Tusi a Mamona

O le Tusi a Mamona o se tasi molimau ia Iesu Keriso ma ua faamaonia upumoni o loo maua i le Tusi Paia. A o talatala mai i le Tusi Paia mea na tutupu i le Atululuga i Sasa’e, o le Tusi a Mamona ua tusifaamaumauina ai soifuaga o e na nofoia le atu Amerika anamua. O le tusi na tusia e le toatele o perofeta anamua e ala i le agaga o valoaga ma faaaliga.

Vaaiga Lautele

Tusifaamaumau Ou Lagona Uunai

O Le A le Tusi a Mamona?

O le Tusi a Mamona o se tasi molimau ia Iesu Keriso ma ua faamaonia upumoni o loo maua i le Tusi Paia. E mamao lava mai le ta’ufaatauvaaina o le Tusi Paia, o le Tusi a Mamona e lagolagoina lana molimau ia Iesu Keriso. Fai mai se tasi o fuaitau e faapea, o le Tusi a Mamona “o le a faamaonia ai le moni” o le Tusi Paia “ma o le a faailoa atu ai i ituaiga, gagana, ma tagata uma, o le Tamai Mamoe a le Atua o le Alo lea o le Tamā Faavavau, ma o le Faaola o le lalolagi; ma e ao i tagata uma ona o mai ia te ia, pe e lē mafai ona faaolaina i latou” (1 Nifae 13:40).

I ona fuaiupu e silia ma le 6,000, e toetoe lava faa 4,000 taimi o loo faatatau atu ai le Tusi a Mamona ia Iesu Keriso ma e ala i suafa eseese e 100: “Ieova,” “Emanuelu,” “Mesia Paia,” “Tamai Mamoe a le Atua,” “Faaola o Isaraelu,” ma faapena ai lava.

O ia voluma e lua o tusitusiga paia o se tuufaatasiga o aoaoga e pei ona tusifaamaumauina ai e perofeta anamua. A o talatala mai i le Tusi Paia mea na tutupu i le atululuga i sasa’e, o le Tusi a Mamona ua tusifaamaumauina ai soifuaga o e na nofoia le atu Amerika anamua.

O le tusi na tusia e le toatele o perofeta anamua e ala i le agaga o valoaga ma faaaliga. “O a latou upu, na tusia i papatusi auro, na sii mai ma otooto e se perofeta-tusitalafaasolopito e igoa ia Mamona.

“O le mea aupito sili ona taua na tupu ua faamaumauina i le Tusi a Mamona, o le auaunaga patino lea a le Alii o Iesu Keriso i totonu o tagata sa Nifaē, ina ua mavae lona toetu mai. Ua folasia mai ai aoaoga faavae o le talalelei, ua faatulaga mai ai le fuafuaga o le faaolataga, ma ua taʼu mai ai foi i tagata mea e ao ona latou faia e maua ai le filemu i le olaga nei ma le olataga e faavavau i le olaga a sau.

“O le aso na atofaina, na tuuina mai ai papatusi ia Iosefa Samita, o lē na faaliliuina e ala i le meaalofa ma le mana o le Atua. O lenei talafaamaumau ua lomia nei ma faasalalauina i gagana e tele o se molimau fou ma faaopoopo o Iesu Keriso o le Alo o le Atua soifua, ma o i latou uma foi o e e o mai ia te ia ma usiusitai i tulafono ma sauniga o lana talalelei e mafai ona faaolaina.

“Matou te valaaulia tagata uma e i soo se mea, ia faitau i le Tusi a Mamona, ia mafaufau loloto i ai i o latou loto le savali o i ai, ona ole atu lea i le Atua, le Tamā Faavavau, i le suafa o Keriso pe ua moni le tusi. O latou e mulimuli i lenei ala ma ole atu i le faatuatua, o le a latou maua se molimau i le moni ma le paia e ala i le mana o le Agaga Paia. (Tagai i le Moronae 10:3–5).

“O i latou o e e mauaina lenei molimau paia mai le Agaga Paia o le a latou iloa foi e ala i lea lava mana o Iesu Keriso o le Faaola o le lalolagi, o Iosefa Samita o lana talifaaaliga ma lana perofeta i aso nei e gata ai, ma O Le Ekalesia a Iesu Keriso o le Au Paia o Aso e Gata Ai o le malo o le Alii ua toefaatuina i luga o le lalolagi, e saunia ai mo le afio mai faalua o le Mesia” (mai le faatomuaga o le Tusi a Mamona).