaamo”