Iosefa Samita

O Iosefa Samita o le uluai perofeta o aso e gata ai. Na filifilia e le Alii ia Iosefa Samita e avea ma Ana perofeta ma ia toefuatai le talalelei a Iesu Keriso ma Lana Ekalesia i le lalolagi.

Vaaiga Aoao

A o avea ma se tama talavou i le 1820, sa fia iloa e Iosefa Samita pe o le fea o ekalesia e moni. A o sailiili o ia i le Tusi Paia mo se fesoasoani, sa ia faitau ai e tatau ona ia fesili atu i le Atua. O le faatino ai o lenei fautuaga, sa alu atu Iosefa i le vao e lata ane i lona fale ma tatalo ai. Na faafuasei ona susulu ae se malamalama i ona luga ma na faaali mai le Tama Faalelagi ma Iesu Keriso ia te ia. Ina ua fesili Iosefa po o le fea o lotu e tatau ona auai, sa tau mai e le Faaola ia te ia e aua nei auai i se tasi o lotu sa i ai i lena taimi ona sa latou aoaoina aoaoga faavae sese. E ala i lenei aafiaga ma le tele o isi na mulimuli ane ai, na filifilia e le Alii ia Iosefa e avea ma Ana perofeta ma ia toefuatai le talalelei a Iesu Keriso ma Lana Ekalesia i le lalolagi.

Ina ua faamaonia e Iosefa Samita ona tauaogaina, sa tuuina mai ia te ia se misiona paia o se perofeta a le Atua. Na tauala mai ia te ia, le faataunuuina e le Alii o se galuega tele ma le ofoofogia lea na aofia ai le aumaiga o le Tusi a Mamona, toefuataiga o le perisitua, faaalia mai o upumoni taua o le talalelei, faatulagaina o le Ekalesia a Iesu Keriso, ma le faavaeina o galuega o le malumalu. I le aso 27 o Iuni, 1844, na fasiotia ai Iosefa Samita ma lona uso o Ailama i se osofaiga e ni tagata faatupu vevesi na faaauupegaina. Sa laua faamauina a laua molimau i o laua toto.

Ina ia atoatoa se molimau o le talalelei toefuataiina, e ao ona aofia ai se molimau e uiga i le misiona paia a Iosefa Samita. O le moni o Le Ekalesia a Iesu Keriso o le Au Paia o Aso e Gata Ai e taoto lea i le moni o le Uluai Faaaliga ma isi faaaliga na tuuina mai e le Alii i le Perofeta o Iosefa. I le Mataupu Faavae ma Feagaiga ua tatou iloa ai o Iosefa Samita, le Perofeta ma le Tagatavāai a le Alii, e tele atu mea na ia faia, vagana ai lava Iesu, mo le faaolataga o tagata i lenei lalolagi, nai lo se isi lava tagata na ola ai (Mataupu Faavae ma Feagaiga 135:3).

O le iloaina o le moni o le molimau a Iosefa Samita e manaomia ai tagata sailiili taitoatasi faamaoni o le upumoni e suesue ia faamaumauga ona faaaoga lea o le faatuatua atoa ia Keriso e ole ai i le Atua i le tatalo faatauanau, ma le lotomaulalo pe ua moni le faamaumauga. Afai e ole atu le tagata sailiili ma le loto faamaoni e faatino le tali e pei ona faaali mai e le Agaga Paia, o le a faaalia mai le moni o le faaaliga a Iosefa Samita. O lenei auala, e mafai ai e tagata taitasi ona iloa sa tautala faamaoni Iosefa Samita ina ua ia tautino mai, “Sa ou vaai i se faaaliga vaaia; sa ou mautinoa lena mea, ma sa ou mautinoa sa silafia e le Atua lena mea, ma e lē mafai ona ou faafitia lena mea” (Iosefa Samita—Talafaasolopito 1:25).

Tusifaamaumau Ou Lagona Uunai