Faaaliga

O faaaliga o le fesootaiga lea mai le Atua i Ana fanau. A faaali mai e le Alii Lona finagalo i le Ekalesia, e fetalai mai o Ia e tauala mai i Lana perofeta. E tusa ai ma lo tatou faamaoni, e mafai ona tatou maua faaaliga faaletagata lava ia e fesoasoani ai ia te i tatou i o tatou manaoga patino, tiutetauave, ma fesili ma fesoasoani e faamalosia ā tatou molimau.

Vaaiga Aoao

O faaaliga o le fesootaiga lea mai le Atua i Ana fanau. O lenei taitaiga e tauala mai i auala eseese e tusa ai ma manaoga ma tulaga o tagata taitoatasi, aiga, ma le Ekalesia atoa. A faaali mai e le Alii Lona finagalo i le Ekalesia, e fetalai mai o Ia e tauala mai i Lana perofeta. O perofeta ua nao tagata ia o e mafai ona maua faaaliga mo le Ekalesia, ae e le nao i latou ni tagata e mafai ona maua faaaliga. E tusa ai ma lo tatou faamaoni, e mafai ona tatou maua faaaliga faaletagata lava ia e fesoasoani ai ia te i tatou i o tatou manaoga patino, tiutetauave, ma fesili ma fesoasoani e faamalosia ā tatou molimau.

O loo tau mai i tusitusiga paia ia ituaiga eseese o faaaliga, e pei o faaaliga vaaia, miti, ma asiasiga a agelu. E ala mai i auala faapena, ua toefuataiina ai e le Alii Lana talalelei i aso e gata ai ma faaalia mai ai upumoni e tele. Peitai, o le tele o faaaliga i taitai ma tagata o le Ekalesia e oo mai e ala i uunaiga ma musumusuga a le Agaga Paia.

Atonu e le mataina tele ia uunaiga filemu faaleagaga e pei o faaaliga vaaia ma asiasiga a agelu, ae e tutusa lava lo latou mamana ma le tumau ma suia olaga. O le molimau a le Agaga Paia e faia ai se faatosinaga i o tatou agaga lea e sili ona taua nai lo soo se mea e mafai ona tatou vaai ma faalogo i ai. E ala i faaaliga faapena, o le a tatou maua ai le malosiaga tumau e tumau faamaoni ai i le talalelei ma fesoasoani i isi ia faapena foi ona fai.

Tusifaamaumau Ou Lagona Uunai

Saunia e Maua Faaaliga

O le fautuaga lenei o le a fesoasoani tatou te saunia ai e maua uunaiga mai le Agaga Paia:

Tatalo mo le taitaiga. Na fetalai le Alii, “Ia outou ole atu, ona foaiina mai ai lea ia te outou; ia outou saili, ona outou maua ai lea; ia outou tu’itu’i atu, ona toina ai lea ia te outou; aua ai se ole atu, e maua e ia; o lē saili foi e iloa e ia; e toina foi i lē tu’itu’i atu” (Mataio 7:7–8). Ina ia mafai ona tatou iloa ma maua, e tatau ona tatou saili ma ole atu.

Ia faaaloalo. O le faaaloalo o le o’oo’o o le ava ma le alofa. A tatou faaaloalo ma toafilemu, tatou te valaaulia faaaliga. E tusa lava pe o vavāō mea uma o siomia ai i tatou, e mafai ona i ai so tatou uiga faaalia faaaloalo ma ia saunia e maua le taitaiga mai le Alii.

Ia lotomaulalo. O le lotomaualalo e vavalalata lava le sootaga i le faaaloalo. Afai tatou te lotomaualalo, tatou te iloa lo tatou faalagolago i le Alii.

Tausi i poloaiga. A tatou tausia poloaiga, ua tatou saunia e maua, iloa, ma mulimuli i uunaiga a le Agaga Paia.

Ai ma inu ma le tatau i le faamanatuga. E aoao mai e tatalo o le faamanatuga auala e maua ai le mafutaga tumau a le Agaga Paia. A tatou aai ma feinu i le faamanatuga, tatou te molimau atu i le Atua ua tatou naunau e tauave i o tatou luga le suafa o Lona Alo, ma o le a tatou manatua pea o Ia, ma tausi Ana poloaiga. Ua folafola mai e lo tatou Tama Faalelagi, a tatou tausia nei feagaiga, o le a tatou maua pea Lona Agaga e faatasi ma i tatou. (Tagai i le Mataupu Faavae ma Feagaiga 20:77, 79.)

Suesue i tusitusiga paia i aso uma. A o tatou suesue ma le maelega i tusitusiga paia, tatou te aoao mai i faataitaiga a alii ma tamaitai na faamanuiaina o latou olaga a o latou mulimuli i le finagalo na faaalia mai a le Alii. Tatou te nofouta atili ai foi i le Agaga Paia i o tatou lava olaga. A o tatou faitau ma mafaufau loloto, tatou te ono maua se faaaliga i le ala e faatatau ai se mau faapitoa ia i tatou pe e uiga i se isi mea e finagalo le Alii e ta’u mai ia i tatou.

Faaavanoa se taimi e mafaufau loloto ai. A tatou faaavanoa se taimi e mafaufau loloto ai i upumoni o le talalelei, ua tatou tatala o tatou mafaufau ma loto i le uunaiga taiala a le Agaga Paia (see 1 Nifae 11:1; Mataupu Faavae ma Feagaiga 76:19; 138:1–11). O le mafaufau loloto e aveese ai o tatou mafaufau mai i mea le aoga o le lalolagi, ae fesoasoani ia tatou maua se vaaiga sili atu e faavavau ma aumaia ai i tatou e latalata atili atu i le Agaga.

Pe a sailia se taitaiga faapitoa, e tatau ona tatou suesuea le mataupu i o tatou mafaufau. E i ai taimi seiiloga lava e uma ona tatou suesueina se mataupu i o tatou mafaufau, ona faatoa oo mai lea o le fesootaiga a le Alii.

Ia saili ma le onosai i le finagalo o le Atua. E faaali mai e le Atua o Ia lava, “ i lona lava taimi, ma i lana lava ala, ma e tusa ai ma lona lava finagalo” (tagai i le Mataupu Faavae ma Feagaiga 88:63–68). O le a masani ona oo mai faaaliga i lea fuaiupu i luga o lea fuaiupu, i lea mataupu i luga o lea mataupu, o sina mea itiiti i i ma sina mea itiiti i o. E tatau ona tatou onosai ma faalagolago i le taimi a le Alii.

Iloaina o Uunaiga a le Agaga Paia

I le tele o leo ma savali i le lalolagi i aso nei, e tatau ona tatou aoao ia iloa musumusuga a le Agaga Paia. O nisi ia o auala autu e fesootai mai ai le Agaga Paia ia i tatou:

E talanoa mai o Ia i le mafaufau ma le loto i se leo filemu, ma itiiti. Na aoao mai le Alii: “o le a Ou tau atu ia te oe i lou mafaufau ma lou loto, e ala i le Agaga Paia, lea o le a oo atu i ou luga ma lea o le a mau i lou loto. O lenei, faauta, o le agaga lenei o faaaliga” (Mataupu Faavae ma Feagaiga 8:2–3). E ui lava o sea faaaliga e oo mai ai se aafiaga tele i ai tatou, e toeitiiti lava o taimi uma e oo mai ai leleoa, e pei o se “leo itiiti” (tagai i le 1 Tupu 19:9–12; Helamana 5:30; Mataupu Faavae ma Feagaiga 85:6).

Na te musuia i tatou e ala i o tatou lagona. E ui e masani ona tatou faamatalaina fesootaiga mai le Agaga o se leo, o lena leo e sili atu ona tatou lagonaina nai lo le faalogoina.

Na te aumaia le filemu. O le Agaga Paia e masani ona taua o le Lē Faamafanafana (tagai i le Ioane 14:26; Mataupu Faavae ma Feagaiga 39:6). A o Ia faaali mai le finagalo o le Alii ia i tatou, o le a Ia “tautala atu le filemu” i o tatou mafaufau (Mataupu Faavae ma Feagaiga 6:23).