Mataupu 2

O Ai A’u?

E fesoasoani faapefea lo tatou iloaina pe o ai i tatou mo le mauaina o le ola e faavavau?

Faatomuaga

“Sa [sau] se faiaoga talavou o le Aoga Sa i se tasi aso e tuuina mai se fesili le mautonu na fesiligia ai o ia e lana vasega i le aso Sa na tuanai atu,” na saunoa atu ai Peresitene Harold B. Lee i se faapotopotoga o le Au Paia. “Na faamatalaina e ia sa latou talanoa e uiga i le muai olaga, ma le olaga lenei, faapea le olaga a sau, ma sa fesili se tagata talavou o le vasega o le Aoga Sa, “Na faamutaina le muai olaga ina ua tatou fananau mai i lenei olaga faitino, o le olaga lenei e faamutaina pe a oo mai le oti; o le a le taunuuga o le olaga a sau? Pe o le a galo atu ea? Sa faapea atu le faiaoga talavou o le Aoga Sa, ‘E le o ia te au le tali.’

“Ao o’u mafaufau e uiga i ai na ou faapea atu, tatou te soona faaaogaina upu pe a tatou talanoa e uiga i le ‘muai olaga, ma lenei olaga, ma le olaga a sau’ e peiseai o i tatou o se pusi e tele ni ola ae o le mea moni e tasi lava lo tatou ola. O lenei olaga o loo tatou talanoa i ai e lei amataina i lo tatou fananau mai i le olaga faitino. E le iu foi lenei olaga i le oti faaletino. O loo i ai se mea e lei foafoaina pe gaosia foi. Na ta’ua e Tusitusiga Paia lea mea o le ‘agaga’, lea na i ai se tulaga faapitoa na faatulagaina ai e avea ma se ‘tagata agaga.’ Ina ua uma ona tuputupu ae lena agaga i se tulaga faapitoa, ona tuuina lea i ai e le Tama o lē ona le poto uma lava, o le avanoa e oo atu ai i se isi laasaga mo lona atinaeina. Na faaopoopoina atu ia te ia, ma ina ua uma ona soifua ai i le umi e tatau ona ola ai i le olaga faitino ma ua ia mauaina lona faamoemoega i le olaga faitino, ona oo foi lea i se isi suiga. O le mea moni, tatou te le o atu i se isi olaga, ae tatou te o atu i se isi laasaga o le ola lava e tasi. O loo i ai se mea e lei foafoaina pe na gaosia foi, ma o se mea e le oti lava, ma o lena mea o le a ola e faavavau.”¹

O lenei mataupu o loo talanoaina ai lo tatou tupuaga e faavavau ma le ala o loo aafia ai o tatou olaga i le iloaina o lenei tupuaga.

O Aoaoga a Harold B. Lee

E faapefea ona faamanuiaina i tatou i lo tatou iloaina o i tatou o atalii ma afafine faaleagaga o le Atua?

O ai ea i tatou? Na tusia e le Aposetolo o Paulo: “Auā foi sa ia i tatou tamā o o tatou tino e na aoai mai ia i tatou, sa tatou faalogo i ai, a e le sili ea i se a ona tatou usiusitai i le Tama o o tatou agaga tatou te ola ai?” [Eperu 12:9] o loo faaalia mai ai o i latou uma o e o loo ola i luga o le fogaeleele o e o loo i ai o latou tama i la le tino sa faapea foi ona i ai se tama o o latou agaga.. … Na faapea atu le Alii ia Mose ma Arona, “Ina vavae ese ia oulua i lenei faapotopotoga, seia ou faaumatia i latou e pei o se emo o le mata.” Na faatupuina lona toasa i nei tagata amioletonu, ae peitai na ifo toele Mose ma Arona ma faapea atu, “Le Atua e, o le Atua o agaga o tagata uma, a agasala le tagata e toatasi, e te toasa mai ai ea i le faapotopotoga uma lava?” [Numera 16:21-22.] Pe na maitauina le faalupeina o Ia? O le Atua o agaga o tagata uma. …

O se tasi o tusitusiga paia aupito sili ona loa ua oo mai ia i tatou i se auala faavavega— ua ta’ua e i tatou o le Penina Tau Tele. O se tasi o tusi sili o lena tusitusiga paia taua, ua ta’ua lea o le tusi a Aperaamo. I totonu o lena tusi…o loo tatou mauaina ai nei faamatalaga:

“O lenei, sa faaali mai e le Aii ia te au, o Aperaamo, agaga na foafoaina a o lei i ai le lalolagi ma sa i ai faatasi ma i latou uma na le toatele o e tautaua ma le maoae;

“Ma sa silasila atu le Atua i ia agaga ua lelei, ma sa ia tu i lo latou lotolotoi ma faapea atu: O le a ou faia ia avea i latou nei ma au faipule aua sa ia tu i le lotolotoi o i latou o e o ni agaga, ma sa ia silasila atu ua lelei i latou; ona ia fetalai mai lea ia te au: Aperaamo e, o oe lava o se tasi o i latou ia; na filifilia lava oe ae e te lei fanau mai.

“Ona tulai ai lea mai ia i latou o se tasi ua faapei o le Atua, ma ua faapea atu i e na i ai faatasi ma ia: Ina tatou o ifo ia i lalo, aua o loo avanoa lava, ma tatou ave nei mea ma tatou faia ai se lalolagi e nonofo ai i latou nei;

“Ma o le a tatou faataitai ai i latou, ia iloa ai, pe latou te faia mea uma e poloaiina ai i latou e le Alii lo latou Atua;

“Ma o i latou o e e tausia lo latou uluai tofi, e faaopoopoina ia i latou, a o i latou o e le tausia lo latou uluai tofi, o le a latou le maua le mamalu o lea malo, faatasi ma i latou o e na tausia lo latou uluai tofi; ma o i latou foi o e e tausia lo latou tofi lona lua, o le a faaopoopoina i luga o o latou ulu le mamalu e faavavau faavavau lava.” [Aperaamo 3:22–26.]

O lenei e tele mea moni taua o loo maua i totonu o lena mau. O le mea muamua, ua tuuina mai na o se faaataataga ia i tatou, ua na o se ata faaemo i le mea ua ta’ua o le agaga. O agaga, e pei ona e faalogo atu ia Aperaamo na faapea mai, o se malamalama faatulagaina lea na ola o se agaga a o le’i i ai lenei lalolagi. O le amataga muamua lea o lo tatou malamalamaaga i le mea ua ta- ’ua o le agaga. O se malamalama faatulagaina lea na ola o se agaga ae lei i ai lenei lalolagi. E faapeī la foliga o le agaga? O le a le ituaiga malamalamaaga ua e maua e uiga i lena agaga? Ua tuuina mai e le Atua e ala mai i le Perofeta o Iosefa Samita, se tali musuia, o se vaega o lena tali e faitauina faapea: “O le mea faaleagaga e foliga lava i le mea faaletino; ma o le mea faaletino, e foliga lava foi i le mea faaleagaga.” Faafofoga foi, “o le agaga o le tagata e foliga lava i lona tino, faapea foi le agaga o le manu, ma isi meaola uma lava na foafoaina e le Atua.” [MFF 77:2.]

Ua lelei, ua outou vaai mai ia te au i le taimi nei, o au o se tagata matua faaletino. O loo i ai se vaega o au e le mafai ona outou vaaia i o outou mata faaletino—o lena vaega faaleagaga o a’u o loo vaavaai atu e ala i o’u mata ma aumaia ia te au le malosi e gaoioi ai, ma aumaia ia te au se fuataga o le poto ma le malamalama. …

O le mea moni muamua la lena ua tatou aoaoina—sa i ai se malamalama faatulagaina na ta’ua … o le agaga. O iina afio ai le Alii (o Ieova), o lē na avea ma lena agaga maoae silisili e faapei o le Atua (le Tama), faatasi ma na malamalama faatulagaina ma ta’ua o agaga, ma na Ia fetalai atu ia te i latou, O le a tatou faia se lalolagi e mafai ai e outou o agaga ona nonofo ai, ma o outou o e ola agavaa iinei i le lalolagi o agaga e mafai ona o atu i lalo i lena fogaeleele ma o le a faaopoopoina ia te outou. Ma o agaga la na tutumau i lo latou faatuatuaga, pe faapea na agavaa foi, sa faatagaina e o mai i le lalolagi, ma faaopoopoina atu i o latou tino faaleagaga, se tino faaletino iinei i luga o lenei fogaeleele. … O le tulaga o le i ai o oe ma au iinei i luga o lenei fogaeleele faatasi ma se tino faaletino o se faamaoniga lea sa tatou i ai faatasi ma i latou sa tausia lo tatou uluai tofi; sa pasi le tatou suega ma sa faatagaina ai i tatou e o mai iinei. Pe ana fai e le pasi la tatou suega semanu tatou te le i ai iinei, semanu ua tatou i ai faatasi ma Satani i le lalolagi e taumafai e faaosooso i latou o loo i ai se tino. …

Aisea e tatau ai ona tatou faamaoni i luga o lenei fogaeleele ina ia mafai ai ona faamaeaina a tatou misiona na muai faauuina ai?

Ina ua uma nei la ona faatulagaina lo tatou faasinomaga i le muai olaga, pe o ai i tatou—o atalii ma afafine o le Atua ae lei i ai lenei lalolagi, pe o ai le Tama o agaga o tagata uma o e o loo soifua i la le tino i luga o le fogaeleele—ma o lea la ua tatou saunia nei e faasolosolo atu i le isi tali o le fesili. Mai le mea sa ou faitauina atu ia te outou mai le tusi o Aperaamo i le fuaiupu e 23 ua outou faalogo ai sa ta’u atu ia Aperaamo sa faauuina ma filifilia o ia ae lei fanau mai. Ou te le iloa pe ua outou mafaufau i lena mea. Sa ta’uina atu foi ia Mose lena lava mea. …

“Ma a o ia valaau atu i le suafa o le Atua, sa vaaia e ia [Mose] lona mamalu, aua ua i ona luga, ma sa ia faalogoina se leo ua faapea mai: Amuia lava oe Mose, aua o Au o le Atua e ona le malosi uma na filifilia oe; ma o le a faateleina lou malosi ia sili atu nai lo vai e tele, aua o le a latou usitai i lau upu e faapei o oe o le Atua.” [Mose 1:25.] O lana misiona lena o le avea ma se taitai sili ma le malosi. Na faapea foi ona fetalai le Alii ia Ieremia, “Na a’u iloa oe a o lei faia oe e au i le manava; na au faapaiaina oe a o lei fanau mai oe, na au tofia oe e fai ma perofeta i nuu.” [Ieremia 1:5.] Sa faamatalaina faafaigofie mai e Iosefa Samita ina ua ia faapea mai ia te i tatou. “Soo se tagata ua i ai sona valaauga e talai atu i tuluiga o le lalolagi, sa faauuina o ia i lena lava valaauga i le Fono Tele i le lagi ae lei faia lenei lalolagi.” Ona ia faapea mai lea, “Ou te manatu sa faauuina au i lenei lava tofi i lena Fono Tele.” [History of the Church, 6:364.]

Ae o se lapataiga taufaamatau lenei. E ui i lena valaauga, ae na tuu e le Alii i le mafaufau o le Perofeta o Iosefa Samita ma na ia tusia ai. … “Faauta e toatele e ua valaauina, ae toaitiiti e ua filifilia.” I se isi faaupuga, …ona ua i ai lo tatou saolotoga iinei, o lea sa toatele ai e na muai faauuina i se galuega e sili atu ae ua itiiti lo latou saunia iinei. Sa ia faapea mai, “E le filifilia foi i latou i se a? Ona ia tuuina mai lea o mafuaaga e lua e ala ai ona le faia e tagata o latou valaauga. Muamua “aua ua faapea ona manumanu o latou loto i mea o lenei lalolagi,“ ma le lona lua, latou te “manao i viiga mai tagata, latou te le aoaoina lenei aoaoaga e tasi—O aia tatau a le Peresitua ua fesootai e le mavavaeeseina ma mana o le lagi.” [MFF 121:34-36.]²

Aua nei faaseseina outou faapea o lena valaauga ma lena muai faauuina o le a muai iloa ai mea e ao ona outou faia. Sa saunoa manino se perofeta i lenei konetineta i sisifo e uiga i lenei mataupu: “O loo ua valaauina ma saunia talu le faavaeina o le lalolagi, e tusa ma le silaisla mamao o le Atua, ona o lo latou faatuatua tele ma galuega lelei, ina ua muamua ona tuuina atu e filifili i le lelei ma le leaga.”(Alema 13:3) …Atonu sa valaauina ma filifilia e le Atua tagata i le lalolagi o agaga poo lo latou uluai tofi e faia se galuega faapitoa, ae pe latou te taliaina lena valaauga iinei ma faalauteleina e ala i le auauna ma le amiotonu ma galuega lelei a o i ai i lenei olaga faitino, o se tulaga lea o la latou lava aia tatau ma le avanoa e faaaogaina ai la latou filifiliga saoloto e filifli ai le lelei poo le leaga.³

E aafia faapefea le faaaogaina o lo tatou saoloto ga pe a tatou iloa pe o ai i tatou?

O a nisi mea ua ta’uina mai e uiga ia i tatou? O i tatou o ni tagata e tutoatasi ma ua i ai se saolotoga ma ua manatu ai nisi tagata e fai lava le mea tatou te loto i ai, ae e le o le sa’o lena. O loo i ai lo tatou saolotoga, ae sei ou faitauina atu se mea e uiga i lena mea. Sei outou makaina le 2 Nifae mataupu e lua, fuaiupu e 15–16. Ou te tau atu ia te outou ou te manatu o se popolega sili lea o lo tatou Tama i le auina mai o i tatou i lalo nei ma le avanoa o lo tatou saolotoga lea e filifili ai. Ina ia mafai la ona faia la tatou filifiliga ma maua o tatou taui e faavavau, e i ai se mea e ao ona tupu ia i tatou. Ia maitau mai—o loo faamalamalama atu i i e se tamā i lona atalii lenei lava mea. “Ua ao lava ina ia faataunuuina ana mataupu faavavau i le iuga o tagata, ina ua uma ona faia e ia o tatou matua muamua, ma manu vaefa o le vao, ma manu felelei, ioe o mea uma ua faia, ua ao ina i ai le faafeagai, o le laau lava ua faasaina e feagai ma le laau o le ola, e suamalie le tasi, a e oona le isi.” [2 Nifae 2:15.]

O le ala lena e masani ona faalogoina ai, o mea e faasaina o mea ia e sili ona suamalie ma manaomia, ae o mea e sa’o mo i tatou e i ai taimi e avea ma fualaau e oona i le tofo ae suamalie i le manava pe aoga mo le tagata, e pei ona tatou gagana ai. O lea, ina ia mafai ona tuuina atu i le tagata le avanoa e filifili ai, “O le mea lea na foai mai ai e le Alii le Atua le faitalia i le tagata. O le mea lea e le mafai ai ona filifili le tagata, sei iloga ua faaosoina o ia e le tasi po o le isi.”[2 Nifae 2:16.] Ina ia mafai ona avea ma se tagata tutoatasi i le faia o filifiliga, o lea e tatau ona i ai e le gata na o le lelei ae e tatau foi ona i ai le leaga ina ia mafai ona tatou filifili i mea e lua. Sei e mafaufau lava e uiga i lena mea mo sina taimi. Pe ana fai e lelei mea uma i le lalolagi ma e leai lava se mea leaga, pe mafai ea ona e filifili i se isi lava mea nai lo le lelei? Pe ana fai e leaga mea uma i le lalolagi, ma e leai se lelei e filifili ai, pe mafai ea ona e filifili i se isi lava mea nai lo le leaga? Pe afai e te mafaufau i ai mo sina taimi, e na o le pau le ala e mafai ona mauaina ai le filifiliga saoloto i tagata taitoatasi o e o loo soifua i luga o lenei fogaeleele o le i ai lea o le lelei ma le leaga ma ua tuuina mai ia i tatou taitoatasi le avanoa e filifili ai mo i tatou lava. …Ua e iloaina nei, e aofia ai i le filifiliga saoloto se tulaga lamatia. Na finagalo le Alii e tuuina mai lena tulaga lamatia ina ia mafai ona tatou savavali ai ma le faatuatua ma, i le avea ai ma tagata tutoatasi ma se saolotoga e filifili ai, ia filifili ai le mea tonu.⁴

O le a le tulaga e mafai ona faavavau ai i tatou i le avea ai ma fanau a le Atua?

O le faamoemoega o lenei olaga o le faataunuuina lea o le faaofuina o le tagata i le tino ola pea ma le ola e faavavau. O le uiga o le tino ola pea o le mauaina mulimuli lea o se tino e le toe oo i ai ni tiga o le olaga faitino, e le toe oo i ai se oti faaletino, ma e le toe pala, ma o le a mavae atu mea muamua. O le mauaina o le ola e faavavau o le aia tatau lea e nofo ai i le afioaga o le Faavavau e Toatasi, o le Atua lea, lo tatou Tama Faalelagi ma lona Alo, o Iesu Keriso. O faamoemoega nei e lua ua tuuina mai ai i tatou uma i luga o le fogaeleele.⁵

Ua tatou i ai iinei i le asõ e saunia ai mo le tino ola pea, “o se taimi e le gata mai, o le taimi lea o le olaga moni o le tagata.” O i tatou uma o ni agaga maoae, aua na tatou o mai e ala mai i se tupuaga tautupu. E ia i tatou le aia tatau e avea ai ma tupu ma taitai ona o vaega sa tatou faia i le lalolagi o agaga ae tatou te lei o mai iinei. Sa filifilia i tatou e o mai i lenei aso ma lenei taimi, ma ua faamoemoeina i tatou mo le tino ola pea e pei o fanau talavou uma a lenei ekalesia. E tatau foi ona “ua’i atu a tatou taumafaiga silisili i mea taua e faavavau ae aua [tatou te mātele] i mea e mate”⁶

Sei ou faitau mai le Mataupu Faavae ma Feagaiga vaega e 132. … “ O lenei foi, e moni ou te fai atu ia te oe, afai e faaipoipo le tane i le ava i la’u upu, o la’u tulafono lea ma i le feagaiga fou e faavavau ma faamaufaailogaina ai ia i laua e le Agaga Paia o le folafolaga,” ma o le a ou faamisia nisi upu ina ia tuuina atu ai ia te outou le uiga, “o le a faia ia te i laua mea uma ua tuuina atu e la’u auauna i o laua luga, i lenei olaga, e oo lava i le faavavau; o le a faatumauina atoatoa foi pe a o ese atu i laua mai le lalolagi, e ui atu foi i laua i tala ane o agelu, ma atua, ua faatuina i lea mea e oo i lo laua faaeaga ma le mamalu i mea uma.” Ia faalogo mai i le mea lenei: o le a “fanafanau pea lava pea e faavavau faavavau lava.” [MFF 132:19.]

Sa saunoa mai le Perofeta o Iosefa Samita, o lona uiga o i latou ua faaipoipoina i le feagaiga fou e faavavau ma faamaoni ia latou feagaiga, pe a maea ona ui atu i le toe tutu, o le a mafai ona latou toe nonofo faatasi o le tane ma le ava ma maua le mea e pei ona ia ta’ua i i, o le fanafanau pea lava pea. Poo le a le uiga o lena mea? Sei ou faitauina atu ia te oe mai se isi mau: …

“I le mamalu selesitila, e i ai lagi po o tikeri e tolu;

“E ao foi i se tagata ina ulu i lenei faatulagaga o le perisitua (o lona uiga o le feagaiga fou faavavau o le faaipoipoga) ina ia na maua le tulaga aupito i luga;

“Afai foi na te le fai faapea na te le mafai ona maua”.

“E mafai ona ia ulu atu i le isi, ao le iuga lea o lona malo, e le mafai ona ia uluola.” [MFF 131:1– 4.]

Uluola faapefea? O le faatuputeleina o fanau. I se isi faaupuga, usiusitai i Lana poloaiga faalelagi, o i tatou nei o tagata ola ua tuuina mai ai le mana e galulue faatasi ai ma le Atua i le foafoaga o se agaga ola iinei, ma tua atu o le tuugamau ina ia maua le faatuputeleina e faavavau i se mafutaga faaleaiga pe a mavae atu le iuga o lenei fogaeleele i ana galuega.

… Ou te tautala atu nei e uiga ia i latou o tagata toetutu o e sa tausia le feagaiga o le faaipoipoga paia ma ua faamauina e le Agaga Paia o le folafolaga. “Ona avea ai lea o i laua ma Atua, aua e leai so laua iuga; o lea o le a i ai i laua e faavavau faavavau lava, aua e tumau pea i laua o lea e aupito i luga lava i laua i mea uma aua e pule i laua i mea uma. Ona avea ai lea o i laua ma atua, aua ua maua e i laua mana uma, ma e auauna agelu ia te i laua.” [MFF 132:20.]…

… Ia tatou ola ina ia le vaavaai mai ia i tatou ē uma ua faatasi ma i tatou ae ia vaavaai atu i mea faalelagi mai le Atua, ma i lena vaaiga i lo tatou faasinomaga ma le tulaga e mafai ona tatou oo i ai, ia tatou maua le malosiaga ina ia maualuga atili ma agai i luga mea tatou te aeaina, ma agai atu i lena sini silisili o le ola e faavavau, o la’u tatalo lea i le agaga maualalo i le suafa o le Alii o Iesu Keriso, amene.⁷

Fautuaga mo Suesuega ma Talanoaga

O le a se mea na faamalosia ai lau molimau o le Atua o lou Tama?
Aisea e le manuia ai taumafaiga a tagata i nisi taimi i le faataunuuina o le galuega na muai faauuina ai i latou e faia i lenei fogaeleele?
O le a le filifiliga saoloto? Aisea e manaomia ai le i ai o le faafeagai ina ia faaaogaina ai la tatou filifiliga saoloto?
E mafai faapefea ona aafia a tatou amioga i aso taitasi i le iloaina lea o le tulaga e mafai ona avea ai i tatou e faavavau?
O le a se mea o loo tuuina atu ia te oe le malosiaga “ina ia maualuga atili ma agai i luga mea e te aeaina, ma agai atu i lena sini silisili o le ola e faavavau?

O Iesu Keriso ma tamaiti mai tuluiga uma o le lalolagi. O i tatou uma o atalii ma afafine faaleagaga o le Tama Faalelagi. Afai tatou te talia le atoatoaga o faamanuiaga o le Togiola a le Faaola, o le a mafai ona tatou toe foi atu e mau ma lo tatou Tama ma lo tatou Faaola.