Mataupu 6

Ina ia Faalogo i le Siufofoga o le Alii

E faapefea ona tatou maua faaaliga mai le Alii mo le tagata lava ia?

Faatomuaga

Sa faapea mai Peresitene Harold B. Lee i se tasi taimi “O loo ia te au se loto talitonu na amata mai i se molimau faatauvaa ao ou itiiti. … ou te manatu e masalo pe o le sefulu poo le sefulutasi o ou tausaga. Sa ma faatasi ma lou tama i le faatoaga e mamao ese mai lo matou fale, sa ou taumafai e pisi i le faaaogaina o le aso seia oo i le taimi ua saunia ai lo’u tama e foi atu i le fale. O le isi itu o le pa mai la matou faatoaga, sa i ai ni fale ua pauu, e mafai ona tosina atu i ai se tamaitiiti sa tumu i le fia iloa ma sa ou fiafia e tafao ma vaavaai i ni vaaiga fou. Na amata ona ou ae atu i le pa, ma sa ou faalogoina se leo manino e pei ona e lagonaina mai lo’u leo o valaau mai i lo’u igoa ma faapea mai, ‘Aua e te alu i o!’ Sa ou liliu e tilotilo atu i lo’u tama e vaai poo i ai i le isi itu o le fanua. Sa le iloa atu se tagata. Na ou iloaina, a o ou tamaitiiti, o loo i ai ni tagata e le mafai ona ou vaaia, aua sa ou matua lagonaina lava se leo. Na amata mai iina, pe a ou faalogo ma faitau i tala e uiga i le Perofeta o Iosefa Samita, ua ou iloa foi la le uiga o le faalogo i se leo, aua sa tupu ia te au.”¹

E ui lava atonu e le fetalai mai le Alii ia i tatou i lona siufofoga, a o tatou aoaoina e talanoa atu ia te ia ma iloa le ala na te fesootai mai ai ma i tatou, ua amata ona tatou iloa o Ia. Sa saunoa mai Peresitene Lee “ina ia iloa le Atua ma Iesu Keriso na ia auina mai (tagai Ioane 17:3), e pei ona tau atu e le Matai i ona soo, ia amata i le ala mautinoa e tau atu i le ola e faavavau i le afioaga o nei tagata ua faamamaluina.”²

Aoaoga a Harold B. Lee

O a ni auala e fesootai ai le Tama Faalelagi ma Ana fanau?

Sa ou faalogologo i se tasi o saunoaga musuia mai a Peresitene [J. Reuben] Clark i le Iunivesite o Polika Iaga. Na ia suesue auiliili ai le eseesega o ituaiga o faaaliga e oo mai. Na ia ta’ua muamua le faaaliga lea na ia faamatalaina o se mea na tupu, lea na faaalia moni mai ai le Tama po o le Alo po o i laua uma foi, ma talanoa tuusao atu i se tagata. Sa talanoa faafesagai Mose ma le Alii (tagai Mose 1:1–4): Na i ai foi se faaaliga patino ia Tanielu, po o se faaaliga faaletagata lava ia [tagai Tanielu 10]. Ina ua maliu ae le Alii ia Ioane le Papatiso mo le papatisoina, ia e manatua na fetalai mai le siufofoga mai le lagi ma faapea mai, “O lou Atalii pele lena ua ou fiafia lava ia te ia.” [Mataio 3:17.] I le faaliliuina a Paulo,. … na i ai foi le faaaliga patino, ma sa faalogoina se leo manino o tautala mai [tagai Galuega 9:1–6]. I le taimi foi na liua ai [Iesu] na malaga ai Peteru, Iakopo ma Ioane, ma le Matai i se mauga maualuga lea na faaali ane ai Mose ma Elia ia i latou, na toe faalogoina ai foi le siufofoga o tautala mai i le lagi, o faapea mai, “O lou Atalii Pele lena, ua ou fiafia lava ia te ia…” (Mataio 17:5.)

Masalo o le faaaliga aupito sili o o tatou taimi o le faaali mai lea o le Tama ma le Alo i le Perofeta o Iosefa Samita i le togalaau [tagai Iosefa Samita—Talafaasolopito 2:14–17]. Mulimuli ane i lena, na i ai isi faaaliga na oo mai, o se tasi lea o loo tusia i le mataupu e 110 o le Mataupu Faavae ma Feagaiga ina ua faaali atu le Faaola ia Iosefa ma Oliva. …

O se isi auala tatou te maua ai faaaliga lea sa tautala i ai le perofeta o Enosa. Na ia tusia lenei faamatalaga sili ona taua i ana faamaumauga i le Tusi a Mamona. “Ina o faapea ona ou finau i le Agaga, faauta ua toe tulei mai le siufofoga o le Alii i lou mafaufau. …”[Enosa 1:10.]

I se isi faaupuga, o nisi taimi tatou te faalogoina le siufofoga o le Alii i o tatou mafaufau, ma pe a oo mai, o faalogoina e malosi lava e pei lava o loo Ia iliaina se pu i o tatou taliga. …

I se tala i totonu o le Tusi a Mamona, na aoai faamalosi atu ai Nifae i ona uso, ma valaau atu ia i latou e salamo, ma tautala atu i le manatu e tasi ina ua ia faapea mai: “…ma ua tautala mai o ia ia te outou i le leo itiiti ma le filemu, a ua le toe lagona e outou, ua le mafafai outou ona lagona ana fetalaiga… ..”(1 Nifae 17:45.)

O lea, e aumaia ai e le Alii e ala mai i faaaliga ni manatu i o tatou mafaufau e pei o se siufofoga ua tautala mai. Sei ou tuuina atu lau molimau ma le lotomaualalo i lena mea moni? Sa i ai se taimi sa ou i ai i se tulaga e manaomia ai se fesoaosani. Sa silafia e le Alii lou manaomia o se fesoasoani, ao ou i ai i se misiona taua. Sa fafaguina au i le taeao po lava ma sa faasa’o ai au i se mea na ou fuafuaina e faia i se auala e ese mai, ma sa faataatia sa’o mai lena auala i ou luma ao ou taoto i lena taeao, sa mautinoa tonu e pei lava sa nofo se tagata i le pito o lo’u moega ma ta’u mai ia te au le mea e fai. Ioe, e oo mai le siufofoga o le Alii i o tatou mafaufau, ma e mafai ona taitaiina ai i tatou.

Tatou te maua foi faaaliga e ala i le mana o le Agaga Paia. Sa fetalai atu le Alii i le Perofeta o Iosefa Samita i popo fou o le Ekalesia, “Ioe, faauta o le a ou faaali atu ia te oe i lou mafaufau ma lou loto i le Agaga Paia, o le a tumau i lou loto. O lenei faauta o le agaga lenei o faaaliga. … ”(MFF 8:2–3) Na faamafanafana atu le Alii i Ona soo, tou te manatua, ao lei oo i lona faasatauroga na ia fetalai mai, “…afai ou te le alu ese, e le maliu mai le fesoasoani ia te outou …Ae a maliu mai o ia [Agaga Paia] o le Agaga lea e tupu mai ai le upu moni, e taitaia e ia ia te outou i upu moni uma: o le a ia faailoa mai ia te outou mea e oo mai.” (Ioane 16:7, 13) “e faamanatu mai foi e ia ia te outou i mea uma … ..”(Ioane 14:26.) O lea ua tatou vaaia le mana o le Agaga Paia. Sa saunoa mai le Perofeta o Iosefa Samita e uiga i lenei, ma ia faapea mai ai, “E leai se tagata e mauaina le Agaga Paia e aunoa ma le mauaina o faaaliga. O le Agaga Paia o ia lea e faaalia maia.” (Teachings of the Prophet Joseph Smith, itulau 238.)

E mafai ona ou suia lena…ma faapea atu, soo se Au Paia o Aso e Gata Ai ua papatisoina ma ua faaee atu i ai lima i ona luga mai i ai laotu o loo galueaina le sauniga, ma faatonu atu ia te ia e talia le Agaga Paia, ma o se tasi na te lei mauaina se faaaliga o le Agaga o le Agaga Paia, e lei mauaina le meaalofa o le Agaga Paia lea e tatau ona ia mauaina. O i na tonu o loo taatia ai se mataupu taua tele. Sei ou liliu atu i le faamatalaga a le Perofeta o Iosefa Samita e uiga i faaaliga:

“E mafai ona faamanuiaina se tagata i lona iloaina o se uluai faailoga o le agaga o faaaliga; mo se faataitaiga, pe a e lagonaina le solosolo lelei o le atamai ia te oe, e mafai ona ia avatu ia te oe nai manatu faafuasei, o le mea lea e te maitauina ai, ma e mafai ona faataunuuina i lena lava aso po o se taimi vave; (o lona uiga) o na mea sa tuuina atu i lou mafaufau e le Agaga o le Atua, o le a taunuu; ma o le mea lea, o le aoao i le Agaga o le Atua ma malamalama i ai, o le a mafai ai ona e tuputupu ae i le mataupu faavae o faaaliga, seia oo ina e atoatoa ia Keriso Iesu.” [History of the Church, 3:381.]

O a ni mataupu e te ono maua ai se faaaliga? Pe o faateia oe i lou faalogo faapea o oe—ma tagata uma o le Ekalesia o e ua mauaina le Agaga Paia—e mafai ona maua faaaliga? E le mo le Peresitene o le Ekalesia, e lē mo le vaaia o mataupu e faatatau i le uarota, le siteki po o le misiona o loo e nofo ai, ae o tagata taitoatasi uma i lona lava tulaga o i ai, ua i ai le aia tatau na te maua ai faaaliga mai le Agaga Paia.

O tagata uma ua i ai le avanoa e faaaoga ai nei meaalofa ma nei avanoa i le taitaiina o mataupu faatatau ia te ia lava; o le tausiaina o lana fanau i le ala e tatau ona ui ai; o le puleaina o lana pisinisi po o le ā lava le mea na te fai. O lana aia tatau le olioli i le agaga o faaaliga ma musumusuga e faia le mea sao, ina ia atamai ma faautauta, amiotonu ma lelei i soo se mea na te faia. Ou te iloa o se mataupu faavae moni lena, ma o le mea lena ou te manao ia iloa e le Au Paia o Aso e Gata Ai. Ma o le mea la lea, o i tatou uma e tatau ona taumafai e finafinau ma uai atu i manatu e faafuasei ona oo mai ia i tatou, ma afai tatou te uai atu i ia manatu ma ia iai se taliga e faalogo i nei musumusuga, o le a mafai e i tatou foi—i tatou taitoatasi—ona tuputupu ae i le agaga o faaaliga.

Ma e toe tasi lava le auala e ono oo mai ai faaaliga ma e ala mai lea i miti. Ia, ou te le tauina atu ia te outou faapea o au miti uma e fai o ni faaaliga tuusao mai le Alii…Ae ou te fefe i lenei vaitau o le atamai faalelalolagi, o loo i ai nisi o i tatou e toetoe lava ina mumusu e talia miti uma faapea e leai se uiga, ma e lē taua. Ae o loo tusia i le faagasologa atoa o tusitusiga paia, ni mea na taitaiina ai e le Alii Lona nuu e ala i miti. …

O le mea e tatau ia i tatou uma ona taumafai ia ola, e tausia poloaiga a le Alii, ina ia mafai ona ia tali mai i a tatou talosaga, o tatalo a e pele ia i tatou, o talosaga a le Au Pulega Aoao, mo i tatou. Matou te tatalo e le aunoa mo tagata o le Ekalesia, ma e matou te faafetai i le Atua pe a matou iloa o loo latou tatalo mo i matou. Pe afai tatou te ola agavaa, ona taitaiina lea o i tatou e le Alii—e ala i Lona faaali mai, po o Lona lava siufofoga, po o lona siufofoga foi e ui mai i o tatou mafaufau, po o faalogona i o tatou loto ma agaga. E le gata i lea, e tatau ona tatou faafetai pe afai e auina mai e le Alii se miti ia te i tatou e faaali mai ai le matagofie o le faavavau, po o se lapataiga foi ma se taitaiga e faamafanafanaina ai faapitoa i tatou. Ioe, afai tatou te ola ai i lena tulaga, o le a taitaiina i tatou e le Alii mo lo tatou faaolataga ma lo tatou manuia.

I le avea ai ma se tasi e sili ona lotomaualalo, ma tauaveina le tofiga o loo ou galue ai, ou te manao e tuuina atu lau molimau faamaulalo ua ou mauaina e ala i le siufofoga ma le mana o faaaliga le atamai ma se malamalamaaga o loo i ai le Atua… ..

Ou te tuuina atu lau molimau maumaututu o loo taitaiina le Ekalesia i aso nei e ala i faaaliga. O tagata uma ua i ai ma ua faamanuiaina ia maua le Agaga Paia, ua i ai ia te i latou le mana e maua ai faaaliga. Ia fesoasoani le Atua ia te oe ma au ina ia tatou ola i se auala e mafai ai e le Alii ona tali atu i tatalo a e faatuatua e ala mai ia i tatou.³

E faapefea ona tatou tatalo i lo tatou Tama o i le lagi ina ia mafai ona Ia taitaiina i tatou?

E tele le eseesega i le faia o se tatalo ma le talatalanoa ma le Atua. O loo i ai nisi e toaitiiti o e ua ou faalogo o tatalo ma sa talanoa ma le Atua, o se tasi o i latou o le uso ia [Elder] Charles A. Callis ua maliu. Ou te le i faalogo lava o tatalo o ia i le fata faitaulaga paia i le malumalu, ou te lei faalogo ia te ia a o ma tootutuli faatasi i le tatalo ao ma i ai i se misiona faigata, ae sa peiseai ao ia tautala, ua ia tau atu i faitotoa o le Afioaga paia o lo tatou Tama, ma sa ia talanoa ma tagata paia. Aua le faia tatalo, aua le faitauina tatalo, ae ia aoao e talanoa ma le Atua ma o le talanoa ma le Atua o le ituaiga tatalo lena ou te manatu na tautala i ai Moronae ao ia tusia le mataupu faaiu o le Tusi a Mamona … :

“Ou te apoapoai atu ia te outou, ia outou ole atu i le Atua, le Tama Faavavau, i le suafa o Iesu Keriso, pe le moni ea nei mea; afai tou te ole atu ai ma le loto faamaoni, ma le manatu tonu i ai ma le faatuatua ia Keriso, na te faaalia le tonu ia te outou i le mana o le Agaga Paia.” [Moronae 10:4.]

… O le mea lenei ou te malamalama i ai o se tatalo o le faatuatua, … faatuatua i le Atua ma Lona Alo, o Iesu Keriso, a aunoa ma lena e leai se tasi e mafai ona talanoa ma le Atua.⁴

Na ou tau ane i se mea na tupu i lo tatou uso pele o Richard Evans [o le Korama a le Toasefululua] i se tasi o ana malaga. … Sa ia nofo i autafa o se tamaloa i le taumafataga i nai po ua tuanai atu, i autafa o se pule lauiloa o se fale gaosi oloa, o lē sa ta’uina atu ia te ia i nai fuaiupu faigofie le ala sa ia taulimaina ai faafitauli mamafa o lona olaga ma le auala na ia faia ai faaiuga o aso taitasi. “Pe a ou ala ae i le taeao, sa ia faapea mai “E masani ona ou lagonaina e le mafai ona ou taulimaina, ae pe a ou alu ifo i lalo i ou tulivae ma faapea na ona fai atu, ‘Le Atua e, fesoasoani mai ia te au ina ia ou faia mea e ao ona ou faia i lenei aso,’ ona ou maua ai lea o le malosi, ma ou te lagona ua fetaui lea mo au. Ma ou te mafaufau ia te Ia o lo’u tamā ma ou te talanoa ia te Ia i se ala faigofie ma tuusao e pei ona masani ona ou talanoa ai i lo’u tamā ao i ai o ia i lenei lalolagi.” …

[Sa faamatala mai e le susuga a Evans:] “Sa ou matamuli ma faamaualaloina au i se uo faatauvaa ma le tuusao, lea sa ou nofo ai i ona autafa i le tasi afiafi. E le o se tagata o lo’u faatuatuaga, ae [i lo’u] lava ia talitonuga faamaoni, semanu e le mafai ona ia tautala atu i le Atua ma le matuā faamalieina ma le mautinoa pe ana mafaufau ia te Ia faapea ua na o se malosiaga, poo se mea foi e le mafaamatalaina i upu, le natura ma le faamoemoega o se mea e le i ai sona malamalamaaga, po o le leai foi o se mea e aumaia ia te ia le lagona mautinoa sa ia talanoa moni i lona tama.” …

E pei ona tau atu e Iakopo i lona aiga. … “E! o le silisili ese o le paia o lo tatou Atua! Aua ua silafia e ia mea uma, ua leai se mea ua le silafia e ia.” (2 Nifae 9:20.) O lea afai o le a e faamauina lena i lou mafaufau ua i ai ia te oe se amataga o manatu, ua i ai se lua mafutaga ma Ia. O i tatou o Ona atalii ma Ona afafine. Ua Ia silafia i tatou. Na te silafiaina mea uma ma taimi atofaina e tutupu ai, ma le nofoaga tatou te nonofo ai, ma taimi tatou te ola ai. Ma ua na o Ia lava e mafai ona tatou faatuatuaina ma le atoatoa.⁵

O se tasi o mea e sili atu lona taua i mea uma e mafai ona tatou mauaina poo le malamalama taua e mafai ona tatou mauaina o le faafofoga mai lea o le Alii ma tali mai i tatalo—pe a tuu foi i se isi faaupuga, tatou te aoao e talanoa ma le Atua. O le tatalo e le na o le faia o faaupuga, e pei ona aoaoina e nisi Ekalesia, ae o le iloaina lea o le Atua, o lo tatou Tama Faalelagi, ma Lona Alo, o Iesu Keriso, o loo soifua i laua, o ni tagata moni ma e ala mai i le galuega a le isi o le Aiga Atua, o le Agaga Paia lea, e mafai ai ona tatou fesootai ma Ia, lo taotu Tama Faalelagi, ma maua se tali i a tatou sailiiliga ma le malosiaga mo o tatou aso.⁶

I le lotomaualalo, ia saunia e tautala atu faatasi ma Paulo, “Le Alii e, se a le mea e te finagalo i ai ou te faia?” (Galuega 9:6). Faatasi ma le lototoa tumau ia tatou faapea ifo faatasi ma le tama o Samuelu, “Fetalai mai ia, Ieova e, aua o loo faalologo atu lau auauna.” (1 Samuel 3:9). Ia e lotomaualalo, ia tatalo, ona taitaiina ai lea o oe e le Alii lou Atua, e faapena lava, ma tali atu i au talosaga [tagai MFF 112:10].⁷

Sa aoao mai e [Tavita O.] Makei ia i matou i se tasi aso i totonu o le malumalu. O le anapogi mai i taumafataga e lua i le Aso Sa muamua o le masina ma totogi le tau atoa o na taumafataga e lua ua e misia… “O te fia tau atu ia te outou se mea se tasi: Afai e tau atu e le Alii ia te oe se mea e ao ona fai, e tatau ona ia te oe le lototoa e faia ai, poo le aua nei e toe fesili atu i ai.” Ua ou aoaoina foi lena lesona. O nisi taimi i le vaeluaga o le po ou te ala ai ma le mafai ona ou toe moe seiloga ua ou oso ese mai le moega ma tusia i se pepa le mea na ma tauivi. Ae e manaomia le tele o le loto toa e galue ai pe a uunaia o se tali i talosaga.⁸

O le anapogi mai i taumafataga e lua i le Aso Sa muamua o le masina ma totogi le tau atoa o na taumafataga e lua ua e misia… .. Sa fetalai atu le Alii ia Isaia, o i latou e anapogi ma tufatufa atu a latou falaoa i e fia aai, e mafai e i latou ona valaau atu ma o le a tali mai le Alii, e mafai ona latou alalaga atu ma o le a fetalai mai o Ia, “O Au lenei.” [Tagai Isaia 58:6–9.] O se tasi na o ala e faatulagaina ai le fesootaiga ma le Alii. Faataitai i lenei tausaga. Ola ma le atoatoa i le tulafono o le Anapogi.⁹

Pe a tatou taumafai e filifili pe o le fea o faaiuga e lua e tatau ona fai, ia tatou manatua le mea na taua mai e le Alii e ao ona tatou faia: Suesue mae’ae’a le mataupu atoa i o tatou mafaufau seia maua se faaiuga; ma faamasani i tatou i tali faaleagaga— pe o le mu o o tatou loto i totonu ia te i tatou ina ia mafai ona tatou iloa ua sao la tatou faaiuga, poo le maua o le pogisa i le mafaufau tatou te faagaloina ai mafaufauga e sese [tagai MFF 9:7–9]. O lea la, e pei ona folafola mai le Alii: “…O le a tuuina atu le agaga ia te i (tatou) i le tatalo i le faatuatua.” (MFF 42:14.)…

Afai tatou te saili ma le maelega, e mafai ona tatou aapa atu i totonu o lena lagi o agaga mo tali e faamautuina ai mo i tatou e le gata o faamanuiaga silisili, ae faapea foi ma le molimau maoae i totonu o o tatou loto ina ia mafai e a tatou gaoioiga, o o tatou olaga, ma a tatou galuega ona maua le faamaufaailoga o le taliaina e le Alii ma Le na Foafoaina i tatou uma.¹⁰

O le a le mea e mafai ona tatou faia e maua ai faaaliga mo le tagata lava ia mai le Alii?

O le mea sili ona taua e mafai ona e faia o le aoao lea e talasnoa i le Alii. talanoa ia te Ia e pei ona e talanoa i lou tama, aua o Ia o lou Tama, ma e finagalo o Ia ina ia e talanoa atu ia te Ia. E finagalo o Ia ina ia e atinaeina taliga e faalogo ai, pe a Ia tuuina mai ia te oe uunaiga a le agaga e tau ia te oe le mea e fai. Afai tou te aoao e faalogo i manatu faafuasei e oo mai i o outou mafaufau, o le a outou iloa lava le oo mai o na mea i le itula tonu o loo outou manaomia ai. Afai o le a e atinaeina se taliga e faalogo ai i ia musumusuga, ona e iloa lea ona savali i le agaga o faaaliga.¹¹

E faapefea ona tatou atinaeina le tulaga maualuga faaleagaga i o tatou uiga ina ia mafai ai ona faataunuuina i le atoatoa a tatou misiona i le lalolagi ma ogatasi ai ma le mana silisili ese o le Atua…?

Na tali mai e Amona lena fesili i sina vaega: “Ioe, o le ua salamo, ma faatuatua, ma ua fua mai i galuega lelei, ma ua tatalo pea e le aunoa—o i latou ia ua tuuina i ai e iloa mea lilo a le Atua.… ”(Alema 26:22.)…

O le faisalamo o Tavita, na ia aoao a o talavou i le puna o le mana faaleagaga. Na musumusu atu i ai le Agaga, “Ina soia, ma ia outou iloa o au lava o le Atua…o le Atua o Iakopo o lo tatou ‘olo maualuga ia.”(Salamo 46:10–11.)

Na aoao perofeta o anamua, e pei ona tatau ona silafia e tagata uma, pe faapefea ona fesootai ma le Alii e ala i le tatalo, ma talanoa ma Ia ona maua lea o tali i le ala a le Alii lava ia…

Na fetalai atu le Alii ia Elia, le perofeta: “Ina alu ia oe i fafo, ma e tu i le mauga i luma o Ieova. Faauta mai, ua afio ane Ieova; o le matagi tetele foi, ma le malosi ua lepetia ai mauga, ma momomo ai papa i luma o Ieova; e lei i ai Ieova i le matagi; ua mulimuli i le matagi o le mafuie; e lei i ai Ieova i le mafuie:

“E mulimuli i le mafuie o le afi; e lei i ai Ieova i le afi; e mulimuli i le afi o le leo filemu ma le itiiti.

“Ua faalogo ai Elia, ona ufiufi ai lea e ia ona mata i lona ofu tele, ma alu i fafo, ma tu i le gutu o le ana…”(1 Tupu 19:11–13.)

Ua masani tele pe a talanoa mai le Atua i lenei leo itiiti ma le filemu, e pei ona ia faia ia Elia i totonu o le ana, atonu e le mafai ona lagonaina i la tatou faalogo faaletino, e pei o se leitio ua faaletonu, e mafai ona tatou le malamalama i lē silisiliese.

… Ua masani tele i aso nei ona taumamao alii ma tamaitai mai mea faaleagaga, ma a oo ina talanoa atu i ai le Alii i o latou taliga faaletino, i o latou mafaufau e aunoa ma se leo e mafai ona faalogoina, pe ala atu foi i ana auauna ua tuuina atu i ai le pule o ē, a oo ina taitaiina e le agaga ua avea ma ona siufofoga, ae na o se pao lava [e faalogoina e nei alii ma tamaitai] e faapei ona i ai i Ierusalema. E faapena foi, ona latou le maua se malamalama musuia, poo se faamautinoaina mai i totonu, e uiga i le mafaufau o le Alii ua ia fetalai ai e ala mai i ana taitai perofeta.

… O Enosa, le atalii o le atalii o Liae, ua ia aumaia ia i tatou se malamalamaaga i le mafuaaga e mafai ai e nisi ona maua se malamalama e uiga i mea a le Atua ae le mafai e isi. O loo faamatala mai e Enosa lana tauiviga ina ia maua se faamagaloga o ana agasala ina ia mafai ai ona agavaa o ia mo lona tofi maualuga.

Ona ia faaiuina ai lea faapea: “Ina o faapea ona ou finau i le Agaga, faauta, ua toe tulei mai le siufofoga o le Atua ia te au, ua faapea mai:Ou te asiasi atu i ou uso e tusa ma lo latou filiga i le tausiga o au poloaiga…”[Enosa 1:10.]

O lena ua i ai ia te oe, i se gagana faigofie, se mataupu sili: E le o le Alii na te taofia o ia mai ia te i tatou. O i tatou e taofia i tatou lava mai ia te Ia ona o lo tatou le usiusitai i ana poloaiga.¹²

Pe a tatou o atu i le Alii mo se faamanuiaga tatou te mananao ia tuuina tatou lava i se tulaga agavaa ia maua ia le mea o loo tatou talosia.¹³

Pe e te le manao ea e ola ina ia mafai ona talanoa mai le Alii ia te oe a o la foi e te mafai ona e lagonaina o ia, pe e te agavaa foi e te maua se asiasiga mai se agelu, pe saunia foi e ulu atu i le afioaga o le Alii? Na faamatala mai e le Alii le ala e mafai ai ona tatou saunia. O iinei na ia fetalai mai ai i se faaaliga maoae i nei upu: “E moni, ua faapea mai le Alii: O le a oo i tagata taitoatasi o le lafoai ana agasala ma sau ia te au, ma valaau mai i lou igoa ma usiusitai i lou leo, ma tausi mai i au poloaiga o le a vaai i ou mata ma iloa o loo i ai au.” (MFF 93:1).

Ina ua sau le leo mai le lagi i tagata i le nuu o Nuumau sa latou le lagonaina. Fa te i latou ua na o se fenumiaiaga o leo, ma ina ua faasaga tonu atu i ai o latou loto sa mafai ona latou lagona upu ae sa le mafai ona latou malamalama i ai; ae ina ua latou mafaufau i ai ma o latou loto ma mafaufau atoa, ona mafai lea ona malamalama i latou i le leo. (Tagai 3 Nifae 11:3–5.)¹⁴

Ia alofa mai le Atua ma fesoasoani mai ina ia mafai e i tatou taitoatasi ona ola ina ia mafai ona tatou olioli i lena fesootaiga ma le Atua e ala i le Agaga Paia, ma iloa e aunoa ma se masalosalo o loo soifua o Ia, ma ia saunia i se aso e ulu atu i totonu o Lana afioaga.¹⁵

Fautuaga mo Suesuega ma Talanoaga

O a mataupu e mafai ai ona tatou maua faaaliga? E faapefea ona faatupulaia lo tatou tulaga e lagonaina le leo o le Alii ma “ola ae i le mataupu o faaaliga”?
O a nisi o ala tatou te maua ai faaaliga e ala i le leo itiiti ma le filemu o le Agaga?
O a eseesega o le faia o le tatalo ma le talanoa ma le Atua? O le a le uiga o le tatalo “ma le manatu tonu i ai?” (Moronae 10:4).
E faapefea ona avea lou iloa o oe o se atalii poo se afafine o le Atua ma auala e te faalatalata atu ai ia te Ia i le tatalo? E faapefea e lena malamalama ona fesoasoani ia te oe e faalagolago ia te Ia?
Pe a faafeagai oe ma faaiuga taua, o a mea e ao ona e faia ina ia maua ai le taitaiga mai le Alii? Aisea e manaomia ai le loto toa e te gaioi ai i musumusuga a le Agaga?
E faapefea ona tatou “taofia i tatou lava” i nisi taimi mai lo tatou Tama o i le Lagi? E faapefea ona tatou faalatalata ia te Ia i o tatou lava olaga ma totonu o o tatou aiga?

Na sailia e le perofeta o Enosa le Alii i le tatalo faatauanau. E tatau foi ona tatou saili ma le maelega e “fesootai ma.lo tatou Tama o i le lagi, ma maua ai se tali i a tatou sailiga ma le malosi mo o tatou aso.

Ia pei o le tama o Samuelu, e tatau ona tatou naunautai e fai atu, “Fetalai mai ia, Ieova e, aua o loo faalogologo atu lau auauna” (1 Samuelu 3:9) ona galulue ai lea ma le lototetele e tusa ai ma le tali o a tatou tatalo.