Tusitusiga Paia

O le faamoemoega autu o tusitusiga paia o le molimau lea ia Iesu Keriso ma taialaina fanau a le Atua ina ia mafai ona latou o mai ia te Ia ma maua le ola e faavavau. O tusitusiga paia faamaoniaina a le Ekalesia, e ta’ua foi o tusitusiga faavae, e aofia ai le Tusi Paia, le Tusi a Mamona, le Mataupu Faavae ma Feagaiga, ma le Penina Tautele.

Vaaiga Aoao

Pe a tusitusi pe tautala tagata paia o le Atua e ala i le Agaga Paia, o a latou upu “o tusitusiga paia ia, o le finagalo lea o le Alii, o le mafaufau lea o le Alii, o le afioga lea o le Alii, o le siufofoga lea o le Alii, ma o le mana lea a le Atua mo le olataga” (Mataupu Faavae ma Feagaiga 68:4). O tusitusiga paia faamaoniaina a le Ekalesia, e ta’ua foi o tusitusiga faavae, e aofia ai le Tusi Paia, le Tusi a Mamona, le Mataupu Faavae ma Feagaiga, ma le Penina Tautele.

O le faamoemoega autu o tusitusiga paia o le molimau lea ia Keriso ma taialaina fanau a le Atua ina ia mafai ona latou o mai ia te Ia ma maua le ola e faavavau (tagai Ioane 5:39; 20:31; 1 Nifae 6:4; Mosaea 13:33–35). Na aoao mai le perofeta o Le Tusi a Mamona o Mamona:

“Soo se tasi e manao i ai ona piimau i luga i le afioga a le Atua, lea ua vave ma mamana, lea o le a veteina ai le poto leaga ma mailei ma fuafuaga uma a le tiapolo, ma taitai atu ai le tagata o Keriso i le ala lauitiiti ma vaapiapi, i luga atu o le vanu pagatia tumau-faavavau lea ua saunia e tofatumoanaina ai e e amioleaga —

“Ma faatulaueleele o latou agaga, ioe, o latou agaga ola pea, i le aao taumatau o le Atua i le malo o le lagi, e nonofo i lalo faatasi ma Aperaamo, ma Isaako, ma faatasi ma Iakopo, ma faatasi ma o tatou tama paia uma, e le toe o atu i fafo” (Helamana 3:29–30).

O le Atua, lea e tutusa “ananafi, i le aso, ma le faavavau” (2 Nifae 29:9), ua faaauau ona faaalia tusitusiga paia i aso nei e pei ona Ia faia i aso anamua. Ua fautuaina e perofeta o Aso e Gata ai tagata i soo se mea ia suesue i tusitusiga paia i aso uma, e aofia ai le Tusi Paia, le Tusi a Mamona, le Mataupu Faavae ma Feagaiga, ma le Penina Tau Tele. Latou te uunaia suesuega faaletusi paia a tagata taitoatasi ma aiga. Ua latou fautuaina i tatou, e pei ona fautua atu Nifae i ona uso, ina ia faatatau tusi paia uma ia i tatou, saili auala e faatatau ai faamaumauga paia o anamua i o tatou olaga i aso nei (tagai i le 1 Nifae 19:23–24). Ua latou fautuaina i tatou e “suesue outou i tusi” (Ioane 5:39) ma “taumamafa fiafia i afioga a Keriso” (2 Nifae 32:3). O le suesueina ma le maelega o tusitusiga paia i aso taitasi, e fesoasoani e saunia ai tagata taitoatasi e maua le taitaiga a le Agaga Paia. E fausia ai le faatuatua, faamalolosia ai mai faaosoosoga, faafiafia ai, ma fesoasoani e latalata atu ai i lo tatou Tama Faalelagi ma Lona Alo Pele.

Tusifaamaumau Ou Lagona Uunai

O Le Tusi Paia

Ua vaevaeina le Tusi Paia i ni vaega se lua: le Feagaiga Tuai ma le Feagaiga Fou. O le Feagaiga Tuai o se faamaumauga paia o fegalegaleaiga a le Atua ma Lona nuu o le feagaiga i le Nuu Paia. E aofia ai aoaoga a perofeta e pei o Mose, Iosua, Isaia, Ieremia, ma Tanielu. O le Feagaiga Fou ua faamaumauina le fanau mai, galuega faaletino, ma le Togiola a le Faaola. E faaiu i le galuega talai a soo o le Faaola.

Ona o le Tusi Paia na faaliliuina i le tele o taimi, ua lolomiina i lomiga eseese. I le FaaPeretania, o le Lomiga a King James o le Tusi Paia ua taliaina o se tusitusiga paia e le Ekalesia.

I Le Ekalesia a Iesu Keriso o le Au Paia o Aso e Gata Ai, tatou te faaaloalo i le Tusi Paia ma ona aoaoga paia. E mafai ona tatou maua le malosi, mafanafana, ma le taitaiga mai tala faatusipaia o fegalegaleaiga a le Atua ma Lona nuu.

O Le Tusi a Mamona: O Se Tasi Molimau ia Iesu Keriso

O le Tsui a Mamona na oo mai i lenei tisipenisione e ala mai le finagalo o le Alii. O se faamaumauga o fegalegaleaiga a le Atua ma tagata na soifua i Amerika anamua. Na vaneina e perofeta a le Alii uluai faamaumauga i papatusi auro. Na folafola mai e le Alii faapea o le Tusi a Mamona o loo i ai “le atoatoaga o le talalelei a Iesu Keriso” (Mataupu Faavae ma Feagaiga 20:9; tagai foi Mataupu Faavae ma Feagaiga 42:12).

I le aso 22 o Setema, 1827, na tuuina atu ai e se agelu e igoa ia Moronae—le perofeta mulimuli o le Tusi a Mamona—nei faamaumauga i le Perofeta o Iosefa Samita. Na faaliliuina e le Perofeta o Iosefa le faamaumauga i le FaaPerretania, i le meaalofa o le mana o le Atua. Talu mai lena taimi, ua faaliliuina le Tusi a Mamona i le tele o isi gagana.

O le faamoemoega autu o le Tusi a Mamona o le faatalitonu lea o tagata uma “o Iesu o le Keriso, le Atua Faavavau, ua faaali mai o ia lava i atunuu uma” (itulau autu o le Tusi a Mamona). Ua ia aoao i tagata uma e tatau ona “o mai ia te ia, pe e le mafai ona faaolaina i latou” (1 Nifae 13:40). Na aoao mai Iosefa Samita faapea o le Tusi a Mamona o “le maa’au’au o la tatou tapuaiga, ma [o le a] sili foi ona latalata atili atu o le tagata i le Atua i lona ola ai i ona mataupu, nai lo se isi lava tusi” (faatomuaga i le Tusi a Mamona

O le Tusi a Mamona o se tasi molimau mo upumoni o loo aoaoina i le Tusi Paia. Ua ia toefuatai mai upumoni “manino ma sili ona pele” na leiloloa mai le Tusi Paia e ala i measese i le faaliliuga pe na “aveesea” i taumafaiga e “faasese ai ala sao o le Alii” (tagai 1 Nifae 13:24–27, 38–41). O le Tusi Paia ma le Tusi a Mamona “o le a tutupu faatasi, e taʼusese ai mataupu sese ma tuu ai i lalo finauga, ma faatu ai le filemu” (2 Nifae 3:12).

I le latalata i le faaiuga o le Tusi a Mamona, ua aoao mai ai le perofeta o Moronae i le ala e mafai ai ona tatou iloa le moni o le tusi: “Ma pe a outou maua nei mea, ou te apoapoai atu ia te outou ia outou ole atu i le Atua, le Tamā Faavavau, i le suafa o Iesu Keriso, pe ua le moni ea nei mea; ma afai tou ole atu ma le loto faamaoni ma le manatu moni i ai, ma le faatuatua ia Keriso, o le a ia faaali mai le moni o ia mea ia te outou, i le mana o le Agaga Paia.” (Moronae 10:4; tagai foi Moronae 10:3 ma le Moronae 10:5).

O Le Mataupu Faavae ma Feagaiga

O le Mataupu Faavae ma Feagaiga o loo i ai faaaliga na tuuina atu i le Perofeta o Iosefa Samita. O loo aofia ai foi ni nai faaaliga na tuuina atu i si perofeta o aso e gata ai na mulimuli mai ia Iosefa Samita. O lenei tusi o tusitusiga paia e tulagaese lava ona e le o se faaliliuga o ni tusiga anamua. O se tuufaatasiga o faaaliga na tuuina mai e le Alii i Ana perofeta filifilia i aso e gata ai.

Na faapea mai le Perofeta o Iosefa Samita o le Mataupu Faavae ma Feagaiga o le “faavae o le Ekalesia i nei aso e gata ai, ma o se faamanuiaga i le lalolagi, ua faailoa mai ai o ki o mealilo o le malo o lo tatou Faaola ua toe faatuatuaina mai i tagata” (ulutala o le vaega mo le Mataupu Faavae ma Feagaiga 70).

O Le Penina Tau Tele

O le Penina Tautele o loo i ai le tusi a Mose, le tusi a Aperaamo, le faaliliuga musuia a le Perofeta o Iosefa Samita o le Mataio mataupu 24, ma nisi o tusitusiga a le Perofeta o Iosefa.

O le tusi a Mose o le vaega itiiti mai le faaliliuga musuia a Iosefa Samita o le Tusi Paia. O se faamaumauga e sili atu le atoatoa o tusitusiga a Mose i le amataga o le tusi o Kenese i le Feagaiga Tuai. O loo maua ai le tele o aoaoga faavae ma aoaoga na leiloloa mai le Tusi Paia ma ua tuuina mai ai ni faamatalaga faaopoopo e uiga i le fuafuaga o le faaolataga, le foafoaina o le lalolagi, ma fegalegaleaiga a le Alii ma Atamu ma Enoka.

O le tusi a Aperaamo o se faaliliuga o faamaumauga anamua na tusia i tusi taai ia na maua e le Ekalesia i le 1835. Na faaliliuina e le Perofeta o Iosefa Samita ia faamaumauga e ala i faaaliga. O lenei tusi o loo maua ai upumoni e uiga i le Fono i le muai olaga i le Lagi, le foafoaga o le lalolagi, le natura o le Atua, ma le perisitua.

O leIosefa Samita---Mataio o se vaega o le (Mataio 24) mai le toeiloiloina musuia a Iosefa Samita o le Tusi Paia ma faaopoopo i lo tatou malamalama i aoaoga a le Faaola e uiga i Lona Afio Mai Faalua.

O tusitusiga a Iosefa Samita i le Penina Tau Tele e aofia ai:

Iosefa Samita---Talafaasolopito, o se vaega mai le talafaasolopito o le Ekalesia a le Perofeta. O se faamatalaga o mea na tutupu na taitai atu i le toefuataiga o le Ekalesia, e aofia ai le Uluai Faaaliga, asiasiga a Moronae i le Perofeta o Iosefa, le mauaina mai o papatusi auro, ma le toefuataiga o le Perisitua Arona.

O Mataupu Faavae o le Faatuatua, na tusia e le Perofeta o Iosefa Samita o ni faamatalaga autu o talitonuga ma aoaoga faavae.